Exodus 26 - Ohiatonhseratokénti

Natóhsehra Tsi Nón꞉we Nihénteron Ne Roiá꞉ner

¹ “Natohsehrákon ne iotosehratokénti, né ne watohsehróthe tsi nónhwe níkes, ne wathaʼharanihióntʼtha né tsiónhniat nʼoiéri nikaʼniatharáke né꞉ne kwáh waniatarí꞉ios tekaiestónhak nʼorónhia, ariwakonhnéha, tánon onekwénhtara ononhwéron. Né tesehwaserihʼiétaront ietsiʼhiátarahst ne tehaʼtinerahóntsionʼte tehnónhne.

² Né skaniataráʼtsions tsi entsiónhni satewásek, 14 iawénhre niwathatsheráke nahiónske tánon tewatatsheráke natahonthakáronhke.

³ Nensewaníkʼkon wísk nikaniataráhke tesehwaʼshonterónhnion né꞉ne tsioʼtitsókwah, tánon thóh nasehwáier ne ó꞉ia wísk niʼkaniataráhkes.

⁴ Sehwaʼkhaʼkwentonhniánon né꞉ne orónhia niwaniatharó꞉ten ísehwats ne tsi iehiotʼtónhnions né áhtste nokwáhti ne tiotiʼtsókwah.

⁵ Wísk niwáhsen níkons sewatkakwenhtonhʼniánons né tiotieréntons nihiotiʼtiókwahkes tánon wísk-niwáhsen nikakaʼkwénhtakes sháka akénhake ne nonahkénkha ne tekeníhaton íken.

⁶ Wísk-niwáhsen níkons owistanórons tionhniánion ohnhiókwas né꞉ne takonthatiéna ne tehiotiʼtiókwahkes nénskak khók iahónton.

⁷ “Tsiónhni nahonteró꞉rokste natóhsehra né꞉ne énskaʼiawénhre nikaniataráhke né꞉ne kaiatákeras ononwéron ahionhniáton.

⁸ Akwékon sathá꞉onske tsi tsiónhni, wísk-iawénhre niwathatsheráke ní꞉ions tánon tewataʼtsheráke natewatakáron.

⁹ Wísk níkon iatesehwáiest tsi sewaníʼkhon né꞉ne tsioiána niahónton, tánon nʼó꞉ia iáh꞉iak níkon né nenʼne ne ó꞉ia entkonhténhroʼwe. Sehwaweʼnónhni né iáh-iakʼkhàton tesewahiá꞉ser nohénton ne watóhsehrote.

¹⁰ Wísk-niwáhsen níkonh sewatkaʼkwentonhniánion ne tsi iehiotʼtónton ne onakènkha ne tsioiána íken, tánon wísk-niwáhsenh nikakakwénhtakes ne tsi iehiotʼtónhnions nʼó꞉ia tsioiánas.

¹¹ Wísk-niwásenh níkons ohʼnhiókwas tionhniánion ne otsínekwar teiotʼtwístaron tánon thóh tetsóhetste tsi watkakwentanihionʼtákwa ne taʼtsiáterihke ne tehioiánakes ne káti énskak iahónton tsi ahonteró꞉rohke.

¹² Né ó꞉ia nasénhnon iotaténron oná꞉ken nénhneʼe nokwáhti Nʼatóhsehra sewanihiónten.

¹³ Né ó꞉ia satewathaʼtseríhen iothaténron ne skatí꞉shons nokwáti ne tsi níhions né꞉nenʼne nakʼtónties Natóhsehra akanihióntake nahonterorókste.

¹⁴ “Shé꞉kon ó꞉ia tékeni shatsiónhni ne waterohrókstha, énska né꞉ne teiotinakaronhtónʼa rátsinn kanéhonk onekwéntara ahonsóhʼonke tánon nó꞉ia né nènhʼne ne kwáh kanewí꞉io, né náhtste nokwáti ahonterohrókste.

¹⁵ “Teietʼtsítast tsi sewatenikonharónhni Natóhsera né꞉ne acacia óiente ísewatste.

¹⁶ Né skanikonharáʼtsions 15 iawénhre niwashítake nahionsónhake tánon 27 tsáta niwashítake natahontaʼkáronhke,

¹⁷ né꞉ne tékeni kwáh né sáka tsi kahiotiʼiáton, né káti nahónton ne onikónharas tatiatékha. Akwékon kíʼ ken nonikónharas satahioʼiothí꞉ieke.

¹⁸ Tewasenh nikanikonharakes tionhnianion né entiene nokwáhti ahówenk

¹⁹ tánon kaiériʼniwáhsen níkons kawistaráke nahonnitskwáhren, tékeni naonnitskáwren skátʼtshons nʼonikónhara tsi nakaiénna tsi enwatakaróroke.

