Exodus 25 - Ohiatonhseratokénti

Nahontaʼieiésthe Tsi Nokwáh Ne Iotoʼkénti Ató꞉sehra

¹ Ne Roiá꞉ner wahawénhase ne Mahís,

² “Seró꞉ri lsraerʼró꞉nons nahionkerohrók꞉se. Rahtiʼiéna kwáh tsi nahoténsons akénhake nónhka í꞉ienhre nahonthaʼhiontkaʼwíten.

³ Kí꞉ken nenkaróhronhke né꞉ne: owistanóron, kawistaráken, tánon notsíʼnekwar karístaʼtsi;

⁴ ne wahniatarí꞉io; orónhia niwasohkóten, ariwakonhnéha, tánon onekwéntara ohnonwé꞉ron; nʼoniatará꞉a ne ahionhniáton ne kaiatákeras raoʼnonwé꞉ronh;

⁵ ne teiotinakaronhtón꞉ʼa rátsinn raoʼnhéhonk onekwéntara ahonthashó꞉honhke; né꞉ne kwáh ionétska kanhewí꞉io; né kwáh kaientanó꞉ron acacia;

⁶ kènhie ne hionthaʼseroʼtákwa wátstha; kanonkwatsheraʼnó꞉ron né꞉ne iontatiatokáhstha ó꞉ni né kanetanó꞉ron iontsienkwaronhniaʼthákwa;

⁷ Ó꞉ni ne kanenhiaʼnó꞉ron hioteherarónhnions tánon ne ohiáshons nʼowistanoronhʼsón꞉has ne ahónsthonke ne Ephod né꞉ne rokháres rahotiniʼiontaʼtsheráke ó꞉ni ne wenhskweʼnàhke ahonstháʼnionke né tsi ionahtáʼtseronhte ne atinihiónta.

⁸ Nonhkweshón꞉ʼa kwáh ónenk tsi enhionkhónnien ne iotokénti atóhshera, ne káti nahónton skátke ahiakwenteʼrónthake.

⁹ Tsiónhni tánon akwékon tsi nihiéiens ne kanónskon sewá꞉ser tsi ní꞉ioht tsi enkwahnatónhase.

Naʼteriwaʼsehronhniátshera Oneró꞉kwa

¹⁰ “Ne nonorókwa tsiónhniat ne kaientanóron né꞉ne acacia nakaientó꞉ten, 45 nihionkaráhke níhions, 27 nihionkaráke natewathakáron, tánon 27 nihionkaráke nitiótʼthe.

¹¹ Aòskon owistanóron tesewanahnétha ne kanorókwahkon ó꞉ni nʼátsthe nokwáhti tánon owistanóron tewakwahtáset tsi tesewawáhnak.

¹² Kaiéri níkonh owistanóron teseʼwahwenónhnits tánon thóh tionhthónnion tsi kaʼshinónhton ne ká꞉ieri níkon, tekenísons ne tehiotweʼnonhniánion ne skatíson nokwáhti.

¹³ Sewatenahwahathonhniánion né꞉ne káientanóron acacia tsiónhniat né áhonsthe tsi ahatíhawe owistanóron sewarohróks

¹⁴ tánon thóh thetsohetst tsi iokaʼkwenthaniʼióntons ne skatíson nokwáhti nʼonoró꞉kwa.

¹⁵ Né kanawahaʼtesónhas thóh ahiorókʼkhonke tsi iokaʼkwenhthentónhnion tánon kwáh tó꞉sa ahonsahiótshionhke.

¹⁶ Ethòne thóh kaʼneróhkwahkon sewatárion ne tèkeni osténras né tkwáwi, tsi thóh nónhwe nikahiatónhnion ne kaianerenseratoʼkénti.

¹⁷ “Né sewanónhtekt né owistaʼnoronhtsheʼróskon, 45 nihionkaráke níhions tánon 27 nihionkaráke natewatakáron.

¹⁸ Tenihiáse kárhio owistanóronh nahó꞉ten ietʼtsihiatónhniat tahoʼtinerahontsiónhtake né꞉ne ieneʼkonhréstha ísehwatste tsi tsiónhni,

¹⁹ skátʼtsions ne tsi ieiotʼtónhnions natenonhtékta. Tsi entsiónhni énskak khók iekénhak natenonhtékta.

²⁰ Ne tenineráhontʼtsionhte kárhios tehiatatkonhsakánerahke tsi iatehiohiaiákhon natenonhtékta, tánon tsi tehoʼnathehonnonkʼtsakaráhwenh ne akarorókthe.

²¹ Kanerokwákon sewátha ne osténhras tanon é꞉neken tasewáhren natenontékta.

