Habakkuk 2 - Ohiatonhseratokénti

Ne Rawenni꞉io Wathorihwaʼserá꞉kwahse Ne Rotokénhse Rahorihwaʼkahtátshera

¹ Kwáh ienhkerát꞉then tsi nón꞉we nahtekenenhraientháhkwa, tánon thóh tentʼtane natenhénrake; kwáh enkathenhnikónhrahren nahonktókenhse nahó꞉ten enhakró꞉ri ne Roiá꞉ner, tánon onhní꞉ioht tsi kwáh thenharihwaʼserá꞉ko tsi nihirihwakwén꞉ni.

² Tánon ne Roiá꞉ner watakeriwaʼsehrá꞉kwahse: Shiá꞉ton tsi nisatetʼtsénhhen; iokentón꞉hak tsi nenhshiá꞉ton nostenhrá꞉ke, ne káti nahónhton ne teharáhtats ahawenhnanhó꞉ten.

³ Kahiatónhak, tiorì꞉wa tsi iáh aré꞉kho tsehióhe ne naiá꞉wenhne nahón꞉we norihwí꞉io; ók ne tsi nikawistáhets iostó꞉re tsi tá꞉we tsi nahorihothénsons ne konhnatónhnionhnis kwáh kíʼ thóh nenhá꞉wenhne. Ethó꞉sane kíʼ nahorihoʼthénsons ioiatakenhé꞉ion ne naiá꞉wenhne; ó꞉nenk tsi ensateráhrate, kwáh orihwiiohón꞉we tsi enwáh꞉we, kwáh iáh tahionísko.

⁴ Sehiatkátho ne ronhtatón꞉ni! Ne tsi rohnónh꞉nhe iáh tetkarihwaié꞉ri, ók ne tionkweʼtaié꞉ri thóh ne nón꞉we nironhnonhnhétse tsi nithanetákwen.

⁵ Sénha isiʼnón꞉we ní꞉ken, ne kakwahséhtshera iáh teiorihwató꞉ken; ne iakotetʼtsen hionthatón꞉ni tánon iáh tewatorishentátie. Tehiakotskaráwenh tsi ní꞉ioht ne tsi tiohontsá꞉ien ne kenhé꞉ion; kwáh tsi ní꞉ioht ne iatekaiá꞉ti kenhé꞉ion iáh nonhwén꞉ton teiawerienʼtí꞉ios. Ne káti aorì꞉wa tiotkonhón꞉we nonhkweshón꞉a teotirihwakénen, tánon thóh ní꞉ioht tsi sakotihiaʼtaró꞉roks nonkweshón꞉as tsi shí꞉ken ní꞉ioht ne ronón꞉ha rahononhkweʼtashón꞉as í꞉ken.

⁶ Ne raononhontsashón꞉as nonkweshón꞉as ne thinonhwanahnonhtón꞉ni ne Babyloniaró꞉nons tsi ronhwenhnonhontsákwen kwáh enthontáhsawen ne tashakotiiéron tánon enhonhné꞉neste tsi nisakotikenrón꞉ni, ensakonénhase ne Babyloniaró꞉nons, “Iawetatʼtsani iesewá꞉ha ne iáh í꞉se tesewá꞉wenk, káti ne Rawenni꞉io entsisewaʼréwate!” Tonikarì꞉wes ní꞉se kwáh ensatatʼkwaséststen tsi nishé꞉reh tsi nihiá꞉kon noʼwísta sehkarotá꞉ni né í꞉siknónk thahonsaiesakarhiákse?

⁷ Kwáh iáh onhtè꞉ken ne shekarotá꞉ni thahontaiawénhstsi thenthatí꞉tane, tánon né꞉ne kwáh í꞉ken tsi ahiesaterónh꞉kwen kwáh kiʼ ensahiatishón꞉kwake? Ethò꞉ne kwáh entiesahnenhskwenháton.

⁸ Tiorì꞉wa tsi nihiakotiohkowá꞉nen nonhkweshón꞉as senénhskwen, ratikwé꞉kon ne iatehonathaténhron nonkweshón꞉as kwáh entiesanénhsko— tiorì꞉wa tsi nisehnonwarhiaʼkónhnion nonkweshón꞉as ne tsi ionhontsá꞉te, tánon tsi nisehiateniakatsthén꞉ni nonkweshón꞉as ne tsi kanatowá꞉nenhs.

⁹ Wasehkwatsésthen ne sakwáhtsire ne tsi nahoʼténhsons shekwenhá꞉ton nakorénhsons ne tsi nithesehianonthón꞉ni, tánon wasathenonhsonhniánion ne kanonsí꞉ios ó꞉ni iononsaní꞉rons ne nasehiatanónsthate ne sawá꞉tsires tsi nokwáh ne atkarónhniat. Tiorì꞉wa tsi kíʼ ken orihwakwé꞉kon tsi thóh násehre, ne Rawenni꞉io kwáh kíʼ enhiaré꞉waʼte.

