Hosea 4 - Ohiatonhseratokénti

Ne Rawenni꞉io Sakorihwá꞉ros Israerʼró꞉nons

¹ Sewathóntet ne raowennaó꞉kons ne Roiá꞉ner, O tiónkwe Nisraeró꞉nonke; asèken ne Roiá꞉ner sakoriwaros ne ratinakere tsi ionwentsaien. Ne thóh nón꞉we iáh teká꞉ien ne tewetákwen iáh ò꞉ni naioriwatokenhake, iáh oni ne raʼtokhatsera ne Ní꞉io.

² Rontewenhnatsatánions, ronhnowenhtánions, tánon shonterihwatewatánions, tánon kanenskwátsheras tánon kanakwaiesátshera ioterihwathéntion; kwáh rotinekwenhsarónhnions.

³ Ne káti aorì꞉wa nonhóntsa ioʼtionhniónkwen, tánon ratikwé꞉kon ne nón꞉we nihatinákere enotishaststenhserónhti; skátne ne kontí꞉rios tánon notsithenokónhas ne tsi niówerare kontí꞉tses, iekaní꞉hare ne kéntionks ne kaniatarakeʼkowáhne enkontiiatháton.

⁴ Ethosà꞉ne tó꞉sa ónhka teierihwakénha, tánon tó꞉sa ónhka ionhtaterihwáro, asè꞉ken nakeriwakathéntseras tionháke kók nón꞉we ní꞉ken, O sewatsihénstatsis.

⁵ Ní꞉se kwáh entiekéne entisewashí꞉tsake; ne rotitokénhse ó꞉ni kwáh enthonashítsake nasonʼthénhne, tánon kwáh enkatónhte ne saʼnisténha.

⁶ Nakonkweʼtashón꞉as wahonwanátonte ne tsi iáh tsiatekaié꞉ri tsi nihonaterienʼtá꞉rakwe; ne aorì꞉wa ne tsi wesewakénron ne attokhátsera, wakonkénron kí ò꞉ni ní꞉se tsi iáh attsihénstatsi thasá꞉ton. Tiorì꞉wa tsi saʼnikonrénhen ne raoianerénhseras ne Rawenni꞉io, kwáh kí ó꞉ni ní꞉i enkheiatanikónhren ne seioʼokónha.

⁷ Ne sénha enhonatiohkowá꞉nen, sénha kí enhatirihwanérake tsi nokwáh ní꞉i; ne wathontáton ne kaiatanerakwáhtshera ne atehénsera iahónton.

⁸ Ne rononnhékwen tsi nihatirihwanérats nakonkweʼtashón꞉as; ronatetʼtsen ne raotirihwaneraháktshera aorihwà꞉ke.

⁹ Tanon tsi nenhotiiatáwen nonkweshón꞉as, thóh kí nenhotiiatawen ne ratitsihénstatsis; kwáh enkheréwate tsi nihatiweienó꞉tens, tánon enshekhekáriakse tsi nihonatié꞉ren.

¹⁰ Thenhonskáhon, ók iáh ki tsiatahotiié꞉rihse; ne enhonswatákwe ne kanakwaiesáhtshera, ók iáh ki tahonatiohkowá꞉nen; tiorì꞉wa tsi ronhwaiatanikonhrénhen ne Roiá꞉ner ne enhonterihwató꞉kenste ne

¹¹ kanakwaieshátshera. Onenharákeris tánon nonékase onenharákeris ne iekáhas ne raotinikonhraienthátshera.

Nisrael Aoiatonhnishón꞉as

¹² Nakonkweʼtashón꞉as ne konwarihwanontón꞉nis ne kenk nikaiénta, tánon ne iótkon raonathénhnits ne tsakó꞉wis nowenhnaʼshón꞉as. Asè꞉ken tsi nihionikonró꞉ten ne kanakwaiesátshera ne iakothaharakwáhton, tánon kwáh ne sateiot ne kanakwaiesátshera, ronwaiatakikonrénhen ne raotiní꞉io.

¹³ Ronteskontʼtas nonotoharakéhsons, tánon rontsienkwahronhniáta ne tsi ionhniarónhnions, né꞉ne noronthonkónsons karíhtons, ó꞉ni nonentakwenhtetsheró꞉kons, tánon karontó꞉kon ne takoskó꞉wa, tiorì꞉wa tsi niioiánere tsi nikarakwaweróstha. Ne káti aorì꞉wa ne saiatasetsherashón꞉as ne wakóntswate nakontenakwaiésathe, tánon ne shehionhsáfas wakontenakwaiésate nonhné꞉e

¹⁴ kwáh kí enkheréwate ne saiatasetsherashón꞉as nó꞉nen ne enkonswáte ne kanakwaiesáhtshera, ó꞉ni ne sehionsháfas nó꞉nen enkontenakwaiésate; asè꞉ken ne ronhnón꞉kwe ronteró꞉sens ne kontenakwaiesátas, tánon ne ská꞉ne wahontsienkwahrónhniate ne ononsatokentikówane tsonatakwahkaré꞉nis; tánon tsi ses tsi niiónton nonkweshón꞉as ne iáh teiakonikonhraiéntas éntien naiekarónhni.

¹⁵ Ethosà꞉ne ne wetsiátswate ne watenakwaiesátha, O Israel, tó꞉sa serí꞉hon ne Judah nahiónike. Tó꞉sa ienhénse niasatawéiate ne Gilgal, khés ne iáse ne Beth-aven, tánon tó꞉sa serihwaní꞉rat, “Ne Roiá꞉ner tsi rónhne.”

¹⁶ Kwáh tsi nihionontsistaní꞉ron ne tionhnónskwaron owí꞉ra, né Israel kwáh se ionontsistaní꞉ron; ahakwé꞉ni ken ne Roiá꞉ner ó꞉nen asakonónte tsi ní꞉ioht ne teiotinakarontón꞉as ne watenhenrowá꞉nenhne kontì꞉teron?

¹⁷ Ne Ephraim kahiatonhnishón꞉as nenené꞉e iehiakotsatará꞉ni— thóh wé꞉sek.

¹⁸ Nó꞉nen enhóntkawe tsi rotinekirenhátses, ne enhonterihwathéntsate ne kentétsera kwáh tsathenhontséste; ronhnonwéskwahni nahontenostónhni sénha tsi ní꞉ioht naotiiatanerakwahtónhke.

¹⁹ Owé꞉ron wahakowenónhni thóh owé꞉rakon, tánon kwáh enhontéhen ne entkarihón꞉ni ne raonáwenk ietienharáhkwah.