Isaiah 11 - Ohiatonhseratokénti

Ne Sakʼthíken Tsi Kanonhtiʼiotsheráien

¹ Né thenkarénharon kwáh thóh nón꞉we nènhtewe tsi thóh iotsinahá꞉rote ne Jesse, tánon nonàhte kwáh thóh entewatehiáron nahoterá꞉ke.

² Ne raonikonratokentítshera ne Roiá꞉ner kwáh enwatorihsénhtaʼne rahonháke, noʼnikónra ne atʼthokhátshera ó꞉ni ne kanikonraienthátshera, nonikónra ne katsenhaientátshera ó꞉ni nontiérent, nahonikónra náttokhátshera tánon nahonwatshaʼnísehke ne Roiá꞉ner.

³ Né raotonnhará꞉tshera thóh nón꞉we nenhiothaʼténronʼke ne Roiá꞉ner. Iáh né thaʼtahaiatoréhtaʼkwe tsi nahó꞉ten ratʼkáthos ne rakaràke, khés né꞉ne tahahiatoréthaʼkwe tsi nahó꞉ten rothóntes ne rahontàke;

⁴ ók Karihwakwarihshionʼtsherákon tsi kwáh tensakoiatórehte ne iakóten, tánon thenhaiatóreʼte kwáh sathenhiotónhake ne tsakorihwaiéri ne tsi ionwenhtsáte; kwáh ne enhaiénte ne tsi ionwenhtsáte ne kánia rohnón꞉te tsi rasakarón꞉te, tánon né tsi nihatón꞉ries ne raskwenhtàke kwáh ensakononwarákon ne ronhnonkwetaʼhétkens.

⁵ Né꞉ne kariwakwarishión꞉tshera kwáh néh enhatsiaʼtanahtserón꞉niaʼte ne enhatsatahnákʼte, tánon né꞉ne karihwatokentítshera thenhotsakwahranát꞉tonhke.

⁶ Nokwá꞉ho tánon ne teiotinakarontónʼa owí꞉ra skátʼne enhniterón꞉take, ne iorakwahrónhnions takoskówa skát꞉ne enhiatenáskwahien ne kaiatákeras owí꞉ra, ne tionhnónskwahron owí꞉ra tánon ne kénreks ó꞉ni ne ronwanaresénstons skát꞉ne enhónton, tánon né꞉ne ietʼsáha enhonwatihenténhse.

⁷ Né tionónskwaron tánon nokwá꞉ho kwáh tenhiathón꞉te, né sakotiʼiohokónhas ská꞉ne tsi enhontenáskwahien; tánon ne kénreks enkawahetseráke tsi ní꞉ioht ne tionnónskwahron rátsinn teonákares.

⁸ Né ienón꞉kera iekʼsáha kwáh thóh èhʼneken nenhontʼkaritserónhni tsi iotʼtshonwaráronhte nóʼniahre, tánon ne iontatsʼtaronhthákwen ietsá꞉ha kwáh ienhionhnentʼtsioró꞉ke tsi ionatʼtsinákwahien noniá꞉res.

⁹ Kwáh iáh tahotikaré꞉waʼte khés nahonwanátonhte tsi nonwéshons nakenontatokentíkes; asèken ne tsi iohontsáte né tentkará꞉ke ne raotʼthoʼkhátshera ne Roiá꞉ner kwáh tsi ní꞉ioht nonèkanos tsi ioróh꞉ron ne kaniatarakhekówa.

Tsi Tethoʼnénon Ne Iaʼteonathaténron NʼIsraerʼronónke Tánon Ne Judah

¹⁰ Nétho enwenhniseráteʼke ne raoterá ne Jesse kwáh enkátake tsi ní꞉ióth noniatará꞉ha ne nahiontkátho nonkweshón꞉has; niaʼkahontsakeró꞉nons kwáh enhonwahiatísake, tánon tsi nón꞉we nihotorí꞉sen kwáh enhioiatanerakwáts꞉tonʼke.

¹¹ Né thóh enwenhniseráte ne Roiá꞉ner kwáh kíʼ iaʼthensanéntseste ne tekeníhaton ienwàteratsʼte nahonshaʼsakohiataróhroʼke ne iatehonathaʼthénron ne rahonkwetaʼshón꞉has, né꞉ne Assyria, Egypt, tánon ne Pathros, Ethiopia Elam, Shinar, Hamath, tánon ne kawenhnokwátʼtonhtses ne kaniataraʼkhekowàʼne natentʼtónhne.

¹² Kwáh ensakoniataroháraʼse ne niaʼkahontsakeró꞉nons akorihwàke, tánon ensakohiataróroʼke ne átste iehonwatiʼiatónhtion NʼIsraerʼronónke, tánon ensakoiataroró꞉ke ne tehonwanatʼtokwáhton ne Judah nón꞉we, thóh natentʼtónhne ne kaiéri natekahiósaien ne tsi ionwenhtsàte.

¹³ Né tsi nihiotekéf꞉fen ne Ephraim kwáh èhʼren enkahawítonke, tsi niwatenontsistahnírats ne Judah kwáh kí enkonwáiatʼse; ne Ephraim iáh kí tahionó꞉sha ne Judah, tánon ne Judah kwáh kí iáh tahioteniakáts꞉tatʼtshe ne Ephraim.

¹⁴ Ók kwáh kí iathenhonhnitiónkwahʼkwe ne ratiʼhnenhshá꞉kes ne Philistines ne tsiʼiatewatʼtsénthos nón꞉we, enthonthénroʼwe nasakotiʼnenskwenháton nonkweshón꞉has ne tsitʼkarakwínekens ratiʼnakeré꞉nion. Kwáh iaʼthenhonhnentsáthaʼte rononhàke ne Edom tánon ne Moab, tánon ne Ammonró꞉nons enhonwatiʼwénhnaraʼkwe.

¹⁵ Tánon kí ne Roiá꞉ner kwáh í꞉ken tsi ensakótonhte nawennáhson ne kaniatarakhekowáne ne Egypt nón꞉we; tánon thenhanentsaʼteníhon èhʼneken ne tsi kaniataratátie né ráhawe ne iowerataríhen; tánon thenwatoríhon né꞉ne tsáta niʼkanahtserá꞉ke ienhwáton, tánon ne enrónniate ne taiehiáiaʼke thaʼkéson niaá꞉ien;

¹⁶ Kwáh thóh nón꞉we nenhiohatátseke ne iohahowánen né꞉ne Assyria nón꞉we nènhtewe asèken né꞉ne iatehonathaténron rahonkwetaʼshónhas raoʼtirihwàke, tsi kí né nihiotónhne NʼIsraerʼró꞉nons nó꞉nen sathontahonténhti ne tsi tsiohontsáien ne Egypt.