Exodus 12 - Ohiatonhseratokénti

Ne Watoʼhetstákwa

¹ Ne Roiá꞉ner wasakothá꞉raʼse ne Mahís ó꞉ni ne Aaron ne Egypt nónwe:

² “Ne kí꞉ken wenhnítare nentewatiérente nʼosehra ne seniriwáhke.

³ Kanakerasehraʼkwékon ne lsraeró꞉nonhke taietʼtsíhion kí꞉ken karihonhnienʼnhí꞉tsheras: Né oieríhaton senskárake ne kíʼ wenhnítaʼre tionkwetáʼtshions ónenk tsi enhontateráhkwahʼse kakʼnikáien teiotinakaronhtónʼa owíra khés ne kahiatákeras nithohiónha ne roʼnónha rahoʼtiriwáhke.

⁴ Tó꞉ka ne rahoʼwátsire sótsi kenhnihatí꞉ha ne kahiaʼtakwékon ne katʼtshénen ahónhnheke, né꞉ne tehiaʼnonhsanéken enwáhton ne taʼhónthonte ne katʼtshénen, tenhkahiáʼkhonʼkhe tsi nihiákon tánon toʼníkon ne tieiáta enhieʼkwé꞉ni nàhieke.

⁵ Enwáthon nashaʼtateráhkwaʼse kák nikáien teiotiʼnakarontónʼa khés ne kaiatákeras, ók ónenk kíʼ tsi ènska tenhahoʼserihiákon ne ráhtsinn né꞉ne kwáh iáh othènnen tehohiatáwenhs.

⁶ Ethòne, nʼokarasʼné꞉ha ne kaiéri—iawénhre nenwenhniseraʼkéhaton tsi niwenhní꞉tare, kwáh kanakeraserakwékon ne lsraeró꞉nonhke tsi enhonwanawènhtʼtho ne kontiʼtshénens.

⁷ Nonhkweshón꞉ʼas ienhiéhaʼwe kenhníkon noneʼkwénsa tánon tsi tehioshoʼtátie ne tsi kanonhkáronte tánon ne é꞉neken tsi iononhkáronte tsi kanónhsohʼte né꞉ne tsi nónhwe nenhatiwá꞉rahke.

⁸ Nètho nʼokarasné꞉ha nowá꞉ron ó꞉nenk tsi enwaʼteskónhthake, tánon tsi enhónʼnheke né tenkaiéstonke ne otskárát ohonteʼsónha tánon ne waʼtenataʼrónhni né iáh thatekaiéston ne iontʼthenkwátha.

⁹ Tó꞉sa thènnen ísewak ne okàhthe íken tó꞉ka ó꞉ni ne tekaʼnekonhtiéton, ók ne isewák naʼkwékon wateskónhte, tsewaʼkwékon nonónhtsi, oshí꞉nas, tánon ne kaiátakons.

¹⁰ Tánon ónenk tsi akwékon énsewake tsi nióre noronhkène; tó꞉ka thènnen ahiotátere, ónenk tsi enwaktsaʼahtónhaʼke.

¹¹ Ónenk tsi iostó꞉re tsi ní꞉ioht tsi énsewá꞉ke, asèken ónenk tsi ensewaʼtseronhníhake tsi ahisewaʼtaʼteweienhnentáʼohnke ne tahisewatʼtháhakwe, tensehwatárionhke tánon sehwatennhitsherenháwak. Né꞉ne iotoʼhetstákwen Kakʼkhwáhere né naskwakwéʼniensthe, ne Watiá꞉ner.

¹² “Nètho enhiokaratserátheʼke kwáh iatenkatonhontsohétsthe ne Egypt, khenonhwarhiakonhátie ne tohʼnatierénton roʼnahnakeráton ne roʼtiskenràkete, tetsarónhkwen ne ónhkwe ó꞉ni ne katʼtshénen, tánon kherewahtonátie ratikwékon ne Egyptró꞉nons raotiʼníios. Í꞉i ne Watiá꞉ner.

