Genesis 4 - Ohiatonhseratokénti

Cain Wahosehte Ne Abel

¹ Nón꞉wa ne Á꞉ton ó꞉nen shakoienté꞉ri ne ró꞉ne Eve, tánon onthá꞉wa naiowiraièn꞉taʼne roskenʼrakéhte waówiraièn꞉tane ók waʼkèn꞉ron, “Né tsi wahatié꞉nawaʼse né Roiá꞉ner roskenʼrakéhte onkewiraièn꞉taʼne.” Sók kí Cain wahoná꞉tonhkwe.

² Ohnaʼkèn꞉ke shé꞉kon ó꞉ia roskenʼrakéhte saiowiraièn꞉taʼne né꞉ne Abel. Ne nenʼne wahaterihón꞉ten nahshakoʼnikonhraratié꞉sheke tánon ó꞉ni tahshakorihwáhshnieʼse teiotinaʼkarontón꞉á, ók ne Cain raiènthohskwe nenʼne.

³ Shakáhewe wahaientwá꞉ko ne Cain tánon iahohaʼwíten ne Roiá꞉ner nonátsa iahá꞉wen ne Roiá꞉ner.

⁴ Eʼthó꞉ne ne Abel tahoiaʼténhawe ne tontié꞉renhte wahotewiraièn꞉hahse teiotinaʼkarontón꞉a owí꞉ra wahoʼwéntho tánon né꞉ne kwáh ioʼwahráreʼsen iahá꞉wen ne Roiá꞉ner. Ne Roiá꞉ner kwáh í꞉ken tsi wahawerientí꞉io tánon wahaié꞉na ne Abel tsi nahó꞉tahtshe,

⁵ nók ne Cain tsi nontahá꞉ieste ne Roiá꞉ner kwáh iáh tehokweniénhston. Kí ne Cain kwáh í꞉ken tsi wahoná꞉khwen, tánon wahatkonwaráksate tsi nahoná꞉khwen.

⁶ Ne Roiá꞉ner wahawénhahse ne Cain, “Nontié꞉ren tsi sanaʼkhwén꞉ʼen tánon nontié꞉ren tsi satkonwaʼraksá꞉ton?

⁷ Tókaʼ aontesaierí꞉tonke, iáh ken takonienenke? Tánon tó꞉ka iáh tahontaserihwaiérite, karihwanéren ioniʼtsonhkón꞉ni ne kaʼnhohát꞉ta; í꞉se kí saskáneks, ók ónenk tsi ensatiaʼtakweʼní꞉iohste.”

⁸ Cain wahawénhahse ne iatatekén꞉ʼa Abel, “Ánion kahéntake niétene.” Tánon nó꞉nen kahéntake sí꞉neʼs, ne Cain iahotiaʼtón꞉ti ne iatateʼkén꞉ʼa Abel, tánon wahononʼwariá꞉kon.

⁹ Eʼthó꞉ne ne Roiá꞉ner wahawénhahse ne Cain, “Kaʼne tsheʼkén꞉á Abel?” Waʼtharihwaʼserá꞉ko, “Iáh tewakaterièn꞉tare; í꞉i ken wakaterihwaièn꞉ni nahiiatenʼnikón꞉raren ne iatiaʼtatekénha?”

¹⁰ Tánon ne Roiá꞉ner wahén꞉ron, “Onhnaʼshatié꞉re? Sataʼhón꞉satat; ne tsatateʼkén꞉ʼa raonekwènhsa tewakenaʼtónnions ó꞉ni tetewahshénthohs nakonhá꞉ke ohwentsà꞉ke niteʼwéhtha!

¹¹ Tánon ó꞉nen wasatatkarón꞉ni onwenhtsá꞉ke nón꞉tawe, tsi watewáts꞉karawe naʼkaiè꞉na ne tsaʼtatekén꞉a raonekwènhsa ne shaʼtshahnàhke nonhtá꞉we.

¹² Nonenh thensatonhontsarihte, kwáh iáh othé꞉nen thaontakahawe nahoshaststénhsera; ensanahthenhawison tanon enhsonhontsaié꞉sha.”

¹³ Cain wahawénhahse ne Roiá꞉ner, “Ne karehwatáhtshera só꞉tsi iohní꞉ron nakerihwá꞉ke nakaʼtakáts꞉tate.

