Ephesians 4 - Ohiatonhseratokénti

Tsi Nateʼionatatienawákon Noierónta

¹ Kwaretsárons, káti—í꞉i ne keʼnhóton neh tsi Roiá꞉ner rihiótense: thóh tiónʼnhek tsi nateiotonhontióʼon tsi nithotáthnon ne Rawenni꞉io neh shatsisewánha꞉ne.

² Tóhsa sewatatonníhek, tasewariwaiérik, tánon sewanikonkátstek. Sewénest ne sewanoronkwátsera ne tsi ietʼtsiʼiatenikonriʼióston nakorénsons.

³ Iatesewatátʼtsahat sewanónstat tsi sakaríwa íken neh tsi nithetsisewáwis ne Rawenni꞉io tsi nikéntons ne skénnen tsi nisewawenónni.

⁴ Énskat khók noierónta ó꞉ni énskat khók nonikónra, kwáh nesáka énskat khók naskanéktsera ne tsi ní꞉ioht ne Rawenni꞉io tsi ietsisewanáton.

⁵ Saiátak khók ne Roiá꞉ner, énskak khók ne tewetákwen, énskak khók natenekwahéston;

⁶ saiátak khók ne Rawenni꞉io tánon akwékon neh Ronwaníha nonkwesónha, rahónhak ne akwékon tiesakoiánere, kwáh rathikwékon sakoioténstha, tánon kwáh rathikwékon tsi skát꞉ne íken.

⁷ Kwáh tsi tewaiatátʼtion kathokenstánion tsi ionkwaienáʼon tsi niʼtesonkwáwi ne Kerístos.

⁸ Tsi niwáton nohiatonseratokénti, “Ne sonsahatharátate, roʼnhatiokowánen ne rathiʼnhótonkwe iasakoiaténhawe; iathékon wasakowíʼon nonkwesónha.”

⁹ Ónen, nahóten kéntons, “sonsahatharátate”? Ne kénthons tahatiérente thóh nónwe wárawe tsi nón neh kwáh ehtáke íken tsi ionwentsiáte.

¹⁰ Ne káti tsi nikáien ne thotsnénton kwáh kíʼ neh sahahiáta ne shotʼtaratháton, neh꞉ne éhneken tánon neh ihsehʼnhokwátis nakaronhiátis, neh ahkananókthon tsi nihotenésthon.

¹¹ Rahónha wáhi iatékon tsi ní꞉ioht tsi sakoiatarakwenháton nonkwesónha; ótiakes natiriwakarenieseke, ótiakes niahatiriwakénseke, ótiakhes tahonteriwaré꞉niate, ótiakhes rathitsihénstatsis tánon ó꞉ni sakothiriʼhonniénnis.

¹² Neh aoríwa thoʼnaháiere ne tsi ahsakoweienéntaʼne ne Rawenni꞉io rahonkwetaʼsónhas nahothiʼióten ne kariwiʼióston kahioténseras, ehnahontáwe nakasátsʼtenʼne ne Kerístos rahononsatokénti.

¹³ Tánon káti tewakwékon entewateróhroke nethóʼnon tsi sahonkwaríwa íken tsi ní tionkwetákwen ó꞉ni tsi tsitewanikonraiéntas ne Rawenni꞉io Roiénha; kwáh káti entewathonkwetísa, iéntewawe kwáh tsi nihanenhiésonʼne ne Kerístos.

¹⁴ Etʼthó꞉ne ónen iáh ieksáha tahonsahionkwatenathónkwen, neh ahionkwahiatenhawíson tsi ionontakwaronthónties tánon tsi níkon neh tahonsakawerakarathéni sók áreh ne iahionkwaiaténhawe neh tsi niʼietʼthirihonniénnis ne rathinikonrátha, tsi wasakothihéntense nakorénsons neh netahonterientawenrhéstakwe tsi nahoténsons rothisahánion

¹⁵ Khèkok, tsi neh ionkwatʼroriáhthon ne kariwakwarishióntsera neh꞉ne kanoronkwátshera, ónenk tsi thóh nónwe nen tewatehiáron rahonháke ne Kerístos, neh tsi rahónha nohnóntsi.

¹⁶ Tsi rahónha thoniarótaron akwékon tsi natekontʼtihánions noierónta kwáh íken tsi tkariwaiéri tsi natekakʼkhánion, tánon ne oierontakwékon tsi níkon teiostóntere tsi tehionatatienawákon tsi nikasahánion. Neh káti nónen neh skátʼtion tsi ní꞉ioht tsi enhiotiʼióten tsi natehiothonwentióʼon, kwáh oierontakwékon tsi enwateiáron ó꞉ni enwatathónnien ne entkáhawe ne kanoronkwátshera.