¹³ Nonekwénhsa né tsi tehiosohtátie tsi iononhkáronhte kwáh né enkaieronhtsitsʼtákwen ne kanónsohthe tsi nónhwe nisehwénhteron. Nó꞉nen enkatkátho nonekwénhsa, Éneken nenkatoʼhétsthe tsi nónhwe nisewénhteron tánon iáh takwakaréwahthe nónen enhʼkheréwahthe ne Egyptró꞉nons.

¹⁴ Ónenk tsi ensewatenikonhró꞉ri kí꞉ken wenhniseráthe né꞉ne kariwiʼiostóntshera tsi ní꞉ioht tsi ahisewakʼkwáhren nakwehiaráhkwen tsi nahó꞉ten Í꞉i, ne Watiá꞉ner, tsi nakátiere. Iatehioseráhke tsi sewakʼkwahérak.”

Ne Kakhwáhere Ne Iáh Tewakʼtenkwáton Kanátaro

¹⁵ Ne Roiá꞉ner wahénron, “Asèken tsáta nikaríwes tó꞉sa othènnen senátarak ne iontʼtenkwátha tekaiéston tsi kanaʼtarónhni—nék khók senátarak ne iáh thaʼtekaiéston ne ionhtʼtenkwátha. Nʼentewaʼtenhniserahʼtiérenhthe akwékon íseh iasehwáti ne ionhttenkwátha ne sewanonskónhʼsons, asèken tó꞉ka ónhka enhieʼnataràke ne ionhtʼtenkwátha tekaiéston ne tsáta nónhta nikaríwes, né kí enhoʼtenatónkwen iáh Í꞉i tesewakonhkwéta tèsken.

¹⁶ Nʼentewaʼtennihseraʼtiérente tánon ó꞉ni shé꞉kon ne tsaʼthákaton nenwenhniserakéhaton sewaniʼtiokwaró꞉rok nahisewaterénhnaien. Kwáh iáh thá꞉hoten takahioténʼen né wenhniserátes, ók enwáton kíʼ nènhʼne nahisewaʼkhónni.

¹⁷ Sewakwéniens kíʼ wenhtanóron, tsioríwa tsi né wenhniseráte tethekhehiatinekénʼen ne sewentiókwas ne Egypt nónwe. Asèken tiokónthe tsi nienskáheʼwe ónenk tsi sahsewenhtanórons kí꞉ken wenhniseráʼte tsi saʼsewakʼkwáren.

¹⁸ Né okarasnéha ne kaiéri-iawénre niʼwenhniseraʼké꞉haton ne tiotierénton wenhnítaʼre tsi nióre ne tewásen—énska niwenhniserakéhaton, kwáh tó꞉sa othènnen sewanáʼtarak ne iontʼtenkwátha tekaiéston tsi kanatarónhni.

^19-20 Asèken tsáta nónhta nikaríwes kwáh tó꞉sa othènen akakʼtsiénhron ne iontʼtenkwátha ne sewanonskónhʼsons, asèken tó꞉ka ónhkaʼk, né ienakerehónwe tó꞉ka ó꞉ni tihiakahontsáʼte, enhienátarahke ne iontʼtenkwátha tekaiéston, né kí enhatenáhtonkwe iáh Í꞉i tesewahkonhkwé꞉ta.”

Né Tsiotiérenton Watoʼhetstákwa

²¹ Ne Mahís iasakónonhke ratiʼkwékon ne sakotihenʼtènse ne lsraeró꞉nonke tánon wasakawénhaʼse, “Tsi sewahiaʼtátshions ónenk tsi ensewaʼthateráhkwaʼse kák nikáien teiotinakarontónʼa owíra khés ne kahiatákeras nithoʼiónha tánon ietʼtsihiawenhtʼto, ne káti nahónton ne sewaʼwátsiʼres thahontenonweráhton ne iotoʼhetstákwen.

