Exodus 23 - Ohiatonhseratokénti

Kaiáneren Tánon Tkariwaiéri

¹ “Tó꞉sa tesateriwaréniaʼt nonówenhs, tánon tó꞉sa shieʼiénawas ne roʼtiníkon tóhsa sanówen nahontateriwiʼiósten.

² Tó꞉sa taʼsehriwáhwas ne iakotiokowáhnen nónen tenhonterientaʼwénhrie tó꞉ka ó꞉ni né enhontró꞉ri ne kahiótats ne kariwaʼkwahrishióntshera.

³ Tó꞉sa shé꞉nest nahonthaʼseriwárakwe tsi nòkwah ne iakóten tsi tehiontatsiatorétha.

⁴ “Tó꞉ka shí꞉ken ashéken ne tetsiatáʼtshons rahotshénen tsionónskwahron tó꞉ka ó꞉ni tewahóntes iotekwenhátie tsiéna tánon, hionshaʼtshiaténhaf ne tsík thoʼnónsohthe.

⁵ Tó꞉ka ne raotshénen tewahóntes wakahiatiénenhne ne tsi nihiorieniákste iokéte, tsniénon ne tahonshaʼkáthane; tóhsa shaʼtohétstat.

⁶ “Tó꞉sa sehiathonhníiens ne kariwaʼkwahrishióntshera ne iakóten nónen tsi teiehiatoʼrehtákwah iatenhiéthaʼne.

⁷ Tóhsa othènen sheʼhianowénhten, tánon tó꞉sa ne iáh othènen teiakonhíkon nahionthaʼtenonwarhiákon, asèken kwáh enkheréwahthe nónhka ètho nenhiéreʼre ne kariwahétken.

⁸ Tó꞉sa othènen sewahiéna ne taieʼtsiʼtsikhethároʼse, asèken né tahionthaʼthitsikhetharó꞉se iakahonnhniénhnis nonhkweshón꞉ʼa ne tahierónhweʼke tsi nòkwah ne tkariwaiéri tánon iakohetkenténhnis noriwaʼshónha tsi nihiákon ne iáh tehiakonhníkon.

⁹ “Tó꞉sa sheiateweiennaksáten ne tihononhontsáte; shaʼteriénthare tsi ní꞉ioht ne thiʼiakahontsáte íken, tsioríwa tsi thiʼtsionhontsátekwe ne Egypt nónwe.

Ne Tsáta Niʼioseràke Tánon Ne Tsatákhaton Niwenhniserakéhaton

¹⁰ “Né iá꞉iak nónta tsièntʼtho ne shonʼhontsàke tánon sheróhrok tsi nahó꞉ten entkáhawe.

¹¹ Ók ne tsatákhaton niʼiohserakéhaton sahtoriséntʼthos, tánon tó꞉sa othènen tsientʼthó꞉ko nahó꞉ten ne thóh nónwe niká꞉nios. Ne iakóten enwáhton nahónnheke nahó꞉ten né thóh nónhwe nentʼkhánio, ó꞉ni ne konhtírhios enwáhton nahónnheke ne iatenhiotátere. Thóh nónhne nátser ne tsi shaʼnenharaʼientʼthóhseron ó꞉ni ne shaʼronhthasónhas ne iakenhiewáhtha.

¹² “Iáh꞉iak nónta sahióten ne tsahiá꞉sehra, ók tó꞉sa enshaʼhióten ne tsatákhaton nónhta, né káti nahónton ne sahnhatserahó꞉kons ó꞉ni ne tihononhontsátes né ieshaʼhiótenhse tánon iekaníhare ne satʼtshenenhókons nahonthorísen.

¹³ “Shaʼthahónshatat oriwakwékon tsi Í꞉i, ne Watiá꞉ner, wakonró꞉ri. Tó꞉sa roʼnonháke nónhwe nasaterenhnaiénsek ne thiʼkaniʼiosehrátes; akwékon tó꞉sa sehnáhton.

Né Ásen Niʼioriwáke Kowánens Tsi Akatʼkhwárake

¹⁴ “Sehwatenikonhró꞉ri náhsen niʼioríwake akakhwárake ne tsósehra né nasekʼkwéniensthe.

¹⁵ Tsi niwenhnítes ne Abib, né wenhnitarákwe shaʼthontesewahiáʼkenhne ne Egypt, sewatenikonhró꞉ri ne katkhwáhere ne iáh tewatʼthenkwáhton kanátaro né꞉ne tsi ní꞉ioht tsi kwanháhon. Tó꞉sa othènen sewanáhtarak ne takaiéstonke ne iontʼtenkwáhtha tsi nikaríwes ne kí꞉ken tsáta nónhta kaʼkhwáhere. Tó꞉sa nonhwénhton tásehwe naskwasénhnaien ne iáh othènen tástsion.

¹⁶ “Sewatenikonhró꞉ri ne tsi nihieientʼthókwas katkhwáhere né nónen ensewaientkwáko ne sewaientʼtóhtsheras. “Sewatenikonhró꞉ri ne katkhwaráston tsi nensewateweiénton ne kanenaké꞉ne, né nónen ensewaʼhiáko ne kahiksónhas ne sewanenhaʼraientʼtónnions ó꞉ni ne tsi ioronhthóhtons ne kahiksónhas.

¹⁷ Iatehioseráke kí꞉ken ne áhsen nihioriwàke ne katʼkhwaráston ratikwékon ne tionhkwétas ronhnónhkwe ónenk tsi entʼthónne nahionksenhnáien, ne Roiá꞉ner Sewaní꞉io.

