Hosea 5 - Ohiatonhseratokénti

Tsi Nikará꞉re Naotirihwenhtátsheras Ne Israel Tánon Judah

¹ Sewathóntet kí꞉ken, O sewatsihénstatsis! Sewathenʼnikónhraren, O tiónkwes Israerró꞉nonhke! Sewatahónsatat, O rahonkweʼtashón꞉as ne Ronnontí꞉io! Asè꞉ken ne karihwenhtátsheras í꞉se sewarihwá꞉kes; asè꞉ken í꞉se teietsinikará꞉rahkwe ne Mizpah nón꞉we, tánon ahá꞉re watkonwatakwaríten ne Tabor,

² tánon iosónhwes kashionhiónhni ne Shittim nón꞉we; ók kwáh kí ratikwé꞉kon tsi enkheréwate.

³ Tsienté꞉ri ne Ephraim, tánon ne Israel iáh ne tewakatasehthénhni; asè꞉ken nón꞉wa, O Ephraim, ne wasatswatákwe ne kanakwaiesátshera; ne Israel kwáh tekonwaiathatiónston.

⁴ Tsi nihatiweienó꞉tens iáh tehotihianerenhserá꞉ien niahonsahónhne raohénton ne raotiní꞉io. Asè꞉ken naonikónhra ne kanakwaieshátshera rononhà꞉ke ká꞉ien, tánon iáh tehonwaienté꞉ri ne Roiá꞉ner.

⁵ Tsi nihatináhie ne Israerʼró꞉nons ne iakokaronhniátha ne rahonhà꞉ke; Ephraim thóh raotinhitsherá꞉kon tonashítsiats; Judah ó꞉ni skátne tsi tonashitsiats.

⁶ Skátne ne raotitshenenhó꞉kons teiotinakarontónhas tánon ne raotitsenhó꞉kons tionhnónskwarons kwáh é꞉ren enhonhné꞉te ne nahonwaiatísake ne Roiá꞉ner, ók iáh kí tahonwaiataʼtshén꞉ri; é꞉ren rawé꞉ton tsi nón꞉we nihón꞉nes.

⁷ Tsi nihonatié꞉ren iáh tehotirihwathó꞉kenʼne rahonhà꞉ke ne Roiá꞉ner; asè꞉ken tsi sakonanahkerátston ne ratitsaokónhas iáh kaianerenhseratè꞉ken ó꞉nen kí norákwahse kwáh enhiakotónhte skátne ne kahentà꞉kes.

⁸ Sewatátist nonákare ne Gibeah nón꞉we, ne iohonrawátsta Ramah ne nón꞉we nasewatátist. Sewatátsist ne watewenhnót꞉tha ne Beth-aven nón꞉we; ionsasewatkáto ne sewashón꞉ne, Benjamin!

⁹ Ne Ephraim kwáh ahonhontsóskon enwá꞉ton ne entewenhniserón꞉te ne karewatháhtshera; ne tsi ratinákeres ne Israerʼró꞉nons wakatró꞉ri nahò꞉ten ne orihwí꞉io í꞉ken.

¹⁰ Ne rakó꞉ra ne Judah nón꞉we, thóh nihoiatawénhen kwáh né꞉ne tsi niká꞉ien ne é꞉ren rotihawí꞉ton tsi karistiséron; rononhà꞉ke kwáh entkawéron nakenakwáhtshera thóh nenhiotónhake kwáh né꞉ne oné꞉kanos.

¹¹ Ne Ephraim ionikonrót꞉tahon, tsekonwatsóron tsi nikonwarihwénton, tiorì꞉wa tsi iehionikonhrakontákwen ne akásehre ne iáh othé꞉nen tekariwástha.

¹² Ne káti aorì꞉wa thóh nitiató꞉then kwáh né꞉ne otsinón꞉wa ne Ephraim raorihwá꞉ke, tánon kwáh né꞉ne iotkénhens ne tsi ronónshote ne Judah.

¹³ Nó꞉nen ne Ephraim sahatʼkáto ne raononwakténtshera, tánon ne Judah tsi nihotkarewá꞉ton, ethò꞉ne ne Ephraim Assyria nón꞉we niahá꞉re, tánon ronontí꞉ioke iahonwató꞉ri Ók iáh ne tehokwénion nahiatsénhton khés nahiaiewenhthónke.

¹⁴ Asè꞉ken thóh nentiatoténhake tsi ní꞉ioht ne kénreks tsi nokwáh ne Ephraim, tánon kwáh né꞉ne kenhnitohiónha kénreks tsi nokwáh nonkweshón꞉as ne Judah. Iathenwatsátiste tsi enkhehiaʼtaratiónko tánon ethò꞉ne é꞉ren enskéte; kwáh ienkhehiaʼthénhawe, tánon iáh tahonsaieniá꞉kenhne.

¹⁵ Kwáh shé꞉kon thóh iénske tsi nón꞉we tewakatená꞉taien tsi nió꞉re ienhatiriwaní꞉rate tsi rotiní꞉kon tánon enhonhnésake ne kontsá꞉ke. Ne tsi nihotironhiá꞉ken kwáh enhionkanithénthen nahatiié꞉na nakithénrat: