Exodus 13 - Ohiatonhseratokénti

Wahonwanahʼtonnahé꞉rahse Ne Toʼnahtierénton-Roʼnahnakeráton

¹ Ne Roiá꞉ner wahawénhaʼse ne Mahís,

² “Ieʼtsihiathonʼnahéras ratikwékon ne thonahtierénton roʼnahnakeráton roʼtiskenrakète nakonhàke, asèken ne toʼnahtierenton roʼnahnakeráton ne roʼtiskenrakète ne lsareró꞉nons ó꞉ni ne toʼnahtierénton roʼnahnakeráton ne ratísinn konhtitshénens Í꞉i aká꞉wenk.”

Ne Katʼkhwaráston Ne Iáh Tewakʼtenkwáton Kanátaro

³ Ne Mahís wasakawénhaʼse nonhkweshón꞉á, “Sewehiá꞉rak kí꞉ken nonhwaʼwenhniserà꞉te—tsi né wenhniserá꞉teʼkwe sehsewaʼhiákenʼne ne Egypt, tsi nónhwe niʼietʼtshiʼnaskhónhnisʼkwe. Né kíʼ wenhniserá꞉teʼkwe ne Roiá꞉ner wàʼrasthe ne rahoʼshatsʼtenseroʼwanáhtshera tsi thontatsiʼsewahiaʼtínekenhwe. Iáh ne iosherhátʼken kanátaro thaʼtahionskáhonʼkwe.

⁴ Èhren tsiʼsehwetàʼne ne Egypt nónwa kén wenhnisehràte né꞉ne tioʼtennhiʼtatsherénton, né wenhnítaʼre tsi nikanoráhris nʼonátsia.

⁵ Ne Roiá꞉ner kwáh iekáien tsi ioriwaʼníron tsi shaʼkorahratsʼténhni ne ietʼtsisotʼthonkonhkénʼen natsíʼtsion ne Canaanites rahoʼnonhóntsa, né saka ne Hitró꞉nons, ó꞉ni ne Amorʼró꞉nons, ó꞉ni ne Hivró꞉nons, tánon ne Jebusites. Nónen thóh nienʼtshihiaténhaʼwe ne iohontsaʼré꞉sen ó꞉ni ne ionhontsíio, ónenk tsi ensewaʼteniʼkonhroʼrí꞉sehʼke nenh kakʼkwárahke nenhteʼwatenhniʼtatiéʼrenhte ne iatehiosehràhke.

⁶ Ne꞉ne tsáta nónhta nikaríwes ónenk tsi né ensewanátaʼraʼke ne iáh tewakʼtenkwáton tánon ne tsaʼthakhàton niʼwenhniseraké꞉haton enkakʼkhwáraʼke nahonwakwé꞉niensʼte ne Roiá꞉ner.

⁷ Né tsáta nónhta nikaríwes iáh tehiówenk nahisewanahtáʼrake né tekaiéston iotʼtenkwátha; kwáh tó꞉sa thènnen ne iotʼtenkwátha tó꞉ka ó꞉ni ne iosheʼrátken kanátaro akaiéntaʼke kwáh tsi niwatenáskwa ne tionhontsàke.

⁸ Nentewatásawen né kákʼkhwáheʼre, ietʼtsiʼnikonhraientá꞉ten ne sewanekenʼteronhtieraʼsónhas né kíʼ tsioríwa thóh nisewahiéra né tsi niʼtsisewatieráhse ne Roiá꞉ner nónen shaʼthontesewahiákenʼne ne Egypt.

⁹ Kíʼ ieskáhes kwáh enhiakawehiarásthen, kwáh tsi ní꞉ioht ne thènnen akawéneʼrenke ne sewaʼnentʼtsàkes tó꞉ka ó꞉ni sewakenkwaràhke; ensewehiaràkwen niaʼhisewakonhtaʼkwénhaʼke nahisewakroʼrísehke ó꞉ni sewatéweiensts ne Roiá꞉ner rahoʼianerénsera, tsioríwa ne Roiá꞉ner né wàratsthe ne rahoʼshatsʼtensheroʼwanátshera tsi thonthatsiʼsewahiatíneʼkenʼwe ne Egypt.

¹⁰ Sewatenikonhroʼríʼsek kí꞉ken kakʼkhwáhere tsi nieʼskáhes ne tioserátʼtsions.

Né Thoʼnatierénton Ronahnakeràton

¹¹ “Ne Roiá꞉ner ienʼtsisewahiaʼténhaʼwe tsi tsiohonʼtsáien ne Canaanites, né꞉ne kwáh tsi nihoriwaniráhton tsi nitsisehwarahrátsʼtenhni ní꞉se ó꞉ni ne ietʼtsisotʼthonkonhkénʼen. Nónen enthetsítion,

¹² ónenk tsi entsítion ne Roiá꞉ner nenthontiérenthe enhonnahkeráhthe ne rotsiʼskenrahkète. Rahtiʼkwékon nenthontiérenthe nenhonʼnáhkerathe ne rahtítsinn kaʼtshénens Roiá꞉ner nènhʼne rahoʼtshenenhókonhs,

¹³ ók ónenk kí tsi entsiʼtsisehʼwaʼnaskwahʼnínon nenhthontiéʼrenthe enhonhnakeráhte ne tewahóntes tsi né ensewátate ne teiotinahkaronhtónʼa owíra nahonʼnakʼtàke. Tó꞉ka iáh tèsewere nahonshaʼtsisewanasʼkwahní꞉non ne tewaʼhóntes, tetshieniá꞉rak. Ónenk tsi entsiʼsehwaníhnon nenhthontiérenʼthe enhonhnákeraʼte ne roʼtiskenrahkèthe níse sewakʼsàtha.

