Exodus 15 - Ohiatonhseratokénti

Mahís Wáthariwahkwe Natesenhnietshera Ne Kaniatarahʼkhekoʼwàhne

¹ Ethòne ne Mahís ó꞉ni ne lsraerʼró꞉nons waʼthonwariwáhkwahʼse kí꞉ken karénhna ne Roiá꞉ner: “Tenhiriwá꞉kwahse ne Roiá꞉ner, tsioríwa tsi aʼthonwesenhtsheràkon wahatʼkwéni ne atesenhniéntshera; kaniatarahkheʼkowàhne iesakohiatóntion ne koshá꞉tens ó꞉ni ne roʼtiʼshátens.

² Roiá꞉ner seh nʼakeshatsʼténsera ó꞉ni nʼakerénhna, tánon rahónʼa nʼatsiaʼthakenáhtshera; né kí꞉ken nakeʼNí꞉io, tánon kwáh tenhinonhweráhton, rakeníha raoʼNí꞉io, tánon kwáh enhiʼsenhnakaráhtaʼte.

³ Ne Roiá꞉ner raterí꞉ios; né꞉ne Roiá꞉ner raosénhna.

⁴ “Kaniatarahʼkhekoʼwàhne lasakohiaʼtónti ne Egypt raotiókwa ronhteríios ó꞉ni ne raotisereʼsónhas otsiónkwas; né kwáh thoʼnonhkwetí꞉ios ne ratiʼsenhnowánens Red Sea nónhwe nahatískohne.

⁵ Tsi niʼhionótes ne kaniatarahkheʼkowàhne tahiakoʼrórohʼke; tsi ní꞉ioht nʼonénhia thóh ní꞉ioht tsi wahontenónhwaien.

⁶ “Né sehseweienteʼtáhkwen, Saiá꞉ner, ioneráhkwat tsi nihioshatsʼtenserowáhnen; ononwénhseri iakahónhnis tsi tehiakohiataʼríhtha ne tehontátʼtshons.

⁷ Sonwehsenhʼtsheràkon tsi waʼsheʼsénhni ne iesháʼsons ó꞉ni waʼshehiathónte; kwáh íken tsi enshanákwen kwáh tsi ní꞉ioht ne ioʼtsirahtharíhen, tánon ensehiaʼtsiatatʼtsahá꞉te ne iesháson tsi ní꞉ioht ne kawá꞉he.

⁸ Niensahtónrhie ne kaniatarahʼkhekoʼwàhne tánon nonékanos enkaniá꞉toʼne; onhtkétsko tsi ní꞉ioht nasóntha; ne kwáh tsoʼnótesʼkwe ne kaniataraʼkhekówah wahaʼhontsaʼníhraʼne.

⁹ Ne roʼnatswénhskon wahonhníron, ‘Enhiaʼkísehre tánon enhiatʼkhiʼhiéna; Thenʼtiaʼkhónʼnion ne rahoʼnatʼtsokowáhtshera tánon iénkhaʼwe kwáh tsi níkonh tewakaʼthonwenhtsóni; Entkasaró꞉tsion nʼakasareʼkowa tánon akwékon iénkhaʼwe tsi nahoʼtiién꞉taʼke.’

¹⁰ Ók énskak khók iaʼsahthonhniserónhti, Saiá꞉ner, tánon ne Egyptró꞉nons wahaʼtískoʼnhe; thóh ní꞉ioht tsi wahonʼtenonwàhien tsi ní꞉ioht noʼristhakwènhthe tsi natehiotenonʼhianí꞉ton ne kaniaʼtarahkhekówa.

¹¹ “Saiá꞉ner, ónhka nó꞉ia ne niʼiohokónhas tahontahieʼsateʼnienténhste? Ónhka ahonsaʼhiesahié꞉renke, ioriwanerákwat iotoʼkénti? Ónhka ahiekwéni nahiakohióten ne ioriwanerákwat ó꞉ni ne kashatsʼtenseroʼwánens tsi nahiéʼiere tsi níse nishié꞉ra?

¹² Iateʼshanéntʼtshesʼte ne sesheʼweienteʼtákwen, tánon nón꞉wenhtsa iahoʼkotsiatanéʼkwahne ne ionkhísons.

¹³ Sahriwaʼtóken tsi nisahrahrátʼston, washeʼhenténhse nonhkweshón꞉ʼa ne sheʼsehniaʼkénton; né꞉ne shasastsʼténshera wáʼsasthe tsi washeʼhiasárine tsi niahónʼne ne iohontsiaʼtoʼkentíke.

¹⁴ Nonhkweshón꞉ʼa wahaʼkokthónteʼne, tánon wahaʼkohiatíhsonhkwe tsi nahoʼnateronhiénthen; ne Philistines né tehothiwáhnen ne katerónhtshera.

¹⁵ Nohénton iehonʼnéton ne Edom roʼtíterons; Ne Moab ne ratiʼshatsʼtes roʼnónhkwe roʼthiiatihʼshónhkwa; nonhkweshón꞉ʼa ne Canaan nónwe wahonhnikonhrók꞉ten.

