Isaiah 20 - Ohiatonhseratokénti

Isaiah Watharihwaʼnonhiániʼte Tsi Nihonatesénhnion Ne Egypt Tánon Ne Ethiopia

¹ Né shiʼioseráte nètho rateriʼioserakweʼní꞉io, rahónha thoteniéton ne ronnontí꞉io Sargon ne Assyria nón꞉we iaháraʼwe Ashdod nón꞉we tánon iahatsiaʼtónti tánon wahaié꞉na—

² thóh shiʼkaháwi ne Roiá꞉ner rowenhnaráhon ne Isaiah ne roién꞉ha ne Amoz, ratónhnions, “Wáhs, tánon sasnerénhsi ne káhiare ne tesatsiakwahranát꞉ton tánon tesaraʼthási,” tánon thóh nahá꞉iere, tsi í꞉re raonehóskonk thí꞉ken tánon raoʼskawetóskonk.

³ Eʼthòhne ne Roiá꞉ner wahénron, “Kwáh tsi ní꞉ioht nakenhátshera Isaiah tsi tehatekhahákwah raoʼneóskonk thí꞉ken tánon raoʼskawetóskonk asèken áhsen niʼioseràke sihawenéston ó꞉ni shiʼsakoronkaténhni ne Egypt tánon ne Cush,

⁴ káti ne ronnontí꞉io ne Assyria iensakosárihne ne Egyptró꞉nons tsi ensakonhóton ó꞉ni ne Cushró꞉nons tsi ní꞉ioht ne ronwaʼnanahkerakwáhton, kwáh sathenhiótonke né꞉ne kén nithoʼtiiónsas ó꞉ni ne rotiʼtstohokónhas, raoʼtinehóskonk thí꞉ken tánon raoʼnaskawetóskonk, tánon ne tsehotiʼnahtsakétote, ne nahotehénhsera ne Egypt.

⁵ Tánon kwáh kí enhonhnikonrótʼten tánon enhontéhen né꞉ne Cush entkarihónhni né꞉ne raoʼnararát꞉tshera tánon ne Egypt ne tehonthaʼterenhsaronhkwátha.

⁶ Né èhʼthoh entewenhniseráteʼke ne ratinákere ne kénhen kawenhokwát꞉tonhtse kwáh enhonhníron, Satkátho, kén kí꞉ken nihiawénhen tsi niháti rononhàke ionhkwahraratsheʼraiéntaʼkwe tánon rononhàke niahitewatátke nahionkiʼiénawaʼse tánon nahonsahionkhiʼiatotsaríhsi tsi nòkwah ne ronhnontí꞉io Assyria! Tánon nonkwáhtsakes, onhní꞉ioht tsi ahonsetewaniákenhne?”