Isaiah 14 - Ohiatonhseratokénti

Enskakwahtákwenhke Ne Judah

¹ Ók né Roiá꞉ner kwáh tenhoró꞉ton ne Jacob tánon shé꞉kon kí ne ensaiataráko ne Israel, tánon thóh ienseshakóteron ne rahononhontsáke; tánon ne thiʼhononhontsátes enhonwanatsátaraʼse tánon thóh enhotiʼiatanénhtake tsi rononshó꞉te ne Jacob.

² Tánon ne ronhnonhonʼtsakerónons kwáh ienhonwatiʼiathénhaʼwe tánon tsi thatiʼterónhton nón꞉we ienhonwatiʼiathénhaʼwe, tánon tsi ronónshoʼte ne Israel kwáh ensakotiénawasʼte ne ronnonhontsaʼkerónons ne ne rotiskenrakéte tánon ne tsonatʼthonwísens kontiná꞉tsheras ne tsi rahonhontsáien ne Roiá꞉ner; kwáh kí ensakotiʼienenháton tsi nikáien ne ronwatiʼiénaskwe, tánon ensakonatʼkóraste tsi nikáien ne ronwatironhiakéntha.

Tsi Nontahahiáthenhne Ne Ronnontí꞉io Ne Babylon Nón꞉we

³ Nó꞉nen ne Roiá꞉ner sonhtáhion natorisénhtsera tsi nisaronhiákenkwe tánon tsi natesaniʼtonhniathénhnikwe tánon ne iohiothenseraníron sahiótekwe ne tsi thóh nón꞉we niʼieshonhniénhnis nahsaterihwatsʼtériste,

⁴ kwáh í꞉se tènhsekwe kí꞉ken kaierónhsera ne thatséron ne ronnontí꞉io ne Babylon: Tsi ní꞉ioht ne sakoronhiakéntha tsi rotʼkáwen! Ne raonhakwátshera tsi teiotáhon!

⁵ Né Roiá꞉ner teoiákon ne raonaténhnits ne ronhnonkwetaʼhétkens, né꞉ne raotinia í꞉ken ne ratiʼkorá꞉sons,

⁶ ne iakohiatsenénhthakwe nonkweókons thóh aterihotatʼkontsherákon né꞉ne iáh thaʼtehatítaskwe tsi nisakotiʼhiénthaʼkwe, ne iakokʼkorastenhníhaʼkwe ne rononhontsaʼkerónons kanakwahtsherákon né꞉ne kwáh iáh othènon tahotiʼiótatʼtshe tsi ensakotiʼréwaʼte.

⁷ Né ohontsakwékon tsi wahaorisénhtaʼne tánon sakthí꞉ken; tánon tahontásawen tahatiríhwakwe.

⁸ Né osó꞉ras keríhtons iesatonhnaráni, ne onentaʼkwenhtétsheras ne Lebanon, watónhnions, “Tsi ná꞉he ehʼtàke shiʼsathatiónhni, iáh ónka kénhen tetonhnhétha iahionkirón꞉tsake.”

⁹ Ne tsi tionontsá꞉ien ne kenhé꞉ion nàkonh nónka í꞉ken tesatorhiaʼnerónhaʼse ne tahitsatátken nó꞉nen entèse; wakaharátaʼte ne atsanerónsera ne ne tahisanónwehron, ratiʼkwékon ne sakotiʼhentenhséhaʼkwe ne tsi ionwenhtsáte; tethatítas ne ranonanitskwáhraʼne ratiʼkwékon ne sakotiʼnontí꞉ioskwe ne iakahontsaʼkerónons.

¹⁰ Kwáh kí ratikwékon tsi enhontáti tánon eniesénhase: “Í꞉se kí ó꞉ni thóh neh wesatsiʼióhane tsi ní꞉hiot nonkwahtsákes! Thóh nashiaʼtóthenhne tsi ní꞉ioht nonkwahtsákes!”

