Hebrews 9 - Ohiatonhseratokénti

Nonhontsiakéka Tánon Ne Karonhiakéka Ionterénnaiens

¹ Né tiotierentákwen kaianerénseras iohianerenseraiéntaʼkwe onhʼní꞉ioht tsi ahionterénnaien tánon ó꞉ni kakwahtákwenʼne tsi nónwe nenʼionterennaiénsehke

² Wahtoseróhtakwe, ne tiotierentákwen, né konwahnatónkwahkwe Iohtokénti íken. Thóh kahiéntakwe ne waʼthaseroharáhkwah tánon thóh wahthekwahráhtserothe kanataráhere ne kanataranóron Rawenni꞉io rahorihwáhke.

³ Nonàken ne tekeníhaton ioʼniatarénton né wahtoseróhthe konwahnathónkwah Né Kwáh Iotokénti íken.

⁴ Thóh káh꞉ien ne owistanóron ietsienharáhkwah nónen enhontsáhathe ne kaienkwahrákon ó꞉ni thóh káien ne Ahteriwahseronniátshera Onehróhkwa owistanóron nahóten karorótʼthon tánon thóh íwah ne owistanóron kátʼtshe ne kanátaro thóh íwah, Aaron raónia né iohnerathontáʼon, tánon tehʼkenstenráhke naʼtiawenhráhtsheras thóh nón nikahiatónnion.

⁵ Éhneken ne tsi kanorohkwáhere níties né teninerahóntionthe káhrios né꞉ne Rawenni꞉io rahorihwáhke tsi thóh í꞉nes, ne rahotinerahhóntia tehotiʼthakahráwenh iohróron tsi nónwe ne karihwáhneren niskanikonrénʼen. Nók iáh kíʼ ónwah tiehió꞉eh nakahnikonrahientáton nakwékon tsi nihioteriwahtiéren.

⁶ Kén kíʼ ní꞉ioht ne thóh oriwahshónhas tsi karihwahserónni. Ne ratiʼtsihénstatsis kwáh niaʼtewenniseráke iehontawehiátha ne tiotierénton ionáktaien nahotihióten tsi nihotihiotenserótens,

⁷ ónk nék khók ne kwáh rahtsihenstowáhnen iehatawehiátha ne tekeníhaton ionáktaien natohsherákon, tánon énskat khók ne tsóshera thóh kíʼ nihaiérah. Tánon onekwénhsa ieháhas tsi tenhononwehráhton ne Rawenni꞉io ne raónha rahorihwáhke tánon tsi nihiákon ne iáh tehiakotheriéntare tsi nihiakorihwáhneren.

⁸ Ne Ronikonratokénti teioswátʼthe tsi sakorihoniénnis kí꞉ken nahorihoténsons tsi ní꞉ioht tsi iahiontáwehiate ne kwáh íken tsi iotokénti ionáktaien iáh ahrèkho tekanotónkwen tsi nikaríhwes ne átsthe nòkwahti natósherah shékon nikáthe.

⁹ Né kí꞉ken ne wahtehnientenstákwen tsi niwahtiátons nónwah nikaháwi. Ne kéntons tsi nitiontʼkáwas ó꞉ni tsi nikonwahnateskóntʼtha ne kaʼtshénens tsi nithonwáwis ne Rawenni꞉io iáh takakwéni nahaweriasí꞉iosʼthe ne tehatenonwerátons,

¹⁰ Tsi nék khók ne kákhwah, tánon ienekiráhtha, tánon ne tekontʼthihánion tsi ní꞉ioht tsi taiontenonwehráhton ne ahonsaiontonnakanónni. Kí꞉ken né꞉ne akwékon átsthe nòkwahti nakaianerenseráhti, thóh nék khók enkarihontáko nónen ne Rawenni꞉io oianerenseráse ensakwatáko.

¹¹ Nók Kerístos knáh rohkwáhtʼton tsi raónha ne rahtsihenstowáhnen íken ne tsi niʼiohiáneres nahoténsons knáha kén꞉en kahkérons. Natóhsera tsi nónwe nihoterihwatsʼteríston sénha kowáhnen ó꞉ni sénha iekaiérih; natóhsera iáh ónkwe tehiakosnónsha tehióshon, nètho, iáh tekenikwékon tsi káhshon ne kén꞉en iohontsáte.

¹² Nónen ne Kerístos hiatriótʼkaʼwe nètho atóhsera tánon énskak khók iahónteratsʼthe tsi hiahatáwehiate nonkwetakwékon akorihwáhke ne thóh nónwe ne kwáh iotokénti ionáktaien, iáh tiehóha ne kaiatákeras rahotinekwénsa iáh ó꞉ni ne tehotinákares rahtísinn nahotiahátonke, kék, raónha khók rahonekwénsa hiaháhawe tánon ne wahatiénawasthe né꞉ne tsi nénhwe enhionkwahniákenthe.

¹³ Ne raotinekwénsa ne kaiatákeras ó꞉ni ne teotinakáres ratítsinn ó꞉ni ne wahkenrontákwen ne ronaʼtsaháton ne tionhnónskwahron owíra né ronwahnakenróserhas nonkwesónha tsi nikáien ne kwáh shiʼioriwahkáion iáh tehonatʼkwéniens, tánon ne kí꞉ken shotihiataserónnis ahéren kahawítha ne shiʼioriwahkáion iáh shihonatkwé꞉niens.

