Exodus 6 - Ohiatonhseratokénti

¹ Ethòne ne Roiá꞉ner wahawénhase ne Mahís, “Ónenh kíʼ ensatkátho tsi nenhihiérahʼse ne Ronhnonhtí꞉io. Enhiʼhiónhnien nashakótʼkaʼwe nʼakonhkweʼtashón꞉a. Tánon kíʼ ó꞉ni, kwáh enthihiaʼnónhtonʼse nʼashaʼkorékwahʼte ne rahontsàke.”

Ne Rawenni꞉io Shé꞉kon Iosahonáhton Ne Mahís

² Ne Rawenni꞉io wahoʼthárahse ne Mahís tánon wahénron, “Í꞉i né Watiá꞉ner.

³ Khehiaʼthotashiénʼni ne Abraham, ó꞉ni ne lsaac, ó꞉ni ne Jacob tsi Wakeshatsʼtenseroʼwáhnen Ní꞉io, ók iáh kíʼ né tewakathatonhniáton Watiá꞉ner ne roʼnonhàke tsi ne naʼiontsenterestaʼkwe natʼsenhnató꞉kenti.

⁴ Káti ó꞉ni wákʼshon naʼkateriwaʼsehronhniátshera skátʼke ne roʼnónha, khehiaʼrahratsʼténhni tsi entekhé꞉ion nonhóntsa ne Canaan nónwe, né ionhontsáien tsi ehʼnónhwe nihatináhkereʼkwe tsi shí꞉ken ní꞉ioht ne thiʼhononhontsáʼte akénhake.

⁵ Ó꞉nen wakatʼthontéhon tsi nihononhsèhna ne lsraeró꞉nons, tsi nikáien ne Egyptró꞉nons ronwahtiʼnaskón꞉ni, tánon wakehiá꞉rahʼne nakateriwahsehronhniátshera.

⁶ Káti ietʼtsiró꞉ri lsraeró꞉nons tsi káton, ‘Í꞉i ne Watiá꞉ner; kwáh enkwahniákenʼte tánon enskwahtaʼtewenhniʼiósehron tsi niʼietsinaskónhnis ne Egyptró꞉nons. Enʼtkharahthá꞉the ne kenenshaʼshatsʼte nahontátʼkhawe ne tehioʼtenonhiaʼnhíton karewahthá꞉tshera ne roʼnonhàke tánon enskwaniákenʼte.

⁷ Entsiónhnien í꞉se ne kwáh akonhkweʼtashón꞉ha enkénhake, tánon Í꞉i ne sewahʼNí꞉io enkénhake. Kwáh ensewateriéntarahʼne tsi Í꞉i ne Watiá꞉ner ne sewaʼNí꞉io ó꞉nen enskaniakènthonʼke tsi niʼhietsinaskonhnisʼkwe ne Egypt nónwe.

⁸ Ienkwahiaʼténhawe ne tsi tsohóntsaien né kwáh khehiaʼrahratsʼténhni tsi entekhéhion ne Abraham, lsaac, ó꞉ni ne Jacob; tánon kíʼ í꞉se èntʼtsion tsi kwáh í꞉se ensehwahwenhkónhweʼke. Í꞉i ne Watiá꞉ner.’”

⁹ Ne Mahís wasakoró꞉ri kíʼ kén ne lsraeró꞉nons, ók iáh kíʼ tehonwathahónsahtats, tsioríwa tsi naʼtehonwanaʼhnikonhrhiákténhni ne tsi nihonhwanahteʼniakatsʼténhni tsi ronhwatinaskónhni.

¹⁰ Ethòne ne Roiá꞉ner wahawénhase ne Mahís,

¹¹ “Wáhs iaʼstsró꞉ri ne Ronhnonhtí꞉io ne Egypt nónwe tsi ó꞉nenk tsi ensahkoríhon ne lsraeró꞉nons nahéren ahónhnete ne rahontsàke.”

¹² Ók ne Mahís wahthaʼriwasehráko, “Iehióhe ne lsraeró꞉nons iáh kíʼ thahionkatahónsahtaʼte, nonhtiéren káti ne Ronhnonhtí꞉io tsi aʼhakathahónsahtaʼthe? Tsi nióre tsi niwahkítenh tsi ní꞉ioht tsi katátis.”

¹³ Ne Roiá꞉ner wasakorihónten ne Mahís ó꞉ni ne Aaron: “Ietʼtsiró꞉ri nʼIsraerʼró꞉nons ó꞉ni ne Egypt Ronhnonhtí꞉io tsi wahkenirihónten naietʼtsihéntenhse nIsraerʼró꞉nons nahatiʼhiá꞉kenʼne ne Egypt.”

