Isaiah 13 - Ohiatonhseratokénti

Karihowanáton Nakonwatʼkónten Ne Babylon

¹ Né nateriwanhotátshera tsi nòkwah ne Babylon nètho Isaiah tonwá꞉wi ne roiénha ne Amoz.

² Né꞉ne onontóskon nón꞉we nahatiʼniatarakétsko, iorakaréni tsi tesewahséntʼtho ne rahotiʼhénton; tesehwanentʼtsateníhon né꞉ne ronónha iahontáweiaʼte ne tsi ronaʼthenhenrakáronhte ne ratiʼsenhnowánens.

³ Akónwa khók kheríhonte nakonkwetashón꞉has ne rotiʼiatatokentíshons, iekhehʼnón꞉kon nakonkwetaʼshón꞉has ne ronterí꞉ios, né꞉ne tekherénhsarons thonatonkwetaʼtónhnions, nahonteriwaténtsiaʼte nakenakwátshera.

⁴ Satahónshaʼtat tsi niʼtiorítstare né tsi tsiʼionontarónhnions tsi ní꞉ioht nahiakotsiokowanénhke! Satahónsatat, tsi nihonatʼtsarokwáton ne tsi kanontiʼiotseráiens, ne rononhontsakeró꞉nons ronaniʼtsiokonhnihátie! Ne Sakoiá꞉ner ne ronterí꞉ios ratironhiakeró꞉nons sakohiataroronhátie ne ronhterí꞉ios nahonterí꞉io.

⁵ Ahiʼnónson tionhontsakéron nón꞉we niʼthonenónhseron, thóh nónhwe nithonénon tsi iehioterónhiaʼte, ne Roiá꞉ner tánon ne rateriʼiosthákwas tsi nathenhateriatítkon, ne nahatón꞉te nonhontsakwékon.

⁶ Satsitówak, asèken ne rawenhnísera ne Roiá꞉ner ákta í꞉wes; tsi nènhtewe kwáh né꞉ne atkaronhniátsera thóh nitsawénon ne roshatstenhserowanénhke!

⁷ Né káti aoríhwa kwáh akohtsanakwékon tsi enhiotsiʼió꞉haʼne, tánon onkwetakwékon nakawé꞉ri kwáh enkawisʼtanáwenhne,

⁸ tánon kwáh tenhonthatenikonráren. Tehonawehetstánion tánon enhatironhiáken kwáh ne enhotiʼiéna; kwáh èhʼtho ní꞉ioht tsi enhatironhiáken tsi ní꞉ioht ne tiontonhwí꞉sen tsi nihioronhiáken tsi iowiraientásere. Kwáh tenhontatkatósehron tsi nithonátonhne; ne ratiʼkonsákes kwáh tsi ní꞉ioht ne iotsírote.

⁹ Satkátho, ne rawennhnísera ne Roiá꞉ner í꞉was, kaniakasténsera, ne kenikwékon ne ateriaʼtitkhóntshera tánon ne teiotenonhianíton kanakwáhtshera, ne enhiónhniaʼte nohóntsa iáh othènen tahonsakastátonhke, tánon nahiakótonhte ne iakorihwáneren né thóh ratinákere.

¹⁰ Asèken tsi niʼiotsistokwahrónhnions ne tsi karonhiáʼte tánon tsi niʼiotitsiókwahkes kwáh kí iáh thatakontiswát꞉theʼte; ne entiekhenékha karákwah kwáh ekʼthentsiokárawe tsi nènk karakwínekenhne, tánon nasonthenhnékha karákwah kwáh kí iáh thataioswát꞉thene.

¹¹ Í꞉i kwáh entréhwaʼte ne tsi ionwenhtsá꞉te ne enkarihónhni ne kariwahét꞉ken, tánon ne rotiriwáneren ne tsi nihotirihwáneren; Ní꞉i kwáh ientsiástsi rononhá꞉ke ne ratináies ne rontatkowanáhtha; tánon èhʼtake enkheiónhni ne iáh tehonatehenseráien ne ratinataká꞉riaʼks.