¹⁶ Kaʼterónhtshera tánon ne tioʼtónʼnekt wahoʼtìrahne. Rontʼkháthos ne kashatsʼténsera, Ó Saiá꞉ner, tánon iáh othénnen tehaʼtísta tsi nihoʼtíteronhs tsi nióre ne shonʼkwetashón꞉ʼa roʼthinenhrahʼseronhniʼhátie tsi waʼsakonaʼtohétsʼten— nonhkweshón꞉ʼas né sheʼsehiathotharíshion tsi ronhwatinaʼskónhnisʼkwe.

¹⁷ Taʼsehiatínionhthe tánon washé꞉teron ne tsi sateʼnonhtáʼhere, nètho athená꞉ta tsi i꞉se, Saiá꞉ner, saráhkwen eh hashiʼterónh꞉take, nononsatoʼkénti tsi iateshá꞉ti sanonsónhni.

¹⁸ Í꞉se, Saiá꞉ner, kwáh ensanontí꞉ioʼke tsi nienhénwe ó꞉ni tsi nènhwe.”

Né꞉ne Miriam Aoʼrénhna

¹⁹ NʼÍsraerʼró꞉nons ehtshiaʼhónhne ne kaniatarakheʼkowàhne ne tsi nónhwe nihionhontsátʼthen. Ók kíʼ nó꞉nen ne Egyptró꞉nons ne rahotiʼsehreʼsónhas notsiónkwas skátke ne koshátens ó꞉ni ne sakonató꞉ries kaniatarakheʼkowàhne niahónhne, ne Roiá꞉ner thonsaʼhané꞉kákha, tánon tahiakoróʼrohke.

²⁰ Ne iotiatát꞉kon Miriam, Né꞉ne Aaron iatenó꞉senha, iaháʼtewaʼkwe ne nikanhakwá꞉ʼa ienahkwaʼekʼtákwa, tánon konhtikwékon ne konʼnónhkwe wakonwásehre, ioʼnatswahthonhátie ne niʼkanhakwá꞉ʼa ienhakwaʼektákwa ó꞉ni tehiotinonhniaʼkwenhátie.

²¹ Ne Miriam waʼtshiaʼkoriwáhʼkwahse: “Tetsisewariwáhkwas ne Roiá꞉ner, tsoríwa tsi athonwesenhtsherákon rotʼkwénion; kaniatarakheʼkówah ieshaʼkohiatóntion ne kosáhtens ó꞉ni ne roʼshátens.”

Ioneʼkatsʼkárat

²² Ethòne ne Mahís sashaʼkosáʼrihne nonhkweshón꞉ʼa é꞉ren sahónhneʼte ne Red Sea tánon kahentaʼkekówa niahonʼne né꞉ne Shur nónhwe. Áhsenh nónhta nikaríwes tsi niahónʼne ne kahentaʼkekówa, ók iáh othènnenh tehó꞉thinekhatsenhrion.

²³ Ethò꞉ne iahonhnewe tsotenahthakwenhrahre konwahnahthonkwah Marah, ók nohné꞉kanos thóh nióre tsi kaneʼkáksen iáh tehothikwénion nahotineʼkíren. Né káti aoríwa né konhwanahtónkwah ne Marah.

²⁴ Nonhkweshón꞉ʼa wahonwariwakáhtatʼtshe ne Mahís tánon wahaʼtiriwanónhton, “Nahó꞉ten káti ónenh entewanekírah?”

²⁵ Ne Mahís wahaʼterénhnaien rohneʼkènnis ne Roiá꞉ner, tánon ne Roiá꞉ner wahoʼnatónhase kèrithe, né nawènhke iahó꞉ti; tánon nohné꞉kanos wahkané꞉kihione nahónton ahieneʼkírah. Thóh nónhwe ne Roiá꞉ner thashaʼkáwenh ne kaianerénsera tsi ní꞉ioht tsi ahonʼnónhʼnheʼke, tánon thóh ó꞉ni nónhwe washaʼkoteʼniéntʼthaʼse.

²⁶ Wahénron, “Tó꞉ka kwáh tohʼkènʼen enskwahʼwén꞉narahkwe tsi thóh nenhsewáiere tsi nahó꞉ten íkere ne tkariwaiéri tánon ensewateweiénton nakeriwaʼtáʼtseras, Iáh kíʼ thènnenh thaʼkwahréwaʼhte ne kannrahʼtariné꞉tsheras tsi né niʼkhehiérahse ne Egyptró꞉nons. Í꞉i, ne Watiá꞉ner, tsi nikáien né tsi skwatsiéntha.”

²⁷ Nóia Elim nónhwe ionhsahónhnewe, thóh nónhwe tèkeni iawénhre níkons ionawerò꞉tons tánon tsáta niwá꞉sen níkons kerítons ne ioneʼrahtésons; thóh nónhwe ákta tsi ionawerò꞉tons nahonthatoʼsehróten.