Genesis 2 - Ohiatonhseratokénti

¹ Tánon ká꞉ti kwáh orihwakwé꞉kon kahsaʼánion ne tsi ionhwentsá꞉te ó꞉ni ne tsi karonhiá꞉te.

² Ne tsatákhaton shiwenhniserakéhaton ne Rawenni꞉io sahakenʼenión꞉ko tsi nahoténshons rohsaʼánion.

³ Wahaiataté꞉riste ne tsatákhaton nónta ó꞉ni kwáh wahrenhniseratokénh꞉tiste, asèʼkenh thóh nón꞉we niwenhniserá꞉tehkwe ne Rawenni꞉io shokenʼeniónhkwen tsi nahoténshons roiotén꞉ʼen ó꞉ni rohsaʼánion tánon wahrenniseraié꞉rite.

⁴ Tánon eʼthó ká꞉ti ní꞉ioht ne Rawenni꞉io tsi róhshon tsi ionhwentsá꞉te ó꞉ni ne tsi karonhiá꞉te. Nó꞉nen ne Roiá꞉ner Rawenni꞉io sharonwentsí꞉sa ó꞉ni shaharonhísa,

Kahéhtakon Ne Eden

⁵ iáh oʼthé꞉nen tekaiéntakwe ne kaienthóhtshera ne tsi ionhwentsá꞉te iáh ó꞉ni ne kanenhaʼshón꞉ʼa oʼthé꞉nen tetká꞉nios, asékenh ne Roiá꞉ner Rawenni꞉io ne tsi iáh á꞉reʼkhok tehokennoréhston, tánon iáh ónka tehaonkwé꞉taien ne tahonʼkenhrawénrie;

⁶ nok nohné꞉kanos ná꞉kon nonkwá꞉ti nitewéhthakweʼ tsi iohnekanóntenhskwe nonhwéntsa.

⁷ Eʼthó꞉ne ne Roiá꞉ner Rawenni꞉io wá꞉thrakwe nokén꞉ra tánon wahoiaʼtón꞉ni ne rón꞉kwe: tsi tehanionkáronte nón꞉we niahotonhniserón꞉ti ne ne iónhnhe aonrí꞉sera tánon ne rón꞉kwe tontáhsawen wahatónhnhete.

⁸ Eʼthó꞉ne ne Roiá꞉ner Rawenni꞉io wahathehtón꞉ni eʼthó nón꞉we ne konwanatónhkhwa ne Eden, né꞉ne tsit karahkwínekenʼs nonkwá꞉ti, tánon tho nón꞉we nahóhtkáʼwe ne rón꞉kwe ne ón꞉waʼk wahoiaʼtísa.

⁹ Tho nonhwenhtsá꞉ke ne Rawenni꞉io niaʼtekarón꞉take waharontonniánion nahontaká꞉nio ne kwáh iorontaskatsténion ne nón꞉we naʼkontehiá꞉ron ó꞉ni nahontakáhawe ne kwáh wahí꞉ioʼs ne꞉ne kakkhwa akénhake. Ne kwáh shaʼtekahehtí꞉hen tho iorón꞉tote né꞉ne tiakó꞉wis naiakonhnhekeʼónwe, nó꞉ia karón꞉ta né꞉ne tiakó꞉wis nattokhátshera ne ioiánere tánon ne karihwáksen.

¹⁰ Ne kaniataratátie né꞉ne Eden nón꞉we nitiawé꞉non tánon né ionekanóntenskwe ne kahéh꞉taien; tsi ieiotohétston ne Eden kaié꞉ri nikaniatará꞉ke ieiotón꞉ʼon.

¹¹ Ne tiotierentáhkwen kaniataratátie né꞉ne Pishon; né꞉ne iaʼteiokwatasé꞉ton ne tsit kanakerahserá꞉ien ne Havilah, kwáh áoskon nohwistanó꞉ron nihatitshénrieʼskwe tánon ó꞉ni kwáh wakén꞉re iontiaʼtakonónhstáhkhwa ó꞉ni kanenianó꞉ronʼs;

¹² kwáh aʼóhskon nohwistanó꞉ron ne nón꞉we nihatitshénrieskwe tánon ó꞉ni ne kwáh wakèn꞉re ne iontiatakonhonstháhkhwa ó꞉ni ne kanenianó꞉rons.

