Exodus 14 - Ohiatonhseratokénti

Wáthatihiaiake Ne Red Sea

¹ Ehʼthóhʼne ne Roiá꞉ner wahoró꞉ri ne Mahís,

² “Sehró꞉ri ne lsraerʼró꞉nons sónhkek tánon thóh ronhthatosehróten ohénton ne Pi Hahiroth, tsi nahteʼtiátere ne Migdol tánon ne Red Sea, ákta ne Baal Zephon.

³ Né ronhnonhtí꞉io kwáh enhaʼnonhtónhnionʼwe nʼètho lsraerʼró꞉nons tshiehoʼthiriwaiéwas tehoʼnahthawénhre ne tsi kanahʼkerasehráien tánon iáh tewátons nahaʼtihiákenhʼne ne kahentaʼkekó꞉wa.

⁴ Kwáh enhinonhtsisʼthanírahʼte, tánon kwáh enhiaʼsehréson, tánon nahkateʼsenhʼniétshera tsi nʼòkwah ne ronhnonhtí꞉io ó꞉ni ne rahoʼtiókwah ne ronhterí꞉ios entewakʼkhawíten ne kaʼkweniensʼthátshera. Ethòne ne Egyptró꞉nons enhoʼnahteriéntarahne tsi Í꞉i ne Watiá꞉ner.” Ne lsraerʼró꞉nons kwáh et nahaʼtí꞉hiere tsi nihonwatiró꞉ri.

⁵ Nónenhʼne ne ronhnonhtí꞉io ne Egypt sahonwaró꞉ri nʼètho onhkweshón꞉ʼa tsi roʼtiniaʼkènhʼen, rahónʼa ó꞉ni ne rahonkweʼtashón꞉ʼas thonsahoʼnahteriwaʼténien tánon wahonníron, “Ónh nihionkwatiéren? Waʼhithiríhon ne lsraerʼró꞉nons nahaʼtiniákenʼne, tánon wahonkiniá꞉kenhse tsi iethinaskónhnisʼkwe!”

⁶ Ne ronhnonhtí꞉io wahaʼweienénh꞉taʼne ne konhterí꞉ios otsiónkwas ó꞉ni ne rahonkweʼtashón꞉ʼas ronhterí꞉ios.

⁷ Á꞉kwekon iaháhaʼwe ne rahoʼsereshón꞉ʼas otsiónkwas, iá꞉iak tewenhniáʼwe nikaʼserétakes kíʼ né kwáh toʼsehretí꞉ios nʼotsiónkwas. Né skaʼsehretátʼtshions nʼotsiónkwas saiáta raʼsenhnowá꞉nen thoʼniarotáron.

⁸ Ne Roiá꞉ner wahoʼnontsisʼthaní꞉raʼte ne ronhnonhtí꞉io, tánon waʼsakosehréson ne lsraerʼró꞉nons, tsi roʼnahtentionhátie roʼnatkonhsaniráhton

⁹ Ne Egyptró꞉nons ronhterí꞉ios, skátke ne roʼtiʼshaʼtóntie, kaseresónhas ne konhterí꞉ios otsiónkwas, ó꞉ni ne shaʼkonahtoʼrihátie, waʼhonwatísehre tánon iahonwatiʼnónhterahne tsi nónwe iehoʼnahtaʼtoseróthaʼkwe atsaʼtákta ne Red Sea ákta ne Pi Hahiroth ó꞉ni ne Baal Zephon.

¹⁰ Nó꞉nen ne lsraerʼró꞉nons sahonwáken ne ronhnonhtí꞉io tahoʼtiokwíne ne rahonkwetashón꞉ʼas ronteríios niasakoʼnenhrénten, kwáh íken tsi wahoʼnateronhniénten tánon rahonhàke ne Roiá꞉ner hiatoʼthihénrethe nasakoiénahwaʼse.

¹¹ Wahonwaʼriwahkátaʼtshe ne Mahís, “Iáh kén tekáien ne ionthatsaʼtatahʼahsthe ne Egypt? Kwáh ken kénʼen kahentakeʼkówa ahontaskwahiaténʼa nahiakwénheie? Satʼkátho tsi nasehriʼwakanónhni tsi taskwaʼhiatínekenwe ne Egypt!

