Exodus 17 - Ohiatonhseratokénti

Ne Roiá꞉ner Waʼrónhni Nahontakaneʼkóten Nʼostenràhke

¹ Kanaʼkeraserakwékon ne lsraerʼroʼnónhʼke é꞉ren sahónhneʼthe ne Sin nónhwe, tehonʼnataʼkwaniónhne tsi niʼsakoroʼrihátie ne Roiá꞉ner. Rephidim nónhwe iahonthatoʼsehróten, ók iáh kí othènnen tekaneʼkaiéntaʼkwe nahatiʼnekí꞉rahte.

² Wahonwariʼwaká꞉tatʼtse ne Mahís tánon wahonníron, “Thakwanékanont nahiakwanekírah,” Wathariwaʼseráko ne Mahís, “Onhʼnonhʼtiéren tsi sewariwakaʼténhʼen? Onhʼnontiéren tsi entsisewateʼniéntha ne Roiá꞉ner?”

³ Ók kíʼ nonhkweshón꞉ʼa kwáh íken tsi rotiʼniatáthens tánon iahonthaʼsónhteren wahonwariwaʼkátatʼtse ne Mahís. Wahonníron, “Teskwahiaʼtinekénʼen kén ne Egypt? Ne꞉ne kaniaʼtaʼthéntshera tsi ní꞉ioht tsi askwaʼnonhwarhiákon ó꞉ni ne iakhiʼienʼokónhas ó꞉ni nonhkwaʼtsenenhó꞉kons?”

⁴ Ne Mahís kwáh íken tsi tahaʼnikonhraʼkónhtaʼkwe tsi iahaterénhnaien rahonhàke ne Roiá꞉ner tánon wahénron, “Ónh nakhehiaʼtiéraʼse kí꞉ken onhkweshón꞉ʼa? Kwáh thóhwa nahoʼnathaʼteweienhnentaʼhónhake nahionkenenʼhióhiake.”

⁵ Ne Roiá꞉ner wahawénhase ne Mahís, “Tohʼkàrah niháti ne sakotiʼhenténhse nIsraerʼró꞉nons iasehiaténhaf, tánon rahoʼtihénton nonhkweshón꞉ʼa niahásewe. Iaʼsehniénhaf tsi nikáien ne sanonhwáh꞉re ne Nile kaniataràhke.

⁶ Sahénton ténkʼthane nostenhràhke ne tsi ionónhthe ne Sinai. Ostenhràhke sehnonhwárek, tánon ostenràhke enhʼkanekóten nonhkweshón꞉ʼa ahatineʼkírahte.” Ne Mahís thóh kíʼ naháiere rahotiʼhéntons ne sakotiʼhentènse nʼIsraerʼró꞉nons.

⁷ Né watenáhtaien né konwanahtónkwa Massah ó꞉ni ne Meribah, tioríwa ne lsraerʼró꞉nons tsi wahonwariwakátaʼtse ne Roiá꞉ner ó꞉ni wahonwaʼteniénten nó꞉nen sahonwariwanónhtonhse, “Tewakwékon ken ne Roiá꞉ner káton kén iáh?”

Naʼteriʼiósehra Tsi Natehónteres Ne Amalekró꞉nons

⁸ Ne Amalekró꞉nons tahónʼne tánon iasakoʼnatsiaʼtónti nʼIsraerʼró꞉nons ne Rephidim nónhwe.

⁹ Ne Mahís wahawénhase ne Joshua, “Sehiaʼtharakwenʼháton ronhnónhkwe nʼiahisèhwe tánon nahisehʼwaterí꞉io ne Amalekró꞉nons nenhiórenhne. Onontoʼharàhke thentékʼtane enwaʼtienawaʼkónhaʼke ne ká꞉nia tsi nihakʼró꞉ri ne Roiá꞉ner nakʼkhawísehʼke.”

¹⁰ Ne Joshua thóh kíʼ nahá꞉iere tsi kíʼ nahoró꞉ri ne Mahís tánon thóh niaháre nahonterí꞉io ne Amalekró꞉nons, tsi nikaríwes ne Mahís ó꞉ni ne Aaron ó꞉ni ne Hur iahónhnewe nohnotoharahkénhiaʼte.

¹¹ Tsi nióre ne Mahís enhoʼnatʼtsakarahtáthonke, ne lsraerʼró꞉nons enhontkwéni, ók kíʼ nónen tenthanénhtshenne, ne Amalekró꞉nons entewatásawenh nahontkwéni.

¹² Nónen ne Mahís tenhanenhtsaʼkénheie, Aaron tánon ne Hur iatiʼnenʼiáhawe nahaniskwánahkwenon nahátien, thóh ná꞉he rahiaʼtákʼtha iʼné꞉the ronwaiénawaʼse tsi ronatʼtsakaratáton, ioriwaʼtóken tsi ronwanentʼtsaʼwàkon tsi nióre ienkaráhkwenhne.

¹³ Thóh kíʼ nahawènhne ne Joshua tsi washaʼkosénhni ne Amalekró꞉nons.

¹⁴ Ethóne ne Roiá꞉ner wahawénhaʼse ne Mahís, “Shiá꞉ton kí꞉ken tsi nahá꞉wenhne kí꞉ken atesenhniéntshera, káti né nahiakerarastákwahʼke. Sró꞉ri ne Joshua tsi kwáh enkhehiáʼtonthe ne Amalekró꞉nons.”

¹⁵ Ne Mahís warónhni ientsienharáhkwa tánon ne wahanáhtonkwe “Roiá꞉ner sehʼnakeniataʼroharátsera.”

¹⁶ Wahénron, “Éneken iahástat ne Roiá꞉ner rahoʼniaʼthará꞉ʼa! Ne Roiá꞉ner ienhaʼkónhthaʼkwe tsi enhonterí꞉io ne Amalekró꞉nons tsi nènhwe!”