Genesis 35 - Ohiatonhseratokénti

Ne Jacob Bethel Nón꞉we Nionsá꞉re

¹ Rawenni꞉io wahawènhahse ne Jacob, “Téstaʼn, Bethel nón꞉we niahá꞉se, tánon thóh nón꞉we ionsasatenà꞉taien. Thóh nón꞉we nahtshónnien ne ietsenhahráhkhwah ne Rawenni꞉io tsi ráonha iatotahshién꞉ni nó꞉nen shonsahtshaté꞉kwahse ne tsatateʼkén꞉ʼa Esau.”

² Sók kiʼ ne Jacob wahshakaʼwènhahse ne raonónhskon ratiʼterón꞉ton tánon ratikwé꞉kon ne skátne ratikwekonhátieʼs, “Isehʼ iaʼsewá꞉ti tsi naesewaièn꞉take ne thihatí꞉te ratiní꞉ioʼs, tánon sasewatonhnhakanón꞉ni tánon tesewatá꞉ton tsi nʼi꞉ioht tsi sewatsherón꞉nis;

³ eʼthó꞉ne tetewá꞉taʼn tánon Bethel nón꞉we niehétewe, ne naón꞉ton thóh nón꞉we iahiʼiónnien ne ietsenhahráhkhwah né Rawenni꞉io tsi niká꞉ien ne tehakerihwaʼserakwén꞉ni ne tewenhniserá꞉tehkwe ne shaʼtewakeʼnikónhrhare tánon kwáh iakenikwekonhátieʼskwe ne tsik nonwéhsons niewaké꞉non.”

⁴ Katíʼ Jacob tahonwawíhon akwé꞉kon ne thikontí꞉teʼs niioʼokón꞉ha ne rotiièn꞉tahkwe, tánon ne atahonhtotahrhóktsheraʼs; tánon ne Jacob waʼhaiaʼtátarion karontó꞉kon ne karíhton tsi neʼ nón꞉we niiorontó꞉tahkwe kanatákta ne Shechem.

⁵ Tsi tahontáhsawen ne tahontháhahkwe ne Bethel nón꞉we niahón꞉ne, kahteronhtsherowá꞉nen Rawenniió꞉ke non tá꞉we tánon ne wahotíhrahʼne ne kanatowá꞉nenʼs ne aktóntieʼs tsi nón꞉we nihón꞉neʼskwe, ne ká꞉ti ne tóhsa ónhka ahonwatíhsere ne Jacob raonekenhteronʼtsheraʼshón꞉ʼa.

⁶ Ne Jacob iahá꞉rawe ne Luz (ne ne Bethel nón꞉we) ne ne tsi watonhontsá꞉ien ne Canaan, ráonha tánon tsi nihá꞉ti ne ratikwekonhátie,

⁷ tánon thóh nón꞉we nahrón꞉ni ne ietsenhahráhkhwa tánon ne wahanà꞉tonhkwe ne El-bethel, tiorí꞉wa tsi ehʼ nón꞉we ne kwáh ráonha Rawenni꞉io nihototahshièn꞉ni ne shonsahoté꞉kwahse ne iatateʼkén꞉ʼa.

⁸ Tánon ne Deborah, ne ne Rebekah akaonkwé꞉ta teiakóhshnie, waʼkénheie, tánon karontó꞉kon ne karíhton nón꞉we nakonwaiaʼtáta ne nentié꞉ne nokwá꞉ti ne Bethel. Sók katíʼ neh nón꞉we Allon-bacuth waʼkonwahsèn꞉non.

⁹ Ne Rawenni꞉io shé꞉kon sahototáhshien né Jacob nó꞉nen shaʼtontá꞉re ne Paddan-aram, tánon wahoiaʼtaté꞉riste.

¹⁰ Ne Rawenni꞉io wahawènhahse, “Jacob iesá꞉iats; iáh kíʼ shé꞉kon Jacob thaonsaiesaiátsheke, nok kiʼ Israel entiesaiátsheke.” Sók kiʼ ne Rawenni꞉io Israel sahoná꞉tonhkwe.

¹¹ Ne Rawenni꞉io wahawènhahse, “I꞉i ne Ní꞉io wakeʼshatstenhserowá꞉nen: sathwatsirón꞉ni tánon sewentiohkowáhnha; nonkwehshón꞉ʼa tánon niaʼteiakahontsá꞉kes isé꞉ke non entieiènhtahkwe tsi enionthwatsirón꞉ni, tánon ótiaʼks tsi nienhsathwatsirí꞉ne enhotinontí꞉ioʼne.

¹² Ne ohóntsa nétho tekheiá꞉wi ne Abraham tánon ne Isaac, kwáh í꞉se enskón꞉ion, tánon ó꞉ni iensekhé꞉ion tsi nienhsathwatsirí꞉ne.”

