Genesis 40 - Ohiatonhseratokénti

Ne Raonatetshénhsera Ne Tehniiáhse Nihnhó꞉ton

¹ Ostón꞉ha kí꞉ken óhnaʼkèn꞉ke, ne Egypt ronontí꞉io raonkwé꞉ta ne teionthnekontáhkhwa ráhahs tánon ne raonkwé꞉ta ranaʼtarón꞉ni wahonwarihwaientáhten ne raotiiá꞉nehr ne ne ronontí꞉io ne Egypt.

² Ne Pharaoh wahshakoná꞉khwase kí꞉ken tehniiáhse raonkweʼtaʼshón꞉ʼa ne ronateríhonte, ne ne ohén꞉ton ié꞉rate ne teionthnekontáhkwa ráhahs tánon ne ranaʼtarón꞉ni,

³ tánon thóh nón꞉we iahshakohnhó꞉ton tsi thonónhsote nohén꞉ton ié꞉rate ne shakoʼnikón꞉rare, tánon tsi nón꞉we thahnhó꞉ton ne Só꞉se.

⁴ Ne ranenhrakweʼní꞉io ne shakoʼnikón꞉rare Só꞉se wahóhnahʼne, nahshakoterihwatsterísthase, tánon katíʼ kwáh í꞉ken tsi karí꞉wes nihnhó꞉tonhkwe.

⁵ Énskat katíʼ tsi niwahsón꞉tes tehnitsá꞉ron wahonatétshen—ne teionthnekontáhkhwa ráhahs tánon ne ronaʼtaronnién꞉ni ne Egyptró꞉non ronontí꞉io, tsi nihnhó꞉ton ne tsi iontatehnhotónhkhwah—sniiaʼtátshon ne raonatetshénhsera, tánon skátshonʼs tsi nikén꞉tons.

⁶ Nó꞉nen ne Só꞉se sahshakó꞉ken nohrhonʼké꞉ne, waháttoke tsi tehonaʼnikónhrhare.

⁷ Sók kíʼ Pharaoh raohnhaʼtsheraʼshón꞉ʼa wahshakoriʼwanón꞉tonhse, tsi ne skátne ratihnhó꞉tonhkwe ne róhnhaʼs raonónhskon, “Nontié꞉ren tsi nitisaʼnikonhwarenhʼen nón꞉wa wenhniserá꞉te?”

⁸ Wahonwènhahse, “Waʼontiatétshen, tánon iáh ónhka ne kén꞉ʼen té꞉iens naionkhiʼnikonhraientáhten nahó꞉ten kén꞉tons nétho atetshènhsera.” Tánon ne Só꞉se wahshakawènhahse, “Ne takarihwathé꞉tonke iáh kenh Rawenni꞉io tehó꞉wenʼk? Aetsathón꞉tate takenihró꞉ri.”

⁹ Sók kíʼ nohén꞉ton ié꞉rate ne teionthnekontáhkhwah raksènhahs Só꞉se wahohró꞉ri ne raotetshènhsera, tánon wahawènhahse, “Nakeserénhtakon ioteʼnènharare nakhén꞉ton,

¹⁰ tánon thóh tsi watenenharí꞉sereʼs áhsen niioʼnháhthonte. Kwáh tsi niiostó꞉re enhskahskweʼión꞉ten, waʼtkatsiʼtsané꞉kare tánon ne ionenhoʼkwenʼtónnion kwáh ienwahiaríhstahkwe oʼnènhare ienwá꞉ton.

¹¹ Ne Pharaoh raótshe teionthnekontáhkhwa Í꞉i khá꞉wahkwe; tánon wáʼká꞉iako noʼnènhare tánon waʼtkahiorarónkhon tsi waʼkhekínekenhwe thóh raotshé꞉takon ne Pharaoh, tánon tahí꞉ion ne Pharaoh.”

