Ezra 7 - Ohiatonhseratokénti

Ezra Iahá꞉rawe Jerusalem

¹ Wé꞉so iosehráke onákenhke, nó꞉nen ne Artaxerxes shiakoraʼkó꞉wa ne Persia nón꞉we, thóh ranakerè꞉kwe rónhkwe Ezra ronhwá꞉iatskwe. Shasakowatsirí꞉shake ne sakosotkén꞉en tsi nió꞉re ne Aaron, né꞉ne ratsihenstowá꞉nenʼne, ken ní꞉ioht: Ezra ne roʼnikén꞉en né꞉ne Seraiah, ne roʼnikén꞉en né꞉ne Azariah, né꞉ne roʼnikén꞉en ne Hilkiah,

² né꞉ne roʼnikén꞉en ne Shallum, né꞉ne roʼnikén꞉en ne Zadok, ne roʼní꞉ha né꞉ne Ahitub,

³ ne roʼní꞉ha né꞉ne Amariah, ne roʼní꞉ha né꞉ne Azariah, ne roʼní꞉ha né꞉ne Meraioth,

⁴ ne roʼní꞉ha né꞉ne Zerahiah, ne roʼní꞉ha né꞉ne Uzzi, ne roʼní꞉ha né꞉ne Bukki,

⁵ ne roʼní꞉ha né꞉ne Abishua, ne roʼní꞉ha né꞉ne Phinehas, ne roʼní꞉ha né꞉ne Eleazar, ne roʼní꞉ha né꞉ne Aaron.

^6-7 Ne Ezra kwáh í꞉ken tsi rothiathonseraweiénston kwáh teiahonkhó꞉ton tsi rotherienhtáres ne kaianerénhsera tsi niká꞉ien ne Roiá꞉ner, ne Sakowenní꞉io ne Israerró꞉nonke, tsi nitó꞉wi ne Mahís. Tiorì꞉wa ne Ezra rahá꞉we ne rahohiathateríhtsheras ne Roiá꞉ner Rahó꞉ní꞉io, ne rakoraʼkó꞉wa akwé꞉kon thó꞉wi tsi nihorihwanón꞉ton. Ne tsathá꞉khaton nihioserathátse shihononhtí꞉iokwe ne Artaxerxes, ne Ezra Babylonia tahatén꞉ti Jerusalem niaháre rotsiokwí꞉ne ne Ratisí꞉taerró꞉nons thóh rathihiaʼtarátie ne ratsihénstatsis, ó꞉ni ne Levites, Nononhsatokentihkó꞉wane ronhterenhnó꞉tas, Nononsatokentihkó꞉wane rathinikónhrare, tánon ne rothihiò꞉tens.

^8-9 Sonhthontenhniseratsérenhte ne tsotenhnithatserénhton Babylonia tahonthénhti, tánon tsi Rawenni꞉io washakoienawasehátie Jerusalem iahón꞉newe ne tsotenhniseratierénhton ne wískhaton siwenhniʼthakéhaton.

¹⁰ Ezra wahaterihwatokénsthe ne tsi rónhnhe nahatéweiensthe ne Roiá꞉ner rahoianerénhseras, nahahioténsthe, tánon nashakorihónhnien oriwakwé꞉kons ne kaianerénhseras tánon tsi nikaianerenhseró꞉tens nonhkweshón꞉as Nisraerró꞉nonke.

Ne Kahiatónhsera Tsi Niká꞉ien Ne Rakorakowané꞉en Artaxerxes Thó꞉wi Ne Ezra

¹¹ Ne Rakoraʼkó꞉wa Artaxerxes tahá꞉wen ne ken hiotiéhtons kahiatónhseras ne Ezra, ne ratsihénstatsi ó꞉ni roteweiénston, ne raónha kwáh í꞉ken tsi rotherièn꞉tare ne kaianerénhsera ó꞉ni nahotsawenhrákʼtseras tsi niká꞉ien ne Roiá꞉ner thesakó꞉wi nʼIsraerʼró꞉nons:

¹² “Tsi nitsawè꞉non ne raonhà꞉ke ne Rakoraʼkó꞉wa Artaxerxes ne ratsihénstatsi Ezra, rotheweiénston ne rahohianerenhserashón꞉as ne Rawenni꞉io ne tsi Karonhiá꞉te.