²⁰ Tewá꞉senh nikanikonharékes tsiónhni nothoréke nokwáhti ahówenk Natóhsera

²¹ tánon kaiéri-niwáhsen níkons kawistanóronhs nahonnitsʼkwáhrate, tekenísons ne skanikónhara.

²² Nonàken nokwáhti Natóhsehra né꞉ne tsi iatewaʼtshéntʼthos nokwáhti, iáhʼiak nikanikonharákes tsiónhni,

²³ tánon tekanikonharákes ne tsi tekahiósaiens.

²⁴ Kí꞉ken tsi tekahiósaiens nonikónharas èhʼtake nokwáhti tsi tenkàkʼkhenhke tánon tenkonhtaʼtiéna kwáh tsi nióre ne èhʼneken. Ne tekaʼnikonharáke tsi káhsons ne tékeni tekaʼhiósaiens kwáh kíʼ ne sháka tsi ahionhníhake.

²⁵ Káti satékon nikanikonʼharákes né꞉ne iáh꞉iak iawénhre níkons kawistarákens tsitʼkenskwáhere, tekenísons ne nàʼkonh nonikónharas.

²⁶ “Wísk-iawénhre níkons tsionhniánion né꞉ne acacia nakaientó꞉ten ne tahontrenwá꞉nion, wísk níkons ne skatísons nokwáhti nonikónharas ne tsi Watóhserote,

²⁷ wísk níkons níse nòkwah nakanikonharáti, tánon wísk níkons ne tsi iatewatʼshénthos nokwáhti, né꞉ne ahonàken nonikónhara.

²⁸ Nasénhnon nónhwe natekarénhwak, asénhnon nónhwe natesewarénho tsi niʼkanikónhares, né꞉ne iahónwe tsi takaiáhiaʼke tsi Waʼtóhserohte.

²⁹ Owistanó꞉ron sewaróhrok nonikónhras tánon ne sewatsʼthánion ne owistanóronhs kakaʼkwentonhniánions nahontiénawasthe ne tekaʼrenwánions, né nónhne ne owistanórons akarohrókston.

³⁰ Sewatohsehrakétsko tsoʼianénhaf tsi natekenhnaʼríhton ne kwáh nathónhni ne tsi tsiononhtáhere.

³¹ “Sewathaharónhni né꞉ne kwáh waniatarí꞉io tekaiéston norónhia, ariwakonhnéha, ó꞉ni onekwénhtara ononhwéron. Tewaseriʼiétaronht ietsiʼiátaras ne tehatiʼnerahontʼtshiónton ne kárhios.

³² Eh senihiónten ne kaiéri níkon kanawahaʼthótons ne acacia nakaientóten tánon né karohrók꞉ton nowistanóron, ohnhióʼkwas wasthánion, tánon thóh kenʼskwáhere ne karistaráken nohóten nionhniáton.

³³ Thóh sewanihiónten noniatará꞉a èhʼtake tsi ioʼnhiokwatserentónhnions ne tsi karonhkweʼnáhere ne Atóhsehra, tánon thóh oná꞉ken tsi ioniaʼtharénton sewáienh naʼteriwasehʼrionhniátshera oneró꞉kwa thóh í꞉wa ne tekensténʼrakes. Noniatará꞉a né tenkhakʼkhásion né Iotoʼkénti íken tánon ne kwáh é꞉neken íken tsi Iotoʼkénti.

³⁴ Sewanónhtek naʼteriwasehronhniáʼtsera oneró꞉kwa.

³⁵ Náhtste nokwáhti né kwáh èhʼneken tsi Iotokénti thóh sewatetʼkwahratseró꞉ten né꞉ne othoʼréke nokwáhti ne tsi Watohseró꞉te tánon ne watʼthaserotákwah entiéne né nokwáhti sewáien.

³⁶ “Né tsi iehiontawehiatákwah natohserákon né sewatahaʼrónniat né kwáh waniataríio né꞉ne tekaiéston ne ononhwéron tanon orónhia, ariwakonhnéha, ó꞉ni onekwénhtara ononhwéron tánon né karaséston tsi tewaseriʼiétaronh.

³⁷ Né kíʼ ken oniatará꞉a wísk niʼkanawahʼáthakes tsiónhni né꞉ne acacia nikaientó꞉ten owistanóronh karoróks꞉ton tánon ne iosthánion nowistanóronhs ohnhió꞉kwas; tánon wísk níkon tsiónhni nahonhnitsʼkwáren né꞉ne tehiotwístaron notsínekwar nikaristó꞉ten.