Isaiah 10 - Ohiatonhseratokénti

¹ Sathaʼtenikonráhrat, í꞉se ne tsanerenhserón꞉nis ne iáh tetkariwaiéri kaianerénhseras, í꞉se shiá꞉tons ne karonhiakénsera kaianerénhseras,

² ne nehrenhakahawítonke ne raotiʼianerénhseras ne teionkʼkárias tsi nahó꞉ten ne ronón꞉ha raonáwenk, tánon nashenénsko nakonkwetashón꞉has ne rotítenh raotiʼianerénhsera, nètho ionaterèhons nahón꞉ton ashenenskwenháton, tánon né nahón꞉ton ne asehiaterhiotónhniaʼte ne tehiontonhnakárias!

³ Ónh nénh꞉shere nenhtewenhniseráte ne karehwahthátsera, natkaronhniátshera né꞉ne kwáh ahí꞉non nió꞉re nènhtewe? Ónka aiesaiénawaʼse, tánon kaʼnónwe nénhshien ne satsokowátshera,

⁴ né káti ne tó꞉sa skát꞉ne asewaʼnitionhkónni ne ratinó꞉tons khés thóh iashiaʼtién tsi ratiʼiatakéron ne ronwatiʼnonhwariá꞉kon? Asèken akwékon kí꞉ken ne raoʼnhakwáhtsheras iáh thaʼtetsiotkaraténion; ne ratsaná꞉ke shé꞉kon kí iatehótsate.

Né Watatʼkowánen Assyria ó꞉ni Wakonwaríhwenhte

⁵ Ók, Assyria, ne káhnia neh naʼkenhakwáhtshera í꞉ken— ne ratinakarénhawe ne ronhtsanàkes ne nakaterhiatitʼkhóntshera í꞉ken!

⁶ Iehihiatenié꞉ton niaʼsakotsiaʼtónhti ne iáh teotiniʼioseráien ronhnonhontsakerónons, kwáh ieionkerhiaʼsarátha tsi niʼionkenakónhnis kwáh akaterhiatitkhonsherákon tsi wahirihontiéten ne Assyria niasakotsatónti, ne nahanenskwenháton tánon nahatiénawasthe ne rotierónkwen, tánon nasakoratatséshon tsi ní꞉ioht ne orashókwahke ne tsi tekanatokénseron.

⁷ Ók iah kíʼ kí ken thóh tehonikonró꞉ten, iah ó꞉ni thóh ní꞉ioht tsi ahanontonhniónheke; ók ne raweriá꞉ne né꞉ne í꞉wa nasakótonte, tánon tsi asakohiá꞉se nonkweshón꞉ha ne tó꞉sa kénh naiakónhake.

⁸ Asèken rá꞉ton: “Nakonkwetashón꞉has ne ratikorá꞉shons iáh kén ratikwékon rotinontí꞉ios tèken?

⁹ Iáh kèn ne Calno kwáh né꞉ne Carchemish akénʼhake? Iáh kén ne Hamath kwáh né꞉ne Arpad akénʼhake? Iáh kén ne Samaria kwáh né꞉ne Damascus akénʼhake?

¹⁰ Tsi iakatsanahníharaʼne tsitʼkanontiʼioseráiens ne kahiatonhnishónhas nahotiʼhiatonhnishónhas sénha ne iawetowáhnen tsi ní꞉ioht ne Jerusalem tánon ne Samaria,

¹¹ Iáh onhtèken thóh tatieràʼse ne Jerusalem tánon nahoiatonhnishónhas tsi nitieràʼse ne Samaria tánon ne ioiatonniseronhniánions?”

¹² Nó꞉nen ne Roiá꞉ner enhá꞉sa akwékon ne raoʼiothénsera ne tsi ionónte ne Zion ó꞉ni thóh nón꞉we ne Jerusalem, kwáh kí enhoréhwate ne ratatkowahnátha tsi natehothaʼterénhsaron ne ronnontí꞉io ne Assyria tánon tsi nihothatóhare tsi nihanáʼie.