¹⁴ Né tsi niaʼhawenonhátie, nónen ne ehtsiénha enhariwaʼnónhton nahó꞉ten kèntons kí꞉ken wenhtaʼnóron, tsi tentseriwaʼseráhkwahʼse, ‘Né tsi rósthon ne kashatsʼtenseroʼwánen ne Roiá꞉ner tsi thon thashonʼkwahiaʼtíneʼkenhʼwe ne Egypt, tsi nónhwe niʼtewanáskwahʼkwe.

¹⁵ Nónen ne ronhnonhtí꞉io ne Egypt shiʼhotenonhtsisʼtaniráhtonkwe tánon roʼraiatákwen nashonʼkwátʼkaʼwe, ne Roiá꞉ner wahshaʼkononhwarhiaʼkónhnion ne thoʼnatiérenton roʼnahnakeráhton ne roʼtiskenrahkéthe ne tsi wathonwénhtsaien ne Egypt, thaʼtetsarónhkwen ne ónhkwe ó꞉ni ne kaʼtshénen. Né kíʼ aoríwa tsitewaʼteskonhtánis ne Roiá꞉ner nenhtewatiérenthe enʼrenhnáhkeraʼte ne kaʼtshénen rátsinn, ók kíʼ tsi tewaʼníhnons nenhtonhtiérenthe enhonhnákerathe ne ietʼthihiohoʼkónhas.

¹⁶ Kí꞉ken wenhtanóron né entsionkwehiaʼráhkwen, tsi ní꞉ioht ne thènen ahʼkawánerenhke ne tewaʼtsanàhkes tó꞉ka ó꞉ni ne tewaʼkenkwahráhkes; né entionhkwehiaʼráhkwen ne Roiá꞉ner tsi tetheshonʼkwahiaʼtinekènhʼen ne Egypt né rósthon ne kowá꞉nen rahoshatsʼténsera.’”

Né Iotsikeró꞉te Tánon Ne Iotsiró꞉te

¹⁷ Nónen ne ronhnonhtí꞉io ne Egypt saʼsakótʼkaʼwe nonhkweshón꞉ʼa, Ne Rawenni꞉io iáh ne tehoʼnatʼthahíten ne ioʼhatátie ne tsitʼkawèʼnoʼthe ne Philistia nieʼiawénon, ethosàne né nihiohahé꞉sa. Ne Rawenni꞉io wárehre, “Iáh thaʼtewakatonwenhtsóni nonhkweshón꞉ʼa tahonsahoʼnahteriwaténien tánon Egypt niaʼhonsaʼhónʼne nónen enhontkátho tsi ónenk tsi enhonteríio.”

¹⁸ Khèkok, iasaʼkosá꞉rihne wá꞉honkwahtase ne wahonthá꞉hitha ne kahentakekówa nieʼiawénon né꞉ne Red Sea nieʼiawénon. Ne lsraerʼró꞉nons roʼnahthaʼteweienhʼnentáʼhon nahonterí꞉io.

¹⁹ Ne Mahís iahá꞉haʼwe ne Só꞉se rahoʼstsienʼsónhas, tsi kíʼ nisaʼkahonhniénhni ne Só꞉se ne lsraerʼrónons kwáh ioriwaníron tsi roʼnahraráston tsi thóh nenhatí꞉ieʼre. Rawen ne Só꞉se, “Nó꞉nen ne Rawenni꞉io entsiʼtshesewaʼniákenthe, ónenk tsi èhren ientsiʼsewahá꞉we naʼstsienʼsónhas èhren sewaháwit né ken nónhwe niwaʼtenáhtaien.”

²⁰ Ne lsraerʼrónons Sukkoth tahonténhni tánon Etham nónhwe iahonthatoʼsehróhten né꞉ne tsi iehiotʼthenʼtate ne kahentaʼkeʼkó꞉wa.

²¹ Ne tsi niwenhníseres ne Roiá꞉ner rahoʼtihénton niaʼhá꞉re tsi iotsikeró꞉te nasakonahʼtónʼhaʼse tsi niehiotʼthahínon, tánon ne tsi niwaʼsónhtes rahoʼtihénton niaʼhá꞉re tsi iotsiró꞉te né taʼsakoswatʼthèten, né káti nahónton ne nahsonhtʼthènnen ó꞉ni nenhtiéʼkehne tahontháhaʼkwe.

²² Ne tsi iotsikeró꞉te kwáh tsiókonhthe tsi rahotiʼhénton nonhkweshón꞉ʼas í꞉wesʼkwe ne tsi niwenhnísehres, tánon nʼiotsíroʼte tsi né niwashón꞉tes í꞉wesʼkwe.