Exodus 4 - Ohiatonhseratokénti

Ne Rawenni꞉io Taháwen Ne Mahís Ne Kwáh Tsioriwahnerákwat Kashatsʼténshera

¹ Ethóne ne Mahís wathoʼriwahserákwaʼse ne Roiá꞉ner, “Ók tó꞉ka shí꞉ken ne lsraeró꞉nons iáh tahontaʼhionkétaʼkwe tánon iáh tahontahónsathaʼte tsi nahó꞉ten enkíron. Ònhkati né nénhtiere tó꞉ka enhonníron iáh teskaʼthotaʼshiénhni?”

² Káti ne Roiá꞉ner wahoriwanónhtonse, “Nahó꞉ten ìshaʼwe?” “Iontennhitseroʼtákwah,” wathá꞉riwaseráko.

³ Ne Roiá꞉ner wahénron, “Onhwenhtsake sati.” Nó꞉nen ne Mahís ehʼtàke wahó꞉ti, óniare iatewaktéʼni, tánon wahatéko.

⁴ Ethóne ne Roiá꞉ner sahawénhase ne Mahís, “Iaʼtesahnéntshest tánon kentahsàke tsiéna tsi thonsàsek.” Káti ne Mahís iaʼthanéntshesʼte tánon wahaiéhna, tánon shé꞉kon iontsinotákwah ionhsónhton.

⁵ Ne Roiá꞉ner wahénron, “Tó꞉ki náhtsier noriwí꞉io ahonatónhnien ne lsraeró꞉nons nètho Roiá꞉ner, né SakoNí꞉io ne sakotisotʼthonkonhkènʼen, ne Raotí꞉io ne Abraham, lsaac, tánon ne Jacob, tsi wahiaʼtotáshiase.”

⁶ Né Roiá꞉ner shé꞉kon sahoʼthárahse ne Mahís, “Iasanentsá꞉nent ne satsiatawitseràkon ne wakóses.” Mahís wahatewénhnarahkwe; tánon nó꞉nen sathontahanenʼtsóhsi, iòhnʼrahre, karáhken iorahkwahrónhnion, tsi ní꞉ioht nónieʼte.

⁷ Ethóne ne Roiá꞉ner wahénron, “Shé꞉kon ionsahsanentʼtsáʼta ne saʼtiatawiʼtsheràkon wakóses.” Thóh kí naháiere, tánon nónhwa sathontahanenʼtsóhsi, kwáh tsoiánere, kwáh thóh nítsiot tsi kíʼ ní꞉ioht nó꞉ia rahierónhkes.

⁸ Ne Roiá꞉ner wahénron, “Tó꞉ka iáh tahontahonʼnhétaʼkwe ne tiotierénton ioriwahneráhkwat, thóh ne kí né kí꞉ken enhonaʼteriwahníratse.

⁹ Tó꞉ka shí꞉ken kí tehioríwahke ioriwahneráhkwat shé꞉kon iáh tahontahionsétakwe, tánon tó꞉ka iáh tahonthónthate nahontahónsahtaʼte tsi nahó꞉ten sáton, iasnekótsient ne Nile kaniataràhke tánon ohontsàke sanekónhti. Nonèkanos onekwénhsa iatenwakténi.”

¹⁰ Ók ne Mahís wahénron, “Iáh, Saiá꞉ner, tó꞉sa iaskató꞉ri. Iáh nonhwénhton tehioiánere tsi tekatátis, tánon iáh ó꞉ni tewakeweienʼtetáʼhon tsi náhe tisathásawe takʼthaʼráhni. Kwáh íken tsi wahkíten tsi ní꞉ioht tsi katátis, wakewenhnaʼkenhéion tánon tethewakenikónhrahke.”

¹¹ Ne Roiá꞉ner wahénron, “Ónhka thonʼwáwis ne rónhkwe ne tsi rashaʼkáronthe? Óhka ronhionhʼniénhnis ne tahahóntaʼkweke tó꞉ka ó꞉ni nahaʼtewenhnáton? Ónhka tonwáhwis nahatʼkathósehke tó꞉ka ó꞉ni taharónweke? Kwáh Í꞉i, ne Watiá꞉ner.

¹² Káti, ó꞉nen wáhs! Enhkonsniénon nahsatáti, tánon enkonró꞉ri nahó꞉ten ensíhron.”

¹³ Ók watariwahsehráko ne Mahís, “Ó Atiá꞉ner, asaʼthontátsheke ónhkak akòren iasehiató꞉ri.”

¹⁴ Ethóne ne raonahkwáhtshera ne Roiá꞉ner né takatsirótaʼkwe tsi nòkwah ne Mahís tánon wahénron, “Onh né ní꞉ioht ne tsathatèkenʼen Aaron, né꞉ne Levite? Wakateriéntahre tsi enhakwéni ne ioʼiáneren tsi ahatáti. Tánon kíʼ ó꞉ni, ónenh táre ne tahitsatátken tánon tsi nenhatsenhnónhni nenhiáken.

¹⁵ Enwáhton tahiʼsehniʼtháren tánon tsióri tsi nahó꞉ten ahénron. Kwáh tesehnitsaron enkeniʼiénahwaʼse nahiʼtsatáti, tánon kwáh tesehnitsáron enkeniró꞉ri tsi nahitsiátiere.

¹⁶ Kwáh rahónʼa enhiatáʼtsiaʼse tánon ensahkoʼthárahse nonhkweshón꞉ʼa ne sariwàhke. Ethóne ní꞉se kwáh né꞉ne Rawenni꞉io enkénhake, tsroʼrihátie tsi nahoténsons ahénron.

