Ezra 6 - Ohiatonhseratokénti

Ne Rakoraʼkó꞉wakwe Cyrus Tsi Nihotenhnahónkwe Onhterihwatʼtsénhri

¹ Káti ne Ronhnontí꞉io Darius wahahianerenhseríhsa nakarihwishákhonke ne tsi ratihiatonhseraientháhkwa ne kanonhtiiótsera tsi nón꞉we niwateweiénthons ne Babylon nón꞉we.

² Ók tsi kanatowanénhke ne Ecbatana ne nahontonhontsá꞉ke ne Media nón꞉we né꞉tho kahiatonhserakwenón꞉ni honteʼtsénhri, thóh nón꞉we nikahiathónhnionh:

³ “Ne shonthonthosehratié꞉renhte Siharórakwe ne Cyrus wahathénhnane né꞉tho Ononsatokentihkó꞉wa ne Jerusalem nón꞉we nahonsakanonhsón꞉nike tsi thóh nón꞉we ne kariwihiosehokón꞉as nahonterihwathenhtsátonhke tánon nahonteskonhtʼtháke. Nononsatokentihkó꞉wa tióhton niwáhsen niwashí꞉take nahontahiotʼteske tánon tióhton niwáhsen niwashí꞉take natahonthakáronhke.

⁴ Nashonthákes tsi enwashonthonhní꞉hake tiothinénhra thenkaronthaientʼthótonhke tió꞉konte ne asénhaton nienhiotinenhrakehátonke nosténhra. Tsi nienkakáhrathe kanonhtiiótsera enhkakahrià꞉ke.

⁵ Káti ó꞉ni nowistanó꞉rons ó꞉ni ne kawistará꞉kens hionsthasónhas ne Ronhnonhtí꞉iokwe Nebuchadnezzar thó꞉ha ne Babylon nón꞉we ne Ononsatokentihkó꞉wane ne Jerusalem tsi iahonhsakáhake tsi nón꞉we tionákthe né꞉ne Jerusalem Ononsatokentihkó꞉wane.”

Ne Ronhnontí꞉io Darius Wahathénnane Niahonsonhthasónhtarake Ne Kahioténhse

⁶ Ethò꞉ne ne Ronhnontí꞉io Darius hionshasakohiá꞉tonhse: “Ne Tattenai, rakó꞉ra ne tsi iaʼtewatséntos nokwá꞉ti ne Euphrates, né꞉ne Shethar Bozenai, tánon ne iesahiathánonhne ne tsi iaʼtewatséntos nokwá꞉ti ne Euphrates. “É꞉ren í꞉sewet nononsatokentihkó꞉wane

⁷ tánon tó꞉sa othé꞉nen sewahiótat tsi satinonhsón꞉nis. Ietsirí꞉hon ne rakó꞉ra ne Judah tánon ne Sitaeró꞉nons sakotihéntenhse nahonsahatinonhsón꞉ni Nononsatokentihkó꞉wa ne Rawenni꞉io rahononsatokentihkó꞉wa tsi nón꞉we nikanonhsóh꞉thakwe ne tiotierénhton.

⁸ Kwáh káti wakwahró꞉ri naietsiié꞉nawaʼse nahonsakanonhsón꞉nike. Tsi nienhkakarátsthe kwáh entkarihwaié꞉rike tsi enwát꞉thako ne kanontiiotserá꞉kon ahowístas tsi nihotiienáhon tsi nihiotkarià꞉kon ne kaientháhtseras ne tsi iaʼtewatsénhtos nokwá꞉ti ne Euphrates, ne káti ne kahioténhse ne tó꞉sa akahiothátonhke.

⁹ Sewenhniseratʼtsons, iáh tetsotewáton, ó꞉nenk tsi enteséhion ne ratitsihénstatsis ne Jerusalem nón꞉we kwáh tsi nahó꞉ten tahonatonhontsó꞉nike: ne nithotihiónha tero, teiotinakaronhtón꞉a, khés ne teiotinakaronhtón꞉a owí꞉ra nakonwateskónhten tsi ahonwatatʼtse ne Rawenni꞉io ne Karonhiá꞉ke, khés onátsia, tsoiótsis, onenharataʼsehontsherá꞉keri, khés ne iakeniewáhtha kén꞉ie.

¹⁰ Thóh kí꞉ken nakaiérenhke ne káti nahónton nahonthahatí꞉ieste ne karihwihiosehokón꞉as ne nahawerientí꞉iosthe ne Rawenni꞉io ne Karonhiá꞉ke tánon nahionterén꞉naien ne rahohiathateríhtseras nahóntʼrane tánon nakenekenhteronhtserashón꞉as.

¹¹ Tánon ishiʼnón꞉we tsi nakerihwí꞉sa né꞉tho tó꞉ka ónhka iáh thahionhtewénhnaraʼkwe kí꞉ken kaianerénhsera, ne tekaronhtháronhwe enhiotsiónhake ne tsi rothinonhsó꞉tons, enkahiothí꞉iaton ne tsi iehiotʼthe, tánon ethò꞉ne tenhonwatihiatawéheste. Tánon ne tsi rothinonhshó꞉tons ononhwénhsehras enhionhniáthonke tsi enhiotsʼthokó꞉thonke.

