Isaiah 1 - Ohiatonhseratokénti

¹ Tsi nihoterihothashiénhni ne Isaiah ne roién꞉ha ne Amoz, ne tsi wahatkátho tsi niʼtsioterihwatséren ne Judah tánon ne Jerusalem nón꞉we ne sihoʼnahtenhniseraténionsʼkwe ne Uzziah, Jotham, Ahaz tánon ne Hezekiah, né rotinontí꞉iosʼkwe ne Judah.

Nahorihwahetkénseras Ne Judah

² Sathóntek, Ó tsi karonhiáte, tánon satahón꞉satat Ó onwénhtsa; asèken ne Roiá꞉ner rotatíhon: Né ratiksahokónha ne khenónten ó꞉ni kheiehiáron, ók wahonkatkónten.

³ Né tehonákares tionhnónskwahron rátsinn roienhtérih né raotshénen, ne tewahón꞉tes roteriénhtare tsi nón꞉we nihatekwahtahástha tsi nón꞉we nihonóntens ne rahiatakwení꞉io; ók né Israel iáh né tehioteriéntare, nakonkwetaʼshón꞉ʼas iáh tehotiʼnikonhraiéntas.

⁴ Ah, sewarihwaneraháts꞉kon tsiónkwe, nonkweʼókons ne iakorieniakétes ne kariwanerahák꞉tsheras, ne ratiksaokónhas ne rotiʼióte ne karihwahétken, ne sakotiʼiohokónhas ronón꞉ha ne ronaterihwathentsatonhátie ne karihwahetkénsera, ronónha ronhwahiatanikonhrénhen ne Roiá꞉ner, ronónha kwáh ronhwakenronhníhon ne Rohiatatokénti ne NÍsraerʼronónke, ronónha kí kwáh ronatsiatontákwen ne rahonháke!

⁵ Onhniʼiotsiéren ní꞉se tsi takonhniénhnis nakonhnonwenhsehrário? Ónh niʼiohtsiéren tsi iesakonhtákwen naskatkónten? Kwáh sanonhtsistakwékon thiʼtsioróhron tsi ióhto, tánon sehriasakwékon tsi iononwáktani.

⁶ Kwáh sasitókon tsi nió꞉re ne senonhtsíne, kwáh iáh okàneka tetsiothaténron ne iáh thahisatsiatakwaráshonke khéhs nahiotó꞉ke, ók shatsatakwarákʼshon tánon shatsiato tánon ionekwáhon tsi nisatkarehwátons; ók iáh tekanóhare, khés naieshakentórenke, iáh ó꞉ni teiesaienáron naionetskáon.

⁷ Né shonhontsáke watónthon, ne sewanatowáhnens ótsire iotenatatʼtsahátons; kwáh tshiaʼtesewahkanerónhnion, thihononhontsátes wahontekwísa tsi niʼtkánios ne tionhontsá꞉kes. Watewenhtéton, tihononhontsáte rotitakʼsáton.

⁸ Tánon nék khók nakoiénha ne Zion iatetsotaténhron tsi ní꞉ioht ne kenkʼnikanónsa kanónshote ne tsi kanenharaiéntʼton, kwáh tsi ní꞉ioht ne waskwahkarénhre tsi nónwe nononhón꞉sera nikahétaien, kwáh tsi ní꞉ioht ne tekonwanáthanen ne iáh thahónton nahontakonwàne.

⁹ Tó꞉ka né Roiá꞉ner roshaststenserowanenkówa iáh thahothontátonke toká꞉ra nihionkwétake iathahonathaténhron, ne Jerusalem kwáh tokénʼen tsi akonwatóntonʼke, tsi kíʼ ní꞉ioht ne Sodom tánon ne Gomorrah tsi niʼiotihiatawénhon.

¹⁰ Sewathóntek ne raowennahó꞉kon ne Roiá꞉ner, í꞉se ne ietsihenténhse ne Sodom! Sewatahónsatat né raorihonhnienhnítshera nón꞉kwah Ní꞉io, í꞉se ne tsiónkwe ne Gomorrah nón꞉we!

¹¹ Nahó꞉ten nènhneʼe kástha nakerihwáke thóh nahkonhá꞉ke ahietsiʼiatsiatátʼtsahate ne kontitshénenhs? Rá꞉ton ne Roiá꞉ner; Kwáh ísiʼnónhwe tsi iatewatserihse tsi nihsehiatsiaʼtátʼtsahatha ratiʼiathakwékon ne tehotinakaronhtónha ratítsinn tánon ne ióresens ne ietsiʼiarehsénston katshénens; Iáh ne tekhatsenhnonhniá꞉tha ne raotinekwénhsas ne kenhnithotiʼiónsas tionhnónskwarons ratítsinn, khés ne teiotinakaronhtónhas, khés ne kaiatákeras.

¹² Ónka iesariwanontónhni nahontasekʼkhawítens akwé꞉kon kí꞉kens nó꞉nenh entese nasekʼsénhnaien? Ónhka iesahriwanontónhni akwé꞉kon kí꞉ken thóh nashieránion ne tasaskwahserón꞉kwate aktón꞉tie Nakenonsatokentiʼkenkówaʼne?

¹³ Théshas nahontásheste iáh kí ne othènen tehioríhonte; ne kaienkwahrákon shatsahátha ítsons nènhneʼe. Norákwahse tánon nawenhtatokentíkes tánon iaʼtesewatatinóntʼkons naisewatkenhnísa— Iáh tatkwéni nakatakáts꞉tate ne hiorihwatóken karihwiʼiostóntshera sewatsataróhroks ne karihwanerenhakʼtsherákon.

¹⁴ Ít꞉sons ne sewáwenk orákwahse tsi nisewatkhwahérha ó꞉ni ne iawenhthatokéntons; ionkerienhniasténhni, tewákʼwisenhéhion tsi kheʼiathakatstáton.

