Isaiah 19 - Ohiatonhseratokénti

Nateriwanoʼtátshera Ahorihwàke Ne Egypt

¹ Nateriwanoʼtátshera ne aorihwàke Egypt. Satkátho, ne Roiá꞉ner ne rohonwí꞉sere ne tehiotsaʼtáka tánon wáhraʼwe ne Egypt nón꞉we; nahohiatonhniʼsónhas ne Egypt kwáh thenhiowí꞉shonkwe ne rahohénton, tánon ne raonerhiaʼnéshon ne Egyptró꞉nons kwáh enhotiʼwistanáwenhse ronhnonháke.

² Kwáh enkhetsirón꞉nien tsi natehóntere ne Egyptró꞉nons, tánon kwáh enhonteriʼióhaton, thenhontaʼtatkónthen, ne tehonhnonsaʼnekhánions thenhontatatʼkónthen, ne kanatowánens iaʼthenhontaʼtsatónhti, tsi kanakeraseraʼkérons thenhontatatʼkónthen;

³ ne tsi ronónnhe ne Egyptró꞉non kwáh enkahiakénhen, tánon kwáh thenkheʼhianitonhniáten tsi niohʼnatenikonhrón꞉ni; kwáh ne ensakonaʼtenikonrát꞉kenhse ne kahiatonhnisónhas tánon ne raoʼtinikónras ne ronenhéions tánon ne raonatónnhets ne tehhontaterennáonh tsi niʼhonnontónhnions;

⁴ Kwáh thóh ienkhehiátʼkaʼwe ne Egyptró꞉nons rasnonsàke ne roníron rahiataʼkwení꞉io; né꞉ne tehhoskénhniaʼse ronhnontí꞉io entesakoniarotàʼroke, rá꞉ton ne roshatstenseró꞉wanen, ne ne Sakoiá꞉ner ne ronterí꞉ios ratiʼronhiakerónons.

⁵ Nonekaʼókons ne Nile enwasteske, tánon ne kaniataratátie kwáh kí iáh othènen tetsionèkaien tánon iostatʼthènhon;

⁶ né tsi kanahtseratátie kwáh enwenhseraksénhake, tánon né ionatónhtons ne kahhionhaténions ne Nile né Egypt kwáh kí enwáton tánon enwasthátʼthen, ohiónʼwi tánon onhó꞉ta kwáh kí enwát꞉kente.

⁷ Né thóh nón꞉we kwáh atenatóskonk thenkénhaʼke ákta ne Nile, ne tsi naʼteiotshahrakarákwen ne Nile; tánon akwékon tsi niʼkaientʼthóhserons ne atsiakʼtonhties ne Nile kwáh kí enwastátʼthen, èhren enkahawítonhke, tánon iáh othènon tahonsakénhake.

⁸ Tsi niʼiákon nón꞉ka ne ionrhiokawínes kwáh enhiontʼtsiónhnion; ratiʼkwékon ne ieohnarhiónhtses ne Nile kwáh enhotiʼnikonrák꞉sen, tánon tsi niháti ne rontaharós ne kaniatará꞉ke kwáh enhonhnikonrók꞉then.

⁹ Né rotiʼió꞉te tsi kaniaʼtarónhnis kwáh kí iáh othènon tahonsahoʼnhararaʼtsheraiéntaʼke, tánon ne ratiwehnónhnis noniatará꞉ha tánon tsi niháti ne tekanonwahiéntha rónstha kwáh tenhonskenhkenhnatónhthen.

¹⁰ Né raononkwetashón꞉has ne tehatiʼnonwaién꞉tha kwáh kí enhonʼhnikonrókten, tánon ratiʼkwékon ne rotiʼióte ne ronatkárhiakʼse kwáh kí enhotiʼnikonrák꞉sen.

¹¹ Né sakotiʼhenténhse ne Zoan iaʼtetsokétote tsi thonatónhnót꞉te; ne rontenikonratʼtókhas ne ronwaʼtenikonrashonteránis ne Pharaoh teʼiotenonwaroʼríhtonʼte tsi niʼsakonatenikonráwis. Ónh ní꞉ioht tsi aksró꞉ri ne Pharaoh, “í꞉i ne tionkwéta ne kaʼtenikonratʼthókha, ehʼnitewakatwatsiríhnon ne thoʼtí꞉ionskwe rotiʼnontí꞉ios”?

¹² Kaʼnihónhnes ó꞉nen ne shonkwétas ne rontenikonratʼtókas? Seríhon naʼiesaró꞉ri tánon nahatiʼnikonraiénhthaʼte tsi nahó꞉ten ne Sakoiá꞉ner ne ronterí꞉ios ratiʼronhiakeró꞉nons roʼtenikonrónhni ne raotirihwàke Egypt.

¹³ Né sakotiʼhenténhse ne Zoan watonhnonwarawénrie, tánon ne sakotiʼhenténhse ne Memphis kènk tsahatiʼiéraʼte; tsi niháti ne roʼnónha kanenhiakweʼní꞉io ronaʼtenatónhkwen ne tsiʼtekaiósaien ne raotiʼtárakon kwáh wakonwatʼthaharákwahte ne Egypt.

