Exodus 36 - Ohiatonhseratokénti

¹ “Ne Bezalel, Oholiab, tánon ne roʼnátsiakes rotihiótens tsi niháti ne Roiá꞉ner teshaʼkówi natʼtohkhátsheras ó꞉ni kanikonhʼraientátsheras, tsi ronhnónha oriwakwékon ronaʼtheriéntahre nahonhnónhni tsi natehiotonhontsóhon naʼtohsehratoʼkénti, oriwakwékon thóh ní꞉ioht tsi enhonhnónhni kwáh kíʼ tsi nihotenhnáhon ne Roiá꞉ner.”

Mahís Wateshaʼkótasthe Tsi Thatíhas Nathataʼwítsheras

² Mahís iashaʼkonónhkon ne Bezalel, Oholiab, tánon ratikwékon ne ronáhtsiakes rotiʼhiotenserahʼrenhnáhon tsi nikáien ne Roiá꞉ner teshaʼkowíhon natʼthoʼkhátsheras tánon tsi niháti né nihotiʼnikonhróhten nahonsniénon, tánon ne Mahís washaʼkoró꞉ri nahontahontáhʼshawenh rotihióten.

³ Ne Mahís thasakowíhon akwékon ne iehiakotkáwen tsi nikáien ne Isaerʼró꞉nonhs thoʼthiháseron nahionhníhake ne atohserahtohkénti. Ók kíʼ Israerʼró꞉nons iahatiʼkónhtakwe thonwahawiténhniskwe ne Mahís iatehionhronhkheʼtseráke ne rahonaʼthatawítsheras.

⁴ Ethòne ne ronhtʼthó꞉khas tsi nikáien ne rothihioténion iahónhne

⁵ tánon Mahís wahonwaró꞉ri, “Nonhkweshón꞉ʼa tahotiʼhahá꞉tie sénha ishʼnónhwe tsi natehiotonhontsóhon ne kahioténsera tsi nihotenhnáhon ne Roiá꞉ner nakahioténʼen,”

⁶ Sók kíʼ ne Mahís iahateriwániethe tsi niwatenáhtaien tó꞉sa ónen ónhka tetsiéhaf nahontahʼié꞉iehste naʼtosehratokénti ahoriwáke; sók kíʼ nonhkweshón꞉ʼa iáh thènnen thatetshiaʼkóha.

⁷ Tsi nahoténsons tkaháseron kwáh sénha ishikʼnónhwe nikáien tsi natehiotonhontsóhon niakáson ne kahioténsera.

Wahontohsehrónhni Tsi Nón꞉we Ní꞉res Ne Roiá꞉ner

⁸ Né kwáh ratiʼhiotenseraʼnó꞉rons né꞉ne tsi nikáien rotiʼhióte wahontohsehrónhni tsi nónhwe níres ne Roiá꞉ner. Né wahonhnónhniaʼthe né kwáh kaniatarí꞉io ne karenskentónhni norónhia niwashohkóten, ariwakonhnéha, tánon nonekwénhtara niwashokóten ononhwéron tánon ne tewasehriʼiétaron niʼhiátare ne teniʼnerahóntsionhte kárhios.

⁹ Né skátʼtsions kwáh satéwas, 14 iawénhre niwataʼtseráke ní꞉ions tánon 12 iawénhre niwatatseráke natewataʼkaron.

¹⁰ Tsi wahatiʼnikhónnion wísk níkoniathaʼtí꞉ieste ne tsoiána tánon thoʼnónhne nahatí꞉iere ne wísk níkonhs iotaténrons.

¹¹ Orónhia niwashokótens noniatará꞉a Wahatiʼkaʼkwenthonhniá꞉nionte ne tsi ieiotʼtónhnions ne áhtste nokwahtísons ne skátʼtsions íken.

¹² Wísk-niwáhsen níkonhs wahatiʼkakwenhtaʼnihiontónhnion né tiotieʼrénton íken tánon wísk-niwáhsen nikaʼkakwenhtákes nahontaʼtsatenró꞉we nonàken íken ne tekeníhaton iotaténron.

¹³ Wísk-niwáhsenh níkonh owistanoronhʼsónhas onhiókwas wahonhʼnonhniánion, né꞉ne iathaʼkaiésthonke ne tehiohiànakes né énskak khók iahónton.

¹⁴ Ethòne ónen wahonhnónhni ne wateroróks꞉tha natóhsera né꞉ne enskaiawénhre niʼkaniataráhke né꞉ne kaiatákeras ononhwéron ionhniáton.

¹⁵ Akwékon satéwas tsi wahonhnonhniánion, 15 iawénhre niwatatsheráke níhions tánon 2 wathatseráke natewatakáron.

¹⁶ Tsi wahatiʼníkhon wísk-níkon iathaʼtí꞉ieste ne tsiohiána tánon ne ó꞉ia iá-iak níkon né꞉ne ó꞉ia tsioiána íken.

¹⁷ Wísk-niwáhsen nikakhaʼkwénhtakes wahonʼnonhtónhnion ne tsi ieʼiottónions nonáken íken ne tsioiána tánon wísk-niwáhsen nikakakwénhtakes ne tsi ieiottónhnions ne óia tsioiána íken.

