Exodus 27 - Ohiatonhseratokénti

Ne Ietsienharákwah

¹ “Né ietsienharáhkwah ne tsiónhniat ne acacia nikaientó꞉ten. Tahiotekerónhteke. 7½ niwashí꞉take nahiónshonʼke, tánon 4½ niwashí꞉take nahontahiótʼteke.

² Né tsi tekaiósaiens iohiothí꞉iek. Énskak iekénhak tsi tsiónhni ne ietsienharáhkwah, tánon akwékon tehiotwístaron notsínekwar karohrókʼthonhak.

³ Saʼtekshonhʼniánion ne naónterakwe teiaweiononkóhton wenkenrontákwen, tánon rahkareniáthashóna tsionhniánion, kaʼtshesónhas, ohnhiokwahsónhas, tánon onhtakʼshónhas ne waʼtsirahrákwahs. Akwékon kí꞉ken tsi niwatsʼtaʼshón꞉ʼas ne aionniáton ne tehiotʼwístaron notsínekwar karístatsi.

⁴ Teiowístaronh notsínekwar nahó꞉ten tsiónhniat ne ionhsehwátha tánon kaiéri níkonh tehiotweʼnonhniánions tsionhniánion nahioshiónthaʼke né tsi tekahiósaiens né꞉ne teiotwístharon ohtsínekwar nikaristó꞉ten.

⁵ Thóh sewáien ne ionhsewátha nákon ne tsi tekawanáksʼthon ne ietsienharáhkwa, né káti niahónwe nasénhnon nióre tsi nitiótʼthe ne ieʼtsienharáhkwa.

⁶ Sehwatenakaronhniánion né iehéstha né꞉ne acacia nikaientó꞉ken, né꞉ne tehiotʼwístharon otsínekwar karísthatsi sewaróhrokst,

⁷ tánon thóh thetsóhetste ne tsi iokakwenhʼtanenhtákʼtons ne skatíshons nokwáhti ne ietsienharáhkwah ne énhonsthe né nónen enhatíhaʼwe.

⁸ Oskwénkare nahó꞉ten tsiónhniat ne ietsienharákwa tánon tehiotskarawénhak, tsioʼianénhaf tsi nikwanaʼtónhni nohnotoʼharáhke.

Né Kanothónston Natóhsera Tsi Nón꞉we Níres Ne Roiá꞉ner

⁹ “Natohserákon tsi nónhwe níkes né tsiónhniat thakawanátʼthonke ne kwáh waniatarí꞉ios ahonteʼniatharaniʼhiónten. Nentiéne nokwáhti né ioniatharénton 50 niwáhsen niwathatseráke nahiónsonhke,

¹⁰ Né enʼhiotienawásthonhake ne tewá꞉sen nikanawahʼáhthakes tehiotwístaron notsínekwar karístatsi ne tsi konhtírahthe ne tehiotwístaron notsínekwar nikaristó꞉tens, né꞉ne ohʼnhiókwas tánon ne karístatsi kanonhwareʼshónhas ne kawistaráhken ionhniáton.

¹¹ Kwáh thóh nasewáier ne othoʼréke nokwáhti hiotoʼhetstákwen tsi kanhóton.

¹² Né tsi iaʼtewatʼtsénthos nokwáhti iotoʼhetstákwen iohaʼrenhtónhak 25 niwaʼthatseráke níhions, né꞉ne oiéri nikanawahʼáhthake iotsenawáhston tánon oiéri níkon ne tsi konhtírahthe.

¹³ Né tsitʼkarakwínekens nokwáhti iotohetsthákwen, né tsi tsionʼtawehiatákwah, né kanhothónkwen 25 nónhne niʼwatenienthentseráke natahonthakáronhske.

^14-15 Né tetsarónhkwen nokwáhti ne tsi tsionhtawehiatʼtákwah 7½ niʼwathatseráke ahiohaʼrentónhake, né ahiotienawasʼtónhake ne áhsen niʼkanawahʼáhthake tánon áhsen nakonháke tsi nónhwe nenhkonhtirátane.

¹⁶ Né kwáh tsi tsionhtawehiatákwah nónhwe enhioharentónhake 10 niwathatseráke ní꞉ions né꞉ne kwáh waniatharí꞉io ahionhniáʼtonke takaiésthonke norónhia, ariwakonhnéha, ó꞉ni onekwéntara ononhwéron, tánon né enkarasésthonʼke ne tewaseriʼiétaron. Né enhiotienawastónhake ne kaiéri nikanawahʼáhthakes ó꞉ni ne kaiéri níkonh tsi konhtírathe.

¹⁷ Akwékon kí꞉ken kanawahaʼteshónhas ne tehiokwahtaséhton ne kaʼnhotónkwen né tenhionathatienawakónhake ne karistaraken kanonhwareʼshónhas, tánon nonhiókwas kawistaráken nènʼneʼe nahó꞉ten enhionhniáton tánon ne tsi konhtírate tehiotwístaron notsínekwar karístatsi né enhionniáton.

¹⁸ Né kanhothonkwen 50 niwáhsen niwathatseráke nenhiónshonke, 25 niwathatseráke natenwathakáronhke, tánon 2½ niwathatseráke nentsiótʼtheke. Né waʼtaharahnihióntʼtha né꞉ne kwáh waniatarí꞉io nahó꞉ten enhionhniáthonke tánon nèhtake tenhiosatharáke ne tehiotwísʼtaron otsínekwar.

¹⁹ Akwékon tsi niwatstashónhas ne watsthánion Natóhsera ó꞉ni kanonhwareshónhas tánon ne tsi kanhotónkwen né꞉ne tehiotwístaronh ne otsínekwar nikaristó꞉ten enhionhniáthon.

Tsi Nikarihó꞉ten Nahiontenhnikonhráren Ne Kahásera

²⁰ “Sehró꞉ri nonhkweshón꞉has ne Israerʼró꞉nonke nahontaieʼsahawíten ne kwáh wenhiení꞉io né iahkeniewátha kènhie né꞉ne watʼthaserotákwah ahówenk, né꞉ne tsiókonhte tsi akahaʼserótake.

²¹ Aaron tánon ne sakohʼiohokónhas enhatiʼkwahtáko ne kahá꞉sehra natohsehrákon ne tsi nónhwe níkes nátsthe nokwáhti tsi ioharénton né nohénton tsi kanorhóʼkwahien naʼteriwasehronhniáʼtshera. Thóh nakʼkhénton enhiotétʼkhake okáras entewathasákwen né꞉ne tsi nióre ienhiórenhne. Kí꞉ken kariwahtátʼtshera thóh nenhiotónhake né꞉ne tsi nénweh enhonteweiénton ne Israerʼró꞉nons tánon tsi wahatiʼwatsiratátie.