¹² Eʼthó꞉ne né Só꞉se wahawènhahse, “Kenʼ kí꞉ken nahó꞉ten kén꞉tons ne áhsen nikaʼnháhtake ne ne áhsen niwenhniserá꞉ke;

¹³ nahsénhaton nenwenhniserá꞉teke ne Pharaoh enhshiahnhontón꞉ko, enhshiaʼnikóhnrhenʼse, tánon enhshiarihón꞉ten tsi nitisaioʼtenhseroʼtén꞉ne; entéhtshon ne Pharaoh ne raótshe teionthnekontáhkhwah, kwáh kiʼ tsi nihshiéhrhahkwe ne ní꞉se sihtshioʼtenhséhahkwe.

¹⁴ Ók kiʼ saskehiá꞉raʼn nó꞉nen akwé꞉kon entsioiánerehke ne sarihwá꞉ke; ahsathón꞉tate taskerihwaié꞉rits takená꞉ton raohén꞉ton ne Pharaoh, ne katíʼ naonsastiaʼtínekenhwe kíʼ kén꞉ʼen iontatehnhotónhkwa.

¹⁵ Aseʼkénh, tiontiaʼtanènhskwen tsi thononhontsá꞉ien ne Hebrews; tánon ó꞉ni ne kwáh kén꞉ʼen kwáh iáh oh thé꞉non thaʼtewakatèn꞉tshon naionkehnhó꞉tonke.”

¹⁶ Nó꞉nen nohén꞉ton ié꞉rahte ranaʼtarón꞉ni shahothón꞉teʼne tsi niiaweriénʼtí꞉ioht tsi ní꞉ioht tsi wahaʼnikonhraièn꞉tahte, wahawènhahse ne Só꞉se, “Í꞉i ó꞉ni wakatetshèn꞉ʼen: áhsen naʼtekaiaʼserónnion iekareʼtsheraráhkwah á꞉there kenontsí꞉ne káhere.

¹⁷ Ne kwáh è꞉neken iekáhere ná꞉there kwáh niaʼté꞉kon tsi ní꞉ioht tsi kakhonniánion ne Pharaoh raorihwá꞉ke, tánon notsiʼtenʼokón꞉ʼahs thóh teionatskaʼhontie naʼthé꞉rakon ne kenontsí꞉ne waʼtherahrátie.”

¹⁸ Tánon waʼtharihwaʼserá꞉ko ne Só꞉se, “Kenh kiʼ nahó꞉ten kén꞉tons: ne áhsen niwaʼthé꞉rakeʼs ne ne áhsen niwenhniserá꞉keʼs;

¹⁹ ne náhsen nenwenhniserakéhaton ne Pharaoh enhianontsistóhskare tánon tsi ioròn꞉tote enhiaiaʼtihá꞉ren; tánon otsiʼtenʼokón꞉ʼahs enhatiʼwá꞉rake ne saieròn꞉ta.”

²⁰ Nasénhaton siwenhniserakéhaton, thóh sikahá꞉wi tsi niehsháhehskwe ne Pharaoh, wahshakokhwahéhrhahse ratikwé꞉kon ne raonkweʼtaʼshón꞉ʼahs, sahohnhotón꞉ko nohén꞉ton ié꞉rate ne ráhahs ne teiontnekontáhkhwa tánon nohén꞉ton ié꞉rate ranaʼtarón꞉ni ne skatne rón꞉neʼskwe ne raohnhaʼtsheraʼó꞉konʼs.

²¹ Sahorihón꞉ten ne teiontnekontáhkhwa raksénhahs tsi kiʼ nithoterihón꞉tahkwe, tánon Pharaoh tahá꞉wen ne teiontnekontáhkhwa;

²² ók wahohniá꞉terenke nenʼ ne ne ohén꞉ton ié꞉rate ranaʼtarón꞉ni, kwáh tsi kiʼ nihshakoʼnikonhraientahtén꞉ni ne Só꞉se.

²³ Ók nohén꞉ton ié꞉rate né raksénhahs teiontnekontáhkhwa kwáh iáh oh thé꞉nen teshawehiahráʼon ne Só꞉se—kwáh wahohiaʼtaʼnikónhrhen.