Ephesians 5 - Ohiatonhseratokénti

Kaskwatʼthetserákon Nón Naiakonnhétie

¹ Tsi í꞉se neh kwáh Rawenni꞉io rahoksáta íken, ónenk tsi kwáh ensateniénten nahonsatiérenke.

² Tsi sónnhe ónenk tsi kanoronkwátshera entioniarótarohke, kwáh tsi nisonkwanoronkwáʼon ne Kerístos ó꞉ni tesonkwáwi tsi rónnhe tsi síken ní꞉ioht ne kwáh tehiotsikhétare tsi niwenserákon tánon ó꞉ni tahionréniaʼte tsi nitánonwes ne Rawenni꞉io.

³ Tsi Rawenni꞉io níse rahonkwéta sewatenathónkwen, iáh tetkariwaiéri ne thènen ne kanakwaiesátseras ó꞉ni ne iáh tehiotkwéniens tóhkaʼ ó꞉ni ne askenátsera akatarákwen tsi natesewátere.

⁴ Iáh ó꞉ni tetsiaténro naíhsewatsʼte natehénsera ahowenʼnasónhas, naihsewariwaiésahte, ahisewaianeraksénhake. Khèkenk tehiothonhontióʼon tatsisewanonweráton ne Rawenni꞉io.

⁵ Kwáh oriwihioʼónwe tsi ahisewateriéntaraʼke kwáh iáh ónka ne iotenakwaiesátha, iáh tehiakokʼkwéniens, tóhkaʼ ó꞉ni iakotétʼtsen (né꞉ne satetiotʼte ne kahiatón꞉ni akonwashén꞉naien) tahiakonakʼtaiéntake ne rahothinakeraserákon ne Kerístos ó꞉ni ne Rawenni꞉io.

⁶ Tóhsa ónka seríhon naiesanikonráten nehne áhonste ne tehiotenonwaroríthonte owenʼnasónhas; Asèken neh nikawenʼnoténsons neh enhothíraʼne ne Rawenni꞉io rahonahkwátsera tsi niháti ne iáh tehonwahwenʼnarákwa.

⁷ Kwáh káti tóhsa thènen tesewateriwasónteren neh nihionkweʼtótens.

⁸ Í꞉se ó꞉ni tionháke tethisewakáraskwe, nók tsi náhe Roiá꞉ner rahonkwétha sewatónʼon, kaswatʼthetserákon nónwe nísewes. Kwáh káti sewateriwaiénʼni thóh nahitionʼnoténhake nahisewéneste tsi tesewaswatʼthéʼon,

⁹ Asèken kaswatʼthétsera seh tkáhas neh kwáh tsitʼnahoténsons ne iotkwénies, nehne ó꞉ni kariwakwarishióntsera, tánon noriwihioʼónwe.

¹⁰ Sateniénten ne sahióten nahonthatsenikonraiérite ne Roiá꞉ner.

¹¹ Kwáh tóhsa thènen sateriwaténtiat nononwenserasónhas, tsi neh nihontiéras nakorénsons, neh rohthihiótens ne tetiókaras aoriwasónhas. Khék tsi tehioswátʼte nónwe nontasehiaʼténhaf. (

¹² Kwáh íken tsi sóhtsi iotehatʼkówa nehne aiethárakwe tsi nihontiéra nónen iáh ónka tatehonwathikánere.)

¹³ Nók kíʼ nónen noriwakwékon tsi tehioswátʼte nónwe nitkáha, ehʼthóhʼne káti neh kwáh tsi nihonnonʼkwethóten tsi enkarihotháshion;

¹⁴ Tsi nahóten neh kwáh íken tsi karihothásion thóʼnek enwáton ne tahioswátʼthene. Tehioswátʼte seh ne kwáh oriwakwékon tshewenéstʼtha. Neh aoríwa tsi nihónen, “Sewáhie, tahrótaros, tánon thontahsewatʼkétsko ne kenheiátʼne, tánon Kerístos tentsiʼsewaswatʼthéten.”

¹⁵ Káti sewathatenikónrahrak tsi ní꞉ioht tsi entiónnheke. Tóhsa thóh natsionnoténhak tsi ní꞉ioht ne tiakothónʼnokte, nók thóh nationnoténhak tsi ní꞉ioht ne rontʼthókas.

¹⁶ Kwáh ioʼianeréhak tsi ísewats natesénʼna tsi nensewaiéntaʼne, Asèken kíʼ nónwa wenʼniserathénions kwáh kariwáhneren.

¹⁷ Tóhsa tasewathonʼnókʼtat, nók satheniénten naseriwatʼtsénri nahóten tehonthohontió꞉ni ne Roiá꞉ner ahisahióten.

