Exodus 39 - Ohiatonhseratokénti

Ronwanakweʼnionhniénhnis Ne Rothikháres

¹ Né꞉ne orónhnia niwasohkóten, ariwakonhnéha, tánon ne ohnekwéntara ononhwéron wahonhnónhni ne iókwats atserónhniat né꞉ne rothikháres énhonsthe nónen enhotiʼhióten ne iotokénti nónhwe. Wahonwaʼkweniónhnien ne rotiʼkharesnéha ne Aaron, tsi kiʼnihonáhon ne Roiá꞉ner ne Mahís.

² Né꞉ne kwáh waniatharí꞉io wahonhnónhniathe ne tehionteʼtskwenaʼnákʼtha; né norónhia niwasohkóten, ariwahkonhné꞉ha, tánon ne onekwénhtara ononhwéron; tánon ne owistanó꞉ron asehrí꞉ie.

³ Tánon owistanó꞉ron nahó꞉ten wahatiʼtsikwentánion ne ónerahtes wahonhnónhni tánon kènk natewathakárons wahathikwetarónhko né꞉ne thóh tahathiwatásehthe ne orónhia tánon nariwakonhné꞉ha ó꞉ni ne onekwénhtara ononhwéron né꞉ne kwáh waniatharí꞉io.

⁴ Tékeni wahonnónhni nanensohtharókstha né꞉ne tehiontetskwenaʼnáktha ahówenk tánon aktónhtie wahonhnonhtónhnion, né nahónton takákʼkhenhke.

⁵ Né kwáh tsioiánere ne karentskentónhni atiaʼtáhnha, né꞉ne sahonhniátara ionhniáton, thóh tekakʼkháston ne tehiontetskwenahʼnáktha né꞉ne énskak khók iahónton, kwáh kíʼ tsi nihoró꞉ri ne Roiá꞉ner ne Mahís.

⁶ Wahatiʼweienénhtahʼne ne ioteherarónhnion onénia tánon thóh wahathiʼrahnenhtákʼthanion ne owistanó꞉rons tsi kakwatákwen; né꞉ne kwáh tewateweiénthon tsi tekaristhahiáton tsi ronhwatiʼsenhnarónhnions ne tekeniʼiawénhre niháti Jacob sakoiohʼokónhas.

⁷ Anensohtharokstáke nónhwe nahathiʼrahnenhtakʼtánion né iohienawakónhnions ne tehiontetskwenahnáktha né nawenésthe ne tekeniʼiawénhre nihothitárahkes ne Isarerʼró꞉nonhs, kwáh kíʼ tsi nihoró꞉ri ne Roiá꞉ner ne Mahís.

Ronhnónhnis Ne Tehionteʼtskwenahnáktha

⁸ Wahonhnónhni ne entskwénnha ahó꞉wenk né꞉ne kwáh né sahenniátara tsi ní꞉ioht ne tehionteʼtskwenahnáktha tánon kwáh ne sáka tsi tewasehriʼiétaron.

⁹ Tehiotekerónhte tánon tekaiasehrón꞉nion, 9 nihionkaráhke níhions tánon 9 nihionkaráhke natewathakáron.

¹⁰ Kaiéri nihiotinénhrahke tsi wahonhnorókʼkhonhs ne kanenʼianó꞉rons: né ohénton ionahthohetsthákwen né꞉ne kwáh tetsiosohkwákaras nonekwénhtara, ne tehiotʼtsinekwáhronhte, tánon nariwakonhné꞉ha;

¹¹ ne thehiotinenhrakéhaton, né꞉ne tehioshokwá꞉the nóhonte, tehioterónʼhionte, ionenhiákent ionenhianíron;

¹² nasénhaton niʼhiotiʼnenrahkéhaton, né꞉ne tehioterónhionhte nóhonte, né꞉ne tekaiéston ne karáhken tánon nathésa, tánon ne tetsiosohkwáhkaras nariwakonhné꞉ha;

¹³ tánon ne kaieríhaton nihiotiʼnenrahkéhaton, né꞉ne tehioterónhionhton nóhonte, ne ioteherarónhnions onénia, tánon ne athésa nikanenhióten. Kí꞉kens thóh nónhwe niwasthánions ne owistanó꞉ronhs tsi kakwathakwaʼniónhkwen.

