Genesis 10 - Ohiatonhseratokénti

Akaonhwentsakwé꞉kon Nón꞉kwe Raonhá꞉ke Ne Noah Nitiakothwatsirí꞉non

¹ Ne kí tsi wahatiwatsiratátie ne Noah ne raonekenhteronʼtsheraʼshón꞉ʼa, ne ne Shem, Ham, tánon ne Japheth. Ne sontóhetsteʼ tsi iawehnó꞉tonhkweʼ, ratikwé꞉kon wahotinekenhteronʼtsheraientá꞉seron.

² Ne raonekenhteronʼtsheraʼshón꞉ʼas ne Japheth: ne ne Gomer, Magog, Madai, Javan, Tubal, Meshech, tánon ne Tiras.

³ Ne raonekenhteronʼtsheraʼshón꞉as ne Gomer: né: ne Ashkenaz, Riphath, tánon Togarmah.

⁴ Ne raonekenhteronʼtsheraʼshón꞉ʼas ne Javan: ne ne Elishah, ó꞉ni ne Tarshish, Kittim, tánon ne Dodanim.

⁵ Japheth kíʼ nón꞉we nithonathwatsirí꞉non ne ne kawehnohkwaktóntie ionhwentsaké꞉ronʼs ratinakerénion nonkwehshón꞉ʼas. Ne raononwentsaké꞉shónʼs, ne rontá꞉tis tsi nihonronkhahttsheró꞉tenʼs, ne tsi ratiʼtaraién꞉tons, ne raotitióhkwakons.

⁶ Ne Ham ne raonekenhteronʼtsheraʼshón꞉ʼa: ne Cush, Mizraim (Egypt), Put, tánon ne Canaan.

⁷ Ne kí ne Cush raonekenhteronʼtsheraʼshón꞉ʼa: ne ne Seba, Havilah, Sabtah, Raamah, tánon ne Sabteca. Ne Raamah raonekenhteronʼtsheraʼshón꞉ʼa ne ne Sheba tánon ne Dedan.

⁸ Ne Cush ráonha kaʼníhsera rotón꞉ʼon tsi nokwá ne Nimrod; ne Nimrod raónha thotierénhton ne tsi niionhwéntsa rateriiohskó꞉wa wahá꞉ton.

⁹ Kwáh í꞉ken tsi ratoratskó꞉wa kén꞉ne raohén꞉ton ne Roiá꞉ner, “Kwáh tsi ní꞉ioht ne Nimrod ratoratskó꞉wa í꞉ken raohén꞉ton ne Roiá꞉ner.”

¹⁰ Nonkwehshón꞉ʼas ne tsi kanatowá꞉nens ne Babel, Erech, tánon ne Accad, ronnónha ne kwáh tsi karihwakweʼní꞉io ronwaienawaʼséhahkwe, akwé꞉kon kí꞉ken kanatowá꞉nenʼs aotonhwentsá꞉ke ne Shinar nón꞉we nikanataién꞉tonʼs.

¹¹ Thóh aotonhwentsá꞉ke ne Shinar tontahahtén꞉ti Assyria niahá꞉re, tánon thóh nón꞉we iahatenatonniánion ne Nineveh, Rehoboth-Ir, Calah, tánon ne

¹² Resen, ne nenʼ néʼeh tsi naʼtetiátere ne Nineveh tánon ne kanatowá꞉nen Calah.

¹³ Ne Egypt ráonha raonekenhteronʼtseraʼshón꞉ʼas tsi nonkwá ne Ludim, Anamim, Lehabim, Naphtuhim,

¹⁴ Pathrusim, Casluhim, tánon ne Caphtorim, ne ne Philistiaró꞉nons thóh nón꞉we nithonatenekwenhsí꞉non.