¹¹ Né sarenhsarónhtsera tahiónhsenhte kénhen ne tsi ionhontsá꞉ien ne kenhé꞉ion, tánon tsi nihiowènhte ne sanowakówas; katsinonwahkéras ionatenatʼtónhni tiató꞉kon, tánon ohtsinonwaʼnhéta ne shaʼkwátston.

¹² Tsi ní꞉iot tsi tisaiathénhen ne karonhiáke, Ó nenhniseráke aotsísto, ne roiénha ne orhonkenéha! Tsi ní꞉iot tsi wahtieʼshakenróhienʼte, í꞉se ne sheʼiatienénhthon ne iakahontsaʼkeróhnons!

¹³ Í꞉sen wáhi ne serhiá꞉ne, “Ní꞉i Karonhiáke nienhenke; kwáh entkaráthate nakanitskwáhra èhʼneken enwatohétsthaʼkwe ne raotsistokwahshón꞉ʼahs ne Ní꞉io; kwáh èhʼtho enkátsien tsi ionónte ne tsi iontkenhnisahá꞉tha thóh ononhtakénhiaʼte ne Zaphon; ne tsi iakokʼkenhníson ne kwáh othorèke ít꞉ken

¹⁴ Ienkatʼtharáthate sénha èhʼneken ne tsi niʼiotʼtsatarónhnions, Kwáh ne enkatatónhniaʼte tsi ní꞉ioht ne Kwáh Eʼnekéntotʼte.”

¹⁵ Ók iehiesaiaténton ne tsi tionhontsá꞉ien ne kenhé꞉ion, tsi nón꞉we ne kwáh tsiosónhwes.

¹⁶ Tsi niʼiákon nenhiesáken kwáh theniesatʼkáneren, tánon enhiesanontonʼniónko: “Né kén kí꞉ken ne rónkwe warónh꞉ni ne tahiohontsíshonkwe, raónha rahowákon ne tsi kahnontiʼiotsherakérons,

¹⁷ ne warónhniaʼte ne tsi ionwenhtsá꞉te kwáh né꞉ne iahonwenhtsiatʼthénhake ahónton ó꞉ni wahátonʼte ne kanatowánens, rahónha ne iáh tesakorihwáhwi ne sahkonhó꞉tons nahonsahonathéntion?”

¹⁸ Ratiʼkwékon ne sakotinontí꞉ios ne iakahontsakeró꞉nons enhatiʼiatiónhnike thóh kaiatanerakwahtsherákon, satiʼhiatátʼtshons ne rahonatʼtsatonkwáhkon;

¹⁹ ók ní꞉se áhtste iehiesahiatónhtion, èhʼren iesahiathenhawíton ne satʼtsatonhkwákon, kwáh né꞉ne iaweheiontátkens, ne thitisaró꞉ron ne iakawenhéion, tsi nihiákon ne ionhthatahá꞉son nasarekówa wáhston, ón꞉ka ne ienióntsnenhte ne tsitʼkanenhiakérons nosonhkwákon, kwáh né꞉ne thóh ierathátses aweheiónthake.

²⁰ Ní꞉se kwáh iáh tashehiatsatáraʼse nahiontatsatátha, tsioríhwa tsi washátonhte ne shonhóntsa, senonwarhiá꞉kon ne shonkwetaʼshón꞉has. Aiáwens tsi niʼthonatwatsiríhnon ne ratiʼweienhnák꞉sens thó꞉sa nonwènhton ahonsahonwatisénhnaronʼke!

²¹ Seweienénhtan ne tsi konwarhiósta ne ne raoʼnekenteronhtserashónhas raotirihwàke tsioríhwa tsi nihoníkons ne shakotiʼnihokónhas. Tó꞉sa nonwènhton seríhon ne tahontahontʼkétsko nahonsahontiénawasʼte nonhóntsa khés né꞉ne hahatiróhrokste tsi kakónshonʼte ne tsi ionhontsáte ne kanatowánens.