¹⁸ Tóhsa sanonwaráthont tsi nasnekíra notsítsia, kwáh nènʼne nek khók nensakarón꞉ni; khék, neh tiatanahnónhak ne kanikonrí꞉io.

¹⁹ Nónen skátne ensewáton tesewariwakwánion, karennasónhas, orennathokéntis; tetsiʼsewariwáhkwas norennahʼthokentiʼokónhas ne Roiá꞉ner, kwáh seweriasaʼkwékon tsi sewathonʼnáhrak.

²⁰ Thoʼraosénnakon ne Roiá꞉ner Ié꞉sos Kerístos, kwáh tiotʼkonʼónwe tsík nahoténsons tsi tetsisewanonwerathónsek ne Rawenni꞉io tsi rahónha ne Kaníhsera.

Ne Rontatʼrohnahasón꞉a

²¹ Tiaʼtateweiennentaónhak ne taihtiatatʼtewennhnarakwahke, ne tsi Kerístos tsi sehnisénʼnaiens.

²² Ne tsiʼsewatʼthonwísens ne sewaniákʼkons, ietsiwenhnarakwak ne tesewénterons tsi ní꞉ioht tsi entsisewakwenhnarakwah ne Roiá꞉ner.

²³ Asèken ne roniákon rahónha rahiatakweʼní꞉io tsi nòkwa ne róʼne kwáh kíʼ tsi ní꞉ioht ne Kerístos rahónha rahiatakweʼní꞉io tsi nòkwa nononsatokénti; tánon ne Kerístos rahonhatsíwa roniakénton nononsatokénti, nehne rahiéronke.

²⁴ Ne káti ne iothiniákons ónenk tsi kwáh thokénʼen enhonwathikweʼniénstake ne tehathíteron kwáh tsi ní꞉ioht ne ononsatokénti tsi nihiotatatkáwen rahonháke ne Kerístos.

²⁵ Ne sewaskenrakéte ne sewaniátkons ietʼtsinorónkwak ne tesewénterons, thóh nahiotónhake, kwá tsi nihanoronkwáʼon nononsatokénti ne Kerístos, ó꞉ni tháwih tsi rónʼnhe.

²⁶ Ne aoríwa thóh nihoiéren nehne ahononsathokentísten ne Rawenni꞉io ne tsi nihiosatsʼténsera ne rahowénʼna, tánon kwáh ahóskon sarón꞉ni ne tsi onékanos wahanohárethe,

²⁷ Ne nahónton kwáh rahonhatsíwa ahaiénhase nononsatokénti tsewakwékon tsi niwatkathotserí꞉io—iáh thènen tekahetkénton iáh ó꞉ni tekanikonraksáton, kwáh iáh thènen tehiorákware iáh ó꞉ni tatehionitsʼtsiákon tóhkaʼ ó꞉ni ne thènen ne iáh tahontakaiérike.

²⁸ Ne ronnónkwe tehiothonhontióʼon nasakothinorónkwaʼke ne rohthiniátkons kwáh tsi nihathinorónkwa ne rathiʼhierónkes. Ne rónkwe tóhkaʼ sakonorónkwa ne teníteron ratatenorónkwa kíʼ. (

²⁹ Kwáh iáh nonwénton tsiʼnhítion thetewásons ne tewahiéronke. Khék, tewanóntens, tánon thetewásnie, kwáh tsi ní꞉ioht ne Kerístos tsi naʼtehariwásniense nononsatokénti;

³⁰ asèken tewakwékon ne rahiéronke.)

³¹ Kwáh tsi niwáton noriwathokénti, “Ne aorí꞉wa ne rón꞉kwe ʼnenshakotiaʼtonhtáhkwahse ne roʼníha tánon ne roʼnisténha tánon ró꞉ne enhateraʼnentákten, ne tenihiáse skaieróntat khók ienhiáton.”

³² Kwáh tsi tehionótens tsi nikariwashéton noriwihioʼónwe tsi niwakróris kí꞉ken oriwathokénti, tsi niwakenikonraiéntas kí꞉ken owenʼnasónha neh rohtharákwen ne Kerístos tánon nononsathokénti.

³³ Tánon í꞉se kíʼ ó꞉ni satarákwa: kwáh tsi niateháti ne rothiniákʼkons ronateriwaiénʼni nasakothinorónkwake ne rohthiniákʼkon kwáh tsi nihonthatenorónkwa, tánon kwáh tsi niaʼtekónthi ne iothiniákʼkon ionateriwaiénʼni nahonwathikweniénsthake ne iothiniákʼkon.