Ephesians 1 - Ohiatonhseratokénti

¹ Kór kí꞉ken nón nitsawénon, neh tsi éhʼthoh nithonikonróten ne Rawenni꞉io nahoteriwahnóthase ne Kerístos Ié꞉sos— Ne Rawenni꞉io rahonkweʼtashónha thóhnon ne Ephesus, neh tsi nihothiriwathóken tsi naʼtehonateriwasóntere ne Kerístos Ié꞉sos:

² Aiá꞉wens ne Rawenni꞉io sonkwaníha ó꞉ni ne Roiá꞉ner Ié꞉sos Kerístos ahtsítsion kenténrat ó꞉ni skén꞉nen.

Kariwiʼiosthóntsera Ahohiathaterítsera Rahonháke Ne Kerístos

³ Ánion thetsitewanonweráton ne Rawení꞉io ó꞉ni rahónha ne kanísera ne sonkwaiáner Ié꞉sos Kerístos! Ne tsi tehionkwateriwasóntere ne Kerístos sonkwahiatateríston neh tsi nitesonkwáʼwi noriwakwékon ne kariwiʼiostóntsera ahohiataterítsera ne karonhiáke tiohontsáte.

⁴ Séhkon ne kwáh ohénton ne sonthontonhontsiatásawen, knáha ne Rawenni꞉io shisonkwahiatarákwen ne rahónha rahonkwéta ahitewáthon thóh rahonháke ne Kerístos, neh꞉ne ahionkwahiatatokentíhake ó꞉ni kwáh iáh thènen tahionkwaníkon ne rahohénton. Ne iohrihonʼníʼon ne Rahononronkwátsera

⁵ Ónenk ne Rawenni꞉io shatehoriwaiénthase thóh rahonháke ne Ié꞉sos Kerístos tsi ensontiónʼnien ne rahónha rahoksátha aihtewáton—neh kí꞉ken ne rahotsenʼnonʼniátsera ó꞉ni tsi nihotenikonrónʼni.

⁶ Ánion theʼtsitewanonweráton ne Rawení꞉io tsi nihionerákwat ne rahoténrat, tsi kwáh iáh thènen tehiokaráien tsi nithesonkwáʼwi ne roiénha!

⁷ Neh꞉ne rahonekwénsa ne Kerístos tsi nihoronhiakénton tsi rahwenhéion ne Kerístos tionkwatatewenʼnihióʼon, ne ken ton skanikonrénhen nonkwariwaneraháktsera. Tsi nikowánen ne Rawenni꞉io rahoténrat,

⁸ Neh tsi nithesonkwáʼwi ne wéso iohthónʼon. Akwékon ne Rawení꞉io Rahothotʼkhátseras ó꞉ni tsi nihokenhenhiónʼon

⁹ Ne Rawenni꞉io thóh naháiere tsi nihothenikonrón꞉ni, tánon wasonkwathokáten ne kariwaséthon tsi knáha hiatehoriwaiéntase ne iahontésa rahonháke ne Kerístos.

¹⁰ Tsi nihotenikonríson, ne Rawení꞉io ienwatewehieiéntaʼne ne nónen kwáh entkaiérike neh naiáwen꞉ne, nehne oriwakwekon ensaróhʼroke tsi naotenson rosahanion, oriwakwekon ne karonhiáke ó꞉ni nonwentsiáke, tánon Kerístos nonóntsi íken.

¹¹ Oriwakwékon thóh niʼiawén꞉en tsi nihotenikonrónni ne Rawení꞉io ó꞉ni iatehoriwaiéntase; tánon Rawenni꞉io sonkwahiatarákwen ne rahónha rahonkwétha ahkénhake tahionkwateriwasónterake ne Kerístos ne tsioríhwa tsi rahónha ehnihotenikonrónni, neh rokenserákwen tsi nahóten hiatehoriwaiéntase neh kwáh sonthontásawen.