¹³ Asèken rá꞉ton: “Né tsi nikashátste ne katsanàke etniwatseren, tánon ne tsi nikatenikonratʼtòkha, asèken wakenikonhraientátskon; Èhʼren wakʼkhawíton ne tsi ronateristhaʼtátie nonkweʼó꞉kons, tánon wakenenskwenháton ne rahonatʼtsokowátsheras; tsi ní꞉ioht ne tionhnónskwaron rátsinn tekhehiathènton tsi niʼiákon nanitskwáhraʼne ratitsʼkótonhkwe.

¹⁴ Né katsaná꞉ke katʼtsenhron, kwáh tsi ní꞉ioht naietsinakwatʼtsénhri, ne raotikwahséhtseras nonkweshón꞉has; tsi ní꞉ioht nónkak wahenonsaʼróroʼke nètho watewenhtéton, káti akahontsakwékon wakhehiataróroʼke; tánon iáh né skanerahóntsa tatehiotenerahontsakarénhron, khés ne tahonskáraʼwe, khés ne takaniakwahkare.”

¹⁵ Ne ató꞉ken ahónha ontèken tahonthaterénsaron tsi ní꞉ioht tsi nikáien ne rahróks, khés ne teiehswenkariákstha ahónha kén ahontatkówanate tsi ní꞉ioht tsi nikáien ne tehaswenhkaríaks? Tsi ní꞉ioht ne kánia ahónha kén ahokétsko tsi niʼkáien ne tehaniá꞉kwah, khés tsi ní꞉ioht nathénnits ne kén ahkakétsko nahó꞉ten ne iáh óiente tèken!

¹⁶ Ne kíʼaorí꞉wa ne Ronontí꞉io, ne ne Roiá꞉ner, ó꞉ni Sakoiá꞉ner ne rontirí꞉ios ratiʼronhiakeró꞉nons, kwáh ienhaténiete ne iahotenen kanhrakaiónsehras rononháke ne ronahrésens rahonkwetashón꞉has ronhterí꞉ios, tánon thóh raoiatanerakwahtsherákon entewatásawen entkatsiró꞉ten nahióteke, kwáh tsi ní꞉ioht ne iohtonkwatétkha.

¹⁷ Naʼoswaʼthétshera ne Israel ótsire ienhwáton, tánon ne Roiataʼtó꞉kenti Í꞉ken otón꞉kwah nènhneʼe; tánon kwáh enhiotéke tánon enwáhtonte ne raohiktaʼshón꞉has ó꞉ni ne raonionhwáhras sewenhnísera khók enkénhake.

¹⁸ Tsi niʼióskats ne raoráh꞉kon tánon tsi niwé꞉so tkánios ne rahontsá꞉ke ne Roiá꞉ner kwáh kí enhátonhte, tetsáron né natónhets tánon noierónhta, tánon kwáh tsi ní꞉ioht nó꞉nenh ne rónkwe ronhnonwákʼtahni kwáh enharihwaiésa.

¹⁹ Ne iatehiothaténhron ne karonhtaʼshón꞉has ne raohrá꞉kons tsi kénk nenhskónhake iekaníhare iekʼsá꞉ha enhiekwéni nahionshéhte.

Ne Shonatatʼrewáton Ne Iatehonathaʼthénron Israerʼronónke

²⁰ Né èhʼtho entewenhniseráteʼke ne iatehonathaténhron Nisraeʼró꞉nonke tánon ne shotiniakénhen ne tsi ronón꞉shote ne Jacob kwáh iáh thóh tsiaʼhontsatarákaren raonháke tsi nikáien ne shakohién꞉ton, ók kwáh thóh ienhontsatarákaren raonháke ne Roiá꞉ner, ne ne Saiá꞉ta ne Roiatatokénti í꞉ken NʼIsraerʼronónke, ne noriwiʼiohónwe í꞉ken.

²¹ Né iatehonathaténron kwáh tentʼtónhne, ne iatehonathaʼténron ne Jacob, rahonháke ne Roshatsʼtenhseroʼwánen Ní꞉io.