¹⁸ “Tó꞉sa ne thasewáiest ne kanátaro ne iontʼthenkwáhtha ionhniáton nónen ensewatsiatatʼtsáʼahthe ne katʼtshénen nakeriwá꞉ke. Nahorehsénh꞉tshera ne katʼtshénen thakwahtsaháten tsi nikaríwes kí꞉ken katkhwáhere tánon tó꞉sa othénnen aiohothaténronhke ne tsi ientsiórenhne.

¹⁹ “Iatehiosehráke tasehwáhaf rahonónskon ne Roiá꞉ner sehwaʼNí꞉io né nenhtewatiérenhthe ensewaientkwáhko nonátsia. “Tó꞉sa sewahwaráhrit ne ken nithoʼhiónha teiotinakaronhtónʼa tó꞉ka ó꞉ni ne kaiatákeras né꞉ne ronisténha ahonónhta ahísewatsʼthe.

Ne Karahrátsʼton Tánon Ne Karihonhnienhnítsheras

²⁰ “Kwáh enthihiaténienthe rahronhiakeró꞉non naiahéntense nahontaʼhiáʼne tsi natensatʼtháhakwe tánon tsi ienʼiaʼiaténhawe tsi nónhwe tsi niwatenátaien ne wakeweienentáon.

²¹ Tsi sewakwénienst tánon tsi sewawénhnarat. Tó꞉sa tsi sewathonkwetatsá꞉ton, asè꞉ken Í꞉i iehihiató꞉rion, tánon kwáh iáh tashaʼkothakátsthathe né iáh tehiontewenhnaráhkwa.

²² Ók tó꞉ka entsisewawenhnarákwen tánon oriwakwékon thóh nenhsewáhiere tsi niwáken, kwáh kíʼ rahthikwékon enhiakwateríio ne ietʼtshíshons.

²³ Nakeronhiakeró꞉non kwáh entsisewahéntenhse tánon tsi thoʼnonhontsáien ne Amorʼró꞉nons nientsisewahiaténhawe, ó꞉ni ne Hitró꞉nons, ne Perizró꞉nons, ne Canaanites, ne Hivró꞉nons, tánon ne Jebusites, tánon kwáh enkhehiáthonthe.

²⁴ Tó꞉sa teiettsiiatiákʼthons ne raotiniʼiohókons tó꞉sa ó꞉ni iettsisénhnaien, tánon tó꞉sa ó꞉ni sewahiéna ne raotiriwiiosthóntsheras

²⁵ Tó꞉ka enseksénhnaien, ne Watiá꞉ner Saní꞉io, Kwáh kíʼ ne enkonhiathaterísthaʼkwe ne kákhwa ó꞉ni nonékanos tánon akwékon èhren entkáwithe ne sannratarinétsheras.

²⁶ Né tionhontsáke iáh ónhka ne iónkwe tahonsahióti tsi kahá꞉we nahiowiraiénthaʼne tó꞉ka ó꞉ni ne iáh thahiowiraiénthake. Kwáh éntʼtsion nahitsionnhésonhkes.

²⁷ “Kwáh enkhehiónhnien nonhkweshón꞉ʼa ne hiesahiotátis nahionketsianíhsheʼke; kwáh tenkhehianithonhniáten nonhkweshón꞉ʼa tsi nikáien nensehwaterí꞉io, tánon kwáh rathikwékon enkhehiónhnien ne iesháshons ne tahonsahontkaraténi tánon nahiesatékwahse.

²⁸ Ne ietsíshons kwáh tenkheʼianikonhrhiákten; kwáh èhʼren enkhehiatenháwithe ne Hivró꞉nons, ne Canaanites, ó꞉ni ne Hitró꞉nons tsi nienhénse.

²⁹ Kwáh enkhehiatínekenwe ne tsósehra nióre; tó꞉ka thoʼnénhtiere, nohóntsa kwáh kíʼ ohhontsóskon enwáton, tánon ne konhtírhio sóhtsi enhonatsiokowáhna ne sariwáhke.

³⁰ Khèkok, kén nikonhátie tsi entkáterahthe, tsi nióre iatekaiéri tsi nensewatiókwahske nahisewatsiaʼthakweníiosthe nonhóntsa.

³¹ Kwáh enkónhni ne tsi karisthatátie ne tionhontsákes ne iahónwe tsi tkanéksker ne Aqaba tsi nióre ne Mediterranean Kaniatarakheʼkówa ó꞉ni ne kahentakeʼkówane tsi nióre ne Euphrates Kaniatarahtátie. Entkónhion ne kashatsténsera nashehiatsiathakweníʼiosthe ne rahthinákere né nón nihionʼhóntsaien, tánon kwáh enshehiatínekenhwe tsi nienhénse.

³² Kwáh tó꞉sa othènnen sewatsiaʼnerensehrónhni tsi natesewá꞉tere ne roʼnónha tó꞉ka ó꞉ni ne raotiní꞉ios.

³³ Tó꞉sa ieʼtsiríhon thíʼken onhkweshón꞉ʼas ne sewanakerahserákon ahatinákerehke; tó꞉ka thóh nensewáhiere, enhiesónhnien nahisewariwáhnerahke tsi nòkwah Í꞉i. Tó꞉ka enieʼtsisén꞉naien ne raotiníios, kwáh kenhéion tsi ní꞉ioht tsi enieʼtsihiaterístaien.”