Genesis 39 - Ohiatonhseratokénti

Só꞉se Tánon Ne Potipharʼs Ró꞉ne

¹ Nón꞉wa ne Só꞉se Egypt niehonwaiaʼténha, tánon ne Potiphar, ne ne Pharaoh raonkwé꞉ta rahsennowá꞉nen, ne ohén꞉ton ié꞉rate ne ratiʼnikón꞉rare, Egyptró꞉non nahaiaʼtó꞉ten, ne ne Ishmaelró꞉nons wahonwaiaʼtahní꞉non ne Só꞉se ronónha iehonwaiaʼténha neh nón꞉we.

² Ne Roiá꞉ner nikwekón꞉ne ne Só꞉se, ne kíʼ waʼkarihón꞉ni kwáh í꞉ken tsi wahoianeráhsten; thóh renʼterón꞉tahkwe raonónhskon ne Egyptró꞉non né roioʼtenhséhahkwe.

³ Né róhnhaʼs waháttoke nétho Roiá꞉ner tsi nikwé꞉kon ne Só꞉se, tánon nétho Roiá꞉ner waharihonniánion orihwakwé꞉kon tsi nenhátiere tsi enioiánerenʼne.

⁴ Ne Potiphar kwáh í꞉ken tsi wahaonkweʼtanón꞉weʼne ne Só꞉se tánon kwáh ne wahaón꞉ni ne raonhá꞉ʼak khók ahoióʼtenhse; kwáhkíʼ ráonha wahorihón꞉ten ahatenʼnikón꞉raren tsi ronónhsote tánon kwáh tsi nahoʼtén꞉shonʼs né raowenhshón꞉ʼahs.

⁵ Kwáh tsi nikahá꞉wi Só꞉se wahorihón꞉ten nahatenʼnikón꞉raren tsi ronónhsote tánon akwé꞉kon ne raowenhshón꞉ʼa, ne Roiá꞉ner wahoiaʼtaté꞉rihste ne Egyptró꞉non ne ne Só꞉se raorihwá꞉ke; tsi wahaiaʼtaté꞉rihste ne Roiá꞉ner ne ne akwé꞉kon tsi nahotén꞉shonʼs roientahtsherá꞉ien.

⁶ Katíʼ kwáh akwé꞉kon Só꞉se wahotahkweniaièn꞉hahse nahatenʼnikón꞉raren akwé꞉kon ne raowenhshón꞉ʼa; tánon, tsi eʼthó rén꞉teron ne ráonha, kwáh kíʼ iáh oh thé꞉nen thaʼteshotateʼnikónhrhare nek khók ne kákhwa né í꞉raks. Nón꞉wa ne Só꞉se kwáh í꞉ken tsi ranekénhteron tánon ratkahthohtsherí꞉io.

⁷ Tánon kwáh tho tsi nikarí꞉weskwe ne róhnhaʼs ró꞉ne waʼkakahrotáhrheʼne raonhá꞉ke ne Só꞉se tánon wakén꞉rón, “Tià꞉rat.”

⁸ Ók iáh tehothontá꞉ton tánon wahrènhahse ne róhnhaʼs ró꞉ne, “Satahónhsatat, tsi kén꞉en í꞉keʼs, ne rakéhnhaʼs kwáh iáh oh thé꞉nen thaʼtehotateʼnikónhrhare tsi niioterihwatié꞉ren ne kanónhskon, tánon kwáh akwé꞉kon tsi nihó꞉ien tsi Í꞉ʼi rakatahkweniaién꞉ni.

⁹ Iáh sénha tehoʼshaststenhserá꞉ien kíʼ kén꞉en kanónhsote tsi ní꞉ioht nʼi꞉i, iáh ó꞉ni oh thé꞉nen tehakahtshiawenhrá꞉ti kwáh nek khók tsi nonkwá ní꞉se, tiorí꞉wa tsi í꞉se tesení꞉teron; oh katíʼ ní꞉ioht tsi akkwé꞉ni tho nakátiere ne nikarihwahétken tánon akerihwanéraʼke tsi nokwá ne Rawenni꞉io?”

¹⁰ Eʼthó sá꞉ne tsi kwáh niaʼtewenhniserá꞉ke roriʼwanontonníhahkwe ne Só꞉se, ók iáh kiʼ tehathón꞉tatskwe nahatahónhsatate ne skátne ahiá꞉rate.

