Genesis 16 - Ohiatonhseratokénti

Sahrennákerate Ne Ishmael

¹ Nón꞉wa ne Sarai, né꞉ne Abram ró꞉ne, iáh teiowiraién꞉tahkwe. Iohnhaʼtsheraién꞉tahkwe Egyptró꞉non naʼkanekwenhsó꞉ten Hagar konwá꞉iatskwe,

² tánon ne Sarai wahawénhahse ne Abram, “Satkáhthohs, ne Roiá꞉ner iáh tehakerihwá꞉wis naonkewiraién꞉taʼne; wás akehnhá꞉tshera skátne tsá꞉rat; nontié꞉renk ne enkakwé꞉ni naonkewiraién꞉taʼne nahonhá꞉ke naontá꞉we.” Ne Abram waharihwanón꞉weʼne tsi nahó꞉ten waʼkén꞉ron ne Sarai.

³ Ká꞉ti, Abram ó꞉nen oié꞉ri niioserá꞉ke Canaan aotonhontsá꞉ke shiehanákerehkwe, né Sarai, né꞉ne Abram ró꞉ne í꞉ken, iaʼoiaʼténhawe ne Hagar ne Egyptró꞉non aohná꞉tshera, tánon Abram iahaʼonkwé꞉ton tsi ní꞉ioht ne ró꞉ne akénhake.

⁴ Katíʼ skátne wahiá꞉rate nʼAbram tánon ne Hagar, tánon ʼontháwa nowirá꞉ʼa. Nó꞉nen shónttoke tsi iowiraientá꞉sere, Sók waʼokèn꞉ron ne Sarai.

⁵ Eʼthó꞉ne ne Sarai sahawènhahse ne Abram, “Tiorí꞉wa tsi niwahétken tsi nonkatié꞉rase í꞉se kíʼ entsisà꞉raʼne! Í꞉i iekát꞉kawenh nakehnhá꞉tshera né senentshà꞉ke né꞉ne tahsahrhó꞉ton, tánon shaʼkarihwatshén꞉ri tsi iowiraientá꞉sere, waʼtewakatkenʼhkerènhthen. Aiá꞉wens ne Roiá꞉ner ahshonkenirihwènhten ónhka ne teteniiáhse tieié꞉rits; í꞉se káton í꞉ʼi!”

⁶ Ók nʼAbram washakawènhase ne Sarai, “Í꞉se tehseniarotárhon ne sahnhátshera; thóh naʼtié꞉raʼs tsi nitehsahská꞉neks.” Eʼthó꞉ne ne Sarai tsi naoteʼniakátstattshe ne Hagar, ne waʼkarihón꞉ni ne Hagar saioté꞉kwaʼse.

⁷ Ne Roiá꞉ner raoronhiaʼkeró꞉non waʼthiatátken ne Hagar tsi tiohné꞉kote ne iawentsathenhá꞉ke né꞉ne tsi nieiothahí꞉non ne Shur

⁸ tánon ne raoronhiaʼkehró꞉non wahén꞉ron, “Hagar, í꞉se ne Sarai aohnhá꞉tshera í꞉ken, kaʼnontáhse kaʼó꞉ni nón꞉we niahesenonhátie?” Waʼkén꞉ron, “Takaté꞉kwaʼse ne wakéhnhaʼs Sarai.”

⁹ Ne Roiá꞉ner raoronhiaʼkehró꞉non sahrènhahse, “Thóh ionsá꞉se tsi tkènteron ne sánhas, tánon sewén꞉narak.”

¹⁰ Eʼthó꞉ne ne Roiá꞉ner raoronhiaʼkehró꞉non sahrènhahse, “Kwáh enkonhiónhnien ne tsi nienhsathwatsí꞉rine ne kwáh aesewatiohkowáhnha né꞉ne iáh thaón꞉ton nahonwanáhshehte.

¹¹ Tánon ne Roiá꞉ner raoronhiaʼkehró꞉non sahrènhahse, satahónhsatat, ó꞉nen sawiraientá꞉sere, tánon ensanekenhteronʼtsheraièn꞉taʼne; ó꞉nenk tsi Ishmael enhtsenà꞉tonhkwe; aseʼkénh ne Roiá꞉ner wahothón꞉teʼne tsi niió꞉re tsi saronhiá꞉ken.

¹² Ók kiʼ ne tshièn꞉ʼa tho ní꞉ioht tsi enhrónhnheke tsi ní꞉ioht ne iáh tekarihonnién꞉ni tewahònhtes; kwáh onkweʼtakwé꞉kon enhshakotkón꞉ten, tánon kwáh onkweʼtakwé꞉kon tsi enhonwatkón꞉ten, tánon kwáh iáh shaʼhotirí꞉wa thakénhake tsi nokwá ne rontátenonhkweʼ.”

¹³ Hagar ʼontateriʼwanón꞉tonhse kí꞉ken kariʼwanontónhtshera, “Kwáh ónhte kenh rí꞉ken ne Ni꞉io tánon shé꞉kon nikónhnhe?” Iaʼtiorihwaién꞉taʼse niahoná꞉ton ne Roiá꞉ner né tsi ráonha rahthará꞉nihkwe ken kíʼ nikahsennó꞉ten “I꞉se né Sewenní꞉io né teská꞉nere.”

¹⁴ Ne káti aorí꞉wa nonkwehshón꞉ʼa ne konwanáʼtónhkhwa ne iohnáwerote tsi naʼtetsátere ne Kadesh tánon ne Bered. “Né Iohnáwerote ne Ronhnheʼón꞉we né Tehakká꞉nere.”

¹⁵ Ne Hagar wahonákeratste ne Abram raonekenhterón꞉tshera; tánon ne Abram Ishmael wahoná꞉tonhkwe ne raonekenhterón꞉tshera, tsi niká꞉ien ne Hagar wahawennákeratste.

¹⁶ NʼAbram shaʼté꞉kon-niwáhsenʼ iá꞉iaʼk shaʼtehaohseriiá꞉kon nó꞉nen né Hagar shahawennákeratste né Ishmael.