²² Kwáh thóh nónhwe naʼtenʼtiatátken, tánon thóh é꞉neken natenontekʼtàke tsi natehiátere ne tèkeni teniʼnerahóntshonʼte ne tehnónne kwáh entkónion akwékon natianerénsheras né꞉ne lsraerʼró꞉nens raotiriwàhke.

Natekhwára Ne Kanà꞉taro Aoriwàhke Tsi Iahonwátatʼtshe Ne Rawenni꞉io

²³ “Sewatheʼkhwaratsherónhni né꞉ne iokaraníronh né꞉ne acacia nakaientó꞉ten isehwastste, 26 nihionkaràke níhions, 18 iawénhre nihionkaràke natewathakáron, tánon 27 nihionkaràke nitiótʼte.

²⁴ Aòskon owistanóron sewanónhtek tánon owistanóron tesewashaʼtaront tewakwahtáset.

²⁵ Tsónhni 3 nihionkaràke natewatakáron tewakwaʼtáset tánon owistanóronh tesewasháʼtaronk ne tsi iotsiaʼtánen.

²⁶ Kaiéri níkon tsiónhni oshiaʼsónhas tehiotweʼnonhníhak owistanóron nahó꞉ten kénhak tánon thóh tionhtónhnion ne kaiéri natehiothiósates, tsi nónhwe nikashiʼnhó꞉tons.

²⁷ Ne tehiotweʼnonhniánions okakwentaʼsónhas né nenʼneʼe tsi nónhwe ne kanákares ienwatóʼrohke tsi enhatíhawe ne atekhwára thóh nónhwe nenkahʼkwatá꞉kwenhke ákta tsi iotiaʼthánenh.

²⁸ Ne kanakáres né꞉ne ioʼientaníronh acacia nahó꞉ten tsiónhniat tánon owistanóron sewaró꞉rokʼst.

²⁹ Sewatetsonhniánion, kátshes, ó꞉ni kakshoʼwánens né nenʼneʼe ahónsʼthonke onenʼharataseʼonhtsherákeri. Akwékon kí꞉ken né꞉ne owistaʼnorontsheróskon akénhake.

³⁰ Nʼatekhwára aohénton enkaiénthake nʼateriwasehrhonniátsera oneró꞉kwa, tánon natekhwaráʼne tiókonhte tsi thóh enkárahke ne kanatarotatokénti nakshéttats.

Ne Wathaserotaʼkwáhke

³¹ “Né wathaserotákwah owistanoronhtseʼróskon nahó꞉ten tsiónhniat. Né tsi tkenskwáhere ó꞉ni ne ionaʼtóntons ienekonhréstha ísehwats tsi tsiónhni; ne tsi iokʼsónhtons ó꞉ni nahonerathaʼsónhas tánon tekaʼtsitsaʼieronhnionháton, ó꞉ni ne tsi ioskwehiónton tánon ne iotsiʼtiónton, énskak khók iakénhake.

³² Iá꞉iak nikanáʼthake enhionatóntonke ne aktóntie, áhsen ne skatísons.

³³ Né skanahatáʼtions áhsen níkon ne tekatsiʼtsaieronhnionhátons thóh nakaieronhtó꞉ten tsi ní꞉ioht ne almond ahotsítsa tsi ioskwehiónte ó꞉ni ioneráthonte.

³⁴ Ne tsi tekarenwá꞉nions ne wathaseranihiontákwa kaiéri níkon ahioiénthake ne tekatsitsaierónhnion thóh nahiotónhake tsi ní꞉ioht ne almond ahotsítsa tsi ioskwehiónton tánon tsi ioneratónton.

³⁵ Ók énska ioskwehióntak èhtaʼke ne áhsen nihioiánake ne ionahtóntons.

³⁶ Ne ioskwehióntons, ne ionathóntons, tánon ne wathaseroʼtákwa kwáh énskak khók iekénhak tsi akanekónre ne owistanóron.

³⁷ Tsáta nikahaseráke tsiónhni ne wathaserotáhkwah ahówenk tánon sewakwahtáko né꞉ne ohénton nónhwe tsi takaswaʼthéte.

³⁸ Ne tewaswenhtoʼraráktha tánon ne tewatetsanetákwah ne tsiónhniat ne ohwistanoronhtserós꞉kon.

³⁹ Tsáta niwáhsen nikakontseráke owistanoronhtseróskon ísehwast nahiʼtsiónhni ne watʼthaserotákwah tánon akwékon tsi niwatsʼtahshónhas.

⁴⁰ Tasewateweiénton tsi tsiónhni sehwáhser tsi natekenhnaʼríhton tsi nikwahnatónhni né kénʼen ionhnonhtáhere.