¹⁴ Né skátsons ne tekeniʼiawénhre nikanénhiakes thóh tekaristhahiatónhnion né sathiʼiatátʼtshons ne Jacob sakohiohʼokónhas, né nahónton nahonwanaʼtátsase ne tekeniʼiawénhre nihothiʼtárahkes ne Isaerʼró꞉nonhke.

¹⁵ Ók né iontetskwenoróktha ahó꞉wenk owistanoronhʼtsheróskon ne wahonteronhkwasónhni, tekawatháse tsi ní꞉ioht ne asehrí꞉ie.

¹⁶ Tékeni wahonhnónhni tsi nónhwe nenkaienáseron tánon tékeni wahatiʼkakwenhtonhniánion owistanó꞉ron nahó꞉ten tánon né tekahkahkwénhtakes èhneken tsi tehioʼthió꞉sates ne iontetskwenoróktha wahatiʼranentatʼtánion.

¹⁷ Né tèkeni asehrí꞉ies thóh wahatinerénkʼkons ne tekakahkwénhtakes

¹⁸ tánon ne tsi iehiotʼtónhnions ne ó꞉ia tèkeni asehrí꞉ies thóh wahatinerénk꞉kon tsi kakwathákwenhs ne tèkeni tánon né kí꞉ken nahónton nahatinerénhke nohénton ne ahothenentsotharókstha ne teionteʼtskwenahnákstha.

¹⁹ Tékeni wahontkakwenthonhniánion ne tehiotkakwenthakwenónhni ne nowistanó꞉ron íken tánon ehtàke ne tsi tekahiósaien nónhwe nahonnonhtónhnion ne tehionteʼtskwenahnakʼthàke,

²⁰ Shé꞉kon tékeni sahontkaʼkwentonhniánion né nowistanó꞉rons íken tánon waatkwakwenniiónten ne ehtake iónten ne tékeni ahoʼnensohtaróksta ne atenniʼióntentskwenanáktha, ákta ne tsi tekakenhátie tánon èhneken ne kwáh ioiánere ne karenskentónhni atiatána.

²¹ Kwáh kíʼ tsi nihoró꞉ri ne Roiá꞉ner ne Mahís, wahatínerenke ne tehiotkakwenhtakwenónhnis ne tehionteʼtskwenahnakʼtàke né꞉ne orónhia niwasehriʼietó꞉ten, né káti ne tehionteʼtskwenahnákʼtha nahontiéʼnawasthe natiatáhna tánon tó꞉sa ahiontsontnerénhsi.

Wahonhnónhni Nó꞉ia Rothikháres Rahonatʼtserónhniat

²² Ne wakóses ne nàkon watohetstáhkwa ne tehionteʼtskwenahnákʼtha kwáh aòskon né꞉ne orónhia ononhwéron ionhniáton.

²³ Tsi iokáronhthe ne tahiontenonhtsistó꞉hetsthe né iohiataniratsthákwen tsi tewashatharátie ne karenskentónhni né꞉ne tó꞉sa ahonteráhtsons.

^24-26 Tehiokwahtaséhton nehthàke tsi tekakwátʼthon wathahiatákwas wahatirahnentakʼtánion né꞉ne kwáh waniatarí꞉io tánon né꞉ne orónhia, ariwakonhné꞉ha, tánon nonekwénhtara ononhwéron, tehiowenhrónhkwen ne iowistenhtónʼnions né owistanoronhtseróks꞉kon íken, kwáh kíʼ tsi nihoró꞉ri ne Roiá꞉ner ne Mahís.

