Genesis 44 - Ohiatonhseratokénti

Ne Só꞉se Wahotiénawahste Ne Benjamin

¹ Eʼthó꞉ne ne Só꞉se wahóhnhaʼne ne raohnhá꞉tshera ne raonónhskon roióte, “Thontásraht atená꞉tshera ne ronnón꞉kwe raotiiareʼshón꞉ʼa, kwáh tsi nenhatikwé꞉ni niaonsahatíhawe, tánon thóh sasewatárion ne shatiiaʼtátshons ne rón꞉kwe raohwís꞉ta é꞉neken ne kaiárakon.

² Sewáta nakétshe teionthnekontáhkhwa, ne kahwistarà꞉ken í꞉ken, thóh é꞉neken ne kaiá꞉rakon ne kenʼ niehrá꞉ʼa raó꞉iare, skát꞉ne ne raohwís꞉ta ne onátsa ahohninón꞉ton.” Tánon tho kiʼ nahá꞉iere tsi kiʼ nihohró꞉ri ne Só꞉se.

³ Kwáh tsi niiostó꞉re waʼtioswátheʼne nohrhonʼké꞉ne, ne ronnón꞉kwe sahonwanaté꞉kwahte skátne ne raotitshenenʼó꞉konʼs tewahónhtes.

⁴ Kenʼk niió꞉re shiehoné꞉non ne kanatowanèn꞉ke, ne Só꞉se wahawènhahse ne raohnhá꞉tshera, “Wáhs, shéhsehr thí꞉ken ronnón꞉kwe; nó꞉nen ienhshehnhón꞉teraʼne, sheriʼwanón꞉tons, ‘Nontié꞉ren tsi ne sesewaié꞉raʼte ne karihwáksen tsi ní꞉ioht ne ioiánere? Oh nontié꞉ren tsi takwatsheʼtanénhskwen nakétshe teiothnekontákhwa kahwistarà꞉ken?

⁵ Iáh kenh ne kiʼ té꞉ken ne rahnekihrá꞉tha natiá꞉nehr? Tánon Iáh kenh ne tehátstha ne iaharí꞉waken? Waʼtisewaterienʼtawén꞉rie tsi kiʼ tho nesewá꞉iere.’”

⁶ Nó꞉nen ne rahnhá꞉tshera shiashakohnhónteraʼne, tontahathnaʼnéta kí꞉ken owennaʼshón꞉ʼahs ne raotirihwá꞉ke.

⁷ Wahonwènhahse, “Nontié꞉ren natiá꞉nehr tsi tho kí꞉ken nikawennó꞉tenʼs rátstha? Aí꞉non ítken ne shanhá꞉tsheraʼs ne tho kí꞉ken nahatí꞉iere!

⁸ Satkáhtho, nohwísta ne ionkwatshénrion ne é꞉neken nonkwaiá꞉rakonʼs, tontaiakwáhawe sonhá꞉ke ietsonkwáha ne tsi ionhwentsá꞉ien ne Canaan; oh katíʼ ní꞉ioht tsi aionkwanénhskwen ne kahwistarà꞉ken khehs nohwistanó꞉ron ne tsi ronónhsote ne iaiá꞉nehr?

⁹ Tókaʼ akatshénrion nónhka tsi niiátion ne sahnhá꞉tshera, rénheh kiʼ; sénha kiʼ í꞉si nón꞉we nonkwátiaʼkes iakwanáhskwa eniakwáhton raonhá꞉ke natiá꞉nehr.”

¹⁰ Wahén꞉ron, “Eʼthó sá꞉ne; tho niiohtónhak tsi nisewá꞉ton, nónhka enhonwatitshénriaʼse kwáh kiʼ í꞉ʼi akehnáh꞉tshera enhá꞉ton, ók ne sewátiaʼkeʼs entsisewatatewenní꞉ioʼne.”

¹¹ Kasterihénʼke ohontsà꞉ke wahatí꞉ien ne raotí꞉iareʼs, tánon shatiiaʼtátshon waʼthatiiará꞉kwarihte ne raotí꞉iareʼs.