¹⁵ Ne Canaan ráonha kaʼníhsera wahá꞉ton tsi nonkwá né Sidon ne ne thakowá꞉nen roién꞉ʼa, tánon ne Heth,

¹⁶ ó꞉ni ne Jebusites, ne Amorʼró꞉nons, Girgashró꞉nons,

¹⁷ ó꞉ni ne Hivró꞉nons, ne Arkites, ne Sinites,

¹⁸ ó꞉ni ne Arvadites, ne Zemarites, tánon ne Hamathites. Ne kí꞉ken ne raotiʼtaraʼshón꞉ʼas ne Canaanites tánon waʼthonré꞉ni.

¹⁹ Tánon tsi nihotinakeráhsera ne Canaanites Sidon nón꞉we tiotáhsawe, eʼthó꞉ne Gerar nonkwá꞉ti nietsawé꞉non, ié꞉io tsi niió꞉re ne Gaza, eʼthó꞉ne Sodom nonkwá꞉ti nietsawé꞉non, tánon ne Gomorrah, Admah, tánon ne Zeboiim kwáh tsi niió꞉re ne Lasha.

²⁰ Né kí ne Ham raonekenhteronʼtsheraʼshón꞉ʼa, skátne ratinákerehkwe tsi nihotiʼtaroʼtén꞉sonʼskwe ó꞉ni ne rontá꞉tiskwe tsi nihonhronkhahttsheró꞉tenʼs ne raononhwentsá꞉keʼs, ó꞉ni ne raotitióhkwakonʼs.

²¹ Shem ráonha thokstén꞉hahkwe, ne iatateʼkén꞉ʼa ne Japheth, ne Shem ráonha kaʼníhsera wahá꞉ton ratikwé꞉kon ne Eber tsi niahathwatsí꞉rine.

²² Ne raonekenhteronʼtsheraʼshón꞉ʼas ne Shem: ne ne Elam, Asshur, Arpachshad, Lud, tánon ne Aram.

²³ Ne Aram raonekenhteronʼtsheraʼshón꞉ʼa ne ne Uz, ó꞉ni Hul, Gether, tánon ne Meshek.

²⁴ Ne Arpachshad ne ieshoién꞉ʼa ne Shelah, ók ne Shelah ne ne ieshoién꞉ʼa ne Eber.

²⁵ Ne Eber tékeni tehonekenhteronʼtsheraién꞉takwe: shaiá꞉ta ne roién꞉ʼa Peleg ronwá꞉iatskwe, aseʼkénh ne sihotenhniseraténionʼskwe teiakonitiohkwakkháhshion ne tsi ionhwentsá꞉te; ne iatateʼkén꞉ʼa Joktan neʼ ronwá꞉iatskwe.

²⁶ Ne Joktan ne ne shakoioʼokón꞉ʼas ne Almodad, Sheleph, Hazarmaveth, Jerah,

²⁷ Hadoram, Uzal, Diklah,

²⁸ Obal, Abimael, Sheba,

²⁹ Ophir, Havilah, tánon ne Jobab; ratikwé꞉kon kí꞉ken Joktan raonekenhteronʼtsheraʼshón꞉ʼas.

³⁰ Tsi nón꞉we nihatiná꞉kere ne ne Mesha kwáh tsi niió꞉re ne Sephar ne ne tsi ionhniahrónnions kananerahserá꞉ien ne tsitkarahkwínekenʼs nonkwá꞉ti.

³¹ Ne kí꞉ken ne Shem raonekenhteronʼtsheraʼshón꞉ʼas, skátne ratinákere tsi nihotiʼtaroʼtén꞉shons tánon ne rontá꞉tis tsi nihonhronkhátsheró꞉tenʼs ne raononhwentsà꞉keʼs ó꞉ni ne raotitióhkwakon.

³² Ne kí꞉ken ne raotitaraʼshón꞉ʼas ne Noah raonekenhteronʼtsheraʼshón꞉ʼas, ne entioianénhawe tsi nienhonthwatsí꞉rine ne raotitióhkwakonʼs; tánon thóh tontáhsawen kí꞉ken onkwehshón꞉ʼas tsik nonwéhson niaʼthonré꞉ni ne tsi ionhwentsá꞉te shonhtóhetste tsi iawenhó꞉tonhkweʼ.