²⁷ Wahonwaʼtiatawiʼtsherónhnien ne Aaron ó꞉ni ne sakoiohʼokónhas,

²⁸ tánon ne tehatenonhwarahnákstha, ne ionekwéntonhthe anónhwaro꞉re, noniataráha natehioshiʼnéssa,

²⁹ tánon natiathána né kwáh waniatarí꞉io ne orónhia, ariwakonhnéha, tánon ne onekwénhtara ononhwéron, tewasehriʼiétaron tsi karaséston, kwáh kíʼ tsi nihonáhon ne Roiá꞉ner ne Mahís.

³⁰ Wahonhnónhni ne wateroróks꞉tha ne iotokénti anónhwaro꞉re né nowistanoronhʼtsheróskon, tánon thóh wahatihiáton, tsi ní꞉ioht ne tekaristaiáton, “Iotokénti tsi nòkwah ne Roiá꞉ner.”

³¹ Ohénton ne tehiontenonhwarahnákstha wahatiwánerenhke né norónhia niwasehriʼiethó꞉ten, kwáh kíʼ tsi nihonáhon ne Roiá꞉ner ne Mahís.

Tsi Wahatísa Ne Kahioténsehra

³² Akwékon ne kahioténseras ne tsi watóhserothe tsi nónhwe nihéntheron ne Roiá꞉ner ónen kíʼ onhtésha. Ne Isarerʼró꞉nonhs akwékon wahonhnónhni tsi kíʼ nihonáhon ne Roiá꞉ner ne Mahís.

³³ Mahís tahónhion natóhsera ó꞉ni tsi niwatsʼtahokónha, nahoniokwahsónhas, nahonikónharas, ne tawatrenhwákwas, tánon nenwateráhtahste;

³⁴ ne waterorókstha ne teiotinakaronhtónhʼa rátsinn kanéhonk nonekwénhtara wasó꞉hon; ne wateroróks꞉tha ne kwáh kanewí꞉io; ne wataharaniʼhiontáhkwa;

³⁵ ne ateriwaʼseronhniátshera oneró꞉kwa né watàrion nosténras, nahonawatesónhas, tánon ne watenonhtékʼtha;

³⁶ naʼtehkwáhra tánon tsi niʼwatsthasónhas, tánon ne kanátaro nahonwátatʼtse ne Rawenni꞉io;

³⁷ né wathaseraʼnihiontákwa nowistanoronhtseróks꞉kon íken, nahohaserasónhas, akwékon tsi niwatsthasónhas, tánon ne kènhie watʼthaserohtákwa;

³⁸ nowistanó꞉ron ietsienharáhkwa, ne hionthatiatokástha kènhie; ne wenhserakónhons ionhtienkwahronhniatákwa; ne wataharanihiontákwah tsi iehionhtaweiatʼtákwah natohsehrákon;

³⁹ ne teiotwístaron otsínekwar karístatsi skátke ne tehiotwístaron notsínekwar karístatsi iosehwá꞉tha, nahonawahʼatesónhas, tánon akwékon tsi niwatsthasónhas; ne hionthawenhstákwah akérah tánon ne tewatetsanetákwah;

⁴⁰ ne wathaharanihʼiontákwa ne watenotónhstha tánon ne onawahʼatesónhas ó꞉ni né wateratasthákwas; ne wathaharanihiontákwa nahontenótonhsthe tánon nahosehriʼiesónhas; natóhsehra ahoristhatsisónhas; akwékon tsi niwatsthasónhas nahónsthonke natóhsera;

⁴¹ tánon ne iokwahnianeráhkwahs ne rothikháres énhonsthe ne tsi iotokénti nónhwe—ne iotokéntis oniataráhas né꞉ne Aaron tánon ne sakohioʼokónhas rahonáwenk.

⁴² Ne Israerʼró꞉nons akwékon rotiʼhioténhen kwáh kíʼ tsi nihoró꞉ri ne Roiá꞉ner ne Mahís

⁴³ Ne Mahís kwáh akwékon niaʼhakenhenhiónko tánon wahatkátho akwékon thóh ní꞉ioht tsi kasahánion kwáh kíʼ tsi nihontenhnáhon ne Roiá꞉ner. Káti ne Mahís wahahiatatéristhe.