¹⁷ Iahá꞉saf kí꞉ken ionhtennhitseró꞉taʼkwa; né énsatsʼste tsi nenhshieʼráhnion ne ioriwahʼnerahkwahʼthénions.”

Ne Mahís Egypt Nionsàhre

¹⁸ Ethòne ne Mahís Jethro sahonahtaʼrenséhra, né꞉ne rawehnónhsa, tánon wahawénhase, “Ahsatʼthontáʼtsheke tahkeríhon thóh iéske tsiʼthatíteron ne iakwahtátenons né Egypt nónhwe nakatʼkenʼsèra tó꞉ka kén shé꞉kon ronhnònnhe.” Ne Jethro wahariwahnónhweʼne tánon tonsahonónhwehron ó꞉nen kiʼ wáhi.

¹⁹ Tsi nikaríwes ne Mahís shé꞉kon Midian nónhwe ní꞉resʼkwe, ne Roiá꞉ner wahawénhaʼse, “Wáhs Egypt nionhsàhse, tsi niháti ne ronhnérahkwe aiesanonhwahrhiákonhke ronenhéion.”

²⁰ Káti ne Mahís iasakohiaʼtánhaʼwe ne ró꞉ne ó꞉ni ne sakohiohoʼkónhas, tewahóntes kahiaʼtàʼke washakotskwahrónhnion, tánon Egypt niahónhne, rahá꞉wine ne ionhtennhiʼtserotákwa nétho Rawenni꞉io roʼró꞉ri ne iahá꞉haʼwe.

²¹ Shé꞉kon ne Roiá꞉ner sahaʼwénhaʼse ne Mahís, “Káti tsi ó꞉nen Egypt nionʼsehsenonhátie, ioriwíhiok thóh nátsier raohénton ne Ronhnonhtíio oriwahkwékon ne ioriwahʼnerahkwaténion tsi nitʼkonhiáwi ne kashatsʼténsera tsi ehʼnénshiehre. Ók kíʼ enhiʼierhiaʼsaní꞉rahte ne Ronhnonhtí꞉io, tánon iáh tahaʼthóntate nahsakótkaʼwe nonhkweshón꞉ʼa.

²² Ethóne kí ó꞉nenk tsi entsró꞉ri tsi Í꞉i, ne Watiá꞉ner, káton, ‘NʼIsrael né꞉ne thakowáhnen rí꞉ienha.

²³ Konhró꞉ri nahʼtshiátʼkaʼwe ne rí꞉ienha, né káti nahónton ahakʼsénnahien, ók iáh tesatʼthontáton. Káti ó꞉nen enkhenonhwarhiaʼkónnion ne thoʼnahtierénhton ronahnakeráhton ne rotiskenrahkète.’”

²⁴ Tsi nónhwe nihiokwènhrahre niʼhonthatosehró꞉taʼkwe tsi nieiawénon ne Egypt, ne Roiá꞉ner wathiatátken ne Mahís tánon wahateʼniénten nahoʼnonhwarhiá꞉kon.

^25-26 Ethóne Zipporah, né꞉ne ró꞉ne, iahaʼtewahkwe ne kwáh ioʼnenhiothí꞉ie, waʼkakwétaron ne ioteroʼrókston kané꞉honk nahonwahwarahkweʼtaronsʼte ne roiénha, tánon né iakaiénasthe ne Mahís rashiʼtàke né aoríwah ne tsi nikarihó꞉ten ne ahionthatewahrakwéʼtaron tsi wahó꞉ro꞉ri ne Mahís, “tsi wakanékwah kí꞉ken ó꞉nenh kíʼ ní꞉se wetsiatátenonkwe onhton né꞉ne kaniáktshera nónhwe nonhtàʼwe.” Tánon káti ne Roiá꞉ner wahanónstaʼte ne Mahís tsi rónhnhe.

²⁷ Kènk nikaríwes ne Roiá꞉ner wahoró꞉ri ne Aaron, “Wáhs kahentaʼkeʼkó꞉wa niahàse tsi tahiʼtsatátken ne Mahís.” Káti thoʼniaháre ne iathahiatátken ne tsi tiononhtaʼtokénti; tánon nó꞉nen sahthiaʼtátʼken, wathoʼnoronhkwáhnion.

²⁸ Ethòne ne Mahís ohriwaʼkwékon wahoró꞉ri ne Aaron tsi nahó꞉ten ne Roiá꞉ner roʼrhorhiánion nó꞉nen sahoró꞉ri ne Egypt nónhwe niahonsáhre; tánon ó꞉ni wahoró꞉ri ne ioriwaʼnerahkwahténions ne Roiá꞉ner rohríhonte tsi nenhaʼieráhnion.

²⁹ Sók káti ne Mahís tánon ne Aaron Egypt niahá꞉ne tánon washaʼkotiʼhiatarórohke ratiʼkwékon ne lsraeró꞉nons ne ohénton iehonnéton.

³⁰ Ne Aaron oriwakwékon wahsahkoró꞉ri tsi nahoténsons ne Roiá꞉ner rohroʼráhnion ne Mahís, ethòne ó꞉nen ne Mahís wahaʼteriwahtén꞉tsiaʼte ne ioriwaʼnerahkwahténions rahotiʼhénton ne onhkweshón꞉ʼa.

³¹ Tahonnhétaʼkwe, tánon ne sahatiʼriwáhronʼke né Roiá꞉ner tsi sakohiaʼthoʼrènʼen tánon rotkathó꞉sehron tsi nihonwahʼnateniaʼkatsʼténhni, waʼthonsáhkeʼte tánon wahonterénhnaien.