Hebrews 11 - Ohiatonhseratokénti

Tewetákwen

¹ Naiakoiéntahke ne tewetáhkwen ne naiorihwí꞉ioke tsi nahoténsons tewahskáneks, naiorihwí꞉ioke tsi nahoténshons ne iáh tewáhtons aitewatʼkátho.

² Ne tsi thohnetákwenhne nonkwesónha ne siʼiorihwahkáions wahhatiʼiéna ne Rawenni꞉io raorihwahnirátʼtshera.

³ Tewehtákwenh seh nón nitewéhtha tsi ionkwahnikonrahiéntas ne tsi ionwenhtsiáte ó꞉ni ne tsi karonhiáte tsi Rawenni꞉io raowenhnasónhas ioshahánion, nekáti tsi nahóten iotón꞉on naiontʼkátho ne kashaháton tsi nahóten ne iáh táhton naiontkátho.

⁴ Tewehtákwenh seh waʼhahón꞉nien ne Abel nahotát꞉tshe ne Rawenni꞉io sénha iohiánereh ne iontienkwahronniatáhkwa tsi ní꞉ioht ne Cain. Rawehtakwénhtshera nonʼnontáwe tsi wahaiéna ne Rawenni꞉io raorihwahnirátʼtshera tsi tronkwetaiéri, tioríhwah tsi kwáh rahónha ne Rawenni꞉io waharihwahnírathe ne raotathawíhtshera. Tsi nikéntons ne rawehtakwáhtshera ne Abel shékon nihatátis, iawehrohátien tsi ónen rawenhéion.

⁵ Tewehtákwenh seh wahonónstathe ne Enoch tsi iáh tehawenhéion. Khèʼkhok, Ni꞉ióʼne niahonwahiaténhawe, tánon iahónka tehiotón꞉on nahonshahonwahiataʼtshénrion, tioríhwa tsi Rawenni꞉io iaohiaténhawe. Norihwahtokénti wáhton né꞉tho Enoch nohénton shahonwahiatakaráhtaʼthe, thóh nikonrahieríhton ne Rawenni꞉io.

⁶ Kwáh iáh ónhka taiekwéni nahontahonwahnikonrahiérithe ne Rawenni꞉io tokà꞉iah tekáien ne tewetákwenh, asèken ónhka Rawenní꞉ioʼke nienhén꞉ien ónenk tsi enhiakoiéntake ne tewehtákwenh ne Rawenni꞉io tsi rónnhe ó꞉ni teshakorihwahserahkwénhnis nónka ronhiaiathí꞉shaks.

⁷ Tewehtákwenh seh wahkakwéni ne Noah wahothóntene ne Rawenni꞉io tsi nihoronkaténnisʼkwe tsi nahorihoténshons ne tsi niaʼhawehnonhátie ne iáh tewáhtonskwe nahatʼkátho. Wahowénhnarahkwe ne Rawenni꞉io tánon wahaʼthonhión꞉ni tsi nónwe ne rahónha tánon ne raowáhtsire nenhatiniákenne. Tsi naháwenhne, tsi ionwentsiáte ontʼréwahthe, ónk ne Noah wahaiéna ne Ni꞉ióʼne nontáwe ne kariwahkwahrishóntshera tsi nitkáhas ne tewehtákwenh.

⁸ Tewehtákwen seh wahahónnien ne Abraham nahatewénhnaraʼkwe tsi nahóten ne Rawenni꞉io rohróhri tsi tkanakerahseráien niáre tsi nihorahratsʼténni ne Rawenni꞉io enháwenh. Wahatewénhtethe ne raonakeráhsera iáh tehotheriéntare kah nónwe niahawehnonhátie.

⁹ Né tewehtákwenh tsi ní꞉ioht ne tihahontsiáte tsi thóh rahnákerekwe né non nikanakerahseráien ne tsi thóh nónwe nihorahratsʼténni ne Rawenni꞉io. Ahtoserahkónshon non nihenteróntaʼkwe, né nònne sáka ne Isaac ó꞉ni ne Jacob, kwáh ne sáka tsi nisakorahratsʼténni ne Rawenni꞉io.

¹⁰ Asèken ne Abraham ne rohráhrekwe ne kanahtowáhnen ne Rawenni꞉io rotenikonrónni ó꞉ni ró꞉shon, ne kanatowáhnen né꞉ne ieʼiotkontákwenh thenʼkenstoró꞉tahke.

¹¹ Tewehtákwen seh wahkakwéni ne Abraham tsi kanísera waháton, iawehrohátien tsi ónen sóhtsi shihoksténha tánon ne Sarah akahónha ó꞉ni iáh tahónton nahiakowirahiéntaʼne. Thonwetákwenhne ne Rawenni꞉io tsi rotienawáston tsi nahóten rorahrátston.