¹² Iáh ken tekwahró꞉ri nohénton shonʼtethewahténhni tsi thóh kíʼ nenhiawénhne? Kwáh roʼríne ne tó꞉sa othènnenh takwatsʼtérist tánon toʼnihiotónhak iakwahnáskwa kenhak tsi nokwáh ne Egyptró꞉nons. Sénha ne tsioiánereʼkwe né thóh ahonthaʼhionkhinaskénhnike tsi ní꞉ioht ne kènʼen kahentaʼkeʼkówa ahiakwénheʼie.”

¹³ Ne Mahís waʼthariwasehráko, “Tó꞉sa sehwaʼteronhiénten! Sehwaʼnikonhraʼnirónhak, tánon ensewatʼkátho tsi nenháiere ne Roiá꞉ner tsi entsiʼsewaʼnóns꞉thate nónhwa wenhniseráte; kwáh iáh shé꞉kon nonhwénhton tahonsaʼietʼtsíken ne Egyptró꞉nons.

¹⁴ Ne Roiá꞉ner rahónʼa entsiʼsewateríʼiose, tánon tót kók níkonh thatheʼsewaʼtótat.”

¹⁵ Ne Roiá꞉ner wahawénhaʼse ne Mahís, “Nonhtiéren tsi teshaʼsénthos naʼiesaié꞉naʼwaʼse? Sehró꞉ri nonhkweshón꞉ʼa iehonténhti.

¹⁶ Skétsko ne satenhnitsheroʼtákwa tánon èneken ne kaniatarahʼkekó꞉wa iahás꞉tat. Tenwakʼnekhaʼkháshion, tánon nʼIsraerʼró꞉nons enwáton ne kaniatarahʼkheʼkowahʼne nienhónhʼne enhionhontsatʼthènhake.

¹⁷ Thóh nióre tsi enʼkhenontsisʼtanírahʼte ne Egyptró꞉nons kwáh thóh nienhónhne nahonwatísehʼre, tánon ne tenkathéntsa ne kaʼkweniensʼtátshera tsi enhiʼsènhni ne ronhnonhtí꞉io, ó꞉ni ne rahonkwetashón꞉ʼas ronhterí꞉ios, ó꞉ni ne rahosehreʼshón꞉ʼas ne konhterí꞉ios otsiónkwas, ó꞉ni ne rahonkweʼtashón꞉ʼas ne sakonató꞉res ne koshá꞉tens.

¹⁸ Ne nó꞉nen enkhesènhni, ne Egyptró꞉nons enhoʼnateriéntarahʼne tsi Í꞉i ne Watiá꞉ner.”

¹⁹ Ne rahoronhiaʼkeró꞉non ne Rawenni꞉io, tsi nikáien ne ohénton í꞉rehne ne lsraerʼró꞉nons rahoʼtiʼtiókwah ronhteríios, onàhken nòkwah nionsáre. Tánon ne iotsikero:tatse ontoʼrhiáʼneronh nónhneʼe thóh niaháhe

²⁰ tsi natehóntere ne Egyptró꞉nons tánon ne lsraerʼró꞉nons. Nʼotsáta tahiaʼkoʼkarásten ne Egyptró꞉nons, ók waʼtsakoswaʼthéʼten nènhʼneʼe ne lsraerʼró꞉nons, né káti ne ronhterí꞉ios né tó꞉sa ahónton ne ákta niahónʼne tsi natehón꞉teʼres ne tsi niwasónhtes.

²¹ Ne Mahís iaʼthanénhtsaʼtaʼte é꞉neken ne kaniatarahkheʼkó꞉wa, tánon ne Roiá꞉ner onàhken wahanekenháwiʼte né꞉ne kwáh kawerahshátsʼte ne nákon nonhthakaʼwerénhaʼwe. Ahsonhtaʼkwékon wakʼkáʼweraʼkwe tánon waʼkastháhʼtaʼte ne ohóntsa. Noné꞉kanos tehiotetʼkháshion,

²² tánon ne lsraerʼró꞉nons waʼthatiʼniataríhiaʼke ne kaniatarakhekowahne kwáh ionhontsatʼtenkowa, kwáh onékanos tewasonhthothakwen ne skatisons nokwá꞉ti.