Náse Aiakónnheke Rahonháke Ne Kerístos

¹⁷ Rahosénʼnakon ne Roiá꞉ner, nekáti wahkwaretiáron; tóhsa iasewathasónteren ne thoʼní꞉ioht tsi atsionnheke tsi ní꞉ioht ne iáh tethonethákwen, ne rahonahnionthonnióntsera iáh thènen tesástha.

¹⁸ Tánon tetʼthonihnikonráhkaras. Kwáh iáh thènen teʼonsterístha tsi ní꞉ioht ne Rawenni꞉io tsi tesakówis tsi ahonʼnónʼnheke, kwáh rathirakonróhnon ó꞉ni rohthinontsisthaníron.

¹⁹ Kwáh ónen iáh thènen thesontstherístha ne thènen ahonsahonthehénseke; nek rathihiathonthákwen naskenʼnhátseras tánon nek khók rothihióte tsi nahoténsons ne iáh tehiotkwéniens kwáh iáh thènen tateshothitástha.

²⁰ Kwáh iáh thènen thoʼtèhiot tsi sewariwaientheráʼon ne Kerístos rahonháke!

²¹ Kwáh orihrihiohónwe tsi entsisewariwarónken, tánon ó꞉ni neh rahotiókwa kènʼne ietʼtsiriʼonniénʼni ne rahoriwakwarishióntsera ne Ié꞉sos.

²² Kwáh kíʼ iasewárek ne sewaweienʼnakáhion, tsi ne iónʼnis ne séhkon thoʼní꞉ioht tsi ahisehʼtsiónnheke—neh oweienʼnakáion tsi wahthónton neh tsi nikanikonráhthakwe nahoskanéktseras.

²³ Ne seweriánes ó꞉ni ne sewanikónras kwáh ioteriwíson ónenk tsi kwáh á꞉se entionníhake,

²⁴ Tánon ónenk tsi kwáh á꞉se ensesáton, neh tsi thoʼní꞉ioht tsi tkáson kwáh Rawenni꞉io teskaieróntare ó꞉ni ahónha wenéstha ne kwáh oriwíhio íken natónnhets ne tsi tkariwaiéri ó꞉ni iothokénti.

²⁵ Iáh ónen nohnówen, nekáti! Kwáh tsi sewahiatátʼtions ónenk tsi tensewatatróri ne ronatsiakhésons tsi nithonethákwen, neh tsi akwékon thó꞉non nitewaiáthare ne rahoiéronke ne Kerístos. Iáh káti ónen thènen nohnówen! Kwáh tsi sewaiatátʼtion ónenk tsi neh꞉ne oriwí꞉io enientʼtsiróri nakorénson ne thonethákwen, neh tsi akwékon skát꞉ne nón nitewaiátare ne rahononsatokentíke ne Kerístos.

²⁶ Tóhkaʼ ensatenakwatserónnien, tóhsa satʼthóntat ne saʼnhakwátsera iahisahsárine ne kariwanerahatʼtseráke, tánon tóhsa kontatiekówa ahisanakwéhen.

²⁷ Tóhsa tsiatesénnon ne ótkon.

²⁸ Tóhkaʼ senenskwáskwe, ónenk tsi ensátkaʼwe tánon tasatásawen satehʼnhatserónni, ehnahontáwe kwáh ioiánere tsi asathathonʼnhakéna ó꞉ni naskwéni aseiénawase ne iakóten.

²⁹ Tóhsa ne íhsas nowénna naiakonikonráksate, nók nek khók nowénna ne iakonikonrahnírats, tsi nikáien ne iakokétskwas ó꞉ni tsakówis nahóten tehiothonwentióʼon, neh káti tsi nahóten ensíron eniakohiénawase tsi niháti nen iesatʼthóntene.

³⁰ Tánon tóhsa tsiónʼnien ne Rawenni꞉io Raonikonratokénti nahonikonráksen; Asèken rahonháke ne Ronikonratokénti nón ne Rawenni꞉io roieronnístʼthon níse tsi rahónha rahonkwéta, neh kariwanírats tsi ienwatenniseríhewe ne Rawenni꞉io tsi enshanerénsi.

³¹ Sahtsiakwarísi tsi nahoténsons ne iotakwáswat, ateriatikhónsera, ó꞉ni kanakwásersa. Tóhsa ónen tahonsesahénrete tóhkaʼ ó꞉ni asenikonrakaréwate, tóhsa ó꞉ni aseswénseke ne kwak tsi nahontahiotieráton.

³² Kék, tasariwaiérik ó꞉ni seriasihióhak tsi naʼtesewátere, tánon ó꞉ni tonsasewatatenikónrens, tsi ní꞉ioht ne Rawenni꞉io tsi sianikónrense thóh rahonháke ne Kerístos.