²² Iaʼteséwak kén nihʼiowiréhs꞉sa ne iotʼwirahtó꞉hon, tánon katʼtshétakon ne ienekaráhkwa iahátsof né íkare ne kaʼtshénen aonekwénhsa, tánon ne sewaneʼkwensohkéwatʼ ne tsi tehioshátare tsi kanonkáronhte tánon ne tekaronhtaʼronhwáhkwen ne é꞉neken tsi kanonkáronhte tsi sanónsohthe. Iáh né saiáta tsi nítsion thaʼisewahiá꞉kenʼne ne kanónskon tsi nióre ienhiórenhne.

²³ Nó꞉nen ne Roiá꞉ner enható꞉hetsʼte ne Egypt nasakononhwarhiákon ne Egyptró꞉nons, kwáh enhakʼkátho ne tsi tehiosáthare tánon iáh thahoʼríhon ne Raronhiakeró꞉non ne kenhéiat niaʼhatá꞉wehiaʼte sewanónskon tánon naʼtsisewanonhwaʼrhiákon.

²⁴ Í꞉se tánon ne ietʼtsiʼienʼokónhas ó꞉nenk tsi ensewaʼtewénhnaraʼkwe kí꞉ken kaianerénseras tsi nénhwe.

²⁵ Nónen ienʼtsionhontsórenhne nètho Roiá꞉ner roʼrahrátston natsíʼtsion, ónenk tsi ètho nenhsewáieʼre noriwakáion.

²⁶ Nó꞉nen ne ietʼtsiʼienʼokónha enietʼtsiriwanón꞉tonse, ‘Nahó꞉ten kéntons kí꞉ken oriwakáion?’

²⁷ tenietʼtsiriwaʼserákwaʼse, ‘Né꞉ne kariwiʼiosehʼokónhas ne iotoʼhetstákwen nahonwakwé꞉niensʼthe ne Roiá꞉ner, tsioríwa tsi é꞉neken nahatóhetsthe tsi roʼtinonhsóhtons ne lsraeró꞉nonhs ne Egypt nónwe. Washaʼkoʼnonhwarhiakónhnion ne Egyptró꞉nons, ók ní꞉i washonkwaʼnónstaʼte.’” Ne lsraeró꞉nons waʼthontentʼtshóten tánon wahonterénhnaien.

²⁸ Ethòne thóh niaháʼne tánon ne wahiateriwahténʼtsiate tsi nahó꞉ten ne Roiá꞉ner sakorí꞉honʼte ne Mahís tánon ne Aaron.

Tsi Wahonní꞉heie Ne Tiotierénhton Ronahnakeráhton Ne Roʼtiskenrakète

²⁹ Shiʼwasónʼthen ne Roiá꞉ner waʼsakoʼnonhwaʼrhiákon ratikwékon ne thoʼtihénton roʼnahnakeráton roʼtiskenrakèʼte ne Egypt nónwe, ne tahahénte né꞉ne ronhnonhtí꞉io roʼiénha, né꞉ne rahónʼa ahonsahoʼtenontiʼhióston, ó꞉ni ne rahnóton roiénha nʼoshònhwakon iehaʼhiá꞉ti; kontiʼkwékon ó꞉ni ne thoʼtihenton roʼnahnakeráton ne kaʼtshénens kwáh nónhne wahonwanaʼwénʼtho.

³⁰ Né wahʼshonhtháteʼkwe, ne ronhnonhtí꞉io ó꞉ni ne rahonkwetashón꞉ʼas, ó꞉ni ne roʼnáhtsiakes ne Egyptró꞉nons waʼhonwatíʼhiete. Kwáh íken tsi onhtsaró꞉ko kwáh tsi nonwéshon ne Egypt, tsioríwa tsi iáh ne skanónsa ónhka iakowiraiéntaʼkwe ne raksáʼa ne iáh tahaʼwenhéionhke.