²³ Ne Egyptró꞉nons wahonwaʼtísehre tánon kaniatarahʼkhekowàʼne niaʼsakotiʼhiaténhaʼwe ne rahoʼtitʼtshenenhʼókons kosáhtens, ó꞉ni ne rahotiʼsehresónhas otsiónkwas, ó꞉ni ne kosáhtens konwanahtó꞉res.

²⁴ Kwáh onenhtó꞉wa sahiórenhne ne Roiá꞉ner tsi iotsiro꞉te ó꞉ni tsi iotsikero꞉te ehtàke wásakoken ne Egyptró꞉nons ronhterí꞉ios tánon watesakahonhʼnhaʼríkhon.

²⁵ Wahaʼriwahserónhni né tsi iokaʼkwentónton ne rahoʼtisehreʼsónhas ne otsiónkwas waʼkasehreʼtotárehne, né káti ne kwáh awenhtóʼrehʼke tsi tahonthawénhrie. Né Egyptró꞉nons wahonhníron, “Ne Roiá꞉ner lsraerʼró꞉nons sakoterí꞉iose tsi ahontaʼhionkihiatsaʼtónti. Á꞉nion èhren tsi tèwet ne kénʼen!”

²⁶ Ne Roiá꞉ner wahawénhaʼse ne Mahís, “Iateshaʼnéntʼtshest é꞉neken ne kaniatarahʼkheʼkó꞉wa, tánon nʼonèkanos tentewá꞉keʼte tánon entsiaʼkoró꞉rohʼke ne Egyptró꞉nons ó꞉ni ne rahotiseresónhas otsionkwas ó꞉ni ne sakonahtó꞉ries ne kosáhtens.”

²⁷ Káti ne Mahís iathaʼnénhtiesʼte é꞉neken ne kaniataraʼkheʼkó꞉wa, tánon ne shiʼhioronhʼkeʼné꞉ha nʼonèkanos kwáh thóh nonsaiáwenhne tsi kíʼ niʼtsiotónhne. Ne Egyptró꞉nons wahonteʼniénten nahontèko ne awènhke, ók kí ne Roiá꞉ner kaniatarahʼkheʼkó꞉wa iasakohiaʼtónti.

²⁸ Nʼonèkanos tontònkeʼte tánon taʼkarórohke ne otsiónkwas káseres, ne sakonahtó꞉res ne koshá꞉tens, ó꞉ni ratiʼkwékon ne Egyptró꞉nons ronhterí꞉ios né sakotíseron ne lsarerʼró꞉nons ne kaniatarahʼkheʼkó꞉wa; iáh ne saiáta tsiaʼtesohtaʼténron.

²⁹ Ók ne lsraerʼró꞉nons kwáh nènhʼne thaʼkésons niaʼhónhne iathonhnótʼkaʼwe ne kaniatarahʼkheʼkó꞉wa tánon tsi nihioʼhontsátʼthen, tánon skatíson nʼòkwahti waʼshontoʼtáʼtie nʼonékanos.

³⁰ Né wenhniseráhʼtekwe ne Roiá꞉ner waʼsakonónhsʼtaʼte nʼIsraerʼró꞉nons tsi nʼòkwah ne Egyptró꞉nons, tánon káti ne lsraerʼró꞉nons waʼsakotíken tehatiʼhiaʼtótaron roʼienheiónhseron nʼatsaktónʼtie.

³¹ Nó꞉nen ne lsraerʼró꞉nons sahontʼká꞉tho ne kashatsʼtenseroʼwá꞉nen né Roiá꞉ner rótsʼthon tsi sakoʼsénhnion ne Egyptró꞉nons, kowánen tsi wahonwakwé꞉niensʼthe ne Roiá꞉ner; tánon thonwetákwen ne Roiá꞉ner ó꞉ni ne rahoʼnhátshera Mahís.