¹⁵ Nó꞉nen iathenshatsá꞉nate nasaterienhnáien, kwáh kí iáh takonhiatʼkátho; iáh othènnon takarihontáko tsi níkon ahsaterénhnaien, Kwáh kí iáh takatahónsathate; ne satsanáke titkanewenhsáhere.

¹⁶ Sashewatsóhare tánon sashewatsiaʼtóhare; sashewatkwenienstónhak; éhʼren sewaháwit ne karihwahétʼkens tsi nisewatserá꞉nions nakʼkénton tsi tetkánere; sewát꞉kaf tsi nisewatsiéra ne karihwahétken,

¹⁷ sewatéweienst thóh nasewáier ne ne ioiánere; sewésat kaiáneren, saietʼtsiniákent ne iontateronhiakéntha, ietsiʼiénawas ne iáh tehiakonísen, taiétsine ne ionateré꞉ons.

¹⁸ Káts kíʼ ó꞉nen, ánion tewahriwasherónhni kí꞉ken oriwasón꞉has, rá꞉ton ne Roiá꞉ner: èʼthohsáne ne sewarihwaneraháktshera thóh nahonshokothénhake tsi ní꞉ioht nonekwénhtara, thóh nenhsewashokothénhake tsi ní꞉ioht nóniete; èʼthohsáne tsi onekwénhtara niwashokóten tsi ní꞉ioht ne tetsonekwenhtarákaras, thóh nenskarákenhne tsi ní꞉ioht ne karáken ohnonwéron.

¹⁹ Tó꞉ka sathontahtserí꞉io tánon satewenhnará꞉kwah, ní꞉se kwáh ne ensék꞉seke ne ioiá꞉nere thá꞉has nonhontsáke;

²⁰ Ók tó꞉ka ensaterahiátaʼkwe tánon enskatkónten, kwáh kí asarekówa ensanonwaríhakon; asèken ne Roiá꞉ner rotatíhon.

Tshiaʼteiorahtiéton Ne Kanatowaʼnénhke

²¹ Tsi nahohiátahwen ne iorihwatokénhne Né kanatowanénhke tsiotahkwakareni iahónton! Ieioterátston ne nahón꞉ha kwáh kaiatananónhne ne kaiáneren, ne karihwakwariʼshióntshera ahonhàke nón꞉we nikénteron— ók ó꞉nen sakonashé꞉thas satíteron nahonháke!

²² Ne sawistarákens thiʼkahristaténion teiotsestánion, ne sanekasónhas notsítsas onékanos watewátseste.

²³ Né ieshakoráshons iehonwatsatóntsies ne Ní꞉io tánon ne wahonteroserónhni ne ratinénskwas. Onkwetakwékon ne ienónhwes ne knahótenk tahionthaʼthetsikhetáhroʼse tánon ne ratiriwanóntons athatahwí꞉tsheras ahonwanawíhon. Kwáh iáh tethesakótines ne tehiontonhnakárias, tánon ne ionateréhons ahotirihwashónhas iáh rahotihénton tsewétha.

²⁴ Né Ká꞉ti aoríhwa rá꞉ton ne roʼshatstenhserowánen ne Sakoiá꞉ner ne ratiʼronhiakeró꞉nons, ne rahonhaha tashatstekówa ne Israerʼronónke: Ók, kwáh kí entkáweron nakenakwáhtshera rononháke ne ióntsions, tánon kwáh Í꞉i enkheronʼhiákente ne iónkʼshons!

²⁵ Kwáh kíʼ tentkatiaʼnónhneke tsi konhiatʼkónten; Kwáh enskonhionhnakanónhni tsi ní꞉ioht ne karístatsi tsi áse tsakónhnis, tánon akwékon éʼren entʼkháwite ne karístatsis ne teiotsestáhon shonháke.

²⁶ Tánon kwáh ensekkherihontónhnion ne shonkwetashónhas ratirihwénhthas tsi kí nitsotónhte, tánon ne iesatenikonhráwiskwe tsi nitsiotásawe. Tánon kénhen ienwatásawen né entsesanatónhkwahke ne iorihwakwahríhshion kanatowanénke, ne iorihwatóken kanatowanénke.

²⁷ Né Zion né entsoʼniákente ne kaiáneren, tánon tsi nihiákon nahonháke enhtiontatréwate, tsi ne rotiióte ne tkariwaiéri.

²⁸ Ók tsi niiá꞉kon ne ronwát꞉konte ne Ní꞉io ó꞉ni ne rotirihwánerens tsi kwáh enhonwanátonte tetsá꞉ron, tánon tsi niʼiákon nenhonwarihwaiesáthen ne Roiá꞉ner kwáh kí enhiontatátonhte.

²⁹ Asé꞉ken kwáh enshesataterihwásthen tsi shesénhnaien tsi keríhtons ó꞉ni ne saiéntóhsehrons tánon sathetonniánion ne iohetahtokénhtis.

³⁰ Asé꞉ken thóh nenhshiatóhtenhne tsi ní꞉ioht ne karíhton ké꞉rihte nahónerathe onstáʼthen, tánon tsi ní꞉ioht ne kahé꞉thaien ne iáh tehioné꞉kaien.

³¹ Tánon ne rahshátste rónkwe thóh nenhotiʼiátahwenh tsi ní꞉ioht ne ioientá꞉ten tsi niiostó꞉re ióteks, tánon ne rahohioténhsera tsi ne ní꞉ioht ne watʼtsirahtón꞉kwas; ronónha tánon ne raotiʼiothénseras skát꞉ne tsi enhontsatátʼtsa, tánon iáh ónhka tahiekwéni nahonsaionswáhthe.