³¹ Kwáh né sahoʼkharátshera ne ronhnonhtí꞉io iaʼsakónonhke ne Mahís ó꞉ni ne Aaron tanon wahénron, “Sehniʼhiáken, í꞉se ó꞉ni ne tionkwetaʼshón꞉ʼa lsraeró꞉nons! Éren í꞉sehwet naʼkenakerahse꞉rákon; wáhs tsi sewahsénhnaien ne Roiá꞉ner, tsi niʼsehwariʼwanóntons.

³² Iaheʼtshiʼiaténhaf ne sewatsheʼnenhó꞉kons teiotinakaronhtónʼa, kahiatákeras, ó꞉ni ne tionhnónskwahrons, tánon sehwaténti. Káti ó꞉ni sehwaterénhnaien nahontsiathatéristhe ní꞉i.”

³³ Né Egyptró꞉nons waʼsakotiretsiáron nonhkweshón꞉ʼa ne tahoʼtisteríhen tánon é꞉ren rónhnet tsi kanakerasehrá꞉ien; waʼhonhníron, “Iakwahkwékon enhiaʼkwénheʼie tó꞉ka iáh é꞉ren tahisehwétaʼne.”

³⁴ Sók káti nonhkweshón꞉a thontahatirahthe né ronhtenaʼtharonhtákwas ne iosheʼrhátken, atserónhniat waʼthatiwàʼnhaʼke, tánon wahonʼnensàren tsi iahaʼtíhaʼwe.

³⁵ Né lsraeró꞉nons thóh nahatíhiere tsi nasakoró꞉ri ne Mahís, tánon wahonwatiʼriwaʼnóntonhse ne Egyptró꞉nons ne owistanórons ó꞉ni ne kawistharákes owistanoronʼshónhas ó꞉ni nʼaʼtsherónhniat.

³⁶ Ne Roiá꞉ner waʼsakahónhnien ne Egyptró꞉nons nahonwaʼtikwéʼnienste nonkweshón꞉ʼa tánon thonwénhnon tsi nenhaʼtiriwanónhton. Thóh kíʼ ní꞉ioht ne lsraeró꞉nons tsi iahaʼtíhaʼwe ne Egyptró꞉nons rahoʼnaʼtshoʼkowáʼtsheras.

NʼÍsraeró꞉nons é꞉ren Wahónʼnhete Ne Egypt

³⁷ NʼÍsraeró꞉nons Rameses nónwe tahonténti takéshon niahónʼne né꞉ne Sukkoth iathonʼnhóhiaʼke. Né꞉ne kák nónhwe ne 600,000 niháti roʼnónhkwe, iáh tekonwanahséhton ne konhnónhkwe ó꞉ni ne ratiʼksaʼokónhas.

³⁸ Shé꞉kon kanenroʼwáhnen òtsiakes nonhkweshón꞉ʼas ó꞉ni teiotinakaronton꞉ʼa, kahiatákeras, ó꞉ni tionhnónskwahrons skátke rónhne.

³⁹ Wahonʼtenahtarónten ne iáh tewatʼthenkwáhton ne iosheʼrhátken né thotíha ne Egypt, asèken sóhtsi thontaʼiahwénhsʼtsi tahonwanahtékwahte ne Egypt iáh tehotinakʼtoʼtáhʼon nahoʼtikwahʼtákwenh ne rahoʼtítkhwa tó꞉ka ó꞉ni nahotiʼkwahtáʼkwenhke nahonaʼtesherhatʼkéntonke.

⁴⁰ Né lsraeró꞉nons 430 nihiosehràke nikaríwes Egypt nónwe nihatináhkereʼkwe.