¹² Nók kíʼ ne Abraham kwáh skanórons nahawenhéion, kíʼ sahiáta rónkwe thóh non nitsawéhnon tsi nihonatiokowáhnen wahawahtsiraiéntaʼne tsi ní꞉ioht né iotsistokwahrónnion ne karonhiakéshon, thóh nihonatiókwah tsi ní꞉ioht ne iáh tahónton naiónshete nonesarónkwah naʼtsatʼtéh꞉shon.

¹³ Kwáh seh tewehtákwenh nónwe nihotenhénion kíʼ nonkweshón꞉as. Iáh tehotiʼienáhon tsi nahoténshons rohrahrátston ne Rawenni꞉io, nónk ahí꞉non nío꞉re tsi wahʼhonwahtíken tánon iahonwahtí꞉konke, tánon kwáh tiahontʼrohrikó꞉wah tsi thiʼononhontsiáte ó꞉ni rothinatenháwis ne tsi ionwentsiáte.

¹⁴ Ónhka né tóh nikarihóten iónton kwáh teioswátʼtet tsi ronʼnéshas kanakeráhsera nahonnawenhkónwehke.

¹⁵ Iáh ne tehonnonthónnions ne kahnakerásera thonatewenhthéton; tóhka thonahiótonhke, aonahtesennaientáʼon ne ahonshaʼonáktonke.

¹⁶ Khèkhok, sénha kahnakerahserí꞉io tohnatonwenhtióniʼne, né karonhiakéka kanakeráhsera. Tánon káti ne Rawenni꞉io iáh tehathé꞉ens naʼhonwahnátonkwe Raothiʼní꞉io, tsoríwah tsi shakonahtonniénni.

¹⁷ Kwáh seh tewehtákwenh wahahónnien ne Abraham wahotewénhthete ne roiénha Isaac nahononwahriákon nónen ne Rawenni꞉io shaotheniéntʼthaʼse. Rahónha seh ne Abraham ne Rawenni꞉io rorahratsʼthé꞉ni, nók kíʼ rohtathewehiennentáhonʼne nahothewénhtethe ne énskak khók rohnekenterontseráien nahononwahrià꞉kon.

¹⁸ Ne Rawenni꞉io tsi nihoróhri, “Tsi nienhsathwatsí꞉rine raonhá꞉ke ne Isaac nón꞉we nenhtón꞉ne kwáh kíʼ tsi nikoniaʼraratsténhni.”

¹⁹ Ne Abraham wahanonthónnionwe ne Rawenni꞉io rohkwénion nahonsahʼokétsko ne Isaac ne kenhé꞉iatʼne—tánon, naiaiéron, ne Abraham shoienáhon ne Isaac tsi iáh tehawenhéion.

²⁰ Tewehtákwen seh wahʼhahónnien ne Isaac tsi waharáhratsʼte ne kahiataterítshera tsi niaʼhonenonhátie ne Jacob tánon ne Esau.

²¹ Tewehtákwen seh wahahónien ne Jacob wahsakohiatatéristhe ne sahtihiatátʼtions ne Só꞉se sakoienokónhas nohénton narénheie. Raʼoténnits wahatiénawaste tánon wahtononweráhton Rawenni꞉io.

²² Tewehtákwen seh wahahónʼnien ne Só꞉se, nónen ákta shiʼrenheiónsere, wahatárahkwe ne Israerʼró꞉nons tsi nishonanahkerákwen ne Egypt, tánon wahaténnhaʼne tsi nakaiéren ne raoierónta.

²³ Tewehtákwen seh wahakahónnien ne Mahís ronwahiénha nahonwahʼiatásehthe áhsen niwenhnítahke shiʼtonahkeráhton. Wahiatʼkátho tsi nihaksatí꞉io raksáha, tánon iáh tehothitianíkon ne iáh tahiatewénhnahraʼkwe tsi nihorihowahnáton ne Ronontí꞉io.

²⁴ Tewehtákwen seh wahahónnien ne Mahís, nónen sihotehiáron, iáh tehotontáton ne Ronontí꞉io sakoiénha ronwahiénha ahonwahnatónkwahke.

²⁵ Ne taharáhko skátʼke rahtironhiáken ne Rawenni꞉io rahonkwetaʼshónha tsi ní꞉ioht né꞉ne ahotiennonniatákwenh ne karihwáhneren ne kénk nikaríhwes.

²⁶ Wahanonthónnionʼwe nahonwahnikonrahkaréwahthe ne Kerístos aharihónni iawehtatʼtsáni sénha ne wéso satekéna tsi ní꞉ioht ne tsi níkon iohtsokowahtsheráien ne Egypt, asè꞉ken thóh nónwe iatehakánere tsi niahawenonhátie ne tkakariaktsheráhehre.

²⁷ Tewehtákwen seh wahahónnien ne Mahís nahonsahanakeráko ne Egypt kwáh tósa thènen ahoteronníhake ne Ronontí꞉io rahonakwáhtshera. Tsi síken ní꞉ioht ne wahóken ne iáh theohiatáken Rawenni꞉io, iáh theothontáton nahosahókton.