¹⁸ Wísk-niwáhsen níkons onhiókwas wahonhnonhniánion né꞉ne tehiotwístharons karístatsis ne tatsiáterike ne tehioiánakes, né꞉ne énskak waterorókstha iahónhton.

¹⁹ Shé꞉kon tèkeni watheroróks꞉tha sahonhnónhni, énska né꞉ne teiotinakaronhtón꞉a rátsinn kanéhonk nonekwénhtara wasóh꞉hon tánon nó꞉ia né꞉ne kwáh kanewí꞉io, né꞉ne áhtste nokwáhti ahonteroróks꞉the.

²⁰ Tékeni ne iotʼthakwahrísions wahonthitserónhni né꞉ne acacia nikaientóh꞉ten natóhsehra ahó꞉wenk.

²¹ Né sewathitserátʼtshions 15 iawénhre niwashí꞉take nitiótʼte tánon 27 nihionkaráke natewathakáron,

²² kwáh né shaʼkanikónharat akénhake, né nahónton natítsheras thakhákʼkenhke. Akwékon natítsheras iotiʼiénthakwe kí꞉ken owastáshónhas.

²³ Tewáhsen niʼkanikonharáhke wahonhnonhniánion ne entiéne iotohetsthákwen

²⁴ tánon kaiéri-niwáhsen níkonh tsi nónhwe nikonhtírathe, tèkeni tsi nónhwe nenkeniráthane ne skanikonharátshon né꞉ne tentsiataʼtiénasthe ne kawasthorókhons.

²⁵ Tewáhsen nikanikonharákes wahonhnónhni nothoréke iotohetstáhkwen natóhsehra

²⁶ tánon kaiéri-niwáhsen kawistarákens nenhkonhtiráhtasthe, tekenísons ne skanikonhrarátʼtshons.

²⁷ Nonàken nokwáhti natóhsehra, né꞉ne tsi iatewatʼsénthos, iá-iak nikanikonharáke wahonhnónhni

²⁸ tánon tekanikonharákes ne tsi tekaiósaiens.

²⁹ Ne tsi tekahiosahkéronhs kí꞉ken onikónhharas ehtàkes nónhwe natehionathaʼtienawákonhs tánon kwáh tsi nióre ne é꞉neken tsi tekákʼkhen. Né tekanikonharáke né tékeni tekhahiósaien thóh ní꞉ioht tsi ionniáton.

³⁰ Káti shaʼtékon nikanikonharákes tánon iá-iak-iawénhre níkon kawistaráken ne tsi konhtírahthe, tékeni ne skaʼnikonharátʼtshons tsi nikonhtírathe.

³¹ Wísk-iawénhre níkonh wahonʼnonhniáʼnion ne tekarenhwáhnions né꞉ne acacia niʼkaientó꞉tens, wískson ne skatísons nikanikonharáke,

³² wísk níkonhs ne ó꞉ia nokwáhti nonikónhharas, tánon wísk níkonhs noʼnikónharas ne tsi iehiótʼte ne tsi iatewatʼsénthos nokwáhti, né nahonáken.

³³ Naʼsenhnonhnónhwe tekáronhwe, kwáh asénhnon nónhwe tsi niʼtiótʼthe natekaʼrénhwak naʼtítshera, kwáh tewakwatáset tsi watohsehró꞉the.

³⁴ Owistanó꞉ron wahatiʼroróks꞉the naʼtítsheras tánon owistanó꞉rons wahaʼthikakwentaniʼhiontónhnion ne thaʼkonhthatiéna ne tekarenhwánions, né nónhne owistanó꞉rons karoróks꞉ton.

³⁵ Wahonteniaʼtharónhni ne wateniaʼtaranihiontákwa ne kwáh waniatarí꞉io, karenskentónhni noʼrónhia, ariwakonhnéha, tánon nonekwénhtara ononhwéron tánon né tewasehriʼiétaron ne tenihiáse nihiátare ne teniʼnerahonhtʼtsionhte tehnónnhe.

³⁶ Kaiéri niʼkanawaháthakes wahontenaʼwahathonhniánion né꞉ne acacia nikaientó꞉ten né nahonteniatharanihióntaʼkwe, owistanó꞉ron karorókston, tánon owistanó꞉rons oniókwas iostʼthánion. Ethóne kaiéri níkonh kawistarákens wahonhnónhni nakonhterátasthe ne kanawahathasónhas.

³⁷ Né tsi iehiontawehiatʼtákwa natóhsera wahonhnónhni ne wateniatharanihiontákwa ne kwáh waniatharí꞉io ne karenskenthonhniáton ne orónhia, ariwakonhnéha, tánon nonekwéntara ononhwéron tánon né karaséston ne tewasehriʼiétaron.

³⁸ Né kí꞉ken wateniataranihiontákwa wísk nikanawaháthakes wahonhnónhni ioniokwentónhnions, tánon owistanó꞉ron sewarórokst ne é꞉neken tánon nahonawatasónhas, tánon wísk níkonh tsionhniánion né꞉ne tehiotwístaron notsínekwar karístatsi nahonteraʼtástha ne kanawahathasónha.