Haggai 1 - Ohiatonhseratokénti

¹ Ne tekeníhaton sihioseratáhtie né꞉tho Darius siononhtí꞉io, ne iahiá꞉ʼkhaton siwenhnì꞉tahre, ne tiothenhniseratierénhton ne wenhnì꞉tare, ne raowén꞉na ne Roiá꞉ner waohiaʼtó꞉renhne ne Haggai raónha ne rotokénhse roterihóntakwe tsi nokwáh ne Zerubbabel ne roʼní꞉ha né꞉ne Shealtiel, ne rakó꞉rakwe ne Judah, tánon né ó꞉ni raorihwà꞉ke ne Joshua ne roʼní꞉ha né꞉ne Jehozadak, né꞉ne kwáh è꞉neken tókte tsi ratsihénstatsi í꞉ken. Tánon Haggai wahèn꞉ron:

² Ken nahó꞉ten ráton ne Sakoiá꞉ner ne ratironhiaʼkeró꞉nons: Kí꞉ken onhkweshón꞉as rónton iáh aré꞉kho tsehióhe nahonsakanonsónhnike ne Roiá꞉ner raonónhsa.

³ Eʼthò꞉ne ne raowén꞉na ne Roiá꞉ner rahonhà꞉ke ne rotokénhse Haggai nontá꞉we, ratónhnions:

⁴ Ó꞉nenh ken thóh tsi nikahá꞉wi ní꞉se ne iatesewahiátis thóh nahisewenhterónhtake ne washirowá꞉nens oswénhkare wasthá꞉nion ne sewanonskónhsons, tsi ná꞉he ní꞉i nakénonsa iorihwenhtà꞉on?

⁵ Nón꞉wa rá꞉ton ne Sakoiá꞉ner ne ratironhiaʼkehró꞉nons: Tesewaiaʼtó꞉ret tsi ní꞉ioht tsi tionnhétie.

⁶ Wé꞉so sewaienthóhsheron, tánon kenʼk ní꞉kon sewaienthó꞉kwen; tesewatská꞉hon, ók iáh kí nonhwén꞉ton tiatesewaié꞉rihse; sewanekirenháties nonenhará꞉keri, ók iáh nonhwén꞉ton tesewaniataná꞉wens; sewathatanawénston, ók iáh kí ónhka teiakohiaʼtarí꞉hens; tánon í꞉se ne sewanhá꞉tsheras tsi natesewathentiáhas kaiará꞉kon sewatáhas iohiarakà꞉ronhte nenhʼné꞉e.

⁷ Káti rá꞉ton ne Sakoiá꞉ner ne ratironhiaʼkehró꞉nons: tesewaiaʼtó꞉ret tsi nitiónhnhetie.

⁸ Wás iasewanonhtá꞉raʼn ne tsi ionhniarónhnions iasewaronhtsá꞉kon tánon tasewakonhretsenháseron tánon sasehwanonhsón꞉ni nononsatokentoʼkó꞉wa, ne ká꞉ti nahónton ahonkerienʼtí꞉io tánon ahiontkwénienste, rá꞉ton ne Roiá꞉ner.

⁹ Wesewésake ne wé꞉so akénhake ók kenk nón꞉kon wesewaʼtshén꞉ri. Tsi nahotentontesewáhawe; i꞉se iahonká꞉ti. Nón꞉tieren? rá꞉ton ne Sakoiá꞉ner ne ratironhiaʼkehró꞉nons. Tiorì꞉wa nakenonsatokentikó꞉wa ehtà꞉ke káien iorihwenhtàhon, otsák ní꞉se sewakwé꞉kon iathetsisewatskén꞉ni tsi tisewahnonshó꞉ton nientsisewatátkhe.

¹⁰ Ne káti aorì꞉wa ne tsi karonhiá꞉te tahionhnéʼke nahawehiátshera, tánon ne tsi ionwenhtsá꞉te tahionhné꞉ke ne kaienʼthó꞉tsheras.

¹¹ Wakstá꞉thate tsi ionwentsá꞉te—tsi ionhniarónnion, tsi kaienthóhseron nonátsa, tsi kanenʼharaienthóhseron, tánon noná꞉tas, náse onenharákeri, ne kenhieshón꞉as, tsi nahó꞉tens nonhóntsa tká꞉nios, nonkweshón꞉as tánon ne kontiʼtshé꞉nens, tánon akwé꞉kon ne raotihioʼthénhseras.

¹² Ethò꞉ne ne Zerubbabel ne roʼní꞉ha né꞉ne Shealtiel, tánon ne Joshua ne roʼní꞉ha né꞉ne Jehozadak, né꞉ne kwáh è꞉neken tokʼte ratsihénstatsi, skátne ne iateonathathénron nonkweshón꞉as, wahontewenhnárakwe ne raowén꞉na ne Roiá꞉ner raotiní꞉io, tánon ne raowenhnaó꞉kons ne rotokénhse Haggai, tsi kí ní꞉ioht ne Roiá꞉ner raotiní꞉io tsi toteniéhton. Tánon nonkweshón꞉as wahonwakwéniensthe ne Roiá꞉ner.

¹³ Ethò꞉ne ne Haggai, ne rorihwakarenién꞉nis ne Roiá꞉ner, washakotháhrase nonkweshón꞉as tsi nihotherihwanietonhátie ne Roiá꞉ner, rá꞉ton, skátne í꞉tewes ní꞉se, rá꞉ton ne Roiá꞉ner.

¹⁴ Tánon ne Roiá꞉ner wathonikòn꞉raren ne raotón꞉nhets ne Zerubbabel ne roʼní꞉ha né꞉ne Shealtiel, ne rakórakwe ne Judah, tánon ne raotón꞉nhets ne Joshua né꞉ne roʼní꞉ha ne Jehozadak, né꞉ne kwáh è꞉neken tókʼte ratsihénstatsi, tánon ne raohnatón꞉nhets ratikwé꞉kon ne ietehonathaténhron nonkweshón꞉as. Tánon tahón꞉ne tánon wahotiiò꞉then raononsatokentikowáhne ne Sakoiá꞉ner ne ratironhiaʼkeró꞉nons, raotiní꞉io í꞉ken,

¹⁵ ne tewáhsen-kaié꞉ri shiwenhniserahkéhaton ne shiwenhní꞉tare, ne iáh-iá꞉khaton niwenhnitakéhaton ne tekeníhaton siioseratá꞉se sionontí꞉iokwe ne Darius.