¹⁰ Ók ne tsi natesanonhwaiewenhthánion atehénsera waʼsehiénhase ne sawá꞉tsire; ne tsi niiakotsokowá꞉nen senonwarhiaʼkónhnion; kwáh kíʼ shonhá꞉hak khok wasatatkarón꞉ni.

¹¹ Iekaní꞉hare nonenhiaʼshón꞉as ne tekenststenhrotákwen ne wathehenráien iesariwárhós kiʼ nonhné꞉e, tánon ne tsi kanenhstarónhnion ahí꞉non nió꞉re iatekontiwénhnaras tsi natekonséntʼtos.

¹² “Satrewáthane! Tsi satenatón꞉ni ne kanatowá꞉nen karihwakʼsénhtshera í꞉ken, tánon ne iasónhniate nahionthataséhthake ne nón꞉we!”

¹³ Nonkweshón꞉as ne sehiatsiatakweʼniióston tsi rotihiothénhen iáh kíʼ othé꞉nen tatehonaténhtion nahontsenhnonhniátakwe. Wahonteshatstenhserók꞉ten, ók akwé꞉kon tsi ní꞉kons ronatenonshonhniá꞉kon kwáh kíʼ enhiotéke. Kwáh seh Roiá꞉ner Roshatstenhserowá꞉nen kí꞉ken thóh nihaié꞉ra?

¹⁴ Ók ne ronhnonhontsakeró꞉nons kwáh tentʼká꞉rake tsi enhotinikonhraientháhsehke ne raoshatsténhsera tánon tsi nateotenonhianì꞉ton ne Roiá꞉ner, kwáh kíʼ tsi ní꞉ioht ne kaniatarakeʼkó꞉wa titkanekáhere.

¹⁵ “Satrewátane asè꞉ken wasehiónhnien ne tesewatonhontsanekʼkhánion nahatinekí꞉ra, sehná꞉kwahse kwáh tsi nió꞉re iahotinonwá꞉raton, ne nahónton tasehiatkáneren tsi raotineoskonkʼthí꞉ken!”

¹⁶ Ne tehiontnekontáhkwa ne karewathátsheras thóh í꞉wa tsi niháhawe ne Roiá꞉ner ne saweienhtetháhkwen kwáh enhiohéstase. Kwáh iateshiá꞉ti khok tsi ensnekí꞉ra. Kwáh kíʼ né ensanonwarathón꞉te tánon nonkweshón꞉as eniesáken sanehoskontʼthí꞉ken. Tsi ní꞉ioht ne taiesarénhsaron, kwáh eniesakénron tánon eniesatehathánion!

¹⁷ Asè꞉ken tsi nikonhwateniaskatstén꞉ni ne Lebanon kwáh kíʼ ní꞉se eniesatón꞉te; sehnonwarhiaʼkhónhnion ne kontiʼtshé꞉nens ó꞉nenh kíʼ ne entiesaterónhkwen. Thóh kí꞉ken nenhiawénhseron né enkarihón꞉ni tsi nisehiaséhton nonkweshón꞉as ne tsi ionhonhtsá꞉te, tánon tsi nisehiateniakatsthén꞉ni nonkweshón꞉as ne kanatowanénhkes nón꞉we nihatiʼterónhton.

¹⁸ Nahó꞉ten nenhné꞉e karihwásta ne kahiatón꞉ni rónkwek khok nenhné꞉e tihóshon, karístatsi khés oiénhte nahó꞉ten rahonhniáton, iehiokonhtákwenh nenhné꞉e sanowenhténhnis? Nahó꞉tenh nenhné꞉e kástha ne ró꞉shon né꞉ne ahontaré꞉takwe, né꞉nenh ne enrón꞉ni ne iáh tewatá꞉ti kahiatón꞉ni!

¹⁹ Satrewátane asè꞉ken sró꞉ris ne oiénhte, “Í꞉tie!” ne iáh tewatá꞉ti onénhia, “Satatkétsko!” Akakwé꞉ni ken nahiakorihónhnien? Satkáto, owistanó꞉ron tánon kawistará꞉ken tekaiestánion, tánon kwáh iáh othé꞉non teiahonhniserá꞉ien.

²⁰ Ók kíʼ ne Roiá꞉ner thóh rénhteron ne raononsatokentikówane; Áhnion kíʼ ohontsakwé꞉kon sak tihiontatón꞉ni ne raohénton!