Tsi Nonhthaʼnhiwahtsirahʼtáʼtie Ne Mahís ó꞉ni Ne Aaron

¹⁴ Né꞉ne Reuben, Jacob thoʼnatierénton sakoʼhiohoʼkónha, kaiéri nihoʼwirahiéntaʼkwe: né꞉ne Hanoch, Pallu, Hezron, tánon ne Carmi; né꞉ne sakotiʼsotʼthonkonhkénʼen né raotiʼtarahshón꞉as né꞉ne raotiʼsenhnasón꞉has konhwatiʼsenhnawíhon.

¹⁵ Ne Simeon iáʼiak nihoʼnekenteronʼtsheraʼiéntaʼkwe: né꞉ne Jemuel, Jamin, Ohad, Jachin, Zohar, tánon Shaul, nenenhʼne roiénha ne Canaanró꞉non tsothonwísen; ne sakotisotʼthonkonhkénʼen tsi nihoʼthisenhnhótens ne raotiʼtáras né konhwatiʼsenhnawíhon.

¹⁶ Ne Levi áhsen nenhʼne niháti roʼnekenteronhʼtsheraiéntaʼkwe: né꞉ne Gershon, Kohath, tánon ne Merari; tsi nihoʼthisennhótens ne raotiʼtára né konhwatiʼsenhnawíhon, ne Levi 137 niʼiosehràke ronnhékon.

¹⁷ Ne Gershon tèkeni nènhʼne tehoʼnekenteronhʼtsheraʼiéntaʼkwe: né꞉ne Libni tánon ne Shimei, tánon wèso roʼtiwiraiéntaʼkwe.

¹⁸ Ne Kohath kaiéri nènhʼne nihoʼnekenteronhʼtsheraiénʼtaʼkwe: né꞉ne Amram, Izhar, Hebron, tánon ne Uzziel, ne Kohath 133 niʼiosehràke ronnhèkwe.

¹⁹ Ne Merari tèkeni né꞉ne tehoʼnekenteronʼtseraiénhtaʼkwe: nén꞉ne Mahli, tánon ne Mushi. Né kí꞉ken tsi nihotiʼtaró꞉tens ne Levi ó꞉ni tsi niehoʼnaʼtwaʼtsirí꞉non

²⁰ Ne Amram né nènhʼne wahoʼtíniake ne roʼníha iaʼtenhosènha né꞉ne Jochebed, né waʼhotiʼwiraiéntaʼne né꞉ne Aaron tánon ne Mahís. Ne Amram 137 niʼiosehràke rónnhekwe.

²¹ Ne Izhar áhsen nènhne nihoʼnekenteronhʼtseraién꞉taʼkwe: né꞉ne Korah, Nepheg, tánon ne Zichri.

²² Ne Uzziel áhsen nonhʼne nihoʼnekenteronhtseraʼiéntakwe: né꞉ne Mishael, Elzaphan, tánon ne Sithri.

²³ Ne Aaron Elisheba nenhʼne wahoʼtíniaʼke, né꞉ne Amminadab saʼkoiénha tánon né iateʼnhosènha ne Nahshon; tánon ne wahotiʼwiraientásehron né꞉ne Nadab, Abihu, Eleazar, tánon ne Ithamar.

²⁴ Ne Korah áhsen nenhʼne niháti wahonekenʼterontsheraiénʼtaʼne: Né꞉ne Assir, Elkanah, tánon Abiasaph; né sakotiʼsotʼthonkonkénʼen ne raoʼtiwáhtsires ne Korah raotá꞉ras.

²⁵ Ne Eleazar, né꞉ne Aaron roiénha, né rotiniá꞉khon né꞉ne Putiel sakoién꞉ha, né wahoʼtiwiraiénʼtaʼne né꞉ne Phinehas. Né kí꞉ken nonhnontsiʼkowátsons tsi ratiwatsí꞉raien ó꞉ni tsi ratiʼtáraiens ne Levi.

²⁶ Ne Aaron ó꞉ni ne Mahís ronónha ne Roiá꞉ner wasakawénhaʼse, “Ietʼtsihéntens ne kentarahsónhas ne lsraeró꞉nons nahatiʼiákenʼne ne Egypt nónwe.”

²⁷ Ronónha kí꞉ken tenònhkwe ne wahonwaró꞉ri ne Egypt ronhnonhtí꞉io nahonsahsakótʼkaʼwe ne lsraerʼró꞉nons.

Ne Roiá꞉ner Wahsaʼkorihónten Ne Mahís ó꞉ni Ne Aaron

²⁸ Nó꞉nen ne Roiá꞉ner satʼnhiʼtháren ne Mahís tsi iohóntsaien ne Egypt,

²⁹ wahénron, “Í꞉i ne Watiá꞉ner. Tshróri ne ronhnonhtí꞉io ne Egypt oriwahkwékon tsi nenhkonhró꞉ri.”

³⁰ Ók ne Mahís wathaʼriwahseráko, “Sahteriéntare tsi nióre tsi niʼwakíten tsi ní꞉ioht tsi katátis; onhnonhtié꞉ren ne Ronhnonhtí꞉io tsi ahakatahónsataʼte?”