Exodus 29 - Ohiatonhseratokénti

Karihonnienʼnhítshera Tsi Ahonwatiriwaníraʼtse Ne Aaron Tánon Ne Sakohiohʼokónhas Tsi Enhonktsienstónhni

¹ “Ken kíʼ nenshié꞉re tsi nókwah ne Aaron tánon ne shakohiohʼokónhas tsi ensehiathonʼnhahérase tsi enhonktsiʼhenstónhni nahiontiótenhse. Iaʼtsínonk saiáta nithoʼiónha tionónskwahron rátsinn tánon tenihiáʼse teiotinakaronhtónha tenítsinn né꞉ne kwáh iáh othènnen tehotiʼhiátawenhs.

² Né íshats né kwáh katʼtheʼserí꞉io onátsia, ók iáh othènen nionhtenkwáhtha, tánon né satenatharónhniat ne iaʼkenʼiewá꞉tha kènhie, tánon ótiake ne iáh othènnen né꞉ne takaiésthonke, tánon ótiakes né꞉ne akénhake norahwístha né nenhʼienáronh.

³ Athé꞉rakon sé꞉tha tánon táktats nó꞉nen entiaʼteskónhten ne tsonónskwahron rátsinn ó꞉ni ne teiotinakaronhtónʼa tenítsinn.

⁴ “Tatʼtsiaténhaf ne Aaron ó꞉ni ne sakohiohʼokónhas ne tsi tsionhtawehiatákwah natosehrákon ne tsi nónhwe nikíteron, tánon ronhtáwen tsi nikarihó꞉ten noriwaʼkáion.

⁵ Ethòne ehʼtsherónhniaʼt ne Aaron né ratiʼtsihénstatsiʼné꞉ha—né atiátawi, ne wakóhses ne nákon watohetstákwah nákhare, natenihiónta, ne raʼtetskwenorók꞉tha, tánon natiatáhna.

⁶ Tetieʼnonhwaráhnak tánon thóh senihiónten ne iotokénti wenéston tsi ronwatonhnaráhni kahiatónkwen ‘Ronhwahiataʼkweniʼióston Roiá꞉ner.’

⁷ Ethòne tések ne hionthatiatoʼkástha kènhie, tánon ranonhtsíne tasáweron, tánon tieʼriwanírats.

⁸ “Ethòne tasheʼhiaténhaf ne sakohiohʼokónhas tánon sehiaʼtáwit;

⁹ tetsiaʼkwaráhnak tánon tetskenhkwaráhnak. Thóh ní꞉ioht tsi enseriwaníratshe ne Aaron tánon ne sakohiohʼokónhas. Ronʼnónha ó꞉ni tsi nienhontwaʼtsiríne tsi enhiontiótense tsi ratiʼtsihénstatsi enkénhake tsi nènhwe.

¹⁰ “Taʼtsaténhaf ne tsonónhskwahron rátsinn ohénton natohsehrákon tsi nónhwe niʼkíteron tánon sehró꞉ri ne Aaron tánon ne sakohiohʼokónhas tehonnisnónhsaren rahnonhtsíne.

¹¹ Thóh tienonhwaʼrhiákon ne tionhnónhskwahron rátsinn tsi íkes ne waʼtiatatokénti né꞉ne tsi tsionhtawehiatákwah natohsehrákon.

¹² Tések ne tsionhnónhskwahron rátsinn raonekwénsa tánon seʼsnonhsàke íshastste thóh sèroh tsi kanikónharoʼte ne ietsienharákwah. Ethòne nenhiotheʼnekwenhsatátere tsi iatewashíthaien ne ietsienharáhkwah tasáweron.

¹³ Ethòne, tések akwékon ne iorésens né iororóksthon ne rahiáthakon, né꞉ne kwáh tsioiánere ne rahotwénhson, tánon ne tèkeni raostiéhsehri ne iorésen thóh ioranentakónhak, tánon ietsienharakwáhke sátʼtsahat né nasékʼtaʼtse.

¹⁴ Ók shaʼtsahat ne tsonónhskwahron rátsinn raowáronk, raoné꞉honk, tánon ne raokahrósta nátsthe tsi watóhserohthe. Né kí꞉ken nathatawítsera nèrenh ahonsakaháwiʼthe ne rotikháres raotiʼriwaneraháktsheras.

¹⁵ “Saiáta tetshiátak ne teiotinakaronhtónha rátsinn tánon tsró꞉ri ne Aaron ó꞉ni ne sakohiohʼokónhas ranonhtsíne tehonhniʼsnónhsaren.

¹⁶ Tienonhwarhiákon, tánon iahásaf ne raonekwénhsa tánon thóh iasáti akwékon ne kaiéri natekahiósaiens ne ietsienharakwáhke.

¹⁷ Tsiaʼsónhnion; sehnoharénion ne raiatakónhsons tánon nonàhken tsi tehashinónhtons, tánon èhneken ne ranonhtsíne thóh srónhnion nohiáson nahoʼrihoténsons.

