Exodus 1 - Ohiatonhseratokénti

Ne Israerʼró꞉nons Wahonwanateniaʼkátsʼtase Ne Egypt Nón꞉we

¹ Né raoʼnekenteronʼtsherashóna ne Jacob né skátʼke niehonénon ne Egypt nónhwe, né sahtiwahtsirátʼtsions, né꞉ne

² Reuben, Simeon, Levi, Judah,

³ Issachar, Zebulun, Benjamin,

⁴ Dan, Naphtali, Gad, tánon Asher.

⁵ Né tkhakwékton tsi niháti kí꞉ken onhkweshón꞉aʼs né꞉ne kwáh Jacob nónhwe nithonatwatsirínon tsáta niwáhsen nihatiʼhiatásen. Ne roʼiénha Só꞉se ó꞉nenk nènhneʼe Egypt nónhwe iéhres.

⁶ Tsi niakáhewe ne Só꞉se, ne ronhtatekenʼhokónhas, tánon ne thóh kawátsire wahonhníheie,

⁷ ók ne sakonahterehokónhas, né꞉ne lsraeró꞉nonhs, wéso wahotiʼwirahʼientàsehron tánon tsi nahonahtsiokowàhna tánon wahatiʼtsiokwahnírahne né Egypt nónhwe kwáh ronònhak khók thitahtírahkwe.

⁸ Ethòne, Ononhtiiosehràse, kwáh iáh othé꞉nen tehoientérihkwe ne Só꞉se.

⁹ Washakawénhase ne rahonkwetashón꞉ʼa, “Kí꞉ken lsraeró꞉nonhs tsi nihonahʼtsiokowáhnen tánon rotiʼtsiokwahníron iótʼteron nonhkwahriwàhke.

¹⁰ Tó꞉ka enwaʼteriʼiosehrakétsko nonhtiérek né enthontènhroʼwe ne thetewahtátʼtsions ne nahonaʼtesenhnaʼién꞉tanʼe ahitewahtherí꞉io, tánon nonhtiérenk enshatiʼniáʼkenhne nonhkwaʼnakerahʼsehrákon. Ónenk tsi knahótenk entewaʼteniʼkonhrónhni onhnaiáwenhne ne tó꞉sa sénha ahonahtiokowáhna.”

¹¹ Káti ne Egyptró꞉nons né꞉ne ratiʼniakátstes waʼhonwaʼtiriʼhónten ne tashakoʼtishatsʼtenserhiàʼke Né꞉ne iohiotensehrahníron tsi ashaʼkotiʼiótensthe. Ne lsraeró꞉nonhs wahatiʼnahtonhniánion né꞉ne Pithom ó꞉ni ne Rameses né꞉ne tsi nónhwe nenhateweienthónsehke tsi nahoténsons tahothonwenhtsóniʼke ne Ronhnonhtí꞉io.

¹² Ók né sénha ne Egyptró꞉nons enhonwatiʼronhiákenhte ne lsraeró꞉nonhs, sénha kíʼ wahonahtsiokowáhnah tánon sénha tenhonwanahréniaʼte ne tsi ionhwénhtsaien. Ne Egyptró꞉nons wahonwatiʼtshá꞉nihke ne lsraeró꞉nonhs

^13-14 tánon wahonwanonhnáksate tsi tahonwaʼnahnónhtonʼse wahonwanahteniákatsʼtatse tsi wahonwatinaskónhni. Wahonwenhnónhnien nahotihióten nahoténsons kahiotenseráhien ne tsi rotinonhsóhtons tsi ní꞉iot ne tahatisténrote, ó꞉ni ne raotihentàkes, tánon iáh othé꞉nen tekàien ne tahonwanahró꞉ton.

¹⁵ Ethòne ne Ronhnonhtíio ne Egypt waʼthatiʼtháren ne Shiphrah ó꞉ni ne Puah, né꞉ne tetiátsnie nenhiaʼkotiʼsnié꞉non ne Hebrew tsionatʼthonwísen nó꞉nen enhiotiʼwiraʼhiéntahne.

¹⁶ “Nó꞉nen enʼietshiʼsniénon ne Hebrew tsionatʼthonwísen naʼiotiwiraiénʼtane,” wasakoró꞉ri, “Ietsiʼnonhwarhiákon nʼowirá꞉ʼa tó꞉ka roʼskenrahkèhte; ók tó꞉ka tsiakokʼthonwísen, iakónhnhek nènhneʼe.”

¹⁷ Ók ne tsiaʼtsniénionhskwe Rawenni꞉io ronhwatʼtsánisʼkwe tánon káti iáh tehonwaʼwenhnaráhkwen ne Ronhnonhtí꞉io; khè꞉kok, wahonwatiʼríhon ne rahtiksaʼhokónhas nahoʼnónhnheke.

¹⁸ Káti ne Ronhnonhtí꞉io iaʼshakónonhke ne tsiatsniénons tánon wahsakoriwahnónhtonhse, “Ónh niʼhiotiéren tsi kíʼ ètho nisehniierenhátie? Ónh ní꞉hiotiéren tsi ietʼtsiriwáhwis ne ratiksaʼhokónhas nahonónhnheke?”

¹⁹ Watʼkeniriwahseráhko, “Ne Hebrew tsionatʼthonwísen iáh ètho tekonhnonhnhótens tsi ní꞉ioht ne Egyptró꞉nons konhnónhkwe; wahtiésenh naʼiotiwiraiénhtaʼne, tánon naʼhotiwirahʼsónhas enhonhnákerahte nohénton nónhkak ne tehiaʼkenihiá꞉se ne thóh iahiá꞉keneʼwe.”

^20-21 Tsoríwa ne tsiaʼtsniénonhs tsi Rawenni꞉io ronhwatʼtsànis, ne Rawenni꞉io kwáh íken tsi iohiá꞉nere tsi ní꞉ioht tsi tesakoriwasnieséhakwe nonónha tánon sakowahtsironhniénhni nònhne nonónha. Tánon kíʼ ne lsraeró꞉nonhs iahatiʼkónhtakwe wahonaʼtsiokowáhna tánon kwáh íken tsi wahatiʼshátstenhne.

²² Kharekiʼónenne ne Ronhnonhtí꞉io wasahkoʼianerenhserónhnien ratiʼkwékon ne rahonkwetashón꞉ʼa: “Iahetsihiaʼténhaf ratiʼkwékon nónhwak roʼnahnakeráhton ne Hebrew roʼtiskenrahkéthe tánon kaniataràhke ne Nile iahetsihiaʼtón꞉ti, ók konhtiʼkwé꞉konh ne tsionatʼthonwísenh konhtiksaʼhokónhas konònhnhek nènhneʼe.”