Hebrews 7 - Ohiatonhseratokénti

Ne Ratsihénstatsi Melchizedek

¹ Kí꞉ken Melchizedek raónha ne Ronontí꞉ioʼkwe ne Salem nónwe tánon raónha ne ratsihénstatsi tsi nòkwa ne Rawenni꞉io ne Kwáh É꞉neken Thótte. Né Abraham shatontahotentionhátie ne tsi wahterí꞉iokwe shakoshennionhátie ne kaiéri nihatinontiʼiotsheráke, Melchizedek iatoteráhte tánon wahohiatatériste,

² Ónk ne Abraham waháwen ne oieríhaton tsi níkon rohientátieʼne. (Ne tiotierentákwen tsi nikéntons ne Melchizedek raosénhna ne ne “Ronwahnontí꞉io ne Kariwakwahrishióntshera”; né tioríhwa tsi raónha Ronontí꞉ioʼkwe ne Salem nónwe, né raosénhna né nónhne kéntons “Ronwahnontí꞉io ne Skén꞉non.”)

³ Iáh kanèka tekaiáton nahonteweiéntonke ne Melchizedek roʼníha tóhka ó꞉ni ne ronisténha tóhka ó꞉ni ne shakhosoʼtonkonhkén꞉en; iáh ó꞉ni tekahiáton tsi nihonakeráhton tánon tsi nihawenhéion. Kwáh né teskaieróntare ne Rawenni꞉io Roiénha; raónha ratsihénstatsi tsi nénwe.

⁴ Satʼkáthos, káti kén, tsi nironkwehtowáhnenʼne. Abraham, ne ronkwetowáhnenʼne tsi tewahsotkén꞉en, waháwen noieríhaton tsi níkon roienà꞉on ne tsi wahterí꞉io.

⁵ Tánon tsi tahawahtsitathátie ne Levi tsi niháti ne ratiʼtsihénstatsis kwáh rohnateriwahiénni tsi nikéntons ne Kaianerénshera nahatiróhroke nonkwé꞉ne noieríhaton tsi nihotí꞉ien ehnónwe ne Israeronónke, ne khók ne ronónha rahononkwetashónha íken, iawerohátien tsi Abraham nónhne nón nithohnatwahtsirínon.

⁶ Ne Melchizedek iáh thóh nón꞉we tetotwatsrí꞉non rononhà꞉ke ne Levi, ok thoró꞉ron ne oierí꞉haton ieká꞉te noʼwísta tsi nitsawè꞉non rahonhà꞉ke ne Abraham tánon wahohiataté꞉riste, rónkwe Abraham né꞉ne roienà꞉on ne Rawenni꞉io raoraráhtsera.

⁷ Kwáh iáh thènen tatetiakonikónrahke tsi nikáien né shakohiataterístha tsi sénha ne ronkwetówah꞉ne tsi ní꞉ioht ne enhonwahʼiataterístha.

⁸ Tsi nòkwa ne ratsihénstatsis noieríhaton ne karóhron né tsi niháti ne ronnónkwe ónen ronenhé꞉ion; nók ne Melchizedek noieríhaton tsi karóron né꞉ne sékon ronònnhe, tsi niwáhton noriwahtokénti.

⁹ Tánon, naiaiéron, nónen ne Abraham wahakáriake noieríhaton, Levi (rahónha rahowáhtsire rotiróhron noieríhaton) tánon ó꞉ni rokariákon ne rahónha.

¹⁰ Asèken ne Levi arókhok shionakeráhton, ónk kíʼ ronakeráton, naiaiéron, rahiátakon ne rosótʼtha Abraham sathiaʼtátken ne Melchizedek.

¹¹ Kwáh tsi kanonkwáhʼien ne levitical ratiʼtsihénstatsis né thóh kaianerénsera thonwahnáwi nonkweshónha ne Israeronónke. Káti, thó꞉ka ne rahotiʼhioténseras ne levitical ratiʼtsihénstatsis nahontakarihwahiérike, iáh tataiotonhontiohónhake tihahiátathe ne ratsihénstatsi ahototáshion, saiáta né꞉ne tsi ne nihatsihenstoténhne kénhne ne Melchizedek, iáh tsi nihotirihóten ne Aaron.

¹² Asèken nónen teiotʼthénion ne ratiʼtsihénstatsis, ónenk tsi tenwahtatháwike ne kaianerénshera.

¹³ Tánon ne Sonkwaiáner, tsi rahónha kí꞉ken orihwahshónhas róhton, tiʼkentiókwahthe nónwe nihahiátare, tánon kwáh iáh ónhka tsi nihotiókwah nonwénhton tehotʼtsihenstón꞉ni.