⁴¹ Né shiʼwenhnisehráteʼkwe ne 430 niʼiosehràke shiaʼhontókten, rahtiʼtarahkwékon ne Roiá꞉ner rahonkwetashón꞉ʼa é꞉ren wahón꞉nethe ne Egypt.

⁴² Né iokarahtsheráteʼkwe nó꞉nen ne Roiá꞉ner wahaʼtenhnikonhráren tsi ahontasakohiaʼtínekenʼwe ne Egypt; tánon kwáh tsiókonte né꞉ne sahoʼkaráhtshera ne niaʼtehioseràke tsi nienskáheʼwe tsi enhonwatonʼnhahéraʼse ne Roiá꞉ner nó꞉nen ne lsraeró꞉nons ó꞉nenk tsi enhontenhnikonhráhren nètho wahsonhtàte.

Tsi Nikaianerenhseró꞉ten Ne Watoʼhetstákwa

⁴³ Ne Roiá꞉ner washaʼkawénhaʼse ne Mahís ó꞉ni ne Aaron, “Ne kí꞉ken ne watoʼhetstákwa ahoianerénseras: Iáh ónhka ne thihiaʼkahontsàte thatahionskáʼhon ne watoʼhetstákwa kákhwa,

⁴⁴ ók ónhka ne rahnhátshera ne tsi sehwahiaʼtaʼnínon enwáton ne tahaʼtskáhon tó꞉ka ohénton enteʼtsisewaʼwarahkwétaron.

⁴⁵ Iáh ónhka ne kènk nikariwés꞉sa thóh rahnákere tó꞉ka ó꞉ni ne roʼtenahtserónhni thóh thaʼtahatsʼkáhon.

⁴⁶ Kwáh ónenk tsi akwékon ne kákhwa enhónʼneke thóh tsi nónhwe niʼkanonsohthe nikáʼkónhni; iáh thaʼhónhton ne áhste niahiéhaʼwe. Tánon tó꞉sa tesehwasʼtsiénʼtsiak ne konhtiʼtshéʼnens ahoʼtsistsiensónhas.

⁴⁷ Kwáh onhkweʼtakwékon ne ienáhkere ne lsraeró꞉nonhke ónenk tsi enhiontenikonhró꞉ri kí꞉ken kaʼkhwáhere,

⁴⁸ ók iáh kíʼ ónhka ne iáh tehonwahʼwarahkwé꞉taron thahónton ne tahatsʼkáhon. Tó꞉ka ne thihaʼhontsàte skátke sewanáhkere tánon íhrehʼre ne ahateniʼkonhró꞉ri ne watoʼhetstákwa nahokwéʼniensʼte ne Roiá꞉ner, ó꞉nenk tsi né entisehwatiérenʼte ratikwékon enietʼtsiʼwarahkwétaron ne roʼtiskenrahkète ne rahonónskon ratíteron. Ethòne kíʼ kwáh ètho nenhahiatoʼténhake tsi kíʼ shí꞉ken ní꞉ioht ne kwáh thóh roʼnahkeráton nʼIsraeró꞉nonʼke ó꞉nenh kíʼ enwáhton nahaʼtsiátheren tsi kaʼkhwáhere.

⁴⁹ Kwáh né sahoʼtihʼianerénsheras ne thoʼnatierénton roʼnahnakeráhton ne lsraeró꞉nonhke ó꞉ni ne tihoʼnonhontsàtes tsi niháti ne skátke sewanáhkeʼre.”

⁵⁰ Ratikwékon ne lsraeró꞉nons wahontewénhnarahʼkwe ó꞉ni thóh nahaʼtí꞉iere tsi nahó꞉ten ne Roiá꞉ner sakorihónte ne Mahís ó꞉ni ne Aaron.

⁵¹ Thóh wenhniseráteʼkwe ne Roiá꞉ner thasakohiaʼtí꞉nekenʼwe ne lsraeró꞉nons rahoʼtiʼtiókwas ne Egypt nónwe.