Ephesians 3 - Ohiatonhseratokénti

Ne Kór Rahohioténsera Ne Kariwiʼiosthóntsera Tsi Nòkwa Ne Iáh Tehathisitaherónons

¹ Neh kí꞉ken iorihonníʼon í꞉i, Kór, kenhóton neh tsi Ié꞉sos Kerístos rihiótense níse sewariwáke ne iáh tesewasitaherónons, sewaterénʼnaien rahonháke ne Rawení꞉io.

² Oriwihioʼónwe tsi sewariwarónken thóhʼnon rahotenretserákon ne Rawení꞉io thakáwi kí꞉ken kahioténsera nahontióten níse ahisewahianerásten.

³ Rawení꞉io rahotáshon ne ioteriwaséton tsi nihothenikonrónʼni ó꞉ni wahakónʼnien nahokatheriéntarane. (Nihiónsʼsha wakʼkhiáthon kí꞉ken.

⁴ Tóhkaʼ ensehwenʼnaʼnhóten tsi nahóten wakʼkhiáthon, enskwéni nasatéweienste tsi nih ní꞉ioht tsi wakenikonraiénthas tsi nihorihothashónkwen ne Kerístos.)

⁵ Tsi nihtiothohestánion nonkwesónhas iáh tehonwathiróri kí꞉ken ioteriwashéton, nók kí Rawenni꞉io rorihotáshon tsi niehóha ne Ronikonriʼióston ronkonháke ne rothiʼhiatathokénti ne rathikwekónne ó꞉ni ne iehathiriwákens.

⁶ Ne kariwaséton nètho kariwíʼios, iokwénion thetsaron ne iáh thehathisitaerónons ó꞉ni ne Sitaeró꞉nons nahathiʼiéna ne Rawenni꞉io rahohiathateríhtsera; rahthikwékon neh sakaierónta nónwe nihathihiátare tánon satehonáwenk tsi nihorahráston ne Rawenni꞉io tsi tehahonkóton rahonháke ne Kerístos Ié꞉sos.

⁷ Hionʼkeríhonte tsi nòkwa kí꞉ken kariwí꞉ios neh tsi nihiotkwéniens tsi tesakówis ne Rawenni꞉io, tsi thakáwi teiahonkóton tsi niʼiohiótens ne rahosatsténsera.

⁸ Í꞉i tshiahonhá꞉a kén nitká꞉a tsi niháti ne Rawenni꞉io rahonkwetaʼsónha; tánon kíʼ Rawenni꞉io takáwi kí꞉ken kakweniensthátsera nehne hiakehawítase neh iáh tehathisitaerónons ne kariwí꞉ios tsi niwatʼrhoriátha iáh tsehiótokʼte ne Kerístos rahohiathanerakwátsera,

⁹ tánon nonkwetakwékon ahiakawenéstʼten tsi ní꞉ioht tsi ahkahioténston ne ioteriwaséton tsi nihotenikonrónni ne Rawenni꞉io. Rawenni꞉io, tsi nikáien ne oriwakwékon rohsahánion, kwáh teiahonkóton rohriwasehthánionkwe tsi nitsawénon,

¹⁰ ehnahontáwe nónwa nikaháwi, neh tsi ionterenʼnaientákwa neh ahkarihónni neh rathironhiakerónons nahontéweienste kí꞉ken, tsi nihatʼthóka ne Rawenni꞉io neh kwáh tsík nahóten ahkénhake.

¹¹ Tsi naháiere ne Rawenni꞉io neh tahioianénhawe tsi ní꞉ioht tsi thoʼtenikonrónni ne kwáh tsi tiotásawen, neh káti iahaweienéntaste rahonháke ne Kerístos Ié꞉sos Sonwaiánere

¹² Tsi tehionkwateriwasóntere ne Kerístos ó꞉ni teiahonkóton nonkwetakwéntsera rahonháke non nihionkwanikonratʼtsáni ne tsi hiahítewe ne rahohénton ne Rawenni꞉io tseʼwakwékon ne tewetákwen.

¹³ Kwaʼnekènnis, káti, tóhsa tasewanikónren ne tsi í꞉se sewariwáke tsi wakeronhiáken; asèken í꞉se ensewatʼtsennónniate.

Ne Kerístos Rahononronkwátsera

¹⁴ Neh kíʼ wakarihónni wakʼkatentʼtióten rahohénton ne Kaníhsera,

¹⁵ Kaníhsera nonʼnitewétha kwáh tsi niaʼtekawatsiráke ne karonhiáke ó꞉ni nonwentsiáke tesakówis nahiakónʼnheke.

¹⁶ Rawenniʼióke nón niwakaterénʼnaien neh tsioríhwa tsi nitʼkowánen ne rahohiataterítsera ne karonhiáke nahontatsítion ó꞉ni sewatʼtháwa ne kasatsʼténsera Asèken rahónha ne Rawenni꞉io theʼtsisewáwis ne kasatsʼténsera ne sewahnikonrakéʼsons.

¹⁷ Tánon wakaterénʼnaien ne Kerístos ne hiahatenakthónʼni ne sewerianésons taʼiahonkóton ne tewethákwen. Wakaterénʼnaien neh kwáh taiahoserénhen ó꞉ni ne ahionniáton ne kanoronkwátsera.

¹⁸ Nahónton, nahisewakwékonke ne Rawenni꞉io rahonkwetaʼsónha, nahisewasatsʼtenseraiéntake nahisewanikonraiéntaʼne tsi natewatakáron ó꞉ni tsi ní꞉ions tsi nitiótʼte ó꞉ni tsi natehionótes, neh Kerístos rahonhoronkwátsera.

¹⁹ Oriwí꞉io, tsi enwáton nahisateriéntaraʼne ne rahonhoronkwátsera—iahwerohátsien tsi kwáh iáh nonwénton thakananónhake niaʼiáwene꞉ne—neh káti kwáh iaʼtekaiérik tsi satʼtháwa ne Rawenni꞉io rahonhoronkwátsera.

²⁰ Rahonháke nónwe nitewètha ne kasatsʼténsera tsi hionkwakwenionhátie tsi niwéso hionkwahiotátie iáh sénha tahitewakwéni nísiʼnon nahitewariwanónton, tóhkaʼ ó꞉ni sénha wéso ahitewanonthónnionwe.

²¹ Rawenni꞉io ne kahiatanerakwátsera tsi kentiókwaien ne hiakoriwiʼióstons ó꞉ni rahonháke ne Kerístos Ié꞉sos kwáh tiókonte enkénhake, tsi nénwe ó꞉ni tsi nienhénwe. Ethonaiawenhne.