¹⁴ Kwáh íken tsi kaienteréʼon thóh nónwe nihonakeráton ne rahotiʼtiókwahkon ne Judah; tánon ne Mahís iáh teshakotaráhkwen kí꞉ken kentiókwah shasakothárakwe ne ratiʼtsihénstatsis.

Thiʼkatsihénstathe, Tahonsakaieróntarahke Ne Melchizedek

¹⁵ Ónen sénha wahtsioswátʼtheʼne norihwahshónha; thiʼhatsihénstate wahokétothe, kwáh teskaieróntare ne Melchizedek.

¹⁶ Ronwatsihenstónni, iáh ónhkwe tehiakoianerénseras iáh ó꞉ni ónhkwe tetiakoniarótaron, ónk thóh nónwe nitiawénon né kashatsténsera né iónnhe né꞉ne iáh nonwénhton tiahontókten.

¹⁷ Asèken wáhʼton norihwahtokénti, “Kwáh tsi nén꞉we tsi enstsihénstatsi enkénhake tsi ne nihatsihenstoténhne kénhne ne Melchizedek.”

¹⁸ Noiahnerenserakáion, káti, ákta nón nikáien, tioríhwah tsi iotsiʼióhakwe ó꞉ni iáh thènen tekarihwáhsthaʼkwe.

¹⁹ Asèken ne Mahís raoianerénsera iáh tewáhtonskwe né thènen ahontakarihwahiérithe. Tánon kiʼnónwah ónen sénha iohiánere tsi tionkwáhrare tsi nikakwahtákwen né꞉ne ákta aítewehthe rahonháke ne Ní꞉io.

²⁰ Ieʼiohtasóntere, kwáh ó꞉ni Rawenni꞉io rohriwahniráton. Kwáh iáh thènen tekarihwahniráhtonkwe ne rohnátiakes sahonwahtitsihenstónni.

²¹ Nók Ié꞉sos wahaʼtsihenstón꞉ni nónen sahariwahnírate ne Rawenni꞉io wahawénhase, “Ne Roiá꞉ner iohriwahníron rorahrátston tánon ó꞉ni iáh tatahontaháktate: ‘Kwáh tsi nén꞉we tsi enstsihénstatsi enkénhake.’”

²² Kí꞉ken tetsatʼtí꞉hen, káti, ó꞉ni iónnis ne Ié꞉sos rahriwahnírats sénha iohiánere naʼteriwahsherionniátshera.

²³ Sékon óia iahtestsiatʼtíhen: kwáh rohnatiokowáhnen ne thiʼhátite rahtiʼtsihénstatsis, tioríhwah wahonníheie tánon iáh tehiotón꞉on ne iahonatashóntehrake ne raotiʼiohténshera.

²⁴ Nók né Ié꞉sos tsi nénwe tsi ronnheón꞉we, tánon ne raohioténshera tsi ratsihénstatsi iáh ónka nakóren tiashakaohétstaʼse.

²⁵ Tánon káti rohkwénion, nónwah ó꞉ni tiókonte, nashakoniákente tsi nihiákon né rahonháke nónwe nién꞉ien rahohénton ne Ní꞉io, tioríhwa tsi ronnhehónwe nahoniténtase ne Rawenni꞉io ne rahotirihwáhke.

²⁶ Ié꞉sos, káti, ne ratsihenstowáhnen né teshonkwáhwis tsi naʼteionkwahtonwenhtió꞉ni. Rohiatatokénti; iáh tahóten tatehaterientawénhries iáh ó꞉ni tekénteron ne kariwáhneren ne rahonháke; tehonwahkháshion tsi nòkwah ne rotiriwáhnerens tánon ronwahiatakaratáton è꞉neken tsi karonhiátes.

²⁷ Kwáh iáh thènen tateshontiérens nakorénsons ratiʼtsihénstatsis; iáh thaʼtehotonwenhtió꞉ni nahatienkwahrónniate niaʼtewenhniseráke ne raoriwahneraháktshera ahontakahénte thóh ne nakorénshons akorihwahneraháktsheras. Énskak khók iehotkháwenh ne karonhiakénsera, kwáh énskak khók ieiohterátston, né nónen rahónha wahatatewénhthete.

²⁸ Ne Mahís raoianerénsera né iakohiatarákwahs ne ronónkwe ne iáh tehionkweʼtí꞉io nahontsihenstónni; nók ne Rawenni꞉io raorahrátshera kwáh ne rohriwahniráton, onahkènke niéh꞉io tsi ní꞉ioht ne kaianerénsera, Roiénha rohiatarákwen, tsi nikáien ne roiánere roiónni tsi nénwe.