¹⁸ Ietsienharakwáhke rahiatakwékon sátʼtsahat ne teiotinakaronhtónʼa rátsinn né꞉ne ká꞉khwa ahoriwáhke tsi ienwakʼkhá꞉wen. Tsi natenwenhserathenihon kíʼ ken iewakʼtkáwen enwaʼkerientí꞉iosthe.

¹⁹ “Iatsiaténhaf nó꞉ia teiotinakaronhtónʼa rátsinn—né꞉ne teiotinakaronhtónha rátsinn rónhstha nahontonhʼnárasthe—tánon tsró꞉ri ne Aaron tánon ne sakohiohʼokónhas ranonhtsíne tehonhniʼsnónhsaren.

²⁰ Tsienonhwarhiákon, tánon iahásaf ostónha ne raonekwénhsa tánon tsi roʼthahónthate ne saweientetáhkwen ne Aaron ó꞉ni ne sakohiohʼokónhas sèhroh, tánon ne sathiweientetáhkwen ratiwehionkaráhkes ó꞉ni ne tsi tehonhiakwiroʼwánens ne sathiweiehtetáhkwen nahonshitáti. Nenhiotátere nonekwénhsa aktónhties ne tsi ientsienharahkwáhke iaʼsáti.

²¹ Ethòne iahásaf nonekwénhsa ne ietsienharakwáhke káhere tánon ostónha ne kènhie ne ronhwatiʼriwaniratstákwa ne ratiʼtsihénsʼtatsis, tánon tesatsʼtaró꞉kwat ne Aaron rahotseronhniaʼkwáhke ó꞉ni ne sakohiohʼokónhas rahonatʼtseronhniaʼkwáhke. Raónha ó꞉ni ne sakohiohʼokónhas, tánon ne rahonatʼtserónhniat enhiotokentíke nakeriwáh꞉ke.

²² “Skwé꞉tar ne teiotinakaronhtónʼa rahoresénhtshera, ne iothasaʼrésen, ne iorésen ne rahiatakónhsons, né kwáh tsoiánere ne rahotwénhsa, ne tékeni raostiéhseri ne iorésen iorahnenhtáʼkons, tánon ne saweientetáhkwen nahanítʼtsati.

²³ Náthere ne kanátaro íwah tsi nikáien ne hiontʼtátʼtshe, skanatharáʼtsions tèsek: skanátara né꞉ne iakenhiewá꞉tha kènhie ionhniáton tánon énska né iáh ne tehionhniáton tánon énska norahwístha.

²⁴ Akwékon kí꞉ken ká꞉khwa Aaron rahtsiaʼnáke ísren tánon ne sakohiohʼokónhas tánon sehró꞉ri nahathitoʼkénstisthe nakeriwá꞉ke né꞉ne katokénston tsi enhiónkon.

²⁵ Ethóne shaʼséhkwah tánon ietsienharakwáhke sátʼtshaʼat, éhneken tsi watéskonhte ne katshénen, né꞉ne káhkhwa hionktáti. Né tehiahonserateníhon kíʼ ken hionktáti wakerientihióstha.

²⁶ “Tések ne raronhkwenáke ne teiotinakaronhtónʼa rátsinn tánon seriwatokéntist akonháke né꞉ne kaʼtokénhston athatawítsera. Thóh kí꞉ken níkon ne katshénen rahowáronk íse sáwenk.

²⁷ “Nó꞉nen ne ratsihénstatsi enhonwariwaníratʼtse, né raronhkwenàke ó꞉ni ne ranhitsáke ne teiotinakaronhtónʼa rátsinn né꞉ne wásthon tsi ronhwatiriwahniráti né enhiontsathakweʼní꞉iosthe né꞉ne kwáh katokénhston athatawítsera tánon né karakwáhthon kaienthákwen ne ratitsihénsthatsis rahotiriwáhke.

²⁸ Né꞉ne iáh thaʼtesehwakateriwaʼteniénhnis natiatoreʼtátshera né nó꞉nen nakonhkwetashón꞉ʼas sahotiríwa tsi ienhatíthate, né꞉ne oronhkwéna, tánon ne ranhitsàke ne katshénen né nènʼneʼe ne ratitsihénsthatsi rahonáwenhk. Né kí꞉ken nonhkweshón꞉ʼas wahónkon, ne Watiá꞉ner.

²⁹ “Ne Aaron né rahotsherónhniat tsi ratsihénsthatsi íken sakohiohʼokónhas entʼthonwénhnon nó꞉nen enrénheie, ronónha enshónsthe nó꞉nen enhonwatiriwaʼníratʼtse.

³⁰ Ne Aaron roiénha ne tenshonakʼtáhkwen tsi ratsihénstatsi íken tánon tsi nikáien ne atohsehrákon nienhéntre tsi nónhwe níkes nahoʼhióten thóh nónhwe ne iotokénti né kí꞉ken enhatʼtierónhniate né꞉ne tsáta nónhta nikaríwes.

³¹ “Iahásaf ne teiotinakaronhtónʼa rátsinn owáhron né꞉ne ronátsʼton tsi ronhwaʼtiriwaniráti ne Aaron ó꞉ni ne sakohiohʼokónhas tánon tesnekónhtʼtsiet thóh nónhwe ne tsi iotokénti íken.

