Hosea 1 - Ohiatonhseratokénti

¹ Ne raowenhnaó꞉kons ne Roiá꞉ner tsi waohiató꞉renhne ne Hosea ne roʼní꞉ha né꞉ne Beeri, né꞉ne shionateniseraténionskwe ne Ronhtinontí꞉ioskwe Uzziah, Jotham, Ahaz, tánon ne Hezekiah ne Judah nón꞉we, tánon ne shiothenhniseraténionskwe ne Ronnontí꞉iokwe Jeroboam né꞉ne ronikénhen ne Joash ne Israerró꞉nonhke nón꞉we.

Ne Raowá꞉tsires Hosea

² Nó꞉nen ne Roiá꞉ner shontonhtsérenhte wahatá꞉ti rahonhà꞉ke ne Hosea, ne Roiá꞉ner wahawénhase ne Hosea, “Wás, ne sathateniatʼthen ne wathenawaiesátha tánon ne sawiraientháseron ne kontenakwahiesátha, asè꞉ken ne tsi ionhontsá꞉te ne ioterihwathéntion ne kowá꞉nen kanakwahieshá꞉tshera ne tsi ronwatewentéton ne Roiá꞉ner.”

³ Sók kí ne Hosea thóh waré꞉the tánon ne wahatateniát꞉then ne Gomer konwáiast né꞉ne sakoiénha ne Diblaim, tánon onhtháwa naiowiraiéntane tánon ki roskenrakéte wahowiraiéntane.

⁴ Tánon ne Roiá꞉ner wahawénhase, “Jezreel tienáhtont; asè꞉ken iáh takarihwé꞉sonhke kwáh enkheré꞉wate nonkweshón꞉as ne Jehu nón꞉we né꞉ne Jezreel raonekwénhsa entkarihón꞉ni, tánon kwáh ientsiástsi ne raotinakeráhsera nonkweshón꞉as Nisraeró꞉nonke.

⁵ Ne thóh entewenhniserá꞉teke kwáh thentsake ne raonahénhna nʼIsraerʼró꞉nons ne thóh ahonráhkwakon ne Jezreel.”

⁶ Ne Gomer shé꞉kon ó꞉ia saiowiraiéntane iekshá꞉a nón꞉wa. Ethò꞉ne ne Roiá꞉ner wahawénhase, “Lo-ruhamah shenátont, asè꞉ken iáh kí ó꞉nen shé꞉kon tahonshaketenhre nonkweshón꞉as Israerró꞉nonhke khés nahonshakhenikonrénhse.

⁷ Nok ki enwatsientake ne kenténhron rononhà꞉ke nonkweshón꞉as ne Judah, tánon kwáh í꞉i ne Watiá꞉ner raotiní꞉io tsi enkenónstate; ók iáh ne thakáts꞉te nahénna, khés nasareʼkó꞉wa, khés nateriiósera, khés ne kosathénsa, khés ne rotishá꞉tens.”

⁸ Nó꞉nen ne Gomer sahostarontáko nahkoiénʼa, sók á꞉re saiowirahiéntahʼne rakshá꞉a nón꞉wa ne sahiowiraiéntahʼne.

⁹ Ethò꞉ne ne Roiá꞉ner wahawénhase ne Hosea, “Lo-ammi, tienáthont, asè꞉ken sewakwekon iáh í꞉i tewakonkwéta tèken tánon iáh í꞉i ne sewaní꞉io tèken.”

Nisraeró꞉nonhke Tsi Enskarihwá꞉seronhnike

¹⁰ Ethó꞉saʼne tsi nenhonatiohkowá꞉nenke nonkweshón꞉as Nisraeró꞉nonke kwáh tsi ní꞉ioht tsi tekanesaronhkotáron ne kaniatarakeʼkowáhne, né꞉ne iáh thahónton nahionshé꞉ʼte khés ó꞉ni naiekontserihárenh; tánon thóh nón꞉we nihonwanén꞉ni, “Sewakwekon iáh í꞉i tewakonkweʼtashón꞉as tèken,” kwáh kí enhonwanénhase, “Ne sakoiohokón꞉as ne ronnheónwe Rawenni꞉io.”

¹¹ Nonkweshón꞉a ne Judah ó꞉ni nonkweshón꞉as ne Israerró꞉nonhke skátne tsi enhonwatiiaʼtaró꞉roke, tánon kwáh saiá꞉ta enhonwaiatará꞉ko nonónhtsi ahaton; tánon enhontié꞉nawatste nonhóntsa, asè꞉ken enwenhniserowá꞉nenhke enkénhake ne Jezreel raorihwá꞉ke.