¹³ Eʼthó꞉ne ne Rawenni꞉io sahathará꞉tate karonhiá꞉ke nionsá꞉re sahotiaʼtontákwahse tsi nón꞉we naʼtehotihthá꞉rahkwe.

¹⁴ Né Jacob wahanenió꞉ten tsi nón꞉we naʼtehotihthá꞉rahkwe; tánon tho tahahnekáweron ne oʼnenharákeri ne iahá꞉tate, tánon ó꞉ni tho taháweron ne iakeniewáhtha kèn꞉ie.

¹⁵ Káti ne Jacob neh nón꞉we niwatenà꞉taien tsi nón꞉we naʼtehotihthá꞉rahkwe ne Rawenni꞉io Bethel wahaná꞉tonhkwe.

Tsi Wahrennákerate Ne Benjamin Tánon Tsi Waʼkénheie Ne Rachel

¹⁶ Eʼthó꞉ne tsi naʼtontahón꞉ne ne Bethel; tánon kwáh eʼthó tsi niió꞉re thotinó꞉ronʼskwe ne Ephrath, né Rachel ó꞉nen skanó꞉ronʼs aiowiraién꞉taʼne, tánon kwáh tho tsi niioronhiá꞉kenhkwe.

¹⁷ Ne nó꞉nen kwáh siioronhiá꞉ken, ne iohshnié꞉nons naiowiraièn꞉taʼne waʼawènhahse, “Tóhsa sáteronʼn, aseʼkénh ó꞉nen ó꞉ia sesanekenhteronʼtsheraièn꞉taʼne.”

¹⁸ Ók kenhé꞉ionhskwe, tánon nohná꞉ken shaʼtontontón꞉rie, Ben-oni wahohsèn꞉non ne roièn꞉ʼa; ók ne roʼníha Benjamin neʼ wahohsèn꞉non.

¹⁹ Katíʼ ne Rachel waʼkénheie, tánon tho nón꞉we naʼkonwaiaʼtáta tsi nieiothahí꞉non ne Ephrath (ne ne Bethlehem),

²⁰ Jacob tsi iotenontsístate naotshatónhkhwa wahanenió꞉ten; tsi kanèn꞉iote ne tsi nón꞉we ne Rachel nikonwaiaʼtáten, shé꞉kon thóh nón꞉we nikanén꞉iote nón꞉wa wenhniseraténion. Naonsakonwehiahrahstáhkwake, tánon shé꞉kon nón꞉wa nikaierón꞉ni tsi Rachel aotshatónhkhwa í꞉ken.

²¹ Ne Israel tonsahatháhahkwe, tánon thóh nón꞉we iahataʼtohseró꞉ten ieiotohétston ne tsi kaʼnikáhtote ne Eder.

²² Tsi nikarí꞉wes ne Israel tho nón꞉we nihanákerehkwe neh nón꞉we niionhóntsaien, né Reuben iahá꞉re tánon skátne wahiá꞉rate ne Bilhah ne ne roʼníha tehníiahsé꞉ne; tánon ne Israel waharihwá꞉ronke nétho. Ne Israel ó꞉nen tékeni iawén꞉re nihá꞉ti sihonekenhteronʼtsherá꞉ien.

²³ Ne kí꞉ken ne Leah akoioʼokón꞉ʼahs Reuben (ne ne thakowá꞉nen ne ne Jacob roièn꞉ʼa), Simeon, Levi, Judah, Issachar, tánon ne Zebulun.

²⁴ Nakoioʼokón꞉ʼahs ne Rachel ne ne Só꞉se tánon ne Benjamin.

²⁵ Tánon nakoioʼokón꞉ʼahs ne Rachel aohnhá꞉tshera Bilhah ne ne Dan, tánon ne Naphtali.

²⁶ Ne Leah aohnhá꞉tshera Zilpah nakoioʼokón꞉ʼahs ne ne Gad, tánon ne Asher. Paddan-aram nón꞉we thonennakerá꞉ton.

Tsi Wahrénheie Ne Isaac

²⁷ Jacob roʼnihnéha Isaac niahá꞉re ne ne Mamre nón꞉we, khehs ne Kiriath-arba (Ne ne Hebron) tsi nón꞉we ne Abraham tánon ne Isaac iehninákerehkwe.

²⁸ Nón꞉wa ne Isaac énska tewenʼniáwe tánon shaʼté꞉kon niwáhsen niiohserá꞉ke nikarí꞉wes rónhnhehkwe.

²⁹ Tánon ne Isaac ne nohná꞉ken waʼaónhniaʼte sahatón꞉rie, tánon kwáh tho tsi nithó꞉ionhkwe sharénheie, tánon iahshakohtsá꞉thahrhahse ne rontátenonhkweʼs nohén꞉ton thonenhé꞉ion tsi ní꞉ioht ne ráonha; tánon ne raonekenhteronʼtsheraʼshón꞉ʼa ne ne Esau tánon Jacob wahonwaiaʼtáta.