¹² Ánionʼkiʼ, tsi í꞉i tionkwatserénton tetsitewethákwen ne Kerístos, tethewatenonweráton ne Rawenni꞉io rahohiathanerakwátsera.

¹³ Tánon ó꞉ni Rawení꞉io rahonkwéta sewatónʼon neh nónen shesewatʼthóntene ne oriwihioʼónwe ahtheriwahnothátsera, ne kariwí꞉ios thisewahawitén꞉ni ne sewahiathakenákʼtsera. Thaʼtsisewétakwe ne Kerístos, tánon ne Rawenni꞉io wahatsíkwente neh tionhakéson tsi rahónha se rahonkwetaʼsónha ó꞉ni ne ne Ronikonriʼióston íken tsi nihorahráston.

¹⁴ Neh tsi tewakwékon ne Rawenni꞉io neh kariwanìhras tsi entewaiéna tsi nahóten sakorahréstenni ne rahonkwetaʼsónha, tánon ne kí꞉ken hionkwariwanihrátis neh Rawenni꞉io kwáh iehiokontákwen entesakáwen naʼthatewennihiótsera tsi niháti ne kwáh rahónha rahonkwetaʼsónha. Ánion tethewatenonweráton ne rahohiatanerakwátsera.

Kór Rahoterénʼnaient

¹⁵ Neh kíʼ aoríwa, tsi náhe tewakarónken tsi thetsisewethákwen ne Roiá꞉ner Ié꞉sos tánon tsi kwáh rathikwékon ietʼtsinorónkwa ne Rawenni꞉io rahonkwetaʼsónha,

¹⁶ iáh tekatʼkáwas tsi tehinonwerátons ne Rawení꞉io níse sewariwá꞉ke. Kweʼhiáras nónen wakaterénʼnaiens

¹⁷ ó꞉ni rihriwanonthónnis ne Rahoní꞉io ne Sonkwaiáner Ié꞉sos Kerístos, ne rohiathanerákwat Kaníhsera, nahontatsítion ne kanikonraienthátsera, rahónha entsitsiónnien nahisewatʼthókʼkhake ó꞉ni natsisewarihotáshiase ne Rawenni꞉io rahoriwasónha, ehnahontáwe naʼtsisewaientérahne

¹⁸ Kwahnekènʼnis sewanonthonkwenháton ne sewanikonrakésons nahisewatkátho ne rahoswatʼthétsera, nahisewateriéntaraʼne nahóten nen꞉ne neh tewetákwen tsi ietsisewanáton, thóh nihiókwas ne kahiatanerakwátsera kahiataterítseras sakorahrasténʼnis ne rahonkwetaʼsónha,

¹⁹ ó꞉ni thóh natehiotenonʼnianíthon ne rahosatsténsera tsi iohióte nontionhakéson tsi nítsion thetsitewetákwen. Kí꞉ken kasatsténsera tsi iohiotátie nontionhákes kwáh ne sáka tsi níʼioht ne kwáh tehiosastenseranónʼiani

²⁰ tsi neh rósthon shonsahokétsko ne Kerístos ne kenheʼiátʼne tánon tsi raweientethákwen nòkwati wahotskwáren ne karonhiáke nónwe tiohontsiáte.

²¹ Éhʼtho nónwe ne Kerístos rathikwékon tesakoniarótaron ne karonhiáke, rathironhiakerónons, kasatsténseras, ó꞉ni ne Rotiʼiáneres; neh rohsenʼnontákwen neh tsiahonhá꞉a tiótʼte tsi níkon ne kasénʼnas ne kén ionwentsiáte ó꞉ni nó꞉ia tsionwentsiáte.

²² Ne Rawení꞉io Kerístos rashihʼthókon nón nihokéron noriwakwékon ó꞉ni thówi nononsatokénti ne rahónha ne Roiánere ahkénhake noriwakwékons.

²³ Nononsatokénti ne neh Kerístos raierónke íken, ne tsi iehoweienʼnentáʼon ne tsi rahonhatsíwa rohiotenseríson noriwakwékon kwáh tsikʼnonwéson.