¹² Wahréhsake, ne ne thakowá꞉nen tahotié꞉renhte tánon tsi iaháhsa ne ne kenʼ niehrá꞉ʼa; tánon ne teionthnekontáhkhwah kátshe Benjamin raoià꞉rakon wahatitshén꞉ri.

¹³ Eʼthó꞉ne kiʼ ó꞉nen wahatiratsón꞉ko ne raonatsherón꞉nia. Eʼthó꞉ne sahonwatihrieʼnónnien ne raotitshenenʼó꞉konʼs tewahónhtes, tánon kanatowanèn꞉ke nionsahón꞉ne.

¹⁴ Judah tánon ne rontateʼkoʼoʼkón꞉ʼahs Só꞉se tsi thonónhsote nontahón꞉ne shé꞉kon eʼthó sihenʼterón꞉tahkwe; tánon ohontsà꞉ke wahatiiaʼtaièn꞉taʼne ne raohén꞉ton.

¹⁵ Ne Só꞉se wahshakawènhahse, “Oh nesewátiere? Iáh kenh tesewaterièn꞉tare ne rón꞉kwe tsi niʼ ní꞉ioht enkkwé꞉ni ne iakerí꞉waken?”

¹⁶ Tánon ne Judah wahén꞉ron, “Nahó꞉ten aiakwakwé꞉ni ahshakwahró꞉ri ne atiá꞉nehr? Nahó꞉ten aiakwakwé꞉ni aiakwèn꞉ron? Oh ní꞉ioht tsi aiakwarihwahní꞉rate tsi iáh teionkwahnhí꞉kon? Rawenni꞉io waharihwahtshén꞉ri tsi nihotihnhí꞉kon ne sahnhaʼtsheraʼó꞉konʼs; kenʼ katíʼ iákweʼs, ne natiá꞉nehr raohnhaʼtsheraʼshón꞉ʼahs, nonkwátiaʼke tánon tsi niká꞉ien ne rahá꞉wahkwe ne teionthnekontáhkhwa ne wahonwatshénriaʼse.”

¹⁷ Ók ne Só꞉se wahén꞉ron, “Aí꞉non ítken nakerihwá꞉ke neʼthó nátiere! Ne khók tsi niká꞉ien ne rahá꞉wahkwe ne teionthnekontáhkhwa ne wahonwatshénriaʼse ne kiʼ akehnhá꞉tshera enhá꞉ton; ók ní꞉se, wáhs skén꞉nonʼk khók iaʼnihnéha nionsá꞉se.”

Ne Judah Wahaní꞉tenhte Ne Benjamin Naonsahonwáhtkaʼwe

¹⁸ Eʼthó꞉ne ne Judah raiaʼtakta ne Só꞉se niahá꞉re tánon wahén꞉ron, “Oh atiá꞉nehr, tsheríhon ne sanhá꞉tshera ahsathontátsheke taetenihthá꞉ren, tánon tóhsa tshenà꞉kwaʼs ne sahnhá꞉tshera; aseʼkénh ní꞉se kwáh ne ne Pharaoh teskaierón꞉tare.

¹⁹ Ne atiá꞉nehr wahshakoriʼwanón꞉tonhse ne raohnhá꞉tsheraʼs, ratónnions, ‘Shaʼníhshen kenh khehs naesatateʼkenʼshén꞉take?’

²⁰ Tánon wahshakwènhahse natiá꞉nehr, ‘Ionkwaʼníhshen, ó꞉nen rokstén꞉ha, tánon ionkwaʼkén꞉sen, ó꞉nen sihokstén꞉ha shahrennákerate ne raksá꞉ʼa. Ne iatateʼkén꞉ʼa raʼwenhé꞉ion; raonhá꞉ʼa khók iaʼteshotatén꞉ron tsi nihá꞉ti iakowiraièn꞉tahkwe ne roʼnisténha, tánon ne roʼníha ronorónhkhwa.’

²¹ Eʼthó꞉ne wahsheiènhahseʼ ne sahnhá꞉tsheraʼs, ‘Kén꞉ʼen nontatshiaʼténhaf akonhá꞉ke, ne ká꞉tiʼ naón꞉ton ahí꞉ken.’

