Exodus 40 - Ohiatonhseratokénti

Wahontóhserakʼetsko Ne Roiá꞉ner Raotóhsera Tánon Wakonwatonhnaʼhérahse

¹ Ne Roiá꞉ner wahawénhase ne Mahís,

² “Nentewaʼtenhniseratiérenʼthe ne tsiotierén꞉ton wenhní꞉tare saʼtoserakétsko tsi nónhwe nihénteron ne Roiá꞉ner.

³ Thóh ítsien nonerókwah nateriwaseʼronhniátshera thóh íhwa noiéri nihawénhnake tánon ahohénton seniatarahnihiónten.

⁴ Tháʼtsiont natekwá꞉ra tánon thóh srón꞉hnion tsi niwatstasónhas. Tánon ó꞉ni thaʼtsiont ne watʼthaʼseranihniontákwa tánon saʼseranihiontónhnion.

⁵ Thóh íhtsien nowistanó꞉ron ientsienharáhkwa né hiontsienkwaronʼniatákwa ne kaienkwarákon ohénton ne ateriwasehronʼniátshera oneró꞉kwa tánon seniaʼtaranihiónten ne tsi tionhtawehiatʼtáhkwa natóhsera.

⁶ Ohénton nató꞉hsera ítsien ne ietsienharákwa né꞉ne konhwanaʼteskonhtákwa ne katʼtshénens.

⁷ Thóh ítsien ne hiontsoharetáh꞉kwa tsi nateʼtiátere natóhsera tánon ne ietsienharákwaʼne tánon snekátha.

⁸ Senihiontónhnion ne tehiokwataséhton watenonhtónkwa tánon saharanihiónten ne tsi tionhtawehiatákwa.

⁹ “Ethóne seriwatokentísten natóhsera ó꞉ni akwékon tsi niwatstasónhas né seienárost ne iotokénti kénhie, tánon enhiotokentíʼne.

¹⁰ Ethòne né nónwa saʼseriwatokentísten nietsienharákwa ó꞉ni akwékon tsi niʼwatstasónhas tsi ensehienáhro, tánon kwáh tohkènʼen enhiotokentíke.

¹¹ Káti ó꞉ni kwáh satahiotónhake tsi seriwatokentísten ne hiontsioharetákwa kátshe tánon ne watenonhkwaráhkwa.

¹² “Tatʼtsiaténhaf ne Aaron tánon ne sakohioʼokónha tsi tionhtawehiatáhkwa natóhsera, tánon seró꞉ri nahontiató꞉hare né noriwakáion tsi ní꞉ioht tsi enhonhtiató꞉hare.

¹³ Ne Aaron né tserónhniat ne rotiʼkharesnéha atserón꞉niat, kènhie tshieró, tánon thóh kíʼ ní꞉ioht tsi tshiaʼterenhnaiénhas, né káti nahónton nahatiótenhse tsi ní꞉ioht ne rokháres.

¹⁴ Tasehiaténhaf ne sakohioʼokónha tánon sehiátawit ne wakóhses.

¹⁵ Ethòne seriwaʼnírats, kwáh tsi nitieriwaniráhti ne ronhwaníha, ne káti nahónton nahiontiótense tsi ní꞉ioht ne rothiʼkháres. Kí꞉ken kariwanirátʼtshera né꞉ne tsi nénhwe enkénhake tsi enhothiʼkharésonhke.”

¹⁶ Ne Mahís kwáh oriwakwékon thóh naháiere tsi nihonáhon ne Roiá꞉ner.

¹⁷ Káti ne sonhthonʼtenhniseraʼtiérente ne tsiotierénton shiʼwenhnitakéhaton ne tekeníhaton shiʼhiosehráte né shaʼthonthahonténhti ne Egypt, Natóhsera tsi nónhwe nihéntheron ne Roiá꞉ner wahʼonthoserakétsko.

¹⁸ Ne Mahís ehtàke wahotiéserons ne wateratastákwas, wahathitierakétsko, waʼtharenhwáhnion ne tewatʼrenhwákwas, tánon wahaʼnawahathonhtónhnion.

¹⁹ Waʼthatakwárithe ne wateroʼrókstha nathóhsera tánon né náhtste nohkwáti waharoróks꞉te, kwáh kíʼ tsi nihotenhʼnáhon ne Roiá꞉ner.