²² Kwáh tentétʼtaʼne nakheiatʼkónten, rá꞉ton ne Sakoiá꞉ner ne ronterí꞉ios ratiʼronhiakeró꞉nons, tánon kwáh éntsiake ne Babylon aosénhna tánon ne iaʼteonathaténron, naʼkohioʼokónha tánon tsi ratiʼwatsiratátie, rá꞉ton ne Roiá꞉ner.

²³ Tánon né enkónhniaʼte nahontakheniarotárohke nahnèn꞉taks, tánon tsiʼkanaweró꞉tons nonèkanos, tánon né tentkonhéwaʼte ne atkaronhniátshera, rá꞉ton ne Sakoiá꞉ner ne ronterí꞉ios ratiʼronhiakeró꞉nons.

Ne Nowénhna Aorihwáke Ne Assyria

²⁴ Né Sakoiá꞉ner ne ronterí꞉ios ratironhiakeró꞉nons kwáh roʼrihwaniráton: Kwáh tsi niʼwahtieronhnítsʼton, kwáh kí thóh nenhiáwenhne; tánon tsi niwahkanonhtonʼniónhon, káti kwáh kí enwahtóhetste:

²⁵ Kwáh kí thentsá꞉ke ne Assyria nakonhontsáke, tánon thóh tsi wakatenontáhere thenhiʼiaskwáhseron thenʼkarasitaʼkénserakwe; ne raoʼtsienhtaniáʼtstha èhʼren enkahawítonhke ne rononháke, tánon nʼoriéna tenhontsiotarisi ne ratinenhsàke.

²⁶ Ne kí tsi niwahtenikonrón꞉ni nʼèhtho tsi niʼwatenikonrí꞉son tsi nó꞉kwah nonhontsaʼkwékon; tánon né kí꞉ken notsá꞉na iaʼtehiótsate nakahontsaʼkeróhnons akorihwàke.

²⁷ Asèken ne Sakoiá꞉ner ne ronterí꞉ios ratironhiakeró꞉nons roʼtenikonrí꞉son, tánon ónka nènhneʼe tahontaʼieríhshi? Iatehótsaʼte, tánon ónhka nenhné꞉e nahonshaʼhióntʼthate?

Né Naoʼká꞉ra Ne Philistia

²⁸ Né shiʼioseràte sarénheʼie ne Ronnontí꞉ioʼkwe Ahaz kí꞉ken oká꞉ra ónhwe:

²⁹ Tó꞉sa satonhnáren, sewakwékon Philistines, nʼètho kániah ne tesewanón꞉ware tehiotsákon, asèken thóh nahoteráke nóniare nón꞉we nentkaiá꞉kenhne ne kaniaraseró꞉hen, tánon ne tenhwatewí꞉riaʼke kwáh enhatiʼtsésehke tsi niʼhiotsíroʼte nóniaʼre.

³⁰ Né thoʼnahtserénhton ronanahkeráton ne rotíten kwáh kíʼ enhontekhón꞉ni, tánon ne tehiontonhnakárias enhontsatiónhniʼte kwáh skénnonk thenkénhake; ók kwáh kí ne enkónhniate ne satèra atonhkariákon enhioró꞉te, tánon ne shonkwéta niaʼtehonataténhron enhkhenonwahrhiákon.

³¹ Satewenhnóten, Ó tsi iotenhenrakáronhte; tesewasént꞉tho, Ó kanatowanénke; sewawistanáwen tsi nisewáterons, Ó Philistia, kwáh sewakwékon! Asèken othorèke nón꞉we nentkaienhkwarénhaʼwe, tánon iáh ónhka tehotsianenhtónkwen tsi nihotinénhra.

³² Ónh ní꞉ioht tsi taietʼtirihwasehrákwahʼse ne ratiʼrihwakaré꞉nies ne ne rohnonhontsakeró꞉nons? “Né Roiá꞉ner rotʼtsénhron ne Zion, tánon ne tehiontonhnakáriaks tsi skátne ratiʼnákere ne rahonkwetaʼshónhas kwáh enhatʼtshénhri nahatekwáhsen nahonhàke.”