Hebrews 4 - Ohiatonhseratokénti

¹ Nónwah, Rawenni꞉io wahshonkwáhtatshe ne karahrátʼtsera nahónton aitewahiéna natorihsénhtshera tsi nihotʼró꞉ri. Ánion tewahtennikonráhren, káti, tóhsa ónkah tsi nítion naisewahrihwahnóron né iáh taisewahienásere nètho kahrahrátsʼton.

² Asèken ionkwahrónken ne karihwí꞉ios, kwáh tsi ní꞉ioht ne ronónha. Ronharónken naterihwahnohtáhtshera, nók iáh thènen tehotiʼhiatakenáh꞉on, tioríhwah nónen sahonatʼthóntehne, iáh tehotiienà꞉on ne tewehtákwen akénhake.

³ Tsi nítion ne tionkwetákwen, káti, entewahiéna natorihséntshera tsi nihorahrátsʼton ne Rawenni꞉io. Kwáh thoʼní꞉ioht tsi niháwenh, “Wahkenakwenhenʼne ó꞉ni iorihwahníron wakarahrátston: ‘Iáh nonwénton tiahatiráhtaʼne nonwentsá꞉ke tsi nónwe nikhehionhontsá꞉wi nahonthoríhsen!’” Né kiʼwahénron iawehrohátien ne raʼoiohténsera ónen sikáshon ne shontakaháwi ne sharonhontiónni.

⁴ Asèken kakʼnónweh nohrihwahtokentíke né kí꞉ken kathahráhkwah ne tsiatákhaton nón꞉ta: “Rawenni꞉io wahatoríhsen ne tsiatákhaton nónta tsi nòkwah ne raohioténsheras.”

⁵ Kwáh né kíʼ séhkon sahoríhwah katharáhkwa: “Iáh nonhwén꞉ton tiahatiráhtaʼne nonwentsá꞉ke tsi nónwe nikhehionhontsá꞉wi nahonthoríhsen!”

⁶ Tsi nihiákon ne tiakotierénton iakorónken ne karihwí꞉ios iáh tehotiʼienáhon nètho atorihséntshera, tioríhwa tsi iáh tethonetákwen. Kwáh áhre, káti, tihátiʼthe ronwahtiʼrihwáhwi nahatiʼiéna.

⁷ Né kí꞉ken iawehnéston tsi kwáh orihwí꞉io nètho Rawenni꞉io tsi ó꞉ia shawenhnisherahrákwen, né konwanaʼthónkwah “Ónhwah wenhnisehráthe.” Wéso iosehráke onakènke né shotharáhkwen raonháke ne Táwit né orihwahtokentíke nónwe ónenk watʼró꞉ri: “Tóhka ensathón꞉teʼne ne Rawenni꞉io raowénhna nónwah wenhniseráthe, tóhsa sathenikonráksat.”

⁸ Tóhka ne Joshua ahontashakówike nonkwesónha tsi nihorahrátsʼton ne Rawenni꞉io, ne Rawenni꞉io iáh tahoshaotharáhkwen nohnakènke nó꞉ia wennihseráthe.

⁹ Kwáh kíʼ tsi ní꞉ioht, nók kíʼ, thóh shékon iotahténron ne Rawenni꞉io rahonkwetasónha nahontohrísen tsi ní꞉ioht tsi rothorísen ne Rawenni꞉io ne iawenhtatokentíke.

¹⁰ Asèken tsi niʼiákon neniehiéna nètho atoriséntshera tsi nihorahrátsʼton ne Rawenni꞉io enhontorísen tsi nòkwah ne kwáh rohnónha raotiʼioténhsera, kwáh tsi ní꞉ioht tsi rohtorísen ne Rawenni꞉io tsi nihoiotén꞉en.

¹¹ Ánion káh, káti, iatethewahtatʼtiáhat aitewahiéna nètho atoriséntshera, nekáti ne tóhsa ónhka tsi nítsion naionkwahriwahnóron tsi né nihotihiatawénhen tioríhwa tsi nitohnathotʼtaníhakwe naʼthokhátshera.

¹² Ne Rawenni꞉io raowénhna tsi iónnhe ó꞉ni iohiótens, sénha iohiothí꞉ie tsi ní꞉ioht ne tetsarónkwen nòhkwati tsi ioʼiotíhie. Kwáh iatheiohétstha tsi kahrénas, tsi nónwe natónnhets tánon ne onikónra nikáien, tsi nónwe naʼteiohtistoterónnions ó꞉ni nostarónwahs skátʼke ietsátons. Tehkaiatorétha nahoskanétsheras ó꞉ni nahononthonnióntsheras nahwéri.

¹³ Kwáh iáh thahóten thaónton nahotashéten ne Rawenni꞉io; kwáh tsi nahoténshons ne kashahánion tehkatakwahríhton ne raohénton. Tánon rahonhà꞉ke nón nihionkwahteriwahiénni akwékon entiohétsthe tsi nahionkwahtiéren.

Ié꞉sos Ne Ratsihenstowáhnen

¹⁴ Kwáh, káti, iohníron tsi ionhkwahtienawastónhak tsi nitionkwetákwen. Asèken Rahtsihenstowáhnen ionhkwahtsihénstaien thóh nieshawéhnon tsi ténteron ne Ní꞉io—Ié꞉sos, né꞉ne Ní꞉io Roiénha.

¹⁵ Nonkwahtsihenstowáhnen iáh raónha tèken ne iáh taonikonraientáhseke tsi niʼionkwahtsiʼióha. Onk khèkenk, Rahtsihenstowáhnen ionhkwahtsihénstaien kwáh tsík nitiotieráhton tsi tehʼonwahnikonraʼráskwe kwáh né sháka tsi kíʼ ninihionkwahiátawes, nók iáh teorihwáhneren.

¹⁶ Áhnion kíʼ ionkwahnikonrahnirónhak, káti, tánon ákta ítewet ne Rawenni꞉io raoniskwáhrahne, thóh nónwe tkáien ne kenténrat. Thóh nónwe entewahiénna ne ataniténron ó꞉ni entewahtiénri ne kenténrat naionkwahiénawahse nónen thenionkwahtonontióseh.