¹³ Ne tekeníhaton kaniataratátie né꞉ne Gihon; né꞉ne iateioʼhkwatasé꞉ton tsi tkanakerahserá꞉ien ne Cush.

¹⁴ Nahsénhaton kaniataratátie né꞉ne Tigris, né꞉ne ná꞉kon nonkwá꞉ti ne Assyria, tánon ne kaieríhaton kaniataratátie ne nen né꞉ne Euphrates.

¹⁵ Eʼthó꞉ne ne Roiá꞉ner Rawenni꞉io kahéhtakon ne Eden nón꞉we nahóʼteron ne rón꞉kwe né꞉ne tahaʼkenhrawénrie ó꞉ni nahatenʼnikón꞉raren.

¹⁶ Wahohró꞉ri, “Enwá꞉ton nenhsá꞉iake ne tsik niwahió꞉ten ne iohientónnion tsi kehrí꞉tons ne kahéʼhtakon.

¹⁷ Ne khók thí꞉ken kéhrite ne tiakó꞉wis nattokháhtshera tánon ne ioiánere tánon ne karihwáksen. Tóhsa sahiaʼnihiontá꞉ko neʼthó kéhrite nahsá꞉iake; tókaʼ tho nénhshiere, kwáh ne sahenhní꞉sera ensí꞉heie.”

¹⁸ Eʼthó꞉ne ne Roiá꞉ner Rawenni꞉io wahén꞉ron, “Iáh teioiánere ne raonhá꞉ʼa khók akénhake ne rón꞉kwe. Enhiiónnien ne kwáh aontakarihwaié꞉rike nahotenroséʼraièn꞉take nahohshnié꞉non.”

¹⁹ Sók kiʼ ne Roiá꞉ner Rawenni꞉io wahshakoiatonniánion noʼkenhrà꞉ke nonhtáwe ne niaʼtehá꞉ti karioʼshón꞉ʼa ó꞉ni notsiʼtenʼokón꞉ʼa. Sók tsi í꞉tres ne rón꞉kwe niahshakoiaténhawe oh sí꞉ken nahò꞉ten enhshakoná꞉tonkweʼ; eʼthó kiʼ nitiawé꞉non tsi nahoʼténshon konwatiiátshonʼs.

²⁰ Sók kiʼ ne rón꞉kwe akwé꞉kon notsiʼtenʼokón꞉ʼa ó꞉ni ne kárioʼs wahshakohsennawíhon; nok iáh kiʼ ne skaiá꞉ta teiotetshénrion ne kwáh ahotenroseronnién꞉ni nahoʼhshnié꞉nonke.

²¹ Eʼtho꞉ne ne Roiá꞉ner Rawenni꞉io kwáh í꞉ken tsi wahotá꞉sten ne rón꞉kwe, tánon tsi náhe ró꞉taskwe kiʼ rón꞉kwe, énska wahonaʼatóhtshión tánon shahahnó꞉ton ne raierón꞉ke.

²² Tánon ne wahaiaʼtónniaʼte ne ión꞉kwe, ne rón꞉kwe raonaʼáhta tánon raohén꞉ton ne rón꞉kwe niahaiaʼténhawe.

²³ Eʼthó꞉ne ne rón꞉kwe wahawénhahse ne Rawenni꞉io, “Keniéntshia tsi iáh oʼthé꞉nen tewakehrá꞉rehkwe ó꞉nen kén꞉ʼen ón꞉we né kwáh ne shaʼákeniʼnekwénhsha í꞉ken— naʼóstsien akstsientáke nón꞉we nitiawé꞉non, tánon naʼowá꞉ron akeʼwahrónhne nón꞉we nitiawé꞉non. Ión꞉kwe enkonwanatónhkhwake né tsi ronkwè꞉ne non꞉we nitiawé꞉non.”

²⁴ Ne aorí꞉wa ne rón꞉kwe ʼnenshakotiaʼtonhtáhkwahse ne roʼníha tánon ne roʼnisténha tánon ró꞉ne enhateraʼnentákten, ne tenihiáse skaieróntat khók ienhiáton.

²⁵ Ne rón꞉kwe tánon ne ión꞉kwe tehnitsá꞉ron raotinéhóskonk thi kén꞉ne, ók iáh kíʼ tehonatehenseraièn꞉htahkwe.