Habakkuk 3 - Ohiatonhseratokénti

¹ Ne Kí꞉ken ne Raoterénhnaient ne Rotokénhse Habakkuk.

Ne Rotokénhse Raoterénhnaient

² O Saiá꞉ner wakerihwaʼrón꞉ken tsi nisarihwanakerátston, tánon tsi niwakerihwanerakóhon, O Saiá꞉ner, ne sahiothénhsera. Nón꞉wa tsi nihionkwahtenhniseraténion shekon thononhsatser; Satanithenratskónhak, ó꞉ni nó꞉nenh kwáh sanakwénhen.

³ Ne Rawenni꞉io tsi tiohontsá꞉ien ne Edom nón꞉we nitawè꞉non, né Roiatatokénti Rawenni꞉io tsi ionontahrónhnion ne Paran nón꞉we nonhtahawenonhátie. Raohiatanerakwáhtshera iororókston ne tsi karonhiá꞉tes, né iakahonhnién꞉nis niakahontsakwé꞉kon nonkweshón꞉a tahonwanonwerá꞉ton. Selah

⁴ Tsi néntʼre, thóh nateoswátʼte tsi ní꞉ioht ne tahonhninekárahwe; tewaʼnitonkwarítʼkons tkaiá꞉kens ne ratsá꞉nake, thóh nón꞉we nihoséhton ne raoshatsténhsera.

⁵ Raohénton iehateniétha ne kanratarinétsheras, tánon ne kenhé꞉ion thót oná꞉ken í꞉we.

⁶ Nó꞉nen thenhá꞉tane tsi teotekhahakwenhátie tenhiahontsí꞉shonhkwe; tsi natehakánere, akahontsakwé꞉kon nonkweshón꞉as waʼhakohiatísonhkwe. Ne kwáh onontakáhions waʼtewanitsthenróko; tánon ne tsi ionhniarón꞉nions eʼtà꞉ke niaháhe né꞉ne tsi nón꞉we natehatekhaʼhákwakwe ne wahón꞉nise tkénhne.

⁷ Waʼkhéken ne Cushanró꞉nons waʼhotiʼterónhne; tánon ne Midianró꞉nons wahotihiathísonhkwe.

⁸ Ne ken ne tsi kaniataratátie wahesanakón꞉ni, O Saiá꞉ner? Ká꞉ton ken né꞉ne kaniatarakeʼkó꞉wa wakarihón꞉ni tsi kwáh í꞉ken tsi wesaná꞉kwen? Tsi iotsatarón꞉nions nón꞉we nisahonwiserétha; né꞉ne tsi teioweratáse ne tsi iotsatarón꞉nion ne satesehretonhniátha notiónhkwa, tsi tasehawí꞉then natesenhniétshera ne shonwetaʼshón꞉as.

⁹ Waʼsathateweienénhtaʼne násaste ne sahénhna, waʼsathateweienénhtaʼne niasarón꞉tate ne saiénkwires Waʼtesonhontióren tánon wakahionhatatséson. Selah

¹⁰ Nó꞉nen ne tsi ionontahrón꞉nions wahesá꞉ken waʼtsiowí꞉sonhkwe; nohné꞉kanos thonwerónhtane ne tsi karonhiá꞉te. Nohné꞉kanos ne nà꞉kon tsi ionwenhtsá꞉te waʼhonekákare, tánon ionontowá꞉nens ionontakwahronhtónhtses;

¹¹ Tsi natewatʼtsiró꞉ke ne tehió꞉ka sáwenk kaienkwí꞉res tánon tsi natehiahó꞉ien ne tehiostaratʼte sashí꞉kwahra; ne karáhkwa tánon nasonhthenhné꞉kha karáhkwa watʼkenítane.

¹² Nó꞉nen sisanakwénhen, waʼtesathekháhawe tsi waʼteshonhontsí꞉iake ne tsi ionwenhtsá꞉te, ne tsi sanakwénhen waʼtesehiaskwáseron nonkweshón꞉as.

¹³ Iashiá꞉kenhne nasehnóns꞉thate ne shonkweʼtashón꞉as, natsenónsthate ne tsatarákwen ronhnontí꞉io. Waseronhkwenoróksi ne tsi rotinón꞉shote ne ionkwetatʼsenhokón꞉as, waʼsehnésthe ne tsitʼkenskwáhere kwáh tsi nió꞉re tsiosthenrakwénhtare. Selah

¹⁴ Saiénkwire waʼtetsenonhtsistawehéste ne raterihiosehrakweʼní꞉io rahonkwè꞉ta, thóh ní꞉ioht tsi ónhwe kwáh né꞉ne tehioweratá꞉se ne tahionkwahreniá꞉te, iahonhninekén꞉en tsi shí꞉ken ní꞉ioht niaiakotsatanekwáhne ne rotí꞉ten tsi nihonataséhton.

¹⁵ Weʼshasáhten ne satsénen koshá꞉tens tsi waʼteseniatarihià꞉ke ne kaniatarakeʼkowáhne, tánon ne kaniatarakeʼkowáhne onkwatstón꞉ni.

¹⁶ Wakaʼthón꞉te akwé꞉kon kí꞉ken, tánon onhtsiatí꞉shonkwe; tsi nió꞉re tsi wáterons waʼtewakenawirohó꞉khon. Tánon tahkwaʼáshon onkatiénhase ne tiéronhke, tánon waʼtiatishónkwa tsi nón꞉we niʼttákwe. Kwáh kíʼ skén꞉nonk thenkénhake tsi nenhkateráhrate ne iaʼkáhewe nó꞉nen ne Rawenni꞉io ensakorewaʼte tsi niháti ne tionkhiiatsatónhtses.

Tewethákwen Tánon Attsenhnonhniá꞉tshera Káien Tsi Nón꞉we Natekaʼnikónhrare

¹⁷ Ethosà꞉ne ne tsiononwaronhtonhakó꞉wa iáh thatekatsisaneká꞉rons, tánon iáh tewahianihióntha nonenhrakésons; ethosà꞉ne ne iakenhiewá꞉tha iáh othé꞉nen tehioianihiontáhon tánon ne kahentá꞉kes iáh othé꞉nen tetsióha nonátsias; ethosà꞉ne ne teiotinakarontónhas ratikwé꞉kon ronenhé꞉ion tánon ne tsi tekontitastáhkwa ne tionhnónskwarons iáh othé꞉nen teskonhtì꞉teron,

¹⁸ Nek kik sáka enwakatonhnárake tánon enwakaʼtsenhnonhní꞉hake rahonhà꞉ke ne Roiá꞉ner; tiorì꞉wa ne Rawenni꞉io tsi thá꞉kenes.

¹⁹ Rawenni꞉io, ne Roiá꞉ner, seh nakeshatsténhsera í꞉ken; ne ronhniátha ne kasitàke kwáh thóh natahonkekhatónhke tsi ní꞉ioht noskenónton, tánon ratiatanónstats ne tsi ionontahrónhnions. Ne Raterenhnathentsatha: né áhonste né karenshó꞉taron waterenhnót꞉tha.