²² Iahwerohátien ne shonkwetaʼshón꞉has Israerʼronónke kwáh né꞉ne tsi natekatsinetarotháron nonesarón꞉kwah ne kaniatarakheʼkówa, tohkàra khók niʼiákon ténhtien. Ne Kakaronniátshera kahianerenhseríhshon ne rahotirihwáke, thiʼtsioró꞉ron ne karihwaʼkwahrihshióntshera.

²³ Asèken ne Sakoiá꞉ner Ní꞉io ne ronterí꞉ios ratiʼronhiakeró꞉nons kwáh ne enrónhniaʼte nakahnanonháke tsi ienwatót꞉ten, kwáh kí kaianerenhserónhni, nonhontsaʼkwékon í꞉ken.

²⁴ Èhʼthoh nón꞉we tsi niháton ne Sakoiá꞉ner ó꞉ni sá꞉ko Ní꞉io ne ronterí꞉io Ratironhiakeró꞉nons: nakonkwetashón꞉has, ne Zion nón꞉we nihatinákere, tó꞉sa ietsitʼtsániʼtset ne Assyriaró꞉nons né nó꞉nen enʼietshinonwenhseʼría꞉rio ne kánia énhonste tánon tahatíniakwe ne rahonaténhnits nahiakótkonhten ní꞉se tsi kíʼ ne nihotiʼiéren ne Egyptró꞉nons.

²⁵ Kénʼk niskaríh꞉wes tsi ná꞉he nakenoshá꞉tshera ienwatók꞉ten, tánon nakenhakwáhtshera thóh nokwáhti nienskaiérate raonatkaronhniatsherákon.

²⁶ Ne Sakoiá꞉ner ne ronterí꞉ios ratironhiakeró꞉nons kwáh né enráts꞉te nó꞉kwire niaʼsakotsatónhti, tsi kí né nisakohién꞉ton ne Midianró꞉nons ne iotstenhráhke ne Oreb; tánon kwáh enhaharáthate ne raoténhnits èhʼneken ne kaniatarakhekó꞉wane, tánon kwáh kí ensahará꞉thaʼte tsi kí ne nihoiéren ne Egypt nón꞉we.

²⁷ Né thóh enʼtewenhniseráteʼke né raoriéna kwáh enharáhko ne snhensá꞉ke, tánon ne raotsientaniáksta kwáh enhwatón꞉tonke ne seniaràhke. Heniehawénon tho iehotohétston Rimmon, tánon ne iontsientaniátstha ne seniaráke káhere kwáh enwatóntonʼke ne enkarihónhni ne iorésenhs

²⁸ kén꞉hen nithaʼwénon Aiath; iehotohétston ne Migron, Michmash nón꞉we nahatakweniáhien ne raoriéna;

²⁹ iatehotiʼiahiákon ne tsi nieʼiawénon, Geba nón꞉we tahonhnón꞉wete; ne Ramah iohiatishón꞉kwah, Gibeah ne Saul nón꞉we ronatèkwen.

³⁰ Iorakareníhak tsi tesewaséntʼtho, Ó sahiénha Gallim! Satahónsatat, Ó Laishah! Teserihwasehrákwas, Ó Anathoth!

³¹ Ne Madmenah iotekwenhatse, ne tsi ratiʼnakerénion ne Gebim nón꞉we nahontekwásen.

³² Kwáh ónhwa wenhniseráte Nob nón꞉we nathenhátaʼne, kwáh tenhatsikwahteʼníʼhon ne tsi tsiotenontáhere nakoiénha Zion, ne tsi tsionontáhere ne Jerusalem.

³³ Satkátho, ne Ronnontí꞉io, ne Sakoiá꞉ner ne ronterí꞉ios Ratironhiakeró꞉nons, kwáh enhanhatoskarónko ne énratsʼte ne iótʼteron kashatsténhsera; ne kwáh tkaróntes enkahiákon, tánon ne iontató꞉hara ehtàke entiónton.

³⁴ Kwáh enhaiákon ne onhniakwireshónhas ne karakonkówa ató꞉ken énratsʼte, tánon ne Lebanon nón꞉we ne ahorontashónhas ne iohrontanerákwas kwáh kí enkareniénhtonhke.