Hebrews 1 - Ohiatonhseratokénti

Ne Rawenni꞉io Raonháke Ne Roiénha Nónwe Nihatáhtis

¹ Tsi nitsawénon Rawenni꞉io wéso iorihwáhke sakotaráni ne ietʼtisotthonkonhkén꞉en tánon ó꞉ni wéso tsi nitsawéhnon ne rotitokenshéhakwe ó꞉ni shakotahráhni,

² nók kíʼ nonakènkha tsi niwenniseraténions raonháke ne roiénha nónwe nishonkwataránis. Raonháke nónwe nitsawénon tsi kashahánion ne kwáh tsík nahoténson, tsi nikáien ne Rawenni꞉io rohiatarákwen ne oriwakwékon ahowenkónweke ne tsi iehiótokʼte.

³ Renésta tsi naʼteioswátʼte ne Rawenni꞉io raohiatanerakwátshera tánon kwáh teshiatiéren ne Rawenni꞉io tsi niʼrónnhe, ne tsi nihioshatstenserowánen ne raowennashón꞉ʼa ne iotsenawastánion tsi orihwakwé꞉kon. Sahariwaié꞉rite ne kaʼnikonrénhtsera tsi nihiakoriwáneren nokwetaʼkwékon, karonhiá꞉ke ionsahátien shaweientetákwen nokwáti ne Ní꞉io, ne Rohshatsʼtenserowáhnen.

Tsi Nioshatstenserowáhnen Ne Ní꞉io Roiénha

⁴ Ne Roiénha sénha ne ronwahkowahnáston tsi ní꞉ioht ne ratironhiakerónons, kwáh tsi nikasennóten nètho Rawenni꞉io rosennáwi sénha ne kasennowáhnen tsi ní꞉ioht ne raotisennasónha.

⁵ Asèken ne Rawenni꞉io iáh nonwénton tsi niháti ne ratironhiakerónons tesahrokó꞉ri “Í꞉se ne konhiénha; ónhwa wenhniseráte í꞉i ne ianíha wakáton.” Thóka ó꞉ni ónkak tsi niháti ne ratironhiakerónon ne ashakorórihke, “Í꞉i ne roʼníha akénhake, tánon raónha ne riʼiénha enkenhake.”

⁶ Nók nónen ne Rawenni꞉io ákta síweh nahontaoténiethe ne tiotserénton rawennakeráton roiénha ne tsi ionwentsá꞉te, wahénron, “Ratikwékon ne Rawenni꞉io raoronhiakerónons ónenk tsi enhonwahsénnaien.”

⁷ Nók tsi nòkwah ne ratironhiakerónons Rawenni꞉io wahénron, “Rawenni꞉io shakowehronniénʼnis ne raoronhiakerónnons, tánon ne raonhatsheraókons iotónkote nohtsí꞉re.”

⁸ Tsi nòkwa ne Roiénha, tsi naʼiotónhake, Rawenni꞉io wahénron: “Ne Sanakeráhsera, O Ní꞉io, enkátake tsi nénweh! Né sáhnia né wenéstha tsi ioiánere tsi ní꞉ioht tsi sehiatkorástha ne shonkweʼtashónhas.

⁹ Sehnorónkwah nahóten ne tkariwahiéri tánon skenrónni nahóten ne iáh tetkariwahiéri. Né ká꞉ti aoríhwa ne Rawenni꞉io, ne Shaʼní꞉io, í꞉se iahiatará꞉kwen nahisanontí꞉ioke tsi ní꞉ioht nón꞉kak akóren rónkwe, tánon sénha wé꞉so thowéron natʼtsenhnonhniátshera ne shonháke sénha tsi ní꞉ioht ne ronátsiakes roʼtinontí꞉ios.”

¹⁰ Tánon ó꞉ni wahénron, “Í꞉se, Saiáner, tsi tiotáshawen sonhontsí꞉shon, tánon kwáh í꞉se shatsháne ioshón ne tsi karonhiáte.

¹¹ Enshewahterihwáhton, ónk níse ehʼenshésheʼke; ónk ratikwékon enohtiksténhane tsi ní꞉ioht natʼtsherónnia.

¹² Thoʼ ní꞉ioht tsi enshehiatiénawasʼte tsi ní꞉ioht nahtsatawitsherowáhnen, tánon thóh ní꞉ioht tsi tenhontatonnaténi tsi ní꞉ioht natʼtsherónniat. Nók níse tiókonthe ne shaʼshón꞉ha, tánon iáh nonwénton tiashíheie.”

¹³ Ne Rawenni꞉io iáh nonwénton tsi niháti teshakoróri ne raoronhiakerónons: “Kénʼen shátien tsi keweientetákwen tsi nió꞉re ne iesháswens enkheiatakéron ne shashitókon tsi ní꞉ioht ne teshashitaráh꞉kwa.”

¹⁴ Nahóten nen꞉ne ne ratironhiakerónons? Né꞉ne rotihiatatokéntis ronwahʼiótense ne Rawenni꞉io tánon rahónwah teshakotóries nashakotisniénon tsi nihiákon neniehiéna ne kaiatakenhátshera.