¹⁴ Né Roiá꞉ner tasakowerón꞉haʼse nonikónra ne tahiakonitonhniáthen; tánon ne wakonhiónhnien ne Egypt tahiohiathéntonhwe akwékon tsi niwatserá꞉nions kwáh tsi ní꞉ioht ne kwáh ronèka tehokatsarahré꞉serons tsi nihatsʼtíkons.

¹⁵ Tó꞉ka kèn ahatiʼsenhnowahnénhke khéhs ne hahotiʼtokenhséhaʼke, kwáh kíʼ iáh ónhka taiekwéni ne thènen nakonwatiéraʼse ne Egypt.

¹⁶ Né thóh enwenniseráteʼke ne Egyptró꞉nons kwáh thóh nenhatiʼhiatothénhaʼke tsi ní꞉ioht ne tsonatʼthonhwísen, tánon enhotiʼhiathí꞉sonhkwe tsi nenhotiʼterónhsehke ohénton ne raoʼtsána ne Sakoiá꞉ner ne ronterí꞉ios ratiʼronhiakeró꞉nons tentʼthátaʼne niaʼsakotsatónhti.

¹⁷ Tánon ne raononhóntsa ne Judah kwáh ne enhiakoteronhkwenhníhake ne Egyptró꞉nons; tsi nihiákon ne ronwatiná꞉ton kwáh kí enhiakóteronhne tsioríhwa tsi nihotenikonrónhni ne Sakoiá꞉ner ne ronterí꞉ios ratiʼronhiakeró꞉nons tsi niʼhotenikonronhnihátie niasakotsatónhti.

Né Egypt, Assyria, Tánon Ne Israel Ronatáskats

¹⁸ Ne ètho entewenhniseráteʼke wísk nenkanataiéntaʼke ne tsi watonhóntsaien ne Judah né꞉ne ronthátis tsi nihonronhkatʼtseróten ne Canaanró꞉nons tánon enhatiʼrihwanírate tsi enhotiʼrihwatokénhake rahonháke ne Sakoiá꞉ner ne ronterí꞉ios ratironhiakeró꞉nons. Skanáta kí꞉ken ne enkonwahnaʼtónhkwahʼke tsi kanatowaʼnénke ne Karáhkwah.

¹⁹ Né thóh entewenhniseráteʼke ieʼtsienhará꞉kwah enhatiʼien ne raorihwàke ne Roiá꞉ner thóh satehʼionhontsíhen ne Egypt, tánon enhonwahnawahathókʼthase ne Roiá꞉ner ákta ne tsi ronateristhaʼtátie.

²⁰ Kwáh ne enwatenientenhstákwen ó꞉ni enkarihwanirátonke rahohénton ne Sakoiá꞉ner ne ronterí꞉ios ratiʼronhiakeró꞉nons ne tsi watonhontsáien ne Egypt; nó꞉nen thenhonséntʼtho rahonhàke ne Roiá꞉ner ne tsioríhwa tsi nihonwatiʼrieniatsténhnis, kwáh kí entesakotonkwetaʼteneniéthen ne sheʼsakohiatákwahs, tánon entesakóne tánon ensesakoniáʼkente.

²¹ Ne Roiá꞉ner kwáh enhatʼthatón꞉nien nahonwaienʼtérahne rononhàke ne Egyptró꞉nons; tánon ne Egyptró꞉nons kwáh enhonwaiénhtereʼne ne Roiá꞉ner ne thóh enwenhniseráteʼke, tánon kwáh enhonwasénhnaien katshénen enhonwateskónktaʼse tánon kaiathakwékon ne katʼtshénen enkonwatsatáʼtshaʼhate tsi enhonwátatʼtshe, tánon kwáh enhonráhratsʼte rahonhàke ne Roiá꞉ner tánon thóh nenhatí꞉iere tsi nenhonráhratste.

²² Né Roiá꞉ner kwáh kíʼ enhaienʼte ne Egypt, ensakoientánion tánon sehshakotsiéntha; rahonhàke kí ne Roiá꞉ner nientsónhne, tánon kwáh enhatahónsathaʼte ne raonaterénhnaientatsera tánon enseshaʼkótsiente.

²³ Né thóh enwenhniseráteke iohahowánen enhiohathátsheke Egypt nón꞉we nitsawénon tánon Assyria nieʼiawénon, tánon ne Assyriaró꞉nons Egypt nienhónhne, tánon ne Egyptró꞉nons Assyria ne nienhónhne, tánon ne Egyptró꞉nons kwáh skátne tsi enhonterénhnaien ne Assyriaró꞉nons.

²⁴ Né thóh entewenhniseráteke ne Israel asénhaton nienkátake tsi nòkwah ne Egypt tánon ne Assyria, enkaiathateritsheraién꞉tahke ne kwáh satehionhontsíhen ne tsi ionhontsáte,

²⁵ tsi nikáien ne Sakoiá꞉ner ne ratiʼronhiakeró꞉nons sakohiatateríston, ratónhnions, “Rotihiatatérists ne Egyptró꞉nons nakonkwetaʼshón꞉has, tánon ne Assyriaró꞉nons ne tsi niwatsioténʼen ne katsanàkes, tánon ne Israel né nakawenhkón꞉we í꞉ken.”