³² Né tsi iehionthawehiatákwah natohsehrákon tsi nónhwe nikíteron ne enhonnéke skátke ne kanátaro natheráhkon íwah.

³³ Ónenk tsi né enhónneke tsi niwásthon ne tsi nihiorenhnáhon nahonsahiontaʼtenikónhrenhse ne tsi nenhionthateriwaníratʼtse. Ratiʼtsihénstatsis khók enhónʼneʼke kí꞉ken káhkhwa, tsioríwa tsi iotokénti.

³⁴ Tó꞉ka ostónha nowáhron tó꞉ka ó꞉ni ostónha ne kanátaro iáh thahónʼné꞉ke ne tsi ienhiórenhne, ónenk tsi enwatsahathónhake; néʼne tóhsa ónhka á꞉ieke, asèken iotokénti.

³⁵ “Sehwateriwaténtsiat tsi nikarihó꞉ten nahonwariwaníratʼtse ne Aaron ó꞉ni ne sakohiohʼokónhas né꞉ne tsáta nónhta nikaríwes kwáh kíʼ tsi ní꞉ioht tsi kwahʼró꞉ri.

³⁶ Sewenhnisehrátʼtshons ónenk tsi ensewátate ne tsonónhskwahron rátsinn natsisewateskónhten, né káti ne kariwanerahʼáktsera nahonsakanikonhrènhʼen. Né kí꞉ken enskanoharé꞉the ne ietsienharákwah. Ethóne iakenhiewátha kènhie tsókaf né nakaiataterísthakwe.

³⁷ Eh kíʼ nasehwáier né꞉ne tsáta nónhta nikaríwes. Ethóne ne ietsienharákwah kwáh thoʼkènʼen tsi entsotokentíke, tánon ónhka tó꞉ka ó꞉ni tsiknahó꞉ten iakaiéna kwáh kíʼ né enhiakokarónhiathe nahoshatsténsera ne iotokénti.

Né Niatewenhniseráke Tieiéstha

³⁸ “Niatewenhniseráke né꞉ne tiókonhte enkénhake, ietsihiateskónhthen ne ietsienhenraʼkwáhke tenihiáse né꞉ne énska tehonoseriʼiákons teiotinakaronhtónʼa tenítsinn.

³⁹ Tsi enietʼtsiiateskónhten ne teiotinakaronhtónʼa tenítsinn saiáta noronhkène tánon saiáata nokarasnéha.

⁴⁰ Nentʼthatiérenhthe teiotinakaronhtónʼa rátsinn owíra né tasehwáhest tekakonhtseráke né꞉ne kwáh katʼthesehríio onátsia né thakaiésthonke skatshétha ne aóskon iakenhiewátha kènhie. Skatʼtshétha ne onenharataʼsehontsherákeri tekaiésthonk tsi entisewáiesthe.

⁴¹ Né tekeníhaton teiotinakaronhtónʼa owíra okarasnéha né nòkwah tsi sewateskónhten, tánon kwáh ne sáka tsi tasewáhiest nothé꞉sera, ne iakeniewátha kènhie, ó꞉ni ne onenharataseʼhontsherákeri tsi kíʼ nithisewahiéston shiʼhioronhkéne. Né kí꞉ken ne káhʼkhwa hionktátis, ne Watiá꞉ner, tánon tsi niwenhsehró꞉ten wakerientihióstha.

⁴² Né tsi tiókonhthe thóh nenhiotónhake, kí꞉ken watéskonhthe ne tkahiéston tsi entkahestónhake akʼkénton kíʼ nónhwe né꞉ne tsi iehontawehiatákwah natohsehrákon ne tsi kíteron. Thóh káti nónhwe natenhiakwahtátken nakonhkwetashón꞉as tánon tsi enkhetháhrase.

⁴³ Thóh nónhwe natenhiakwahtátken nonhkweshón꞉ʼas ne lsraerʼró꞉nons, tánon ne tehiokaráiak kaswatʼthétshera ne tsi kíteronh né enhiotoʼkéntisthe ne watenáthaien.

⁴⁴ Kwáh ne enkónhniathe natóhsehra ó꞉ni ne ietsienharákwah nahiotokentíke, tánon kwáh tenkhekhási ne Aaron ó꞉ni ne sakohiohʼokónhas tsi enhiontsiótenhse tsi ratiʼtsihénstatsis íken.

⁴⁵ Skátke enhiakwahnákereke nonhkweshón꞉ʼas nʼIsraerʼró꞉nons, tánon kwáh Í꞉i ne raotiní꞉io enkénhake.

⁴⁶ Tánon kwáh enhonateriéntarake tsi Í꞉i ne Watiá꞉ner Raotiní꞉io tsi nikáien ne tethesakohiatinekénʼen ne Egypt ne káti nahónton skátke ahiakwahnákereke. Í꞉i ne Watiá꞉ner Raotiní꞉io í꞉ken.