¹² Aiá꞉wens ne Rawenni꞉io tsi raónha rorákwen ne Jerusalem tsi thóh nón꞉we nenhonwasenhnaienthásehke, ronhwahiatí꞉nekenf ónhka ne ronhnonhtí꞉io khés ne onhkweshón꞉as ne tenhietsiónsthe ne ken kaianerénhsera tánon nahionhtheʼniénten nahierihwathónhte ne Ononsatokentihkó꞉wa ne nón꞉we, í꞉i ne Darius, watsianerenhserí꞉sa. Natianerénhsehra tsi kwáh enkanánonhke tsi enhiontewénhnaraʼkwe.”

Ne Ononsatokentihkó꞉wa Wakonhwathonhnahérase

¹³ Ethò꞉ne ne Rakó꞉ra Tattenai, ó꞉ni ne Shethar Bozenai, tánon ne tehotirihwaienawá꞉kons kwáh ki é꞉tho nahatí꞉iere tsi ki nihoianerenhseríhson ne rakó꞉ra.

¹⁴ Ne Sitaeró꞉nons sakotihenténhse wahotiianerásthen tsi shatinonhsón꞉nis Nononsatokentihkó꞉wa, ronhwatinikónhrare ne rotitokénhse né꞉ne Haggai tánon ne Zechariah. Wahatinonhshí꞉sa Nononhsatokentihkó꞉wa kwáh ki tsi nisakorihwatháti ne Rawenni꞉io ne Israerró꞉nonhke ó꞉ni ne Cyrus, Darius, tánon ne Artaxerxes, raónha rakó꞉ra kénʼne ne Persia nón꞉we.

¹⁵ Wahatinonhshí꞉sa nononsatokentihkó꞉wa né꞉ne asénhaton siwenhniserá꞉te ne tsi niwenhnitá꞉rakwe ne Adar né꞉ne iaiá꞉khaton shiioserathátse shihononhtí꞉iokwe ne Darius.

¹⁶ Ethò꞉ne nonhkweshón꞉as Nisraerró꞉nonke—ne ratitsihénstatsis, ne Leviró꞉nons, tánon ratikwé꞉kon ne ronátiaʼkes ne sóhti ne ronanahkerá꞉kwenhne—aktsenhnonhniatserá꞉kon tsi wakonhwatonhnahérase Nononsatokentihkó꞉wa.

¹⁷ Tsi wakonwatonhnahérase tahatiiesthánion 100 nihá꞉ti té꞉ro, 200 nihá꞉ti teiotinakaronhtón꞉as, tánon 400 nihá꞉ti teiotinakaronhtón꞉as owí꞉ra ne nahonwanateskónhten, tánon 12 nihá꞉ti kaiaʼtákeras ne nénhne ne kariwáneren aorihwà꞉ke, saiá꞉ta ne sohtitsiokwaʼtsons rahotirihwà꞉ke ne Israerró꞉nonke.

¹⁸ Tánon ó꞉ni sahonwatirihwasehrónhnien ne ratitsihénstatsis ó꞉ni ne Leviró꞉nons tsi ní꞉ioht tsi hionhterén꞉naiens nononsatokentihkó꞉wane ne Jerusalem nón꞉we, tahioianénhawe tsi ki nikahiatónhnions ne Mahís rahohiatonhserá꞉kon.

Ne É꞉neken Watohesthákwa

¹⁹ Nonhkweshón꞉as ne sóhti ne ronanahkerá꞉kwenhne wahonteʼnikonhró꞉ri ne é꞉neken watohesthákwah né꞉ne kaié꞉ri-iawénhre niwenhniserakéhaton ne tiotierénhton wenhnì꞉tare ne ó꞉ia hioserá꞉tekwe.

²⁰ Ratikwé꞉kon ne ratitsihénstatsis tánon ne Levites shonatonhnakanonhní꞉hon tánon né꞉ne kwáh orihwakaionnéha tsi nishonatʼkwéniens. Ne Levites kaʼtshé꞉nen wakonhwanonhwarià꞉kon né꞉ne é꞉neken watohesthákwah karihwihiosehokón꞉as aorihwà꞉ke tánon né꞉ne onhkweʼtakwé꞉kon tsi nihá꞉ti ne sóhti rahotirihwà꞉ke, ne ratitsihénstatsis, tánon ne iatehatihiatísons.

²¹ Ne wateskónhte kwáh ratikwé꞉kon wahón꞉neke nʼIsraerʼró꞉nons tsi niká꞉ien ne sóhti ne ronanahkerá꞉kwenhne, tánon ki ó꞉ni tsi kwáh onhkweʼtakwé꞉kon wahonwanatsiatárase tánon wahonthatsiatotháro tsi natehiakohiathátsons ne thóh nón꞉we nihiohontsá꞉ien nihatinákere, ók ne tsi nihá꞉ti ne thoné꞉non ne nahonwashén꞉naien ne Roiá꞉ner Rawenni꞉io ne Israerró꞉nonke.

²² Né꞉ne tsá꞉ta nónhta nikarì꞉wes kwáh ronatonhnáhere tsi nihonateʼnikonhró꞉ri ne kakhwáhere ne iáh tewatʼthenhkwáhton Kanà꞉taro. Kwáh titkáhere tsi nihonaʼtsenhnón꞉ni tiorì꞉wa ne Roiá꞉ner wahahónhnien ne Rakoraʼkó꞉wa ne Assyria nashakorihwawá꞉se, káti kwáh washakorihwawá꞉se rahothihiotenhserakónhson tsi sahatinonhsón꞉ni ne Rawenni꞉io Rahononsatokentihkó꞉wa Nisraerró꞉nonke.