¹⁴ Nón꞉wa wenhniseráte é꞉ren wahstiaʼtenhá꞉wihte nokenrake, ó꞉ni waskatkonsashéhten; kwáh kí enwakeʼnatenhawíson tánon enkonhontsaié꞉sha, tánon nónhka tahiatsiatát꞉ken nonhtierek enhionkenonhwariakhon.”

¹⁵ Eʼthó꞉ne ne Roiá꞉ner wahawénhase, “Iáh thó꞉teiot! Ónhka ahonwanonwariákhon ne Cain kwáh enharonhiáken tsáta nihionkwetake iaténskene ne karewathátsera.” Tánon ne Roiá꞉ner wáʼthohiaton ne Cain, ne káti nonka tenhontátken ne tóhsa ahonwanonwariákon.

¹⁶ Ethó꞉ne ne Cain é꞉ren wá꞉rehte tsi nón꞉we ní꞉res ne Roiá꞉ner, tánon thoʼnón꞉we ionsahathatiteron tsi tiohóntsaien ne konwanaʼtónhkhwa Nod, né꞉ne tsik karahkwí꞉nekens nokwáti ne Eden.

Tsi Nonthontáshawen Ne Tsi Iewatsiraiéntons

¹⁷ Cain shakoienté꞉ri ne ró꞉ne, tánon ontháwa naiowiraiéntane tánon ne wahonakerátste né꞉ne Enoch; eʼthó꞉ne ne Cain kanatowánen wahanatón꞉ni, tánon né꞉ne roién꞉ʼa raosén꞉na Enoch wahaná꞉tonkwe.

¹⁸ Ne Enoch wahoneʼkenterontseraièn꞉taʼne Irad wahoná꞉tonkwe, tánon ne Irad né꞉ne ieshoién꞉ʼa ne Mehujael, tánon ne Mehujael wahoneʼkenterontseraién꞉taʼne Methushael ne wahoná꞉tonkwe, tánon ne ieshoièn꞉ʼa Lamech né ronwá꞉iats

¹⁹ Ne Lamech tekeniiáse rotiniakónʼne; ne꞉ne Adah tánon Zillah konwatí꞉iats.

²⁰ Ne Adah waʼowiraièn꞉taʼne né꞉ne Jabal, ráonha ronwasót꞉kenhen tsi niháti naʼtohserá꞉kon ratiʼterón꞉tahkwe tánon ratinaskwaienskwe.

²¹ Ne Jabal né iatateʼkén꞉ʼa ne Jubal; ráonha ne ronwasotkènhen ne ronterenʼnó꞉thaskwe ne karenshoʼtàhron ohnowaʼkó꞉wa tánon ne ieiontónries ohoró꞉ta.

²² Ne Zillah waówiraièn꞉taʼne ne ne Tubal-Cain; iatekon tsi ní꞉ioht tsi rarihstón꞉niskwe notsinekwar nikaristhótens ó꞉ni ne tsi niionstáshonhas ne karistatsis nionhniáton. Ne Tubal-Cain iateʼnosén꞉ʼa né꞉ne Naamah.

²³ Ne Lamech wahshakawénhahse ne tekeniiáhse rotiniá꞉kon: “Adah tánon ne Zillah, tatiatahónsatat; rónkwe wainonhwariákon ne tsi wahakkarewatanion, tanon ne ken nithoión꞉ha ne tsi wahatkonré꞉kon.

²⁴ Tóka tsá꞉ta nihioríhwake karihwanónt꞉tha nahonsakahkariákton nahonwanonwariakhon ne Cain, oriwiiohónwe ne Lamech Tsáta niwáhsen tsátak nihioríhwake iatenskene tóhka onkháʼk enhionkenonhwariakhon.”

²⁵ Ne Á꞉ton shé꞉kon nisakoienté꞉ri ne Ró꞉ne, tánon wahonákeratste ne roièn꞉ha Seth ronwaiats, asèken waʼké꞉nron, “Rawenni꞉io roiatarakwen nakerihwá꞉ke ó꞉ia raksáha ne taonsahonaktákwen ne Abel, tsioríhwa ne Cain rononhwarhiakon.”

²⁶ Ne Seth wahoneʼkenterontseraién꞉taʼne, Enosh wahoná꞉tonkwe. Eʼthó꞉ne nonkweʼshón꞉ʼa taiontáhsawen wá꞉ʼonste ne Roiá꞉ner raosénna nó꞉nen enhonterén꞉naien.