¹¹ Énska kíʼ wenhniserá꞉tehkwe, tsi niióhtha, ne Só꞉se kanónhskon niahá꞉re nahoióʼten ne raoʼioténhsera, tánon thóh náhe kwáh iáh ónhka ne rón꞉kwe ahenʼterón꞉take kanónhskon,

¹² waʼkaié꞉na ne raotsherónnia, watónnions, “Káts skátne tiá꞉rat.” Ók aonhá꞉ʼak iekáhawe ne raotsherónnia, tánon wahaté꞉ko áste nionsahatákhe.

¹³ Nó꞉nen sontkáhtho ne raotsherónnia tsi áonha káhawe tánon shoté꞉kwen átste nieshotakhé꞉non,

¹⁴ iaʼakó꞉nonke ne ronnón꞉kwe aohnhaʼtsheraʼó꞉konʼs tánon waʼakawènhahse, “Sewatkáhtho kí꞉ken! Teiakení꞉teron thoiaʼténha kí꞉ken Hebrew ne kén꞉ʼen kanónhskon nahshonkwaʼnikonhrakaré꞉wahte! Kén꞉ʼen tahataweiáhstahkwe ne ne skátne aiatiá꞉rate, tánon kí tsi niiorakaré꞉ni waʼtewakhén꞉rehte;

¹⁵ tánon shahothón꞉teʼne tsi waʼtewakhén꞉rehte, tiaʼtákta wahó꞉ti ne raotsherónnia, tánon ionsahaiakénhstahkwe.”

¹⁶ Eʼthó꞉ne ontiénawahste ne raó꞉khare tsi niió꞉re ne róhnhaʼs sá꞉rawe,

¹⁷ tánon kwáh tho ní꞉ioht tsi sahokaratón꞉hahse, watónnions, “Thí꞉ken Hebrew rahnhá꞉tshera, tsi niká꞉ien ne kén꞉ʼen tetshiaʼténha ne tsi tewanákere, tahataweiáhstahkwe ne nahakeʼnikonhrakaré꞉wahte;

¹⁸ ók kwáh tsi niiostó꞉reh waʼtewakkhén꞉rehte, tiaʼtákta wahó꞉ti ne raotsherónnia, tánon átste nionsahatákhe.”

¹⁹ Nó꞉nen né Só꞉se róhnhas wahothón꞉teʼne ne ró꞉ne wahonwahró꞉ri, “Tsi ní꞉ioht tsi wahshakoteweienaksʼsa꞉ten,” ne Só꞉se, kwáh wahotenaʼkwawén꞉ratshe.

²⁰ Tánon né Só꞉se róhnaʼs wahaténhnhaʼne nahonwaié꞉na ne Só꞉se tánon thóh nón꞉we iehonwahnhó꞉ton tsi nón꞉we ne ronnontí꞉io iehshakohnhó꞉tonhskwe, tánon thóh nón꞉we iahonwahnhó꞉ton.

²¹ Ók ne Roiá꞉ner nikwé꞉kon ne Só꞉se tánon wahonaʼtón꞉hahse ne iorihwató꞉ken kanoronhkwáhtshera; tánon ne Roiá꞉ner wahaónnien ne shakohnhó꞉tons naontahorihwaié꞉rike tsi nonkwá ne Só꞉se.

²² Nohén꞉ton ié꞉rate ne shakohnhó꞉tons Kwáh Só꞉se ohén꞉ton iaʼthó꞉tahste nahshakotenʼnikón꞉raren ne ronátiaʼkeʼs ratihnhó꞉tonʼs, tánon kwáh tsi nahó꞉ten akaioʼtén꞉ʼen ne tsi iontatehnhotónhkwah, kwáh kiʼ tsi nèntrehre ne Só꞉se.

²³ Nohén꞉ton ié꞉rate ne shakonhó꞉tons kwáh iáh oh thé꞉nen kenʼ tshieshaiéhrhahkwe tsi nahoʼtén꞉shonʼs ne Só꞉se non nihoterihwatsteríston, tiorí꞉wa ne Roiá꞉ner tsi nikwé꞉kon ne Só꞉se; tánon kwáh tsi nenhátiere, ne Roiá꞉ner tsi raianeráhstha.