²² Wahshakwènhahse natiá꞉nehr, ‘Ne raksá꞉ʼa iáh thaón꞉ton ne eʼthók thahóhtkaʼwe ne roʼníha, aseʼkénh tó꞉ka eʼthóʼk thenhóhtkaʼwe ne roʼníha, ne roʼníha enhrénheie.’

²³ Eʼthó꞉ne wahsheiènhahse ne sahnhaʼtsheraʼó꞉konʼs, ‘Eʼthó꞉neʼ khók tsik entísewe ne tshisewaʼkén꞉ʼa, iáh kiʼ shé꞉kon thaonsaskwakónhsaken.’

²⁴ Sonsaiákwawe ne tsi thonónhsote ne sahnhá꞉tshera rakeʼníha, waʼshakwahró꞉ri ne raowennaʼó꞉konʼs natiá꞉nehr.

²⁵ Tánon nó꞉nen sahén꞉ron ne shakwaʼníha, ‘Wáhs shé꞉kon tho ionsásewe, ostón꞉ha saskwatenaʼtsherahninonʼsé꞉ra,’

²⁶ Waʼakwén꞉ron, ‘Iáh thaón꞉ton thóh iaonsaiákwe. Ne khók tókaʼ kenh eniákwe ne shakwaʼkén꞉ʼa, thóh nek khók thóh ientsákwe; aseʼkénh iáh thaón꞉ton naonsahshakwakónhsaken ne rón꞉kwe tsik eniákwe ne shakwaʼkén꞉ʼa.’

²⁷ Eʼthó꞉ne ne shakwaʼníha wahshonkwènhahse, ‘Sewaterién꞉tare ne teiakení꞉teron Rachel tehniiáhse iakonakerátston nakenekenhteronʼtsheraʼshón꞉ʼa;

²⁸ shaià꞉ta rakatewentéhton, kwáh orihwiioʼón꞉we tsi kontírio ronwaiaʼtaratsónkwen; tánon iáh nonwén꞉ton teshí꞉ken.

²⁹ Tó꞉ka oh thén꞉nen nahoià꞉tawen, kwáh kiʼ iensewà꞉senhte tsi niwakenonhkwareʼtarà꞉ken tho nón꞉we ne Sheol.’

³⁰ Nón꞉wa eʼthó sá꞉ne, nó꞉nen iénskewe tsi thonónhsote ne shanhá꞉tshera ne ne rakeʼníha tánon ne raksá꞉ʼa iáh tetsákwe, eʼthó꞉ne kiʼ ne tsi rónhnhe ne tekení꞉neren ne raksá꞉ʼa tsi rónhnhe,

³¹ nó꞉nen enháttoke ne raksá꞉ʼa tsi iáh tetsákwe, nontié꞉renʼk enhrénheie; tánon ne sahnhaʼtsheraʼó꞉kon ieniakwá꞉senhte tsi nihononhkwareʼtarà꞉ken ne sahnhá꞉tshera ne shakwaʼníha tsi nenhoʼnikonhràksenh tho nón꞉we ne Sheol.

³² Iáh thok té꞉kon, tsi kónhnhe riiatkaraientahkwén꞉ni ne rakeʼníha tsi nonkwá nétho raksá꞉ʼa, wá꞉ken, ‘Tó꞉kaʼ iáh thaʼtaontahiiaʼténhawe ne raksá꞉ʼa ne shonhá꞉ke, eʼthó꞉ne kiʼ í꞉i entkatáterahse raohén꞉ton ne rakeʼníha kwáh tsi nikónhnhes.’

³³ Tókaʼ katíʼ nón꞉wa, nahsathón꞉tate tseríhon ne sahnhá꞉tshera kén꞉ʼen ré꞉shek tsi ní꞉ioht ne raksá꞉ʼa ne ranáhskwa ahá꞉ton raonhá꞉ke natiá꞉nehr; tánon tsheríhon ne raksá꞉ʼa shón꞉ne ne rontateʼkoʼokón꞉ʼa.

³⁴ Aseʼkénh oh ní꞉ioht tsi rakeʼnihnéha niaonsá꞉ke tókaʼ iáh tetsákene ne raksá꞉ʼa? Wákteronʼs nakatkátho ne kaʼnikonhraksénhtshera nenhó꞉raʼne ne rakeʼníha.”