Hebrews 8 - Ohiatonhseratokénti

Ié꞉sos Nonkwatsihenstowáhnen

¹ Ne kwáh kaiatakweʼní꞉io tsi nahóten iakwáhton tsi nió꞉re tsi ionkwentsihenstowáhnen, tsi nikáien né saweientethákwen nonʼnitskwahrahtsherá꞉ti renskwáhere ne Rawenni꞉io Ronontí꞉io ne karonhiáke.

² Rahónha ne ratsihenstowáhnen né kwáh tiotenatʼtháte ne Iohtokénti nónwe, né꞉ne kwáh orihwí꞉io athóhsera íken tsi nikáien ne Roiá꞉ner rohkétskwen, iáh ne ónhkwe akotsána.

³ Kwáh niatehatitsihénstatsis tsi ronwahiataráhkwen nahaterihwatsʼterístake nahotatstse ne Ní꞉io ó꞉ni nashakoteskóntʼthake ne kaʼtshé꞉nens tsi nòkwah ne Rawenni꞉io, tánon káti nonkwahtsihenstowáhnen ónenk tsi knahótenk enshakáh꞉wen.

⁴ Tóhka shíken ohontsiáke ahrésheke, kwáh iáh ratsihénstatsi thakénhake, tioríhwa né ratiʼtsihénstatsis shakonáwis natathawhí꞉tsheras tsi nikarihwahnóntons ne Sitaeró꞉non Raotiʼianerénshera.

⁵ Tis nihotihiótens ne kahioténshera tsi ratiʼtsihénstatsis kwáh nek khók ne tekahnahnetákwen ó꞉ni tsi iotashátare tsi nahoténsons tkáien ne karonhiáke. Kwáh né sháh꞉ka tsi ní꞉ioht tón꞉ne ne Mahís. Nónen ákta shiʼhatohsherónniaʼne ne Iotokénti, ne Rawenni꞉io wahoró꞉ri, “Tasewateweiénton tsi tsiónhni sehwáhser tsi natekenhnaʼríhton tsi nikwahnatón꞉ni né kén꞉en ionhnonhtáhere.”

⁶ Nók ónen, Ié꞉sos thonwáhwi tsi nihotihiotensheróten ne ratiʼtsihénsthatsis né꞉ne sénha tiót꞉the tsi ní꞉ioht ne ronónha, kwáh tsi ní꞉ioht naterihwahsheronniátshera tsi nihokwahtákwen tsi natehónthere nonkwehshónha tsi sénha ne iohiánere, tioríhwah tsi né kakensherákwen tsi wahrahratsʼtánion ne iohiáneres.

⁷ Tóhka iáh thènen tahiotónhake ne tiotierénton aterihwahsheronniátshera, kwáh kíʼ iáh thènen tathahiotonwenhtiohátonke ne tekeníhaton.

⁸ Nók ne Rawenni꞉io shakorihwatʼtsénriase ne rahonkwetaʼsónhas nónen enhénron, “Táh꞉we nenníseras, ráhton ne Roiá꞉ner, nónen á꞉se enshekheʼhiónnien naʼterihwahsheronniátshera ne onhkweshónha ne Israeronónke tánon né onkwesónha ne Judah.

⁹ Kwáh iáh thóh tahiothónhake tsi niʼiohthónʼne ne kahianerensehrakáion tsi niwákson tsi naʼtehiakwáhtereh ne sathiʼtisoʼthonkonhkén꞉en nó꞉nen ne sonshaʼkhenentsí꞉ne tánon shaʼkhehiatinekénʼwe ne Egypt. Iáh tehotirihwahtókenne tsi nòkwah nahterihwahsheronniátshera ne khesenhénni, tánon káti iáh thènen tekhehiatahonshatáton.

¹⁰ Nónwah, ne áse aterihwahseronhniá꞉tshera nenhkón꞉ni skátke nonhkweshón꞉a ne Israelronónke nón꞉we tsi néntewe nenhní꞉seras kwáh kén ní꞉ioht, ráton ne Roiá꞉ner: Rahotinikonrakéson nónwe néntsien natianerénseras tánon rahonerianésons nónwe nenkʼkhiáton. Í꞉i ne raotiʼNí꞉io enkénhake, tánon ronónha nakonhkweʼtahshón꞉a enkénhake.

¹¹ Iáh ónhka tsi niháti nashakotirihónnien ne ronahténros tóka ó꞉ni ahshakotiʼrórih ne tehonnonsanéken, ‘Tsienteríhak ne Roiá꞉ner,’ tiorí꞉wa tsi ratiʼkwé꞉kon enhiontienteríhake, né꞉ne kwáh kenk nahiesénnaske tsi nió꞉re ne kwáh tsiaʼkotsénnahthe.

¹² Ensehkhenikónhrenseh ne raoʼtirihwahneraháktsheras tánon kwáh iáh tahonshaʼkehiárahke tsi naʼthahonahterenthaʼweréhon.”

¹³ Tsi waʼtharáhkwen náse ahterihwasheronniátshera, Rawenni꞉io wahriónnien nahonkahiónne tiotserénton tkáson; tánon né thènen ahonkahiónʼne tánon onhteráhnie kwáh iostóre tsi enʼwá꞉ton.