Hosea 9 - Ohiatonhseratokénti

Enwatré꞉wate Ne Israel Ne Tsi Iorihwané꞉ren

¹ Tó꞉sa satónhnare, O Israel! Tó꞉sa satatʼtsenhnakarátat nashatatonhkwetowá꞉nate tsi nihatiié꞉ra ne thihononhontsá꞉tes; asè꞉ken ne satswathákwen tsi satʼthokhóktha, éhren satatsiathenhawí꞉ton tsi nokwáh ne Saní꞉io. Ne sanonwéhon ne tsothakwahkaré꞉ni tsi nikonhwakariakséhakwe tsi nón꞉we nikaswenhkarakwénhtare ne tsi rathithetáhkwa.

² Ne tsi ratithetáhkwa kaswenhkarakwénhtaron tánon ne onenharákeri watnekaráhkwa iáh ne tahiakonónhte, tánon nonenharákeri enthonatnekóktase.

³ Iáh thóh nón꞉we tahonathatenrónke tsi rahontsá꞉ien ne Roiá꞉ner; ók ne Ephraim Egypt ne nón꞉we nienhénsewe, tánon ne Assyria nón꞉we ne né꞉e enhonhnékseke ne iáh tehiothekwatkwéniens.

⁴ Kwáh iáh tahontahatinekáweron nonenharákeri nahatinekí꞉ra né꞉ne ahonwatatʼtse ne Roiá꞉ner, tánon tsi nikonwanateskontʼtha kaʼtshé꞉nens iáh ne thahonwanikonhrí꞉ioste. Ne ní꞉ioht tsi wateskónte kwáh thóh nenhiotónhake kwáh né꞉ne iakotsionhniónkwen akonà꞉taro í꞉ken; tsi nihiá꞉kon né꞉ne énhieke kwáh kí thenhiakoiatatiónhne; asè꞉ken ne raotinátaro ne khók enkénhake ne tsi ronhtonhkáriaks; tánon kwáh iáh tehiówenk nahontahónhne ne Raononsatokentikówahne ne Roiá꞉ner.

⁵ Onhnenhsátiere nenhtewenhniserá꞉te ne wenhniserará꞉kwen nakakʼkhwárake, tánon nenhtewenhniserá꞉te nenhkakʼkhwárake ne Roiá꞉ner raorihwá꞉ke?

⁶ Asè꞉ken shé꞉kon nakonwaniá꞉kenhse natkaronhniá꞉tshera, Egypt kí nenʼné꞉e entsakohiaʼtaró꞉roke, Tánon Memphis enhiakohiatháta. Ohíktas kí nenenhné꞉e entkaró꞉roke ne kanorón꞉sons ahowenkshón꞉as kawistará꞉kens; ohíktas enhiothaténhronhke ne raonatohserá꞉kons.

⁷ Nawenhní꞉sera ne karewatháhtshera nó꞉nen ónhwe, nawenhní꞉seras naonsaiesaié꞉ristse ó꞉nen ón꞉we; Nisrael tewaséntʼtos, “Ne rotokénhse thotonhnotʼte, ne rón꞉kwe ne roshatstenhserowá꞉nen ronakwénhen!” Tiorì꞉wa tsi nikowá꞉nen ne sewarihwaneraháktshera, tsi natehiotenonhianì꞉ton tsi nisateriwát꞉satha.

⁸ Ne rotokénhse ne roterihwanikonrará꞉ni náke ní꞉io tsi nokwáh ne Ephraim, ethosà꞉ne notsì꞉ténha tesakonikararánis kwáh tió꞉konte rahoháhake rón꞉nes, tánon wateriwatsáton ne Raononsatokentikó꞉wane ne Raoní꞉io.

⁹ Kwáh í꞉ken tsi tehionó꞉tes tsi nihonatatʼtetkentén꞉ni tsi kí niiotónhne shiotenhniseraténionkwe ne Gibeah; kwáh kí enrehiárake ne raotirihwaneraháktshera, kwáh kí ensakoréwate ne raotiriwaneraháktsheras.

¹⁰ Kwáh tsi ní꞉ioht ne karakónha onénhare, thóh ní꞉ioht tiatatʼtsénhron Nisrael. Tsi ní꞉ioht ne tontiérenhte onhiári ne tionhnionwarontonhakó꞉wa, ne tontiérenhte ionhianihiónten, khéken ne sesothonkonhkén꞉en. Baal-peor nón꞉we niahónhne, tánon ne wahonterenhnaiéntakwe tsi nahò꞉ten ne atehénsera í꞉ken, tánon thóh ní꞉ioht tsi wathontatsatatiónste kwáh tsi ní꞉ioht tsi nahò꞉ten ratinón꞉wes.

¹¹ Ephraim ahohiatanerakwáhtshera kakʼtsathenkáten tsi ní꞉ioht notsiténha— iáh tahonsahiakotinakerátstha nowirá꞉ʼa, iáh ó꞉ni thakontá꞉wa nahiotiwiraién꞉taʼne, iáh thahonsónton nahiotiwiraién꞉taʼne!

¹² Ské꞉kon tó꞉ka nahonwanehiá꞉ron ne ratitsaokónha, kwáh kí enkhehiathónhten tsi nió꞉re iáh ónhka tsatahonsahonathaténhronke. Kwáh í꞉ken tsi rotithentáhsere nó꞉nen enkhehiatsatonhtákwahse!

¹³ Énska wahí꞉ken ne Ephraim shithohiónha ioneratésons raienthós꞉kwe tsi nón꞉we ne kwáh kahentí꞉io í꞉ken, ók kí ó꞉nen ne Ephraim iensakohéntenhse ne sakohioʼokónha nahonwanawénhtho.

¹⁴ Tashé꞉ion, O Saiá꞉ner— onhnahó꞉ten kwáh enteshé꞉ion? Ne tashé꞉ion ne tsakowirón꞉tses watewiraráhkwa tánon tó꞉sa akontinontátake ne kontinontá꞉kes.

¹⁵ Akwé꞉kon ne raotirihwahetkénhseras Gilgal nón꞉we tiotáhsawe; thóh nón꞉we niewakénon tsi wakhéson. Tiorì꞉wa tsi nikarihwahétkens ne raotihiothénhseras kwáh kí enkheiatí꞉nekenhwe nakenonsatokentikówane. Kwáh iáh shé꞉kon thahonsakhenorónhkwe; ratikwé꞉kon ne rahonnonkweʼashón꞉as ne ronaterihóntons ionkanowenhtén꞉nis.

¹⁶ Ephraim iotrewáton, nahoteraʼshón꞉as iostatʼthénhen, kwáh iáh tahonsonhianihiónten. Iawerohátien tsi iakawenhnakerátsta, kwáh kí enkhenonwarià꞉kon ne kwáh tsakonorónhkwa tsi nihowiraientáhon ne tsi watewiraráhkwa nitsawé꞉non.

¹⁷ Tiorì꞉wa tsi iáh tehonwawenhnarákwen, nakeʼNí꞉io ensakokenron kí; kwáh kí enhotinathenhawí꞉son tsi ienakeré꞉nion nonkweshón꞉a.