¹⁴ Tsi kwáh kí꞉ken orihwí꞉io íken, tohʼniwéso tsi sénha karihwahkwahtákwas ne Kerístos raonekwénsa! Thóh nónwe ne ionnheónwe kashatsʼténsera raónha iahatatátʼkaʼwe né꞉ne ahontakarihwahiérike ne karonhiakénshera raohénton ne Rawenni꞉io. Né raonekwénsa né entionkweriashaserón꞉ni tsi nòkwa ne iáh thènen thekarihwásthas tsi nikarihótenne, ne káti nahónton atsitewaiótense ne ronnheón꞉we Ní꞉io.

¹⁵ Asèken ne kí꞉ken aoríhwa raónha Kerístos sarihwahserónnis náse aterihwahseronniátshera, né꞉ne tsi nihiákon ne Rawenni꞉io iesakonáton nahónton naieʼiéna ne ionhnheʼón꞉we kaiatateríhtshera tsi nihorahrátsʼton ne Ní꞉io. Ne kí꞉ken enwáhton ne thóh nakaiéren tsoríhwah tsi iekenʼhéion né tiakohiatotaríshions nonkweshónha tsi naʼtehonaterientawenhré꞉on tsi nikaríwes ne tiotierénton ateriwahserionniátshera katáh꞉kwe.

¹⁶ Tsi ní꞉ioht ne iontatʼhiatonseronniénni ónenk tsi teiotonwenhtió꞉on nakarihwahniráton nètho tsi nikáien iakohiatonserónni ne iakawenhéion,

¹⁷ Asèken ne kahiatónsera iáh thènen tekástha tsi nikaríhwes sékon nihiakónnhe ne iakohiatonseríhson; thóh ne khók enwahtónnhethe nónen iakawenhéion.

¹⁸ Né tsoríhwah ne tiotierénton aterihwahseronniátshera thóh ne khók wahoriwahnírah tsík onekwénhsa iahatʼkéh꞉ne.

¹⁹ Tiotierentákwen, Mahís wahshakorórih nonkwesónha orihwakwékon ne atsiawenhráhtshera tsi nikahiatónnion ne kaianerenserákon. Ehthóhʼne teotinákares ratísinn tánon ne kaiatákeras raotinekwénsa wáhratsʼthe, onékanos wahtháiesthe, tánon kahiatonseráhke ne kaianerénsera wahtanekéntonwe tánon ó꞉ni ratikwékon nonkwesónhas wahtesakonekéntonwe, hyssop ahonhatasónhas wáhratsʼthe tánon onekwéntara niwahshokóten okénha wahawahnerékthe.

²⁰ Wahénron, “Né kí꞉ken onekwénsa ne kakentoráhkwah naʼterihwahseronniátshera nètho Rawenni꞉io wahiatiawénhratʼtshe tánon asatewénhnaraʼkwe.”

²¹ Kwáh né sahoríhwah ne Mahís tsi tehonekwensentón꞉on ne Karihwahtokénston natóh꞉sera ó꞉ni orihwakwékon tsi niʼióntstha ne tehiontenonwehráhton.

²² Kwáh orihwiioʼón꞉we, tsi nikéntons ne kaianerénsera kwáh thóhʼwah akwékon onekwénsa skanóhares, tánon ne karihwáhneren tóh꞉nek enskanikonrén꞉en tsík onekwénsa entewahwéronke.

Kerístos Raoronhiakénsera Ahéren Kahawítha Ne Karihwáhnerens

²³ Kí꞉ken naorihhoténsons, né tekananethákwens ne karonhiakékhas kahiatakweʼní꞉ios, ónenk tsi thóh ní꞉ioht tsi ahonsakanóhareke. Nók ne karonhiakékhas oriwahsónhas ne iaʼtekontiʼhiáti sénha iohiáneres kariwahnóntons tsi ní꞉ioht ne iontienkwahronniathákwas.

²⁴ Asèken ne Kerístos iáh thóh tiehotawehiáton tsi Tionáktaien ne Iotokénti ne ónhkwe akosnónsha ahióshon, né tekananetákwen ne kwáh orihwí꞉io íken. Kwáh karonhiáke nónhwe nieʼshawénon, thóh nónhwe ónenh iésres í꞉i onkwahriwáhke rahohénton ne Ní꞉io.

²⁵ Ne Sitaeró꞉non ratsihenstowáhnen iehatawehiátha ne kwáh Iotokénti Ionatʼtaien énskak ne tióshera ne ieháhas ne kário raotinekwénsa. Nok né Kerístos iáh nenhné꞉e tóhka tehiorihwáhke tiehotawehiáton ne hiahotatatʼká꞉wen,

²⁶ asè꞉ken ónenk tsi wéso iorihwáhke ahonsahoronhiakénʼen tsi náhe tiotonhontsí꞉shon. Khèʼkhok, nónwah ónen norihwakwékon ákta íweh ne tsi iehiótokʼte, énskak khók iehototáshion, nahonsaharáhkeʼwe ne kariwáhneren ehnahóntawe tsi rahonhatsí꞉wah roronhiakén꞉en.

²⁷ Onhkwetaʼkwékon ónenk tsi énskak khók tsi enhiaiéheie, tánon eʼthò꞉ne ónen Rawenni꞉io teshakohiatórethe.

²⁸ Kwáh ne sahoríhwah Kerístos ó꞉ni rothatátkawen naharonhiáken nénska iakaiénthe ne iakotiokowáhnen akoriwaneraháktsera. Sékon tekeníhaton ienkaiénthe enshatotáshion, iáh tahastéristhe ne karihwáhneren, nók né nasakoniákenthe tsi nihiákon ne ronwáhrahre.