²⁸ Tewehtákwen seh wahahónnien ne Mahís nahakwahtáko ne wahtohetsthákwah ne tiakoniakéntha ó꞉ni nahaténnhane ne takanekwenséntonhke tsi kanonkarónton, né꞉tho Raronhiakerónon ne shakowénthos tóh꞉sa ashakório ne tiotierénton rotiwiraientáʼon ne Israerʼró꞉nons ne roskenrahkéte.

²⁹ Tewehtákwen seh wahonónnien ne Israerʼró꞉nons nahatikwéni tahatiʼiáhiake ne Onekwénhtara nikaniataróten tsi síken ne tohnahʼiotónhake nahiohontsiatʼténhake; nók nónen ne Egyptró꞉nons wahonteniénten ne tahatiʼiáhiake nonékanos tahiakoróhroke.

³⁰ Tewehtákwen seh wakakwéni wahkaréniente ne tewahshontóthakwe ne Jericho né nónen ne Israerʼró꞉nons tsiataʼnónta wahtonkwahtaséh꞉nion tsi tewahshóntote.

³¹ Tewehtákwen seh wahonónstathe ne tiotakwahkaréni Rahab tsi iáh tekonwahnonwariákon tsi niháti ne iáh tehonwahwenhnaráhkwaʼkwe ne Rawenni꞉io, asèken watiakoróhton ne Israerʼró꞉nons ne ronteriwahtórats.

³² Iakatashonterénken? Iáh tewahkenákʼtothe ne Gideon akhetérahkwe, Barak, Samson, Jephthah, Táwit, Samuel, tánon ne iehatirihwáhkenskwe.

³³ Tewehtákwen tsi ní꞉ioht tsi wahʼhontirí꞉ioste tánon kanakerahserakwékon tsi wahontʼkwéni. Tóh nahatí꞉iere tsi nateiotonwentióʼon tánon wahatiʼiéna tsi nihorahrátston ne Rawenni꞉io. Wakonwatískweʼke ne kénreks,

³⁴ wahónsʼwathe ne kentiohowáhnens, shahatiniákenne nasarekówah ahonahwén꞉ton. Rohtitsiʼióhakwe, nok wahatishátsʼtenne; rahtishátsʼthekwe ne tsi wahtirí꞉io ó꞉ni wahshakotisénni ne ronwahtishónskwe ne kenkʼthitoné꞉non.

³⁵ Ne konnónkwe shahonwahtiʼiéna ne ronwahtinorónkwa ahotiwáhtsires tsi nó꞉kwa ne kenheiátne. Nók ne ronahtiakéson Rawenni꞉io ne ronwahniahéʼsen ók wahonwatironhiakénten, sénha ne tathiʼráhkwas nahonníheie tsi ní꞉ioht ne aʼhonwahtharóntienʼse ne Rawenni꞉io tánon ne aʼhonthatewení꞉ioke. Shonatonnhéton ahotiwáhtsires. Ne ronatiakhésons, iáh tehotiʼienà꞉on ne atatewenhnihiótsheras, karonhiakenserákon tsi wahonníheie iáh teʼiotónʼon nahonshahonwahtikhétskwen nahioianeréhake tsi ahonshahonnónnheke.

³⁶ Ótiakes tahonwahtiʼiéron ó꞉ni ókwire wahonwahthinonwáhreke, tánon ótiakes ó꞉ni waʼthonwatironkwahsánahke tánon tsi tiontatenothónkwah niahonwahthihiaténhawe.

³⁷ Wahʼhonwahthinenʼióhiake, tánon áshare wáhonsthe wahthonwahtihiátiake, tánon ahsharekówah wáhonthe tsi wahonwahthinonwahriákon. Tehiotinakarontónha tánon kaiatákeras kanéhon rohnatʼtsheronniá꞉ton—ne iakóten, shakotironhiakéntha, ó꞉ni shakonatiéskwahni.

³⁸ Ne tsi ionwenhtsiáte iáh tsatekaiéri tsi niʼiohiá꞉nere ne rahotiriwáhke! Tóh ní꞉ioht tsi tehontawénhries tsi ní꞉ioht ne rohnatiatatónʼon ne kahentakekówah ó꞉ni ne tsi ionnontarónnions, ostenrakónsons tánon oshónwahkons nónwe nihathiterónton.

³⁹ Tsi nihothisenhní꞉ios tsi niháti kí꞉ken tehonaténtion ne tewehtákwenh! Nók kíʼ iáh tehotiʼiená꞉hon tsi nihorahrátston ne Rawenni꞉io,

⁴⁰ tioríhwa ne Rawenni꞉io sénha ioiánere rohthenikonrónni nonkwahríwahke. Ne rahothenikónrah kwáh nék tsi ionkhihiariskóton né enhotihianerásten.