²⁰ Ethòne wàtʼrakwe ne tekensténrahkes tánon kanerókwahkon nateriwaʼseronhniáʼtshera wahatárionh. Nonawahaʼtesónhas watʼrohetstánion ne tsi iokakwenhtaʼnihióntons noneró꞉kwa tánon wahanónhteke.

²¹ Ethòne noneró꞉kwa atohserákon iaháʼhionte tánon wahaʼharanihiontónhnion. Né kí꞉ken hontʼrenhóstaʼkwe ne ateriwaseronhniátshera oneró꞉kwa, kwáh kíʼ tsi nihotenhnáhon ne Roiá꞉ner.

²² Atohserákon iaháhionthe natekwáhra, né꞉ne othohréke nokwáhti ne tsi iohniaʼtharénhton,

²³ tánon thoʼwaharen ne kanátaro né꞉ne Roiá꞉ner ahonwátatʼtshe, kwáh kíʼ tsi nihotenhnáhon ne Roiá꞉ner.

²⁴ Atohsehrákon iahá꞉hionthe ne waʼthasehrotákwah, né nentiéne nokwáhti, ákte nokwáhti ne tsi wateʼkwahratsheró꞉the,

²⁵ tánon thóh tsi rénteron ne Roiá꞉ner wahahaserotónhnion ne kaháseras, kwáh kíʼ tsi nihotenhnáhon ne Roiá꞉ner.

²⁶ Atohserákon iahahiónthe ne owistanóron ietsienharáhkwa, ohénton ne tsi iohniaʼtarénton wahá꞉ien,

²⁷ tánon wahaʼtienhkwahrónhniathe ne kaienkwarákonhons, kwáh kíʼ tsi nihotenhnáhon ne Roiá꞉ner.

²⁸ Wahaʼharanihiontónhnion ne tsi iehionhtawehiatáhkwa natóhsehra,

²⁹ tánon thóh ohénton tsi iohniatarénton wahá꞉ien ne ientsienharákwah né꞉ne konhwanateskonhtʼtákwa ne konhtiʼtshénens. Tánon thóh wahaʼteskónhten ne katʼtshénen ó꞉ni ne onátsias iahátkaʼwe, kwáh kíʼ tsi nihoʼtenhnáhon ne Roiá꞉ner.

³⁰ Ne ionhtsioharetákwa akéra thóh wahá꞉ien tsi natetiátere ne atóhsera ó꞉ni ne ietsienharáhkwa tánon wahaneʼkátha.

³¹ Mahís, Aaron, tánon ne sakohioʼokónhas thóh wahontsó꞉hare ó꞉ni wahonrashitó꞉hare

³² né nó꞉nen ienhontáwehiathe natohsehrákon tó꞉ka ó꞉ni ákta niahónhne ne ientsienharákwahke, kwáh kíʼ tsi nihotenhnáhon ne Roiá꞉ner.

³³ Mahís wahaketskwaniónhko ne watenonhthonkwahʼsónhas ne tehiokwahtaséhton natóhsehra ó꞉ni ne ietsienharákwa tánon wahaharanihiontónhnion ne tsi tionhtawehiatáhkwa né kanhotónston. Káti akwékon wahaʼhiotensehrísha.

Otshá꞉ta Watʼkawahnákthe Ne Iotohseraʼtokénti

³⁴ Ethòne otshá꞉ta wakarorókste natóhsehra tánon ne tehiohaseraswáʼthe wakánane tsi nónhwe nihénteronh ne Roiá꞉ner.

³⁵ Né kíʼ wakarihónhni, ne Mahís iáh tehiotónhʼon natohsehrákon iahotawehiáʼtonhke.

³⁶ NIsraerʼró꞉nonhs thonsahonhnáthakwe tsík kíʼ hontóhetsthe tsi tehiotʼtshátaienhkwe natohseráke.

³⁷ Tsí kíʼ nikaríwes tehiotʼtshátaienkwe, iáh thatehoʼnahnatákwen.

³⁸ Tsi nikaríwes wahothiʼnatenhawíson ronhʼtkátoskwe ne tsi tehiottshátaien ne tsi niʼwenhnísehres tsi nónhwe nihéntheronh natohsehrákon ne Roiá꞉ner tánon ótsire iotékha èhneken natóhsehra nokarasnéha.