¹³ “Wakerihowánathe kwáh tsi niwakenakeráhsera ratikwé꞉kon nʼIsraerʼró꞉nons onhkweshón꞉as, ne ratitsihénstatsis, tánon ne Leviró꞉nons ne kwáh ronská꞉neks nahothihianerenhseraiénthane nahisehwaterósen ne Jerusalem niahí꞉sewe.

¹⁴ Ní꞉i, skát꞉ke ne tsá꞉ta nihá꞉ti ne hiontʼtsienhaién꞉ni, iakwaténiethe naserihwisákha onh nihʼtsiot ne Jerusalem ó꞉ni ne Judah ne nahónton nahiakwatʼkháto tonihiohiánere ne rahohianerénhsera ne Saní꞉io, tsi niká꞉ien ne iesathakweniáienhni, tsi watewenhnarahkwen.

¹⁵ Iahásaf nowistanó꞉rons tánon ne kawistará꞉kens ne tkaiesthánions ne tsi ní꞉i ó꞉ni ne hionktsienhaién꞉ni iakwahskáneks ne ahonthasakwáhion ne Rawenni꞉io ne Israerró꞉nonke, ne rahononhsatokentihkó꞉wa tsi Jerusalem nón꞉we ítken.

¹⁶ Tánon ó꞉ni akwé꞉kon iahásaf ne kawistará꞉kens ó꞉ni nowistanó꞉rons tsi nisaró꞉ron ne tsi wathonhontsá꞉ien ne Babylon tánon tsi nithotiiesthánion ne Israerʼró꞉nons onhkweshón꞉as ó꞉ni ne rahotitsihénstatsis tsi nikonhwá꞉wi ne rahononhsatokentihkó꞉wa ne Rahotiní꞉io ne Jerusalem nón꞉we.

¹⁷ “Kwáh tashateweién꞉ton tsi íhsats kí꞉ken oʼwísta tánon ne senaskwahní꞉nont ne té꞉ro, teiotinakaronhtón꞉a ratítsinn, teiotinakaronhtón꞉a owí꞉ras, onátsias, ó꞉ni onenharataʼsehontsherákeri tánon thóh iahásren ne ientsenharákwahke ne Ononsatokentihkó꞉wane ne Jerusalem.

¹⁸ Enwá꞉ton ná꞉shatste ne kawistará꞉kens ó꞉ni nowistanó꞉rons ne iothaténhrons ne kwáh tsi nahó꞉tens ní꞉se tanon ne onhkweshón꞉as ahisewaskáneke, tsi thóh nenhthonikonhrohténhake ne Rawenni꞉io

¹⁹ Ó꞉nenk tsi enthé꞉tson ne Rawenni꞉io Jerusalem nón꞉we akwé꞉kon tsi nihionsthashón꞉as ne tiesá꞉wi nahónsthonke Nononhsatokentihkó꞉wane tsi nihionterén꞉naiens.

²⁰ Tánon ne tsi nathahisatonhontsó꞉nike noiáhson nahoʼténhsons Nononsatokentihkó꞉wane, thóh nón꞉we iénsko ne tsi ratiwisthaientháhkwas ne kanontiióshera.