¹² Kwáh ne enkhehiónhniaʼte niakonhontsakerónons sénha káron nenhsatíhake tsi ní꞉ioht ne kwáh kawistanoronhtserí꞉io, tánon nonkweshónha tsi ne nikawístho nowistanóron ne Ophir nónwe.

¹³ Né kí aoríhwa kwáh né enkónhniaʼte ne tsi karonhiáʼte né tahiotihentonhwe, tánon ne tsi ionhwenhtsáte kwáh tenhiahontsísonhkwe tsi enwatʼtháko tsi nón꞉we nihionák꞉te, thóh raoteriatitʼkhontserákon ne Sakoiá꞉ner ne ronterí꞉ios ratironhiakerónons né thóh enwenhniseráteʼke ne tehiotenonhianítonʼke raonhakwáhtshera.

¹⁴ Kwáh né꞉ne konwatórats ne kahentakéha ohskenón꞉ton, khés kwáh né꞉ne teiotinakarontónhas iáh tehiotíʼien nónka asakoiataróhroʼke, ratiʼkwékon kí thóh nòkwah niènsonhne né꞉ne sahatiʼiáta í꞉ken, tánon ratiʼkwékon thóh niensatiʼtátke tsi thóh nonhontsáiens.

¹⁵ Nón꞉ka enhiontatsiatatʼtshénhri kwáh kíʼ tenhonwanarié꞉niaʼte, tánon nónka enhiontatiéna kwáh kí enhionthataʼwenkto asarekó꞉wa enwáston.

¹⁶ Né sakotiʼiohokónhas kwáh kí kènk níwas tsi enhonwatihiataratiónko raotihénton tsi tehatikánere; ne tsi rotinonshó꞉tons enkanenskwenhátonke, tánon ne rotiniátʼkons konhnón꞉kwe tentʼkonwananóntonhse nahiotináwine.

¹⁷ Satkátho, wakheioriáneron ne Medes niaʼsakonatsatónhti, ronónha ne iáh othènen tehatikweniénstha ne kawistaráken tánon iáh ne tehotinikonrotákwahs nowistanóron.

¹⁸ Né raonahénhnas kwáh né enhiakowéntʼtho ne kén nithotihiónsas raononkwetaʼshón꞉ʼahs; kwáh iáh othènen thaotiʼiéntake ne kenténhron tsi niʼhiakonakeráts꞉tha ne watewiʼrahrákwah; né ratikarákes iáh taiakotíthenre ne ratiksaokónhas.

¹⁹ Tanon ne Ne Babylon, né꞉ne aohiatanerakwáhtshera tsi níkons kanontiʼiotsherakérons: ne ne akorashétsheras ó꞉ni akonaiéseras ne Chaldeans, kwáh kíʼ thóh nenhiá꞉wenhne tsi ní꞉ioht ne Sodom tánon ne Gomorrah!

²⁰ Kwáh kí iáh nonhwénton ónka thóh nón꞉we thahonsaienákerehke. Khés nahonsahaʼtiterónhthake tsi tahatinekwensatátie; ne Arabiaró꞉nons kwáh iah nonwénton thohʼnónhwe tahonsahonthatosehróten, ne teiotinakaronhtónhas sakotiʼnikónraʼre kwáh iáh thasakonón꞉nien ne raotiʼtshehnenókons thohʼnónwe nahonsakotenáskwahien.

²¹ Ók kontírios thohʼnónhwe nenʼkontenaskwahienʼtákwahke, tánon nahotinonsashón꞉aʼhs kwáh tentkárake enhioskwahrarónhnionke ne niatekónti; thohʼnónhwe ne skawirowanekówa nenkenhterónhtake, tánon thohʼnónwe ne skawirowanekówa nenhkenterón꞉take, tánon thóh nón꞉we ne kaiatákeras-rátsinn kwáh thenhanónhniaʼkwe.

²² Né kahentakéha è꞉rhar nathenhaséntʼtho ne tsi rotenikátote, tánon ne kahentakéha erha tsi nón꞉we nihiotenatatkwéniens enʼkénhake natenhonséntʼtho; nahówenk kawistáheks ó꞉nen iehióhe, tánon ne tsi iothenhniseraté꞉nions iáh tahonsahiónhnise.