²¹ “Wakeró꞉ri ratikwé꞉kon ne tehontwistanónhna ne Tsi iatewatʼtséntos nokwá꞉ti ne Euphrates wathonhontsá꞉ien nahonthakariwaié꞉rike tsi nahonthahónhion ne Ezra, né꞉ne ratsihénstatsi ó꞉ni rotheweiénston ne rahoianerénhseras ne Rawenni꞉io Karonhiá꞉ke, akwé꞉kon tsi nenhiariwanón꞉tonhse,

²² tsi nió꞉re né 7,500 nikakonhtsherá꞉ke kawistará꞉kens, 500 tewenhniáwe nikawinhotsherá꞉ke onátsias, 550 nikawerokwáhkes ne onenharataʼsehontsherákeri, 550 nikawerókwakes ne iakenhiewátha-kén꞉ie, tánon kwáh tsi ní꞉kon tehiothonhontsó꞉hon ne tiohió꞉tsis.

²³ Ó꞉nenk tsi kwáh enshathenhnikónhraren naserihwaié꞉rihte orihwakwé꞉kon ne Rawenni꞉io ne Karonhiá꞉ke tsi nenharihwanón꞉ton tsi nokwáh ne Ranononhsatokentihkó꞉wa, tánon káti orihwí꞉io shón꞉ni ne tóhsa nonhwén꞉ton ahakenákhwahse tánon ó꞉ni tsi nihá꞉ti ne enshontenonhtí꞉iosthe ne tetsonhkenatʼthákwen.

²⁴ Kwáh tó꞉sa nonhwén꞉ton shekarotháshen ne ratitsihénstatsis, ne Leviró꞉nons, ne ronhterenhnót꞉thas, ne ratinikonhrares, ne rotihiotens, khés nón꞉kak akó꞉ren ne tahonaterihwasónhterehke kí꞉ken Ononhsatokentihkó꞉wa.

²⁵ “Í꞉se, Ezra, shasthonhátie nateʼnikonhrathokhá꞉tshera ne Saní꞉io thiá꞉wi, ne nashehiatharakwenhá꞉ton ne shakonaterihwatsterísthase tánon ne rathirihwénhtas nashakonatkórasthe nonhkweshón꞉as ne tsi iaʼtewatséntos nokwá꞉ti ne Euphrates tsi niká꞉ien ne rathísere tsi nihoianerenhseró꞉te ne Saní꞉io. Ó꞉nenk tsi ensherihónhnien né꞉tho kaianerénhsera nónhka ne iáh tehiakoterièn꞉tare.

²⁶ Tó꞉ka ónhkak iáh tahionhtewénhnaraʼkwe ne rahoianerénhsera ne Saní꞉io khés ne kaianerénhseras tsi kanonhtiiotsherá꞉ien, kwáh ki entkariwaié꞉rihke tsi ní꞉ioht tsi enhonwatirewáthe: ne nahonwatinonhwarià꞉khon khés nahonwananahkerákwahthe.”

Ezra Watonhnonhwerá꞉ton Ne Rawenni꞉io

²⁷ Ezra wahèn꞉ron, “Tehonwanonhwerá꞉ton ne Roiá꞉ner, ne sháko Ní꞉io ne iethisoʼthonkonhkén꞉en! Wahahónhnien ne rakó꞉ra ne nahonikonhroténhake tsi thóh ki ní꞉ioht tsi ahakwéniensthe ne rahononhsatokentihkó꞉wa ne Roiá꞉ner ne Jerusalem nón꞉we.

²⁸ Né꞉ne rahoténhrat ne Rawenni꞉io watkaténhtsa nahawerienʼtí꞉io ne rakó꞉ra, ó꞉ni ne ronhwatsienhaién꞉nis, tánon ratikwé꞉kon ne rotishatstenhserowá꞉nens rahonkweʼtashón꞉as; Ne Roiá꞉ner Akení꞉io tahá꞉kon ne kaʼnikonhrahniráhtshera, tánon ki wakʼkwé꞉ni tsi wakhéreke ronatiohkowá꞉ne nononhtsikowátʼtsons ne tsi ratitióhkwaiens nʼIsraerʼró꞉nons ne tahonthahiákwe.”